....انت لم تمت لأنك ساكن في داخلي
وداخلي
لك وكل شتات روحي أليك
كيف انساك وانا اتناسه حبك وانت نبض بين الشريان
كيف اقول بأني نسيت رجل عشت بمشاعري له لسنين
عند ذكر اسمك يتجدد ويزيد بيه الحنين
كيف يمت قلبي وانت حي فيه
كيف تغادرني وانت لم تخرج مني ابدا
....شاهين مات شاهين
ركضت ويدي على كلبي وحسيت الخوف راح يموتني
وكفت كدام خالتي
باوعت عليه بس محاجتني
كالت لااخويه
....علي وين اختي
....جوة
كامت ودخلت واني وعلي وراها وجنت مفرفحه روحي بس اريد اعرف شصاير
ركضت
وراها دخلت للهول مالتنا امي كاعدة بس شافت اختها ولابسه اسود كامت
...يمه شكو منو شكو
....كامت تبجي خالتي وحضنت امي
وامي مكدرت بعد توكف كعدت بالكاع
ودك وتلطم وابويه مناك يصيح
....شكو
حسيت الثواني مدتمشي
...شكو احجي
...مات رجل فوزيه واوس ياعين خالته بين الحياة والموت
.....يمه يمه يمه شكو وج شصار
اني كعدت بالكاع صح اطمنت انو شاهين مابي شي
بس كلبي صار دم ودمعي نزل من سمعت اوس
بين الحياة والموت
امي
تصيح
....شكوووو شبي الولد يمه احجي
.....بالمستشفى سودة عليه وفوزيه بغير دنيه لاايد لارجل
....يمه كلبي ياربي رحمتك شصار بيهم
وخالتي تبجي متكدر تحجي واني دموعي تجري واخويه
علي كعد بالكاع
.....اوف اوف اوس صارله فترة وضعه متغير وامه تبجي من ورا دكول يشرب
اول تالي اوس يشرب وميكعد بالبيت وفوزيه دتموت قهر
علمودة
وقبل اربع تيام ساعه بالتسعه بالليل
ودك تلفون الاب زوج فوزيه
صديقه لااوس
...كله عمو ابنك سيارته دخلت جوة لوري ويبجي صديقه
يكله اوس مات وهذا الرجال هو سد التلفون وكال لمرته اوس اوس
وكع وهي وكعه وبعد ماكام
ماتلحكو اله
ومات ومناك هالولد
عبالهم ميت ونتراكض بالليل وشاهين يركض
طلع ماميت مودي للمستشفى لان
بعدة بي نبض بس فاقد
فحصه شاهين لان جان ينزف
شك بي شي بدماغه
حوله يمه
سواله رنين وفحوصات طلع عندة نزيف بالدماغ
وصارله اربع تيام
نايم هسه ولازم يسوي عمليه
وتعاي شوفي المصيبه الي حطت على راسنا
وامي كامت ادك على صدرها
....ليش ماكلتولي
.....انتو ماعدكم تلفون وتلفون علي يطلع مغلق
وكلنا التهينا بهاي المصيبه ونتراكض
وكلنة انتو ماتريدونا بعد لا بفرحنه ولابحزنه بس ماكدرت مااجي اكلج
حتى لمن راد حمزة يجيج كتله لاتروح وماظنيت انتو هنا بيتكم لان نعرف بيتكم محروك وماينكعد بي
وشمدريني بعد التمت فد لمه ودخنه هذيج الدوخه
بعد عقل ماظل براسنا
.....كومي اروح لااختي فوزيه
شكد جنت كارهتهم وضايجه منهم بس من سمعت هيج
ماوكفت دموعي بجيت وبجيت لحد ماخلصت دموعي
ردت بس اروح اشوف اوس
ودعيت ان شاءالله يكعد ومابي شي
وراحت امي بس بطلوع الروح جانت بكوة جر نفسها
وماكدرت اني اروح مااعرف حسيت شي منعني
ومر هذا اليوم واني يدي باردة حتى متاخذ شغل
ومااكدر كلشي اسوي
كاعدة وانتظر امي تجي وصار الليل
وامي مابينت وماجتي
قلقت اكثر لان هي مريضه ودواها بالبيت
وابويه خبلني كل شويه وكايلي وين امج
ظليت هاي الليله كاعدة على نار وطار النوم من عيني
لحد الاربعه الفجر يله غمضت عيني
...
