....اي اكوووو
....شنو
تردتت كلت شراح اكله انت جنت لعبه بينا وادمر كلشي
واخرب صداقته هو وشاهين
...هيلين احجي
....شاهين عندة مشاكل ويا خطيبته صار فترة يمكن
يريد يتركها ويجوز هذا السبب الي دشوفه متغير شويه
بس انت صديقه اكيد تفمه
...ماادري زين ليش كل شويه يوصيني عليج
يعني اني رجلج وهو ابن خالتج شنو
الا داعي يحجي
....انتو اصدقاء وعلاقتكم قويه اكيد هذا السبب وهو
يشوفني مثل اخته فيحب يوصيك عليه
....هيلين مااريد بعدين انصدم بشي اذا اكو شي
اذا شاهين خاطبج من قبل اي شي كوليلي
حتى هسه اكدر اتقبل منج
الكلام بس بعدين ترة مااسامحج اذا عرفت
.....شبيك كاميران
....مابيه شي اني اعرف بطريقتي
يله
بالليل امرلج
....اوكي انتظرك
سديت التلفون وكعدت
هذا شبي شسامع وهذا شاهين ليش ديوصي عليه شعليه هو بيه
اني شداسوي بروحي
اجتي امي
....لج هيلين
....ها
....اريد افتهم خالتج دازة اكل مال طبخ ليش مرجعته
هسه خابرتني دكول ليش هيلين مرجعه الاكل
....احسن
....احسن شنو
كوليلي شنو فلمج انتي شكو هم رديتي وياهم مو نخطبتي وراح تزوجين وسالفه خلصنا منها
...لا ماخلصنا زين
....تعاي كعدي اححي
....ماااحجي شي
....احجي داكلج شنو السالفه
....هاي اختج وابن اختج وبتها الحيه الصفرة
يحجون علينا ويحجون على شرفي زين
واني عرفت وماكلتلج
لان انتي مريضه وتعبانه بس مداتحملهم دمروني ودمرو حياتي ومستقبلي وكسرو كلبي ودمرو حلمي
.....شنو احجي مدافتهم شنو الي صاير
شنو دمرو حياتي شكو
.....ابن اختج اوس واخته مسوين فلم علأساس
اني عندي علاقه بااوس
...يعني علاقه تحبي
....لا علاقه جسديه
....يمه يمه اصخام بوجهي
ودكت هلى صدرها
....قبل سنه ونص اكثر شاهين رايد يخطبني ورايح عليه اوس كايله اني وهيلين عدنا علاقه وكاتب رساله مثل خط يدي ومكتوب اني من انام بحضنك ارتاح
وخله شاهين يقرأ الرساله
...يمه اصخام بوجهي لج دتحجين صدك
لو تتبلين عليهم كوليلي
....ليش اني اكذب تعرفين هاي افلام بيت اختج
وراح سائل اختج فوزيه كايلتله اي بينهم علاقه
ودينا هم كايلتله نفس الشي
وهذا يوم وذاك يوم وهما مسويني ماعندي شرف
صدكتي من جنت اكلج بيت اختج ماعدهم ضمير
وميحبونه شفتي وين وصلت بيهم الحقارة
.....ولج غبيه انتي ليش محجيتي
...شكلج وخفت عليج
....كومي بسرعه
....وين نروح
...كومي بسرعه والله لاازيد مصيبتهم مصيبه
....امي عوفيهم اني رزلت اوس وبعد ميجي ولايحجي
....كتلج كومي لبسي بسرعه
لااخلي طين براسهم
....مااروح اني خلي يولون
....اني اروح
وكامت وكفت وجرت عبايتها وطلعت
صحتها كتلها
.....انتظريني دقيقه
خفت لايصير شي بيها وهي مريضه
....بسرعه
لبست بسرعه ورحت وراها وكفت تكسي من الشارع مالتنا وصعدنا وراحت على بيت خالتي ام شاهين
كالتلها
....وين شاهين
خابري
....ليش شكو
...دخابري خلي يجي
شالت خالتي التلفون وخابرته وكال اتاخر
امي جرت التلفون من يد خالتي
....شاهين اريدك بمسأله ضروريه
كاعدة دانتظرك
وسدت التلفون وكعدنا وخالتي شكد رادت تعرف شكو امي ماحجت
كالتلها ابنج يكلج
ورا ساعه اجى شاهين
