حلو شعور الانتصار والقوة ليش اني ظليت ضعيفه ليش محاولت اتغير كل هاي الفترة الي فاتت
ليش انطيتهم الفرصه يباوعولي بعين الصغيرة
لمن دخلت جوة وغيرت ملابسي
وطلعت كعدت ويااهلي بس كعدتنا صارت باردة لان همنا كبر
وايمان روحتها وشعورنا باانو عبالك ضحينه بيها
جان موت الفرحه
بينه
صاحتني امي كالتلي
....هيلين تعاي
ودخلت كدامي للغرفه وبيدها الايت
.....هاامي شكو
...تعاي بنتي كعدي عندي سالفه وياج
كعدت
...اي شكو
....سمعتي خالتج شدتحجي وشكالت
على الدكتور كاميران
...اي سمعت
....وشكلتي.
.....ماكالت شي ولا فكرت بالموضوع لان ماازوج اصلا
واني كتلج من قبل
...قصدج لو هو لولا اختج هم ياحسرت كلبي راحت
وزوجت بلا فرحه بس عايشه
زوجي يابنتي وين نلكي هيج قسمه لو عيونه متباوع الا الي ميهتم بينه
وبالنسبه الي مااخليج تزوجين واحد من ولد خواتي مع اعتقادي انو شاهين يحبج هوايه واوس هم
بس موكل قصص حبنا تنتهي بزواج
....اني ميهمني اوس يحبني لولا
....اعرف بس الي يهمج موالج واحنا ماناخذ حاجه مومالتنا
وهسه اجتج فرصه تعيشين حياة تزوجين انسان
مثقف ودكتور وابن عائله
طلعي يابنتي من هالقوقعه الي حابسه نفسج بيها
وزوجي وعيشي وجبيلج طفل يملي دنيتج انتي دتكبرين
صح انتي حلو
بس العمر من يفوت يروح الجمال وتبقى الحياة الي سويتها لنفسج
.....وانتو شلون تعيشون اذا فكرت ازوج
....النا رب كريم
واني ارجع اخيط الحمدلله صرت زينه واخوج علاوي ديشتغل وماعندة بعد شي حملنه خفيف راح يصير
اني وابوج وهمين اخويه حمزة كلي راح ابدي ابيع العمارة هاي القديمه الي بالشورجه بلكي يطلعلي منه
ارتب وضعي
....صارله جم سنه اخوج محتكرها وهو ياخذ اجارتها
...اي ميخالف حجيت وياة كلي راح ابيع وانطيج حصتج
بلكي الله هم افتح يجوز فد محل لااخوج
....الله كريم
....هسه شكلتي
...ماادري بس مااريد
......هاي فرصه لاعبالج راح تتكرر واكع بيدج دكتور
...ليش شبيه
......مابيج شي بس لاعبالج الدنيا بس الج هي فرص بحياة الانسان لو يستغلها لو تروح بعد وماتتعوض ابد
فكري زين حتى ارتب الوضع ويا خالتج
....علاقتج هم رجعت بخواتج مثل الاول
....الدم ميصير مي بنتي
......اي
.....شوفي وين توصلين لااي قرار وكوليلي
....ماادري
....تعرفين يابنتي انتي نغريتي لان شفتيهم اثنينهم يريدوج
ومتخبلين علمودج بس هذوله يحبوج
لان كبرتي كدامهم ولان ولد خالتج
بس الرجال الي مايعرفج يجي يخطبج مارضتي ميهتملج
وفرصج تبدي تقل كلما دتتقدمين بالعمر
سكتت وماجنت اعرف شجاوب ماادري اذا كلامها
صحيح او لا
وللحظه وحدة حسيت نفسي امام اختيارين
اما اوس الي كلي شاهين اعتبري حاله انسانيه
اما كاميران الدكتور
معقوله اني كمت فعلا احس بالغرور لان عرفت اوس يحبني
وعرفت بشاهين يحبني
حسيت بينهم تنافس علمودي فنغريت اكثر
خايفه من كلشي خايفه من القرار الي راح اخذة
وداحس نفسي مجبورة اخطي خطوة بلكي
اكدر امشي واعيش حياة طبيعيه
بس شلون وشاهين معقوله اكدر اعيش وهو ماموجود بحياتي واعيش واني ممنوعه من انو حتى افكر بي
خليت راسي على المخدة وتغطيت ردت مو ادفء ردت الكي أمان
بعدني كلما ضاكت الدنيا بيه وزاد تفكيري اتخيله ويايه
اتخيل وجودة حواليه
من خليت راسي على المخدة وغمضت عيني تخيليت شاهين يمي وديلعب بشعري
وعلى وجه احلى ابتسامه شفتها بحياتي
حسيت بلمسته على خدي بس حسيتها بخيالي
وخيالي
خلاني اشعرها حقيقه
تمنيت هو صدك هسه يمي واحضنه واخذ من كل نفس
منه اخذ عمر
تمنيت المس شفايفه من تضحك
ردت نظرات عيونه تلاحكني
بس فتحت عيني ورجعت لواقعي وعرفت انو اني ظليت اتخيل شاهين لمدة طويله كلش
واخاف بعدين اتخبل من تخيلاتي
يمكن اجى الوكت الي اقرر قرار واحد وبعد مامنه رده
اقرر
قرار
يخليني ابتعد عنه
يمكن كلام امي صحيح
وكلام خالتي شتريد اكثر من هيج قسمه هم صح
خلص وكتك ياشاهين
لازم التفت لحياتي بس مداكدر اوعد نفسي بشي
نمت وجنت داخل حلم او كابوس مومهم كلهم عندي صارن.
