قصة : { #هويته_وأنتهيت } 🤞💔
الحلقة التاسعة عشر { ١٩ } 🐍
( يتخض مروان )
مروان ب استغراب : عرفتي منين ؟!
تيا : دكتور ايسل قالتلي
مروان : اة ، عادي والله محصلش حاجة يعني
تيا : ضربت زميلك وضربك واتعورت وكان ممكن تتفصل فيها وعادي كدة ؟!
مروان : والله عادي ، ميهمنيش اي حاجة من دي ، المهم مسمعش حد يقول عليكي كلمة وحشة
( تسكت تيا ومتبقاش عارفة تقول ايه )
تيا : بس برضو انا مش هحب اجيبلك الأذية بسببي !
مروان : ياريت كل الأذية تيجي منك ، انا قابل ي ستي
تيا ب احراج : كلامك غريب ي مروان ومينفعش يتقال !
مروان : عارف
تيا ب استغراب : ولما انت عارف ليه بتقوله ؟!
مروان : عشان دة احساسي من ناحيتك ، وانا كدة ع فكرة كاتم حاجات كتير اوي ، ف حاجة طلعت غصب عني متزعليش
تيا بعدم ارتياح : انت ليه بتخوفني منك !
مروان : لا مش قصدي والله ، بس دي الحقيقة ، مش حابب اكدب عليكي
تيا : بس مينفعش تحس كدة من ناحيتي انا بالذات !
مروان : وليه ، مين اداكي الحق تحجمي مشاعر حد وتحدديها ؟
تيا : لما تكون غلط ، مكانها غلط ووقتها غلط وكلها غلط !
مروان : وليه متقوليش إن اختيارك انتي الي غلط م الأول
تيا : ومتحملة نتيجته مشتكتش ، ولو مشاعرك دي شفقة احتفظ بيها لنفسك !
مروان : ولو حب ؟
( تتخض تيا وقلبها يوجعها )
تيا : مينفعش غلط !
مروان : تاني هتقرري وتحددي !
تيا : عاوز ايه ي مروان ؟!
مروان : عاوزك ، عاوزك بجد
تيا بخضة : ايه الي انت بتقوله دة !!
مروان : عاوزك ف حياتي ، ف يومي وف كل وقت ، كل مكان ، ادمنتك بجد ، انا بحبك ، بحبك ومبقتش قادر يبقا الي بينا رسمي وله حدود كدة ، مش قادر بجد ، انا بخطف منك الوقت ، بخطف الدقايق والثواني الي بنتجمع فيها ف الكلية او ف الكورس ، اول م بتمشي بتهدي كل حاجة بنيتها ف الدقايق دي فوق دماغي ، وابدأ ف اليوم الي بعده م الأول ، بقيت اتمناكي كل يوم كأنك مستحيلة !
تيا ودموعها بتنزل : عشان انا فعلاً مستحيلة !
( تقفل تيا الفون ، يتضايق مروان ويندم إنه اتكلم ، تقعد تيا ع السرير وتنزل دموعها )
تيا بضيق : ليه بس ، ليه كدة ، ياريتني م كلمتك !
( تمسك الفون تتصل ب ايسل )
تيا : الو ، انا ف كارثة ي ايسل
ايسل بقلق : حصل ايه ؟!
( تحكيلها )
ايسل : الولا دة اتهبل ولا ايه ، هو مش عارف إنك متجوزة !
تيا : عارف طبعاً
ايسل : اومال بيعمل كدة ليه ، انتي لازم تبعدي عنه عشان دة ساق فيها اوي !
تيا : هبعد اكيد ، بس في مشكلة
ايسل : ايه ؟
تيا : إن انا كمان مشاعري غريبة من ناحيته !
ايسل بخضة : نعم ، يعني ايه ؟!
تيا بحيرة : مش عارفة !
ايسل : انتي بجد لازم تبعدي عن الولا دة عشان وضعك كدة مصيبة ي تيا !
( تنزل دموع تيا ، يعدي اليوم ، تاني يوم ، ف الكلية ، تيا ف المحاضرة واقفة بتشرح ومروان قاعد عيونه مش متشالة من عليها وهي ملاحظة بس بتحاول تتجاهله ، تخلص المحاضرة ، يبدؤا الطلاب يمشوا وتلم تيا ف حاجاتها ، يقرب عليها مروان ، يقف قصادها ، تبصله )
مروان : ممكن نتكلم ؟
تيا : معنديش وقت معلش
( تمشي تيا ، يتنهد مروان ، ييجي الليل ، جوة شقة باسم ، ف اوضة نومه ، نايم هو وليان ف حضن بعض ، وفجأة ..................... يتكسر باب الأوضة ، يصحى باسم وليان مفزوعين ، يدخل اتنين بادي جارد ووراهم فايد ، يتخض باسم وليان ويبصوا لبعض ، يقوم باسم يقف )
باسم ب ارتباك : فايد باشا انا .....................