نزل يباوعلي
.....بيج شي شصار شكو
.....امي كالتله
.....لتحجي وياها حجيك ويايه
امشي نروح لبيت فوزيه
.....ليش
.....هناك تعرف
طلع كدامنا وصعدنا بالسيارة وساق وطبك باب بيت خالتي فوزيه
نزلت امي بسرعه
وراحت دكت الباب ونزلنا احنا وراها
وشويه ونفتحت الباب فتحتها دينا دخلت امي
ودخلت ورا امي وشاهين هم دخل
جانت خالتي واوس كاعدين اول مشافت
خالتي امي وكفت
...هلو
باوعتها امي وعافتها
....اوس شعندك انت ويا بنتي ها كلي
..شنو السالفه خاله
....احجي لك انت متستحي انت وهاي امك وندارت على فوزيه وعود انتي اختي موعيب عليكم ماعدكم غيرة
تحجون بشرف بنتي
ولكم تروح فدوة انتو واهلكم وعشيرتكم كلها
تروحون فدوة لبنتي
فوك متحافظون عليها انتو ولد خالتها كاعدين تاكلون بلحمنا
الله لايوفقكم
وج فوزيه انتي من هاي اللحظه لااختي ولااعرفج وبريئه منج ليوم الدين زين
تحجين على بنتي
وندارت على دينا ولج انتي صدك حيه
وتنفضين سم شلون ضميرج ينطيج وسوين هيج
خالتي كالت
....احنا ممسوين شي ومحاجين على بنتج
....كل هذا حتى بتج تاخذ شاهين
هيجي ميهمج شي ميهمج الناس الي دوسين عليهم
وجان تلتاف على شاهين
جان واكف وبس يسمع الكلام وطبعا شاهين محد يكدر يجاوز عليه
حتى لمن ندارت امي عليه وباوعتله
مجاوزت عليه بس كلتله
...احنا عدنا غنى نفس وشرف وهاي الصفات ماعدهم
واشرت على بيت اختها
بنتي مثل الثوب الابيض محد يدنسه
اني عفت عمري كله حتى اربيهم وربيتهم ولحد الان محد جاب طاريهم بكلمه وحدة
سمعتني ابن اختي عيب جان المفروض متفكر
موتحجي مجرد التفكير متفكر انو هيلين هيج اسوي
وكمشتني من يدي وجرتني وطلعنه
وشاهين ماطلع بعد
تمشينا لحد مشفنا ابو تكسي رجال جبير وكف النا
وصعدنا وصلنا للبيت
شكد فرحت لان انرد اعتباري واعتبار امي وانكشفت
اللعبه القذرة الي لاعبيها بيت خالتي
بس اول ماوصلت للبيت شفت كاميران واكف ومنتجي على السيارة وبيدة التلفون
نزلنا اني وامي
وسلمنه عليه وامي دخلت جوة
واني وكفت
كلي
....وين جنتي
....طلعت وياامي رحت لبيت خالتي
....ليش ماكلتيلي
...ليش عندك اعتراض انو اروح
....مو رجل كرسي اني
....لا موقصدي بس قصدي يعني انت اضوج اذا اطلع
....لا مااضوج بس احب اعرف وين تروحين وين تجين
وين تلفونج كم مرة دكيت
....بالبيت
....ليش التلفون يشترو حتى يبقى بالبيت لو حتى يستخدمو
....اي نسيته
بقى يباوعلي
كلي تعاي ويايه
...وين
....نفتر شويه
...خلي اكول لااهلي واجي لحظه
....يله
دخلت كتلها لاامي راح اروح ويا كاميران
ورديت طلعت جان بالسيارة
كعدت بصفه
وشغل السيارة وكام يكلب بالسيديات ويريد يفتح
اغاني وطلع اغنيه مال نانسي عجرم
.اسمها في حاجات تنحس
وكام يمشي
كلي
....شوفي اكو شغلات تنحس متنطلب ولا نكدر نفرضها
اريد احس بيج اريد احسج اريد اهتمامج انتي هسه مرتي
يعني مثلا خابريني وكوليلي حبيبي مشتاقتلك دزيلي رساله بيها حب
كعدي كدامي وخططي لحياتنا
طلبي مني نسافر طلبي مني اشتريلج شي
اي شي
كوليلي وين راح نعيش شراح نسوي
لتخليني اني اكلج كلشي وانتي دكولين ميخالف
