حبي لك لايشبه حب تلك الافعى انا
احبك لنفسك وانت تحب ذاتك
انا لاأرى غيرك وانت لاتراني
انا متيمه بك ياسيدي
وغارقه في بحور اشلاء روحي
انا اعشق وصالك وانظر الى العالم من خلال عيناك
لاتقل لي اذهبي لغيري
وأحضني قلبه هناك قلوب ياسيدي
تعرف الوفاء
،،،،،،،،،،،،،،،
....هيلين جفلت وردت اوكع الكلاص من يدي
....جانت امي
....ها ماما صباح الخير
راحت كعدت وكامشه راسها وعيونها مورمه
......شبيج ماما
.....راسي راح يطك ماكدرت انام الليل كله مثل السمجه
ادكلب
وصاعد ضغطي يمكن وهسه راسي راح ينفجر من الوجع سولي جاي وانطيني فد حبايه بلكي يصير راسي احسن
داريد اروح اطلع
...وين تروحين
...اشوفلي جارة اروح ادور بالبيت بلكي باقي بي شي نستفاد منه ملابس اصخام ياويلي على حظي المصخم شلون مصيبه ونزلت على راسي
....انتي مريضه اني اروح
...لا اني اروح ابقي يم ابوج لان الليل كله هم منام
....اني وعلي نروح
.... لعد لازم احد يوديكم هسه اخابر اوس بلكي يجي
بوديكم خوما تروحون وحدكم
....وعلويش اوس احنا نروح ناخذ تكسي
....لا هو وياكم شنو رايحه انتي وحدج
وشوفي هدوم ماعندج
بيش تروحين بالبجامه
...اي شنسوي احنا نهزمنا من الحرك هزم بقت عدنا هدوم
....شوفي من هدوم دينا يمكن عدها هنا
...اي ميخالف
صبيتلها جاي وانطيتها دوة وماقبلت تاكل
وكعدت والدي وانطيته ريوك وشويه كعدت يمه
وصاحتني ماما
....هيلين
...نعم
...صعدي على اخوج وجيبي التلفون منه داخابر اوس
...خاف نايم بعد وكت تخابري هسه
.....ليش مويروح للمكتب حتى قبل ميروح
يوديكم بلكي طلعون شي واني منا لباجر اروح اشوف شسوي لان اليوم تعبانه واحس نفسي اريد كل شويه اوكع على وجهي
وحتى هم اجيبيلي دوة وياج وتشترين دوة لاابوج هم
صعدت على علي اخذت التلفون من يم راسه
ونزلت لاامي
وخابرتلها على اوس
سمعتها دكول
.....الو هلو خاله صباح الخير شلونك
لاالله يسلمك ماكوشي بس اريد منك فد خدمه
اريدك تاخذ هيلين وعلي وتروحون للبيت تشوف هيلين واخوها بالبيت بلكي يلكون شي صاحي شي نكدر نستخدمه
بلكي هدمايه
اي شي
اي يله ننظرك مع السلامه
انطتني التلفون وسديته
كالت
...هسه كال اتريك وابدل واجي
وفعلا ماطول واجى اوس
دخل للمطبخ وسلم علينا وكال
...ها هيلين يله
....مو علي بعدة نايم
...عوفي نايم هو ماكو شي نروح اني وياج
....ديله
خلي البس
خالتي انطتني بنطرون وبلوز وجان خفيف بس يله هو هذا الموجود
هي هاي الملابس مال دينا
بدلت وشلت شعري
وطلعت
وكالتلي امي
....اوس برة طلع وانطتني فلوس كالتلي جيبيلي دوة
الي ولاابوج انتي تعرفيهن
...اي ميخالف
طلعت بالحديقه جان اوس واكف يم الباب
تمشيت وهو راح كدامي صعد بالسيارة
واني سديت الباب وصعدت بصفه وساق واني ساكته
مااحجي شي ولا هو يحجي شي
بس عصبي ولاعبالك هذاك اوس الي يحجي ويشاقه
عبالك غير واحد
وصلنا لبيتنا