....هيلين هيلين هيلين تعاي اخذي ايدي وطلعيني
الصوت صوت شاهين
كمت ادور بلكي الكي
مالكيت حفرة بالكاع
....انت وين
...جواج
...وين جوايه
كمت اشيل تراب واشمر بلكي الكي بس هو ماكو
وسمعت صوت اختي ايمان
كتلها
...ايمان جابج
....اني موجودة يمج هيلين ديري وجهج
درت وجهي وماشفت احد
ظليت امشي والمكان اظلم بكوة اباوع
شفت باب ودخلت فتحتها ودخلت
واول مادخلت شفت كل الي اعرفهم كاعدين
ولابسين اسود
خالاتي دينا شاهين امي اختي ايمان ابويه
كلهم كاعدين
وجان اكو مثل الميز بالنص عليه شي مغطه باابيض
رحت تقربت وامشي على كيفي
وخايفه ومن داتقرب ديوضح الشي الى كدامي
جان جفن ابيض وملفلفين بي ميت
بس مجان وجه مبين
كتلهم
....هذا منو
محد جاوبني ومحد يباوعلي بس شاهين جان كاعد وبيدة ورقه محروكه من الطرف
جانت المسافه بالنظر للشخص الميت وملفلف بجفن قريبه بس جنت كلما دامشي ديبعد
وجنت امشي واباوع الكل
لحد ماوصلت يم الجفن والميت
حسيت برجفه وخوف بس ردت اعرف منو
فتحت الجفن
وعطت جنت اني النايمه ومجفنيني
رجعت ليورة من الخوف وطخيت باامي بس ماحست بيه
عرفت انو اني متت وهاي روحي
كعدت من النوم على عيطه كعد ابويه واخويه على صوتي
شنو هذا الكابوس حسيته حقيقه
كعدت شربت مي وجنت خايفه بشكل
صعب الانسان يعيش هيج شعور
يشوف نفسه ميت
خفت بعد انام
وطلع الصبح بعد وكمت اشتغل كالمعتاد
بس بالي على امي وكلت خلى اروح اوديلها الادويه
ورا ماكملت شغل لبيت
لبست جبه اخذتها من ام أسعد مال زوجه ابنها يمهم جانت لونها اسود
وكتله
...بابا
....ها بنتي
......اني راح اروح لاامي بالي يمها واروح اودي الدوة
....روحي بنتي
......بس وحدج يابنتي ميصير
.....لابابا ام أسعد راح تروح ويايه
....اي زين لعد
وصدك رحنا اني وام أسعد اخذنا تكسي واول ماوصلنا باب بيت خالتي باوعت
مجان اكو سيارات وعالم بابهم
بس سيارة وحدة مااعرفها
رحت فتحت الباب ودخلت وتمشينه ودخلنه للمطبخ شفت امي نايمه على القنفه
ومتغطيه بعبايتها
ركضت عليها وبوستها
.....هابنتي اجيتي
....اي اجيت جبتلج الدوه
امي عيونها حمرة وخدودها حمرة مبينه كومه باجيه وضاربه على خدودها
....هاي ليش هيج امي وجهج احمر شمسويه لاطمه هو انتي مريضه
....ليش مصيبتنا قليله يابنتي
....لاوالله موقليله متت من البجي على اوس من البارحه لليوم
شفت امي باوعت بس مهتميت اصورت هاي دينا وامي دتباوعها
وجانت دموعي تنزل لان ذكرت وضع اوس وحالته وذكرت الحلم الي حلمته ونكربت روحي كرب
وكملت كلامي
وكتلها
....ومن البارحه ادعي الله يكومه بالسلامه والله ياامي كلبي
صاير دم
...الله يشافي هسه فدشويه اروحله
وباوعت مرة ثانيه ليورة
شاهين خاله فحصت فوزيه شفت ضغطها
سمعت صوته
...يكللها
...ضغطها صاعد نطيتها دوة وهسه لازم ترتاح شويه
اني سمعت صوته ارتبكت وعرفت انو هو جان ديسمع الحجي على اوس بس مهتميت
....ماما لعد وين خاله
....بالغرفه
...عبالي اشوفها
.....موهسه نايمه من تكعد
....موداروح للبيت
...ابقي بنتي شويه وبعدين روحي
كل هذا وشاهين واكف ورايه يم الباب واني مانداريت
حتى لااشوفه
....خاله تروحين للمستشفى لولا بس ترة مراح تستفادين شي بروحتج
وانتي شكلج تعبان
....يمه خاله شلون هذا اوس شلون مااروح اشوفه وبكلبي
نار مدتطفه
....ماما اني اروح للمستشفى ومناك ارجع للبيت وباجر اجي
حتى اخذج زين
...لاشلون تروحين
.....اني اصلا اريد اروح اشوفه
....لعد روحي وياشاهين هو هم باجر يسويله العمليه
...لا اني اخذ تكسي واروح
سمعت صوته
....يله كومي اني داروح للمستشفى كومي
مكدرت ارفض او احجي شي لان الوقت مو مناسب
امي باعتلي وكالتلي
....روحي بنتي
...ماشفت خالتي
....خالتج ودينا اثينهن وضعهن تعبان
.....يله باجر اجي
ام أسعد كالت ابقه واانتي روحي وبعدين اني اروح للبيت
كمت وكفت ونداريت