فايد وهو باصص ل ليان : ششششش
( يسكت باسم ، يقرب فايد ع ليان )
ليان وهي بتشد عليها الغطا : فايد ، فايد بالله عليك متموتنيش !
فايد : حذرتك قبل كدة وقلتلك لو عرفت إنك بتلعبي من ورايا هولع فيكي حية ، صح ؟
( تترعب ليان )
فايد : شكلك مصدقتنيش وقتها ي ليان
ليان ودموعها بتنزل : لا مصدقاك والله مصدقاك !
( يشاور للبادي جارد ، يقرب وف ايده چيركن صغير ، يدلقه ع ليان ، تتخض )
باسم وهو بيقرب ع فايد : فايد ابوس ايدك مينفعش ت ......................
( يمسكه البادي جارد )
فايد ل باسم : متستعجلش ع دورك
باسم بخوف : عشان خاطري سيبها !
فايد : بتحبها ؟
( ميردش باسم )
باسم : سيبها واعمل فيا الي انت عاوزه !
فايد : يبقا بتحبها !
( يولع فايد ولاعته ، تتخض ليان وباسم )
باسم : فايد بالله عليييييك !
( يرمي عليها الولاعة ، تصرخ ليان )
باسم بصريخ : ليااااااااان !
ليان بصريخ وهي بتتحرق : اااااااه !
( يزق باسم البادي جارد ويجري ع برة )
فايد ببرود : هاتوه
( يروح وراه واحد م البادي جارد ، ينزل باسم م العمارة يلاقي اتنين تانيين مستنيينه بسلاح ، يتخض ويقف ، وفجأة ، طلقة ف دماغه من فايد من ورا ، يقع ع الأرض ، يعدي الوقت ويمشي فايد ورجالته يتصرفوا ف جثة ليان وباسم ويظبطه الدنيا ، تاني يوم الصبح ، واقف مروان قدام الكلية ، تركن تيا عربيتها وتنزل منها ، تقرب تدخل )
مروان وهو بيقف قدامها : لازم نتكلم
( تبصله )
مروان : عشان خاطري
تيا : اوك
( تدخل تيا ، يروح مروان وراها ، يقعده ف كفاتيريا الكلية )
مروان : انا عارف يمكن الي قلتله مكانش ينفع يتقال
تيا : دة اكيد مش يمكن
مروان : بس كان غصب عني ، انتي بالنسبالي حاجة كبيرة اوي ي تيا ، حاجة غالية اوي ، عارف إنه حب غلط ، بس مقدرتش محبكيش ، معرفتش والله غصب عني
تيا : اديك بنفسك قلت غلط !
مروان : ايوة غلط ماشي ، بس .........................
تيا : مروان ، انا وانت مينفعش يكون في بينا كدة اوك ، إذا راح تطول ف الكلام دة يبقا من بعد القاعدة دي لا ليك دعوة بيا ولا ليا دعوة بيك ، ولا حتى هخليك تحضرلي مادة وي سيدي هخليك تعديها ، لكن تشوفني تاني مش هيحصل ، لإن انت كدة والله بتأذيني !
مروان : وانا ميهونش عليا اذيتك ي تيا ، بس بكلامك دة انتي كمان بتأذيني ، كل الي بحكيلهم عنك بيقولولي ابعد ، بس انا مش قادر ابعد !
تيا : انا ............................
مروان : عارف إنك مستحيلة ، عارف من اول ليلة نمت فيها وانا عارف إنك ف حضن واحد تاني ، بس كملت ، كملت مشي لقلبك لحد م فعلاً وصلت ، ويوم م اجي ادخل تحرقي بيا كل حاجة كدة !
تيا : انت ليه مش قادر تفهم !
مروان : انا فاهم والله فاهم ، فاهم إنك متجوزة ، فاهم إني مينفعش افكر فيكي فاهم ، انا فاهم
( تدمع عيون تيا وتضير وشها )
مروان وهو بيهبد ع قلبه : بس دة مش فاهم ، فهميه واقنعيه انتي لو تقدري !
( تبصله )
تيا : هتنسى والله
مروان ب ابتسامة سخرية : ايوة بننسى ، بس بعد اد ايه ، وبعد ايه ، ملعون اليوم الي شفتك فيه بجد ، توهتيني ، انا مكنتش حمل كل دة والله ، دخلتي اوي ي تيا ، دخلتي وكبرتي الموضوع جوايا !
تيا : واخرتها ي مروان ؟
مروان : بالنسبالي ملهاش اخر ، بس اوعدك إني هشيل كل الحوارات دي من دماغي وهشيلك من قلبي ، بس متبعدنيش عنك ، حتى لو نبقا صحاب ، بالله عليكي
( تسكت تيا وبعدين تشاورله ب اة )
