متى تشعربي

الجزء الثالث

برغم  انو اني اعرف واقعي مختلف بس
حلمت انزف ‏ لشاهين حلمت تجمعني بي غرفه
حلمي كبر ويايه وتاليته هذا الحلم نجمع بقصاصات ورق صغار  وبس هب الهوى طارن
ومالحكت الم حلمي  و تبعثر
بس اي بقيت عمري كله احبه بيني وبين نفسي
لدرجه نعميت عن الكل وهسه
جاي يكلي اوس يحبج فتحي عينج وباعي
اهتمي بحبه
واني منو يهتم بحبي منو يطيب جرحي منو يرجعلي
حلمي منو يجيبك يمي ياشاهين منو يواسيني من اشوفك يمها
منو يوصلني لكلبك
وكلبك ساكنته غيري وعيونك متشوفني
ليش حبيتك
وكفت حياتي عليك ‏
ليش قدري خلاك بطريقي حتى بس اتعذب
حتى بس افكر بيك وبحبك حتى بس اسمع نفسي بصدري ومااسمع نفسك
ليش ركضت وحبيت واحد مثلك
يمكن موشرط الطفوله تنسرق من نتعنف
طفولتنا تنسرق
من نختار الي  مالنا بي حق من نرسم على حيطان شوارعنا
رسمه تعبر عن كبر حبنا برغم صغرنا من ناخذ
احساس اكبر من قدرتنا من نكبر ويكبر كلشي بينا
ونفكر بشخص مو ملائم
من نكبر بدنيا مو نظيفه ووجوة كذابه ومظاهر خداعه
وزيف مشاعر من يكون الحب حسب المستوى موحسب الحساس لمن رجعت لواقعي
حسيت التفكير دمرني
مااعرف شنو جان لازم اسوي شلون لازم اتصرف وياشاهين
وشلون اتصرف ويا اوس
وشلون اتاكد انو فعلا اوس يحبني
شلون راح اعرف
ماكدرت انام طلع الصبح واني كاعدة وكلبي
تعبان وداحس  نفسي بدائرةدتفتر واني بنصها
واني بعدني مدده بالفراش سمعت دكت الباب
...منوً
...اني
.....اوف هذا اوس جابه
نداريت شفت الساعه ب 8الصبح
هذا شعندة من الصبح
كمت كعدت ولبست جاكيت البجامه
وعدلت شعري لان جان مكفوش
...ادخل
فتح الباب وجان يبتسم ونظراته بيها شي
طفولي يحسسني كأنما اني طفله من يباوعلي
وهو شكله هادئ تناقض غريب بينه وبين شاهين
اوس ضعيف وشعرة جوزي وعيونه جوزيه
وعندة لحيه خفيفه وموكلش طويل وابيض
وجه كلش هادئ وشكله يحسس الانسان براحه
نفسيه من يشوفه
وعندة نظرات طفوليه
ظل يباوع عليه 
....ها اوس صباح الخير
.....صباح العسل
....شعجب هنا من الصبح
...خالتج خابرتني
...وشعجب اجيت
...مولان انتي هنا كلت على الواهس
....اها
...يله كومي لظلين كسلانه تعاي نشرب جاي بالحديقه
اعرفج تعشقين الحديقه وتحبين منظر الورد
سكتت اول مرة انتبه انو هو يعرف كلشي احبه
....اوكي هسه اجي
...دانتظرج
كمت دخلت للحمام غسلت وجهي وغيرت ملابسي
وطلعت جانت بس ماما كاعدة تحجي ويا خالتي وجان البيت مابي احد بعد كاعد
صبحت على ماما وخالتي
وطلعت للحديقه جان اوس كاعد على الميز
وخال كدامه كوبين جاي وبسكت
كعدت
وجنت ممرتاحه هالمرة  من كعدتي وياة خلتني ارتبك و اتوتر
لان هسه عرفت شلون يفكر بيه صحيح مامتأكدة
بعد بس مجرد الاحساس باانو هو يفكر هيج بيه
يخليني مااتصرف على راحتي