هيلين اني حبيتج وبديت اتعلق بيج لتصدميني رجاءا
لظلين باردة ويايه اني لحد الان مكامش يدج
هيلين المشاعر متنطلب
لازم انتي عندج شعور اتجاهي حتى يكون بينا شعور
متبادل
وبعدها سكت وظل يسوق لحد ماوكف يم باب بيت
بي ترميم لان جان اكو رمل وطابوك بالباب
....كتله ليش وكفت
...هذا البيت مال ابويه تعاي ندخل نشوفه داسوي
بي شغلات كلش حلوة
خفت انزل بس ماكدرت اكله لا
نزلت وهو نزل قبلي دخل للبيت ولعب بالميزانيه مال كهرباء
وشغل الاضويه مال بيت ودخلني للبيت كلي
...دخلي
دخلت جوة وبقيت اباوع وظل يفرني بالبيت ويشوفني
وصعدني فوك
وكف بنص الغرفة
ومد يده اي
....تعاي داشوفج
رحت يمه وجان يجر يدي
....باعي
وقربني من الشباك
جان جوة مسبح والسياج الي كدام الغرفه كلش عالي
....هاي الغرفه كلش بيها خصوصيه
يعني اني مفكر اكعد بهذا البيت وتعرفين
شسوي
...شسوي
....اخلي الجربايه مالتنا هنا وهذا الي كدامنا الحايط كله اسوي زجاج
....ليش
ضحك
....حتى لمن انام على الجربايه اني وياج واكعد الصبح هذا الي كدامنا كله زجاج وانتي يمي وحتى بالليل يصير جو رومانسي
وجهي كام يذب الوان
....يله نروح اتأخر الوقت
...لا بعد وكت وانتي ويايه ليش مهتمه
جرني عليه
وصعد يدة وكام يلعب بشعري
...كلبج شيصير بي من انتي يمي يعني هسه شدتحسين
بلعت ريكي
....كتله عفيه خلي نروح
....ضحك
....من زمان عاجبني اخذ بوسه من هاي الشفايف الي تخبل كلش تجذبيني تخربطين اوضاعي كلها انتي
وجرني عليه ولزكني بي
وتقرب مني بس اني دفعته
...هاي شدسوي كاميران
.....رجع كمشني مرة ثانيه وكلي
...انتي مرتي ليش خجلانه مني المفروض هسه انتي تعيشين احساس حلو
تعاي اتقربي مني خلي احسج خلي نصير اني وياج واحد
وخله يدة على ظهري وقرب شفايفه مني وصل قريب من وجهي ودفعته قوي
وكتله بعصبيه
....كافي
رجع ليورة كلي
....شبيج شنو مشكلتج ليش اضوجين من اتقرب عليج
شنو الي بيج المفروض هسه انتي تفرحين مو سوين هيج
...ميصير
...شنو الي ميصير
ودار وجه وظل واكف وبعدها ضرب اكو قوطيه بالكاع ضربهابرجله
وكلي
....يله داوصلج
نزل من الدرج ونزلت بعدة وطول الطريق ساكت وصلني للبيت
وماسلم حتى عليه وراح
دخلت جوة للبيت وجانت بس امي كاعدة ودتخيط وعصبيه عفتها ودخلت لغرفتي
وكعدت
افكر بلي صار بس ماكدرت اتحمل انفاس كاميران
ماكدرت اتحمل قربه مني من جان يحجي مجنت اكدر احس بهذا الكلام
لحد ماتعبت من التفكير ونمت كعدت ساعه بالتسعه شفت واصلي مسج من كاميران
اليوم ساعه بالوحدة الظهر يجي ياخذني نتغده برة
كعدت اصفن مابيه حيل لشي وامي ضايجه من البارحه
بس كتلها انو راح اتغدة برة
ماهتمت
وصارت ساعه بالوحدة وجنت منتظرة اجى كاميران مبدل
ولابس قاط جوزي لونه
بس يحجي ويايه برود مو طبيعي وصلنه للمطعم
وكاميران ماقبل يطلب الاكل
كلي دانتظر احد
شويه وشفت شاهين اجى ديتمشى من بعيد
اظاهر هو ميعرف بيه اني موجودة لان وجه تغير من شافني وكاميران الى هم مكلي
يعني يريدنا نلتقي
اظاهر ديشك بشي ويريد يثبت انو بيني وبين شاهين شي