اول ماشفته كلبي نكرب وعيوني غوركت واجه على بالي انو لو احنا باقين بي جان هسه صايرين فحم
فتحت الباب.ونزلت ودخلت جوة
واباوع على الغراض الي مايعه والفراش المحترك
والعربانه مال ابويه مايعه
وغرفتي ودفاتري الي جنت اكتب بيها خواطر محروكه
والاجهزة الكهربائيه
مختصر الكلام ماباقي منه شي غير
ملابس كانت بصندوك بالكنتور بي كم قطعه
من الملابس
والباقي منتهي مابقي شي سليم
طلعت من البيت واوس طلع ويايه
وكعدت على الصبه مال باب المطبخ وخليت يدي على خدي
وصفنت على هاي الحاله شلون راح نكدر نعمر بيتنا
شلون راح نرجع نعيش بي
وحسيت الدمعه واكفه باب عيني
كعد بصفي اوس
وكلي
.... لضوجين كلشي يتعوض
.....شيعوضه منين شلون احنا راح نعيش وين راح نكعد
وين كلي
...اني موجود
....شتكدر سويلنه يااوس احنا انتهينا
....كلشي اسوي بس طلبي انتي
...اشكرك اعرف بيك متقصر بس الي نهدم صعب يصلح
شوف صاير كلشي رماد حتى المكينه الي اكعد اخيط عليها حتى نعيش انتهت
....اني اجيبلج مكينه جديدة
ابتسمت اله
...اشكرك
اوف
....الاوف الي بكلبج هي بصدري
....يله خلي نروح
كمت وتمشيت بسرعه للسيارة وكعدت وظليت اباوع من الجامه وساكته
بس شو السيارة وكفت
....شكو وكفت
.....اريد احجي وياج
...بشنو
.....هيلين
....اني
....انت شنو
...اني احبج وبعد ماعندي القدرة انو اضم بكلبي
لان كلبي راح يطك
....هاا
....اي احبج واريد ازوجج
....شنو هذا الكلام اوس احنا
....اش سكتي لدكولين اخوة من احنا صغار
احنا مو اخوة اي صحيح كنا من احنا صغار سوا
بس اني حبيتج من انتي صغير حبيتج من انتي طفله
من انتي صغيرة
جنت انتظر اليوم الي تجين بي طول الاسبوع حتى العب وياج محتفظ بصورة النا من احنا اطفال لحد الان اباوعها
وحد الان محتفظ بيها اشم بيها ريحتج
...بس اني اشوفك اخويه
......بس اني مااريدج تشوفيني اخ اريدج تشوفيني حبيب
اني تعبان ياهيلبن وبيدج راحتي اني بقيت طول عمري اهرب من كل البنات لان ماكدرت احب وحدة غيرج
ولانج بس انتي سكنتي كلبي
اني مااكدر بدون عيونج اني هوايه حاولت ابتعد عنج
وغبت فترة طويله كمت احاول انسى
بس كلما اكون قريب منج حبج بكلبي يزيد
اني منج انتي حلمت يكون عندي طفل وياج حلمت تكون حياتي
.....اسفه اني
وماكدرت اكمل حسيت بكلبي وكف وضايقت وبدت الدنيا تصغر بيه
.... فكري ياهيلين واني مستعد كلشي اسوي
طلبي وتمني
يكفي اخذج بين احضاني
ولخاطرج اتحدى االكل
....اوس اني اريد ارجع للبيت الله يخليك
....هذا جوابج
....ماعندي جواب مااعرف شكلك
....كولي الي تريدي بس ريحيني
..مااكدر اكول شي
....ليش
....بدون ليش
بقى يباوعلي وبعدها كام يسوق مثل المخبل وصلني للبيت
ونزلت بسرعه وجان وجهي مخطوف لونه
وامي عبالها تخربطت
...شبيج بنتي
....مابيه شي بس اريد شويه ارتاح
...روحي نامي
صعدت للغرفه الفوك ركض
ونمت بالفراش وعيوني