جريت الكوب مال جاي واخذت بسكتايه
وكمت اشرب على كيفي واكل  واوس يباوعلي
ويضحك
...شبيج هلونه
هو يدلعني من قبل هلونه بس من زمان مكايلي هذا الدلع
....شذكرك بهذا الدلع ههههه
..اني مانسيت حتى اذكر
....ها
سمعنا صوت الباب مال مطبخ نفتحت وطلع
شاهين مبدل
وراح على سيارته بالكراج شغلها ورد دخل للمطبخ جاب اوراق والجنطه
مالته ودخلها بالسيارة
وسوة نفسه مشافنه
بس هو جان يباوع بالمرايه مال سيارة
وحتى مسلم
علينه صاح الحارس الي عدهم
...رزاق افتح الباب
...اي دكتور
فتحله  الباب وساق السيارة وطلع عالسريع
....شبي شاهين حتى مسلم
جان اوس ضايج من الي صار بس ماحجه شي
.....اي عادي هو طول عمرة شايف نفسه
....تغيرت عليه وهو هم شعجب هيج
....لان بينا شي مشترك
...يعني شنو
....ماكو شي لاتهتمين
.ردت اعرف شي يريحني ويبعد التفكير باانو اوس يحبني
...اي ماكلتلي المن تحب  وحلوة لا
صفن بوجهي يمكن بالعشر دقايق ورفع كوب الجاي وشرب منه وبعدها رجعه بمكانه
.....هوايه حلوة
....امبين تحبها
....اي هوايه احبها
.....منيه
بس جنت احجي وخايفه وارجف  لايكلي انتي
....وحدة
....اعرفها ‏
.....تعرفيها اكثر مني
....احجي منو ليش تحجي الغاز اعرفك مضم عليه حاجه
....خايف
...من شنو
...من نفسي منها من الي بكلبها
روحها مو شفافه وكلبها بي بقايا
....بقايا شنو ‏
...انتي ليش مهتمه تعرفين
....فضول واني بت خالتك ومثل الاخوان احنا
....احنا مواخوان هيلين
..شنو
....اني ابن خالتج وانتي بت خالتي مواخوان احنا
...بس مثل الاخوان
...لا
....دائما جنت اكلك احنا اخوان واصدقاء ولد خاله
....اي اصدقاء ولد خاله بس اخوان لا
...شنو الفرق عندك
....هوايه فرق
تغير وضاج وكام يحجي بعصبيه بس بكوة كامش نفسه
...شبيك صرت عصبي
...مابيه شي
....اي زين
....شنو رأيج بخطوبت دينا وشاهين
وجان يدقق بملامحي ويريد يعرف مني أجابه
....واني بشنو يهم رأيى هما نخطبو والله يهنيهم
.....يعني
...يعني شنو ‏
....يعني مجاوبتيني
....جاوبتك
...مجان هذا جواب
...اني شعليه وشنو دخلي
....اي صح شعليج اني راح اكوم لان خالتي رادت شغلات مني اجيبها
....مستغربه انت تروح اجيب الغراض ليش مو شاهين او هذا الرجال الي يشتغل عدهم
او عمو محمد
...اني كتلها اجيبلج الي تريدي
او بالأحرى اجيت علمودج ‏
قصدي لان انتي موجودة كلت على واهسج ومن زمان مكاعدين سوا ولا مسولفين
ابتسمت اله
...اي صحيح مر وقت طويل
....اشوفج بعدين
واخذ سويج سيارته وطلع واني دخلت جوة وبديت
التهي  وياهم
همزين جان اوس وشاهين ماموجودين
حتى اعرف اشتغل
...هيلين
...ها دينا
...شبي اوس شو ضايج
....ماادري مجان بي شي قبل شويه
....ها
.....اي
.....راح نخطبله بت عمي تعرفين
دسمعني عود لان شافتني كاعدة وياة