تقرب شاهين من الطاوله مالتنا وباوع وجه كلش تغير وصار عصبي وجانت حتى ابتسامته بعصبيه
.....مساء الخير
....مساء الخير صديقي
تفضل اكعد
كعد شاهين
كدامي ميباوع عليه ومسئلني شلونج
كاميران كله
.....شنو متحجي ويا هيلين
....لا ليش ماااحجي وياها
....موشفتك محجيت وياها
.....لان مبينه بخير واكيد اعرف اخبارها لان هي بت خالتي
....ومثل اختك اعرف
....مكلتلي لعد وياك هيلين اني عبالي وحدك
....اي مجان جيت وبلاشي اني اصريت عليك يله اجيت
صاير ثكيل ماتتحجه دكتور شاهين
....اي
بس شاهين اختنك كمشت كلبي اعرفه عصبي
وكاميران حسيته يريد يستفزة
كلي كاميران
....شبيج باهته
....لا مابيه شي
وتغير صوته وحجى ويايه بعصبيه
....اني بعدني ضايج منج ترة
سكتت
....وكتله
....بعدين نحجي هسه مو وكتها
....ها نشوف
....شبيك كاميران عيب ترة كاعدين بمطعم شتريد
...وانتي تعلميني العيب
شاهين كله.
....كافي عد ليش هيج دتتصرف هذا مو اسلوبك
ولترفع صوتك عليها هي موطفله كدامك
...اي مو طفله صحيح
شاف شاهين تعصب بدل كال
....اعتذر منج هيلين اسف بس اليوم جنت مضغوط شويه بالمستشفى وتعبان
.....وهي شعليها
.....وليش هيج ضجت لو اختك من صدك جان ماحترك دمك هيج
......انت زيدتها اليوم كاميران من الصبح كاعد تفتر وتحوم على شي شتريد مدافتهمك
....مااريد شي داريد استوضح بعض الامور
....وهي شنو احجي واني اجاوبك بكل صراحه وماااكذب عليك
باوعلي كاميران وسكتت
....كله لشاهين
...مو وكتها
......شوف كاميران احنا اصدقاء لظل تودي وجيب
عندك شي احجي لتختل ورا سوالفك هاي
.وكام وكف شاهين وكال
....بالعافيه واني اترخص مع السلامه وطلع
....كومي هيلين
وطلعنا من المطعم وصعدنا بالسيارة
وصلني للبيت وكلي
...اني منا لااسبوع اريدج تخلصين كل الامور الي
تخص الزواج منا لااسبوع بس
.....كاميران اذا داسكت فمعناتها داحترمك لتستغل الوضع احجي ويايه بأسلوب افضل
هوايه تحملتك اليوم زين وفتحت الباب
ونزلت وفتحت باب بيتنا ودخلت
بنفس اليوم خابرني كاميران وصالحني ومعتقد انو اني اهتم اله
كل الي صار برره هو بأنو هو يغار عليه
ولكن هو لازم ينطيني ثقه هو غلط بحقي ميصير يتعامل هيج ويايه وانو الشيطان شاطر ومن هالحجي
وجان مقرر انو اسبوع ونزوج
وبدأ يوميه يجي وينطيني فلوس او نطلع اني وياة
واشترالي ذهب وكل هذا
بس اني ماحاسه اكو شي حلو بحياتي
داشوفها ايام وماخذتني وياها بطريقها مديفرق
شنو الي راح يصير
ومر اسبوع حافل بهوايه امور ومتعب موبس
تعب جسدي انما تعب نفسي
وكل يوم ديقربني من الزواج اكثر داحس هاي السجينه الى على ركبتي ديزيد ضغطها عليه لحد ماراح تذبحني
اليوم رحت اشوف بدله عرس بيضه
رحت اني وامي وتختاريت بدله ودخلت لغرفه التكدير ولبستها جانت حلوة كلش
بس حسيتها جفني ماحسيتها بدلة عرسي
بقيت اباوع على نفسي بالمرايه
واشوف هاي البدله الي لابستها ودموعي تنزل
دخلت ام المحل كالتلي
....محتاجه شي
....لا
....ليش تبجين حبيبتي
...مابيه شي
هزت براسها
كالت
.....هوايه اجني بنات بيوم مايختارن البدله يبجن
وجانن ينزفن بغصه