سواسيه
جان نومي قلق وكل شويه انام واكعد
لحد ماطلع الصبح وصاحني علي
وراد ريوك لان كال لكيت شغل
عند ابو مطعم
كلت الحمدلله هذا هم يساعد اهلي اكثر
كمت سويت ريوك والتهيت بالبيت
ولكن جانت امي ماموجودة
ولمن رجعت جانت جايبه مكينه مال خياطه
...الله يساعدج هاي منين
...اخذت من ام أسعد علما تنباع العمارة وانطيها
الفلوس
....اي زين الله يفتحها بوجهنا ويرزقنا
....ان شاءالله وعلاوي هم ديشتغل
بس هلااسبوع ابقي من اسبوع الجاي يرجع للمدرسه ويبقى بس العصر يشتغل بهذا المحل الي هنا على الاقل يشيل نفسه
...ان شاءالله
...شكلتي ياماما فكرتي بالموضوع مال كاميران
....اي ميخالف
ضحكت امي.
....صدك والله اي الله يتممها على خير
اروح اخابر خالتج نشوف شلون نرتب الوضع
....امي ترة رجل خالتي مات مصارله كم يوم واوس مريض
عيب من العالم انتو كاعدين دورون زواج
....لا بنتي قابل راح نسوي حفله بس كلام بينا
واكيد المرة تجي تشوفج
....بكيفج سوي الي تريدي
ودخلت كعدت يم الصوبه
وصافنه ويدي مااخذت شغل ولاكمت بعد
وسمعت امي صيح
....علاوي تعال انطيني التلفون اخابر
وجاب علي التلفون واخذته امي ودخلت
للغرفه
كلت لنفسي يله هي هاي الدنيا اشو مثل ماطبيت منها مثل ماراح اطلع منها عادي شنو
شراح يصير حالي حال اختي قابل حظي راح يصير احسن منها
رحت كعدت يم ابويه كلي
........شكو بنتي شو امج كالتلي بس مافتهمت هالكد
.....اي بابا عود اسئلها ولدوخ نفسك انت كلشي يمشي على خير
....ياربي لو ماخذ امانتي ولا حاطني هيج
....اسم الله عليك
....لعد هاي حاله اني عاجز مابيدي شي
....الله كريم بابا
....هيلين
....ها
....تعاي
رحتلها
....ها
....خابرت خالتج دكول اليوم العصر تعالو وهي دكول اخابر اتفق ويا ام الولد علااساس هيجي روحه عدهم
بحجه تاخذ من خاطري المرة
....استغفرالله وهي وين تعرفج ولعد هي مشايفتني
...لاشايفتج مرة من زمان بس لازم تشوفج مرة ثانيه وهو كاميران كايللها عليج
.....والله عيب عدنا مصيبه وكاعدين انتي واختج اسون زواجه
....انتي معليج العيب علينا
وثاني شي هو رجال جبير زوج فوزيه وراح الله يرحمه واوس الحمدلله صار زين
وخالتج فوزيه راح تقدر من اكللها واحنا ماراح نسوي شي هيج مجرد يشوفوج
وانتي تحضري العصر
ولبسي لبس زين اذا عندج ولتلبسين شي بي لون
...اوفً
رحت لغرفتي وماقبلت اتغدى
وجنت اسمع امي كل شويه اصيح علاوي
وعلاوي اظاهر اتخابر بتلفونه
.اجتني ساعه ب4العصر
...هاي شنو بعدج يابنتي كومي بدلي
...اي هسه البس
...شراح تلبسين
...اي شي
فرت بيدها وراحت على الكنتور مالتي
وطلعت نفنوف اسود اشترته ايمان
بوقتها سودة عليه اشترتلي ملابس وانطتنا من فلوس الجهاز مالتها
شكد مشتاقتلها وكلبي يمها
...تعاي شوفي هذا الله شكد حلوو