....ها عالخير  الله يوفقه والله اوس وردة ويستاهل كل خير
....يوم زواجج لان كبرتي موصغيرة انتي
...الله كريم
....اي ان شاءالله وعافتني ومشت
كعدت على الميز وطلعت التلفون وجانت دتخابر
شاهين سمعتها دكله
....صباح الخير شاهين حبيبي ليش مكعدتني
ها اوكي اكو احد يمك
اي عادي يله من يصير عندك وقت خابرني
مع السلامه
وكامت تتفرفر كالعادة وكلشي مسوي كلت بكلبي والله خالتي تستاهل هيج مرت ابن
هي هاي هيج وعلى  كلبها مثل المي البارد وتحبها وتباوع عليها من تحجي
عود مكيفه بيها
صاحتني خالتي
....هيلين ‏
...ها خاله
...فدوة هيلة صعدي ‏نظفي الفوك  
اللهم مطولج ياروح هدورة صيحني هيله
ضحكت بوجهها
....اي خاله تدللين
عفت الغراض من يدي
وباوعت على دينا كتلها
....تعاي نظفي ويايه الفوك
....لا روحي انتي نظفي الفوك واني هنا اشتغل
،،،اي خطيه شلون تشتغلين،،،،
...اي براحتج
شلت شعري وسويته طوبه وكفيت رداني واخذت غراض مال تنظيف وصعدت فوك
خالتي ماعدها بس ولد اثنين وهي وزوجها
وابنها الجبير بهاء مسافر عايش باامريكا صارله
يمكن تلث سنوات فهي عايشه هي و شاهين
وزوجها
والفوك مالتهم جبير كلش
بس مامستخدمين منه بس تلث غرف وحدة مال ابنهم الي مسافر
وحدة مال شاهين
وحدة مال خالتي
بديت انظف وجنت اخاف اتقرب من غرفه شاهين ماادري ليش
ظليت اشتغل لحد ماخلصت وبقت بس غرفته
وبعد مامنها لازم انظفها
اول مرة ادخل لغرفته جنت بس اباوع عليها من بعيد
لمن فتحت الباب ريحته ماليه المكان
غرفته تشبه مختلفه كان كلشي بيها لونه ابيض
لو زيتوني ضحكت لمن شفت اللون
كانت غرفه نظاميه كلشي بمكانه الشي الوحيد الي جان
مخربط البجامه مالته جانت على الكرسي
الغرفه بيها رفوف  كلها كتب
وكتب هم على المكتبه
وكتاب على الكومدي الي يم راسه
وكتاب على الطبله الي بصف الكرسي الي يم الشباك
حاولت مااكمش شي بس شفت النفاضه مال جكاير
بيها كميه من الكطوف  رهيبه 
كلت لروحي عود هذا دكتور والمفروض يعرف خطر الجكاير ولازم ميشرب
اخذت النفاضه ونظفتها ورتبت كتبه بمكانها وجان اكو بصف الكتاب الي جان يقرا بي ورقه صغيرة
مشخبط عليها
وكاتب بخط مخربط
(((هي ليست لي )))
وكاتب
(((مامر من حياتي لها ولكن وجودي بجانبها عدم))
ضحكت بحزن اكيد هاي لـ دينا وكلت
ليش عدم هي يمك وسوالفكم وضحكم مالي الدنيا
خليت الورقه على المكتبه والتافيت شفت
شاهين واكف ومجتف ومنتجي على الباب عطت
وكع المنظف من يدي
....عزة خفت 
مضحك ولا حجة شي ظل يباوع
وعلى نفس حركته بس مد يده وخلاها على لحيته
....اني اجيت انظف الغرفه مالتك
...اي داشوف
عجبج
...شنو
....المكتوب
...اسفه مجرد فضول
تقرب مني وكف كدامي وبعدها كعد على المكتب
مالته
...اي وشنو الي وصلتيله من هذا الفضول
....ماوصلت لشي