جان شاهين واكف وشكله تعبان وحزين كلش
واكف ومخلي يده على ورا ظهره
من شافني نداريت باوعلي نظرة جانبيه وبعدين اخذ السترة مالته ولبسها وسمعت صوت دينا
صيح
....شاهين
.....هياني بالمطبخ
اجتي دخلت شافتني باوعتلي ومهتمت بس منظرها
كسر كلبي خفت اروح احضنها او احجي شي
....حبيبي وين تروح
....للمستشفى
ومن كال مستشفى كامت تبجي وتشهك بالبجي
....شاهين يعني راح يرجع اوس
لو يموت
...لااله الالله مابي شي هسه يرجع مثل الاول واحسن
ردت باوعتلي
وكالتلي
...روحي شوفي اوس بلكي يحس بيج ويكوم
لان هو ميريد احد بس انتي
ورا الي كالته صار هدوء مو طبيعي الكل سكتو محد كدر يحجي ولااني حتى
حسيتها ددكلي شي ودتوصل لشاهين شي
كللها شاهين
...روحي نامي ارتاحي واني شويه واجيج بس اروح اطمن على وضع اوس
هزت براسها وراحت دخلت جوة
واشرلي شاهين وكلي
.....يله
سلمت وطلعت ورا امشي وصلت للسيارة وصعدت كعدت بصفه
ماادري ليش الدنيا دتخلي بطريقي ودتخليني بطريقه
كلما اريد ابعد عنه يصير شي يقربني منه
مااعرف شتريد الدنيا مني
لمن صعدت بصفه ونسدت الباب حسيت اني تنفست
وحسيت العطر مالته التارس السيارة ترس كلبي
ورد بيه الروح الي صارلي اكثر من شهر فاقدتها
كام شاهين يسوق وجان السكوت سيد الموقف
لااني حجيت ولا هو حجى شي
ظلينا ساكتين لحد ماوصلنا للمستشفى
اول ماوصلنه نزلنا وكمت امشي وهويمشي بصفي وكل شويه جارني وخالني كدامه
حتى لحد يطخني لحد ماوصلنه
للغرفه الي بيها اوس
فتح الباب ودخلني
باوعت اوس نايم وجه كله مورم وازرك تقربت منه
وبقيت اباوع عليه ودموعي تنزل
كتله
....هذا شبي ليش هيج كلي شنو راح يموت
باوعلي بنظرة مااعرف شلون اوصفها
....ان شاءالله يكوم ويكون بخير
....ان شاءالله
كمشت يده وكتله
..ابن خالتي وصديق طفولتي كوم شد حيلك
لخاطرنا
....قصدج لخاطرج
وطلع من الغرفه واني وبقيت اباوع على اوس
وبعدين طلعت
من الغرفه جان شاهين واكف يشرب جكاير
مردت احجي وياة بس هو اجى عليه
كلي
.....تعرفين شنو الي قهرني والي خالني احسن بتأنيب الضمير
....اني مااريد اعرف وهو حادث يعني قدر وراد يصير
كمش يدي قوي
...هد يدي مناك العالم
جرني من يدي ومشاني وصلني للسيارة وكلي
...صعدي بسرعه
صعدت وكلبي يدك لان جنت داتمشى بسرعه وجنت داتنهد
وصعد بصفي وسد الباب و قفلها ومشى شويه
وبعدين وكف السيارة يم شجرة
.....انتي سبب كل الي صار
...اني
....اي
واني هم
...اني شنو دخلي
....لعد هو ليش هيج صار غير بسببج
لج تلث مرات ضربته علمودج وبيوم الحادث هم ضربته
اجى عليه للعيادة وكام يحجي ويعيط ويغلط وضربته
وخله يده على راسه
وسكت
....انتي صدك مثل مكالو عليج تتلونين وتتمسكنين بس انتي مثل السم يجري بالدم
.،.....اني
....اي انتي
ردت افتح الباب وانزل كمش يدي وجرني
...وين تروحين
....عوفني ترة الي بيه مكفيني لزيد همي اني تعبانه الله يخليك
.....اني حياتي كلها تغيرت بسسببج
كلشي بحياتي تغير اني خايف لايموت واظل عمري كله اعيش بعذاب الضمير
يمكن هو يحبج اكثر مني
لان هو تعبان ونفسيته متحطمه
اريد اطلب طلب منج انو اذا رجع اوس
مثل الاول حاولي تتعايشين ويا واقع مختلف
.....اني ماااحبه تفتهم شنو مااحبه هو كوة الحب اني بعدت
عنكم وماتقربت منكم وانتو تجون دائما وتحاولون تخربطون
وتهدمون الي ابني شنو انتو
....اعتبري حاله انسانيه
.....معقول انت اعتبره حاله انسانيه قصدك العب بمشاعرة واخدعه
....ماكتلج خدعي كتلج حاولي
تتقبلي
...شنو الي تغير هسه موكلتلي انتي بينج وبين اوس شي موكلتلي انتي ملوثه موكلتلي اني مااعوف دينا
وطلعت ومن يوم الي طلعت من هذاك الباب اني طلعتك من حياتي
انت واوس ودينا وخالتي فوزيه وامك وكلكم حتى اكدر اعيش
كافي ظلم هالدنيا الي هدورة ظلمكم
اني اجيت اسوي الواجب
واطمن بس مجيت افتح جروح قديمه