نملت دمع كلام اوس خنكني يمكن جنت اتمنى الي سمعته من اوس يكوله شاهين
يكلي احبج واريد ازوجج
اني بين نارين
مثلي مثل الى على متن مركب وهذا المركب
يمشي بلاشراع
شعور الطوفان بداخلي كلما داريد المس حلم يطلع حقيقه
وكلما اريد امسك حقيقه تطلع كابوس
ظليت بفراشي وافكاري توديني وجيبني
وبعدها اجتي عليه ايمان كالتلي
...هيلين كاعدة
....اي
.....استحي انزل جوة
....لويش
.....خجلانه
...من شنو خجلانه
......الي صار بسببي
...لاحبيبتي مو بسببج هذا قدر الله
واكيد رب العالمين دفع عنا بلاء اكبر الحمدلله احنا كلنا بخير
كامت تبجي
....احنا وين راح نروح ياهيلين
....مااعرف بس تدبر لتهتمين كلشي يصير زين
جنت اهون عليها واني محتاجه احد يهون عليه ويطيب خاطري المكسور
......هيلين
....ها
.....انتي مضايجه هنا
....اكيد ضايجه لان احنا هنا خطار وخطار ثكيل لان احنا
لا واحد ولااثنين وماكو واحد يتحمل احد بهذا الوكت
....لا قصدي مضايجه لان موجودة هنا ويا شاهين
استغربت من كلتلي هيج لان اول مرة ايمان تذكرلي
شاهين
....لا وليش اضوج
....هيلين احنا ليش هيج ماعدنا حظ
ليش الي نحبه يروح من عدنا وليش الي نريدة ميصير
وليش هيج متعذبين
شنو عود لان فقرة
....لا هاي قسمتنا والفقر موعيب بس اكو ناس صارت بلا ضمير
الله كريم ماكوشي يظل على حاله
.....اني كلش ضايجه ياهيلين
وامي تعبانه وابويه وضعه تعبان وانتي بدنية ظلمه
هم تضحكنا الدنيا اشو كظيناها طول عمرنا بعازة وقهر
...الله كريم ان شاءالله
كلشي يتغير
يله كومي ننزل جوة ونصرف طبيعي
...اوكي
نزلنا جوة وكمنا نساعد خالتي وامي جانت كلش تعبانه
ومابيها حيل تتحرك
وللظهر اجى شاهين
ومانزع ملابسه وغسل يدة وكال اريد اتغدى
خالتي جانت بغرفتها
وهو ميقبل احد يصبله اكل بس خالتي
كتله
...اصيحلك خاله تجي تصبلك
....ليش موانتي
....يعني عادي
....شنو الي موعادي
...مواعرف متقبل بس خالتي
....امي وانتي عادي
ابتسم
وبديت اصبله الاكل وبااعتناء شديد
وبخوف عبالك اول مرة اكمش شي بيدي
مااعرف لان هو موجود وكاعد يباوع عليه
....هيلين
...وين رحتي اليوم ويااوس
..... ها
...وين رحتي
.....للبيت
....ليش
.....ردت اشوف بلكي اكوشي زين اكدر اطلعه
بس مالكيت
وتقربت وخليت الاكل كدامه
...ها وشصار
...مصار شي
....شكلج اوس
...انت ليش مهتم
....اني مااريد شي يأذيج اني مثل ،،،،،، ومكمل
اني ابن خالتج
....وهو هم ابن خالتي
.....براحتج
بقيت مترددة اكله لو لا بس بديت احسه يهتم
وعيونه تلمع بريق مخيف من يسمع اوس حاجي ويايه لو شايفني
ردت اعرف ردت فعله اذا كتله اوس كلي احبج واريد ازوجج
لان جان اكو شي بداخلي ديحركني
....شاهين
...نعم
....ممكن اكعد احجي وياك
....اي تفضلي
...ورا متكمل اكل
.....لا تعاي هسه
...اوكي
سحبت الكرسي وكعدت
...اليوم
...اي
....اوس كلي
وماحجيت بعد الحجايه وكفت بحلكي.