اخذ الورقه وباوع عليها وشكها وذبها بالكاع
...مااريدج ادخلين لغرفتي
....ليش شسويت
...تعلمي لتتعدين على خصوصيات غيرج عيب
...ماسويت شي عيب
.....ليش لعد جنتي كاعدة تفتشين بااوراقي
...مافتشت
شفتها كدامي  وفوك مدانظف
الغرفه
....لتنظفيها بعد
وجان يحجي برود بحيث يخلي الواحد من الغيض والعصبيه يريد يطك
بقيت واكفه
....اي افضل اصلا اني لخاطر امي اجي هنا لان علويش اجي اساعدكم وانظفلكم
قابل نشتغل يمكم بس غير امي كلبها طيب
وتجي
...وانتي كلبج مو طيب
....لا كلبي موطيب
....هههههه هيلانه المخبله
....اني مو مخبله واسمي هيلين مو هيلانه
....بكيفي
وكام وكف وطخ بيه ولمن ديطلع من الغرفه
سمعنا صوت الدرج  واحد صعد
مشيت وكفت بنهايه الغرفه
......هيلين
.....ها اوس
شاهين جان ديطلع بس من سمع صوت اوس رجع كعد على المكتب ورفع جتافه ورفع حواجبه وغمزلي
تخبلت من سوا هيج معناته هو ديريد يضوج
اوس بشي
شنو الي يريد يوصله
هذا الدكتور الي خبلني ‏
دخل اوس وضحك لان اني جنت بزاوية الغرفه الي كدام الباب
بس شاهين باالصفحه المقابيلي لمن دخل اوس مشافه
ل شاهين
بس لمن انتبه على شاهين تخبل عيونه تغيرت وحسيت
عبالك تحولت لعيون حيوان مفترس
اما شاهين جان كاعد يبتسم بمكر ونظرات عيونه
بيها استهزاء
....هيلين
....نعم
....امج تريدج جانت دصيحج
....اي جيت
...شو ماسمعتها اني ولا هيلين سمعتها دصيحها
او يجوز جنا ملتهين بالكلام ماسمعنا
.....كلتلي الي
...ها يعني مصاحت
.....دكتور شاهين جابك للبيت ماعندك دوام
...لا ماعندي اليوم
....اي زين حتى نكعد وياك شويه
....ماعندي وقت اسف يااوس
اوس يفتح ويسد بيدة وشاهين بارد
بس برغم هذا حسيت هذا غطاء لان مامعقوله هلكد عندة
برود
يمكن جان بس ديحاول يستفز اوس
وفعلا نجح لان اوس جان باقيله شويه وينفجر
كام شاهين ونزع السترة وشمرها على الجربايه وكام يفتح بالقميص ودار وجه عليه
...راح تبقين
....ها لالا راح اطلع
اخذت الغراض وطلعت بسرعه بحيث ضربت اوس
من الاستعجال
...اسفه
...مصار شي
ونزلت من الدرج ولحد نصه ورجعت درجايتين
وباوعت جان اوس بعدة واكف باب الغرفه وشاهين ممبين
رديت كملت نزلتي
وجنت دارجف
وشافتني ماما
كالتلي
...شبيج شو وجهج اصفر
...مابيه شي
...لازم اوديج للدكتور لان وجهج هاي الايام اصفر واحسج منعوشه
خالتي كالت
....هسه اخلي شاهين يوديها لكاميران
...اي والله ياريت
جنت ساكته وبالي مويمهم
وعيني على الدرج
وبعد مايقارب عشر دقايق اكثر
نزل اوس ومادخل للمطبخ وطلع من باب الصاله
وبعدين نزل شاهين
ومجان مبين على ملامحه اي شي
باوعلي
ودار وجه عني
وراح دخل للصاله وشافته دينا ولحكته
واني بقيت واكفه بمكاني
وصاحتني خالتي
.....هيلين
....ها خاله
.. فدوة مجيبين تلفوني داخابر ابو شاهين