هذا مال ايمان
....اي لبسي لونه اسود وحلو
.....شبيج امي تريدين بس تزوجيني وتخلصين مني
.....اني اريد اخلص منج لو اريد افرح بيج
واشوفج سعيدة ومرتاحه وكاعدة بيت وعندج اطفال
هاي كظيت عمري كله اركض علمودكم هذا جزاتكم الي
صرت اريد اخلص منكم الحمدلله والشكر
اذا هيج اني صرت
....ميخالف امي راح البسه
عافتني وطلعت
باوعت على النفنوف جان اسود اطويل ويصير من هذا المقسم
وبي ليلك بيجي وبي احزام جوزي عريض
اوف والله ضايجه نفسي شنو الي داسوي بروحي اني المن دارضي امي لو دارضي نفسي
يله وين متوصل خلي توصل
بدلت ولبست حذاء فلات لان طولي زين ميحتاجلي حذاء عالي
ومشطت شعري وفتحته وعندي قراصه مثل الوردة خليتها بشعري صفح
وخليت مكياج بس كلش خفيف عبالك محاطه
وطلعت لاامي
....يله كملت
ظلت صافنه عليه
...الله يحميج من عين الحاسد
...يله ماما خلي نروح ونرجع من وكت خلي نخلص
.....شوفي وجهج شلون مكلوب شنو رايحه لفاتحه
بنتي صيري طبيعيه
....ميخالف
....انتظري هسه يجيب علي تكسي لان مومال اطلعين هيج
وتتوصخ ملابسج
كعدت انتظر علي
لحد مااجى وكال يله
وطلعنا وكعدنا بالتاكسي
هدورة السايق مال تكسي شافني كام كل شويه ويلوف الجامه عليه واني روحي طافرة
وكام يحجي وياامي بس خطيه طلع مثل الاخرس يحجي بس يئتئت
ضحكت مو عليه على حظي هدورة هذا نعجب بيه
هههههه
وامي تباوعلي وتضحك
الحمدلله وصلنا بخير
نزلت بيت خالتي برغم جنت محابه ادخل هنا ابد
بس شسوي الدنيا تفتر وتفتر وجيبني يمهم مرة ثانيه
دخلنا جانت سيارة زوج خالتي بس
وخالتي جانت بالمطبخ
دتحضر فناجين
اول مادخلنا باوعتلي
،.....ماشاءالله شنو هالجمال شطالعه
...اشكرج
ورحت وكعدت وبعد ماتحركت من مكاني لحد ماسمعنا صوت الجرس
كالتلي امي
.....روحي فتحي باب الصاله وتعاي يسرعه
رحت فتحت باب الصاله
واجيت وخالتي بدت تسلم عليهم وتحجي وياهم ودخلتهم جوة
واني رجعت كعدت بعدم اهتمام ولاعبالك اجاين عليه
معقوله الانسان كلبه يريد شي وعقله يريد شي
وبعدين ميسوي ولا وحدة منهن غير الي الله رايدة
زين ليش من نختار شي منقرر بعد انو خلص لازم نسوي
باوعت امي دخلت جوة
وردت طلعت صبت الكهوة بالفناجين
....هيلين
...نعم
....كومي دخلي الكهوة
....هسه الا اني خاف توكع من يدي
كومي زين جيبي المي اني اقدم الكهوة شيلي المي وامشي ورايه
...اوف كمت
دخلت ورا امي وجان الدكتور كاميران وامه بس
من دخلت صارت عيني عليه ودرت وجهي
وخليت المي على الطبله وسلمت على امه وكمشتني وبوستني كومه وبعدها
رحت كعدت بصف امي وكاميران ماشال عينه بس يباوعلي
واني مدنكه لو اباوع على امه لو على خالتي لو امي
وجان كلام اعتيادي
ماذكرو شي بس شويه وسمعنا صوت الباب مال مطبخ نفتحت ونسدت
خالتي كالت.