لان عينه تغيرت
...شبي
...كلي اريد ازوجج
خجلت اكله كلي احبج
....شنو
.....يريد يخطبني
شمر الخاشوكه من يده
واخذ كلينسه ومسح حلكه
ورجع الكرسي ليورة
ومد يده بجيب سترته المعلكه بالكرسي
وطلع الباكيت
مال جكاير
وطلع وحدة وكام يشرب ويباوع بوجهي
....واني شعليه
....انت ابن خالتي وهسه مو وقت اكول لاامي هيج موضوع
....انتي شتريدين
....يعني
.....اذا تريدي ليش لا
بس حسيته ديحجي من ورا كلبه ومختنك بالكلمه
الي تطلع من حلكه
....ماادري
.....شنو الي متدرين بي
لو تحبي وتزوجي لولا شنو بيش تفكرين بعد
....انت شدكول
....مومهم اني شكول المهم كلبج شيكول
بقيت ساكته
وكلت لنفسي بقيت طول عمري ورا احساس كلبي
مافكرت بي ومافكرت بنفسي جنت اكتفي دائما بالسكوت
وماصرت بيوم انانيه ومافكرت بروحي لحد مماتت روحي
هو كامي والي بينا خطوة
الي يفصلني عندة مدت يد
بس امد يدي المس وجه المس شعرة اخلي عيني بعينه
اكله اني احبك الك احبك انت بس
ماردت غيرك من الدنيا
اكله انت الدنيا الي كبرت ويايه اكله ايامي كلها
كاطعه النفس بس من تمر
اتنفسك
واعيش على امل مرة ثاني خطوة وحدةتفصلني عن حلمي
عن احساسي المكبود
اريد اكله هذا الوجه الي يضحك ويبتسم ويمزح
مووجهي هذا قناع لبسته خفيت بي ملامحك المكتوبه بوجهي
اريد اكله ياريت لوتمد يدك وتخليها على كلبي
وتشوف شيكلك
بس اه يالنصيب تاخذ الي نحبه وتنطي لغيرنا
اقسى انواع الشعور انو نحب انسان ونشتاقله ونكون بقربه
بس الوصول الى مستحيل
كل هذا واني احجي ويانفسي كل هذا واني بين اريد
وبين مااريد ليش مااكله احبك
واخلص من كل عذابي
بس معقوله اني الي اكله
......هيلين وين رحتي بعقلج وين وصلج تفكيرج
وين راح ينتهي دربج
دورات ياهلين نتمنى حلمنا يكون حقيقه اوبالعكس
....انت تحب دينا
.....شخطر على بالح تسئلين هذا السؤال
....حبيت اسئل
....ماراح تفرق الاجابه
الاجابه يمج
....يعني شنو
....يعني اني اتمنالج تلكين السعادة وين ماجنتي
....يمكن انت مهنتك كطبيب موتت احساسك
....احساسي مامات احساسي جمد احساسي يحتاجها حتى الجليد الي عليه يموع
...منيه
.....تلك الغائبه الحاضرة بقلبي
.....هههه دينا
.....اوس خوش ولد اني متاكد راح يسعدج
.....هههههه
...ليش ضحكين
.....متوقعت تحجي هيج عليه
....اني مااقاتل شخص على شي مو الي
..شتقصد
....مااقصد شي
كام وعافني مثل المخبله
وراح للصاله شاف خالتي كاعدة
كللها
.....حضريلي الجنطه فدشويه اسافر للشمال
....ليش شعندك
....شغل
....شوماكلتلي ياابني صار فجأة
...شوكت ترجع
...اربع تيام وارجع
خالتي وجهها كام يضرب الوان مااعرف ليش
و طبعا هي مامرتاحه لوجودنا ابد
بس متكدر تحجي وساكته
....كال
...راح اروح للعيادة وارجع
.....زين ابني
وطلع شاهين
طبعا شاهين دكتور مال جملة عصبيه
يداوم الصبح بالمستشفى والعصر بالعيادة
المهم خالتي صعدت لغرفه شاهين وحضرت الجنطه مالته
وماطول شاهين ورجع وصعد فوك ومانزل الابعد مايقارب الساعتين
جان مبدل ملابسه وشعرة مبلل
ومشطه وساحبه ليورة
سلم على الكل وكال صديقي الدكتور كاميران برة واكف
راح نروح سوا
وسلم وطلع
ودعيتله بكلبي يروح ويرجع بالسلامه ودعت كلبي ويا خطواته
بعض الاحيان نحس بالشخص الي كدامنه بس
نغالط نفسنا ونكول لا احساسنا غلط
شاهين يوم عن يوم كام يتغير
يوم يتقرب ويوم يبتعد
اما اوس حكايه اخره المشكله انو هو من يحجي يكسر كلبي لان اشوف نظرات حزن بعينه رهيبه
بس شلون بكلبي كلبي مديميل لغيرة
يله علويش افكر تاليتي مااخذ
الي اريدة لان ميصر خلص
تعودت الدنيا متنطيني شي
بس اني تعبت من كلشي
واحس حتى دكات كلبي توجعني
،،،.،،
لا تبكي ياحياة من اجلي
انا لااستحق البكاء
دمعك يختار من هم أسوأ مني
دمعك لايختار النبلاء
لاتوعديني ياحياتي بحبي لاتوعديني بليله
معه لاتقولي لي بأني سوف اصبح افضل
فأنا اعلم بأن
كل وعودك كاذبه وبأنك تختارين
من تشائين بدون مبالاة
يتبع...
#الكاتبه #روجمان