اشوف الناس شوكت يجون
..وين التلفون
....يمكن بالصاله
...اي
رحت ووصلت  يم باب الصاله جانت مفتوحه شويه
باوعت شاهين كاعد ودينا كاعدة بصفه وخاله يدها على جتفه وهو يباوع عليها
كمشت كلبي لان حسيته نخمط
وغمضت عيني
وكمشتني البجيه مشيت بسرعه وطلعت برة وكفت ورا باب المخزن الي برة
وكمت ابجي بدون صوت
جنت احس بالشهكه بس ماكدرت اشهك
حتى دمعي خفت منه
شفت طابوكه بالكاع كعدت عليها
وكمت امسح بدموعي
ياالله لتخليني انذل ياربي لاتكسرني
ياربي كلبي ديدكطع موبيدي
ياربي قويني اني تعبانه
فجأة شفت احد دنك وكعد يمي على الكاع
جان اوس
عيونه تلمع
...شبيج
جنت اريد احجي اريد اكول الي بكلبي
....ضايجه مخنوكه يااوس
....ليش
....مااعرف
....لاتعرفين
....اني تعبانه وكلبي صاير مثل البركان
...ياالله شنو الي بيدي اسوي الج كوليلي والله اسوي بس لااشوفج حزينه انتي كسرتج
ودمعتج والآه  الي دكوليها بكلبي كوليلي
شيطلع بيدي اسوي الج
حتى لااشوفج هيج
كمت ابجي حسيت بالضعف ماتحملت ماكدرت اكمش نفسي ‏
...لتبجين هيلين والله مااتحمل اشوفج هيج
كوليلي بت خالتي وصديقة طفولتي شكدر اسويلج
اني وياج عاجز اني وياج ساكن وماخذ الصمت ملجئ
....لتهتم ماكوشي بس محتصرة
وكلبي وجعني  
.....علمودة
بلعت شهكتي
..علمود منو
....اوف اوف وميت اوف بكلبي وميت آة وآة
كام وكف ومد يدة الي
وكمشت يده وكمت وكفت
....مسحي دموعج لج والله محد يسوة دمعه من عينج
لعيونج الدنيا كلها تهون
ضحكت
...تعرف اني شكد ارتاح من انت موجود لان دائما تفهمني
...واني موجود لعيونج بت خالتي
....تسلم عيونك اوس
...اني احس بيج بلاماتحجين
...خجلت احجي شي يمكن خجلت من تصرفي
من دموعي خجلت لان اعرف مشاعر اوس
اتجاهي وماهتميت بيها
اهتميت بس بنفسي
خجلت من اهتمامه بيه وكلماته الي
...يله خلي ندخل
دخلت جوة ورحت للصاله ودكيت الباب
..ادخل
دخلت بدون مااحجي ولااباوع
اخذت التلفون وطلعت
واوس كاعد على الدرج وحسيت اوس بهاي الكم  يوم
كبران عبالك  وتعبان
وحاولت اضيع  الوقت بس اشتغل بحيث هلكت
واجوي  الخطار وجانو شيوخ ولدهم مجان اكو وياهم نساء واطفال
وجانو هوايه
وشاهين دخل جوة واوس هم
وصبينا  غدة  ومرت العزيمه ومرت النظرات الناريه الي بين شاهين و اوس على خير وايضا
نظرات الاتهام الي بعيون دينا الي مااعرف شنو السبب
الي يخليها هيج تباوعلي بس هاي اني اعرفها
دور  مشاكل وتغار حتى  من نفسها
ولمن خلص هذا اليوم جنت منتهيه حتى مااكدر افكر بشي
بس التعب لازم يتبعه تفكير ومهما تعب جسدنا يبقى عقلنا وقلبنا يتعبنا اكثر
كل هالسنين المرت ماكان اكو قصه بحياتي غير حبي الصامت ولكن  فجأة ‏باليلة
ويوم صارت عندي قصه ومااعرف وين راح تنتهي
يتبع....
#الكاتبه #روجمان