Let's learn English

3

🍷 ဝိုင်အရက် (wine) ဆိုတာ အဓိကအားဖြင့်တော့
စပျစ်သီး (သပျစ်သီး) ကို အချဥ်ဖောက်ရာက ရတာပါ။

ℹ ဝိုင်ကို ထပ်ချက်ရင် ဘရန်ဒီ (brandy) အရက် ရပြီး
brandy ကို ထပ်ချက်ရင်တော့ ကော့ညက် (cognac) အရက် ရပါတယ်။
ဒါကြောင့် ကော့ညက်ဟာ အရသာကောင်းသလို
စျေးလည်းကောင်းပါတယ်။
(အိမ်ကပုလင်းကတော့ လက်သုံးလုံးပဲ ကျန်တော့တယ်)

🍇 စပျစ်သီးကို grape လို့ ခေါ်ပါတယ်။
☀ စပျစ်သီးခြောက်ကိုတော့ raisin (ရေဇင်) လို့ ခေါ်တယ်။

🇫🇷 ကမ္ဘာ့ထိပ်တန်းဝိုင်တွေဆိုတာ ပြင်သစ်က လာတာပါ။
ဒါကြောင့် ဒီစကားလုံးတွေဆိုတာကလည်း ပြင်သစ်ကနေ လာတာပါပဲ။

🍇 ဒါပေမဲ့ ပြင်သစ်လို စပျစ်သီးကို raisin လို့ ခေါ်တယ်။
ဘာလို့ အင်္ဂလိပ်မှာကျ grape ဖြစ်နေရသလဲဆိုတော့
စပျစ်သီးကို အခိုင်လိုက်ရောင်းတဲ့အတွက် ပြင်သစ်လို
grappe de r​aisin
= bunch of grapes လို့ သုံးတာကနေ
ရှေ့စကားလုံး grappe ကို ​ဖြတ်ယူလိုက်တော့
ပြင်သစ်မှာ "အစု၊ အခိုင်" ဆိုတဲ့ စကားလုံးက
အင်္ဂလိပ်မှာ "စပျစ်သီး" ဖြစ်လာရတယ်။

☀ စပျစ်သီးခြောက်ကိစ္စ ဆက်ပြောပါမယ်။
ပြင်သစ်မှာက adjective တော်တော်များများက
နောက်ကနေ အထူးပြုရတော့ စပျစ်သီးခြောက်ကို
raisins secs = grapes dry လို့ ခေါ်ပါတယ်။

ဒါကိုမှ အင်္ဂလိပ်တွေက ထုံးစံအတိုင်း
ထိပ်စကားလုံးကိုပဲ ဖြတ်ယူလိုက်တော့
ပြင်သစ်မှာ "စပျစ်သီး" ဆိုတဲ့ raisin က
အင်္ဂလိပ်မှာ "စပျစ်သီးခြောက်" ဖြစ်လာရပါတယ်။

🌿 တစ်ခါ စပျစ်ပင်ကို vine လို့ ခေါ်ပါတယ်။
ဒါပေမဲ့ အခြားနွယ်ပင်တွေကိုလည်း vine လို့ခေါ်တော့
စပျစ်နွယ်ပင်ကို grapevine လို့လည်း
သီးခြားခေါ်ကြပါသေးတယ်။

(မြန်မာမှာ "သစ်သီးဝလံ" ဆိုတာ တကယ်တော့
ပင်စောက်က သီးတာကို "သစ်သီး" လို့ခေါ်ပြီး
အနွယ်က သီးတာကို "ဝလံ" လို့ခေါ်ပါတယ်။
စပျစ်ဟာ ဝလံ မျိုးပါ။)

🏡 စပျစ်ခြံကိုကျ vineyard လို့ ခေါ်ပါတယ်။
(vine = စပျစ်နွယ်ပင် ; yard = ခြံ)
❗ဒါပေမဲ့ အသံထွက်လေး သတိထားပေးပါ။
vine ကို "ဗိုင်း" လို့ ထွက်ပေမဲ့
vineyard ကိုတော့ "ဗင်းည(ဒ်)" လို့ ထွက်ရပါတယ်။
ဘာလို့ vine က "ဗိုင်း" မဟုတ်ဘဲ "ဗင်း" ဖြစ်ရတာလဲ။

စပျစ်ခြံဆိုတာ ဝိုင်ချက်ဖို့ စပျစ်စိုက်တဲ့နေရာပါ။
တိုက်တိုက်ဆိုင်ဆိုင် ပြင်သစ်လို
ဝိုင် (wine) ကို vin လို့ ခေါ်ပါတယ်။
(ပြင်သစ်လိုတော့ အသံထွက် နည်းနည်းကွာတယ်)

👨‍🏫 စဥ်းစားကြည့်ရင် wine vine vin
အမျိုးတော်တယ်မထင်ဘူးလား။

🔁 w (ဝ) နဲ့ v (ဗှ) ဆိုတာ ပါဠိလို ရှေးကျတဲ့
ဘာသာစကားတွေကနေ မွေးစားထားတဲ့စကားလုံးတွေမှာ အသံဖလှယ်ယူလေ့ရှိပါတယ်။

📚 ဥပမာ ဧဝ ဆိုတာ Eve/Eva (E = ဧ ; va = ဝ)
ဒေဝေါ/ ဒေဝ (နတ်) ဆိုတာ Deva (De = ဒေ ; va = ဝ)
ဒါကြောင့် နတ်မျက်စိကို ဒိဗ္ဗစက္ခု လို့ ခေါ်တာပေါ့။

❗တစ်ခါ W (double U) ဆိုတာ တကယ်တော့ U နှစ်လုံး မဟုတ်ဘဲ V+V (V နှစ်လုံး) ဖြစ်နေတာ သတိထားမိလား။

✒ တကယ်တမ်း လက်တင်ဘာသာမှာ
U ရော V ရော နှစ်ခုလုံးကို V နဲ့ပဲ ရေးပါတယ်။
ဒါကြောင့် W ကို အင်္ဂလိပ်က double U လို့ ခေါ်ပြီး
ပြင်သစ်က double V (ဒူဘလယ်ဗေ) လို့ ခေါ်ပါတယ်။

🏛 အောက်ကပုံမှာ လန်ဒန်က BBC ဌာနချုပ်ဖြစ်ခဲ့တဲ့
Bush House ရဲ့ အဝင်ဝမျက်နှာစာမှာ ခံ့ညားအောင်
BVSH HOVSE လို့ ထွင်းထားတာကို တွေ့ရမှာပါ။

ဒါဆို wine နဲ့ vine ဟာ အမျိုးတော်မှန်း သိလောက်ပါပြီ။
ဒါ့အပြင် ပါဠိ၊ မြန်မာ၊ အင်္ဂလိပ်၊ ပြင်သစ် စုံသွားပြီမို့
မသောက်ရဘဲလည်း မူးလောက်ပါပြီ။
(ကိုယ်တွေတော့ လက်ကျန်လေးဖြတ်လိုက်ဦးမယ်)

PS: ဒီ post လေးကိုလည်း ဆရာ Nyuntwai Moe တိုက်တွန်းလို့ ရေးဖြစ်သွားတာပါ။

With love,
YKL
May 18, 2022