....هذا شاهين اجى
بس وجهها تغير مبين ميعرف
وشويه وجان تنفتح الباب ودخل شاهين
وكال
....السلام وعليكم
واجى وسلم على كاميران وحجى وياام كاميران وباس امي من راسها
وكعد كدامي
بس وجه ميتفسر الي يشوف نطراته يكول الله اليستر
منه
وكل شويه ومغير كعدته وكام نزع السترة مالته
وخلاها ورا وكف رداناته
وكل شويه ويكمش لحيته لو يخلي يده على شعره ويرجعها ليوره
ولحد ماكامو الناس حسيت شاهين تخبل
وعيونه تخوف
وحركاته ادل على انو عبالك راح ينفجر
واني خفت صراحه وجانت يدي على كلبي لايسوي شي كدام العالم ونظراته لكاميران
خطيرة بس جان يجامله ويبتسم بوجه
ومن كامو الناس وطلعو وطلعت خالتي وامي وراهم
وهو سد الباب مال خشب الي اطل على الحديقه
ودامشي وجان يجي يوكف كدامي
.....شدسوين كوليلي
....انت مالك حق تدخل بحياتي
راح وجان يسد الباب مال صاله من جوة
وكف كدامي
...اريد اطلع
....متزوجين والله اذا ازوجتي انهيج انتي وياة ادمرج
هالمرةحسيت انو شاهين هسه بموقف ضعف اي كلمه مني تنهي
ودمر اعصابه
.....ليش وضحكت واني بكلبي نار
عمري كله اني كدامك بس انت تروحلها تركض عليها
اجتي امي فتحت الباب باوعتنا واكفين
.....هيلين
.....تعاي بنتي
....خاله داحجي ويا هيلين بموضوع
....ها يله لعد لتتاخرين دنروح
وراحت بس عافت الباب مفتوحه راح مرة ثانيه وسد الباب ورجع وكف كدامي
وبقى يباوعلي
مافكرت تروحين لااحد ثاني مااعرف ليش مافكرت او افكاري عمتني وعقلي وكف
بس من يمج
بس صعب اخلي احد ياخذج مني
هاي عيونج الي احتار بلونها من اباوعها
وهاي الحواجب الي جنها سهام ونابته بكلبي
وخشمج وشفايفج وبياضج
وشعرج وكمش نهاية خصله من شعري
وطولج وجسمج كلشي بيج يخليني اتخبل
احب يدج الناعمه الي احسها اذا اضغط عليها شويه اطك
بيدي احسها شفافه
من اباوعج احس نفسي اباوع الدم الي يمشي بيج كل هذا تعبني لسنين مضت تعبت
من حبج وتعبت اضم عنج واحاول اعيش حياة بعيدة مابيها انتي بس كل الي صار خلاني ابعدج من كدام عيني
بس هم ماكدرت ابعدج عن كلبي ولا لحظه
برغم الي سمعته عنج وشفته بس جنت مااريد اصدك
ومااريد اقتنع واكول حتى عيني تكذب
....اني ماسويت شي شنو الي دتحجي وليش اجاي تتبله عليه
وليش اجاي توجع كلبي
واني كلبي تعبان
عوفني.
....مااكدر ولاراح اخليج تزوجين وشسميها سميها انانيه خباثه بكيفج بس اني مراح اعوفج تنامين بحضنه ولا لحظه
على كولتج يضوگ الي ماضگته
لاوالله مااخلي
ولتخليني أذي الله خليج لان كاميران صديقي
كولي مااريدة وخلص
....اني اكدر ازوج اوس واصير كدام عينك دائما وكلما نارك تبدي تطفه اخلي عليها بانزين وازيدها
يادكتور شاهين اني انسانه عندي كرامه واحساس
ومشاعر و مو من حقك تلعب بيه اني
مو وحدة تاخذ غايتك منها وتشمرها
اني راح ازوج رضيت ولا لا
واذا كلتلي ازوجج اني ماارضى بيك
كافي الي عشته
طول هاي الفترة الي راحت
وراح ازوج كاميران واذا خربطت زواجي من
كاميران راح ازوج اوس
وانت ازوج دينا
وعيب لتتصرف تصرفات متليق بدكتور
.....وليش بقيتي براسي عقل
..... والله بالنسبه الي ماعندي شي وياك ومعليه بعقلك
.....هههههه ههههه
كام يضحك وتغير فجأة
كلت هذا شبي اظاهر صدك ماعندة عقل براسه
......شو تضحك
....على خبالج على وكفتج كدامي وجنج عصفور
وياريت هذا العصفور اخلي جوة جناحي واغطي واحمي من عيون الكل
...هذا العصفور طار
.....لا بعدة بس صاير مغرور وراسه يابس كبر هذا العصفور
....تعبتني
......واني نظراتج تعبتني دفو صوتج تعبني كلشي بيج تعبني جنت احلم اخذج بدنيا ثانيه ومااشوف بيها بس انتي
هيلانه اريد اسئلج سؤال وجاوبيني بدون كذب
وبعدها كلشي راح يتغير كلشي صدكي
بس كون اكدر اصدك جوابج
،،،،،...
حبايبي اني داكتب القصه بتفاصيلها وهذا الي ينطيها
جماليه للقصه
واعتبروها مسلسل يوميه حلقه
يتبع....