يمكن بيهن الي عاشت سعيدة وبيهن الي ظلت طول عمرها تعيسه يمكن نحبس وجع كلبنا بس صعب نحبس دمعتنا طول حياتنا
حزنا وعدم سعادتنا راح يكسرنا ويخلينه ضعيفين وماعدنا القدرة بعد نتحمل
بس ماااكلج غير الله يسعدج انتي مو اول وحدة
وطلعت ودخلت امي كالتلي
...الله شكد حلوة
.....اي حلوة
...عجبتج
....اي
.....شو مفرحانه
...لافرحانه
........عيونج تبجي شلون فرحانه
...لا مابيه شي يله اريدها البدله اتفقي ويا ام المحل
.....اي
وطلعت امي ونزعت البدله ولبست ملابسي بس ظليت كامشه البدله وكاعدة واباوعها
جنت اتمنى البس الابيض بس موهيج
مو واني تعبانه من القهر
كل بنيه من اول ماتفهم تحب الفستان الابيض وتتصور يوم الي تلبسه راح تعيش يوم من الاحلام والضحكه ماراح تفاركها بس صدك هسه يله حسيت من جانو يكولون راحت بغصه عروسه وحزن جفن ابيض
هسه يله فهمت وحسيت شتحس الي تروح بلا فرحه
والي يكمشها واحد متحبه ولمسته تتحول جمرة
ردت هو يلمسني ردت هو بحضنه ينومني
ماردت البس ابيض ا ذا هو ماموجود
اليوم ضعت اني
لاتلوموني ليش كلبي ميدك الا يمه هم اكدر اكللكم ليش تتنفسون
رجعت لبيتنا وبديت الم غراض عرسي بجنطه ماراح اسوي حفله راح البس البدله البيضه ويجي من باب بيتنا ياخذنا وبيت اهله يسولي حفله بسيطه
اني الم بغراضي وامي كاعدة تباوع عليه
سديت اول جنطه ويا كل جنطه تنسد يكون ثكلها دمع
سمعنا الباب تندك رحت اني
فتحت الباب ويارتني مافتحتها
......شجابك
....كلبي الي جابني
...روح لايجي كاميران
.....صار مالي حق وتخافين من جيته
....هو احق بيه منك انت قربك مرض وجع وأهانه
شتريد
....اجيت اشوفج
...روح شاهين الله يخليك خلص اني باجر زفتي
....اعرف
.... ماراح تزوج
....لا
....اني اسف هيلين على الي صار بس اظاهر الله مكاتبنه ننجمع كلمن اخذ نصيبه من هالدنيا
هيلين منو بالباب
....ماكو احد هسه اجيت
.....راح تلبسين بدله بيضه
.....اي
.....بت خالتي لو اني الي ضيعتج لو الزمن الي ضيعنا
بس كلمن استحق الي صار
دمعتي نزلت
.....ليش تبجين
.... لان كلبي مثل بير نشف ميه
....بس ردت اشوفج واسلم عليج مااريد ابقى لان مااريد اضعف لان لو تدرين شديخطر بالي
.....شنو
ابتسم بحزن
.....لتعرفين احسن لان بهاي اللحظه بالذات داحسج بنتي ودياخذوها مني
للاسف كبرياء الانسان وغبائه شكد يأذي
بس كاميران صديقي وهو ماله ذنب تمنيت لو واحد غيرة
جانت حاربت ولو الحرب وياج دائما باردة
....الله يهنيك وتعيش مثل ماتريد
....الله يوفقج الج هم وتعيشين فرحتج
......مااعتقد لان مجبورة اعيش ويا واقع ميناسب مشاعري
.....ليش كاصه شعرج
....كاميران راد
.....كذابه كاميران ميحب الشعر الكصير اني احب الشعر الكصير
جنت حاطه شال على جتفي لونه اخضر جرة واخذة
وراح بلا مايحجي بعد ولاكلمه وصعد بسيارته
احيانا نعيش بنصف قلب
واحيانا يأخذ منا قلبنا ونعيش
بلا قلب ويموت احساسنا وتتخدر
عواطفنا ولاينبض الامل فينا
من جديد يامن سرقت
وشاحي مني
عد لي واعطني مااخذت اعطني
ماسرقت مني
اعطني فرحتي
فانا غائبه منذ ذاك اليوم
عن سماء ضحكتي
يتبع ...
#الكاتبه #روجمان
