بين الماضي والحاضر اختلاف جذري

البارت السابع

بقلم الكاتبة الزهيرية الزهيرية

شكرًا للظروف الصعبة التي علمتني
انه ليس هناك شي يدعى سند
وليشهد الله اننا كنا اطيب من ان نؤذي
او نجرح او نخيب ظن احدهم

وسناء/ من تحدد العرس مالتي چنت اصور نفسي أسعد وحده بالدنيا كلها لكن يبقى القدر اله رأي ثاني ويبقى ما يصير غير المكتوب النه وصارت هواي مشاكل لما تحدد هذا العرس ومن راح رافد يجيب الإجازة مالته والموافقة على زواجنه بعدها أختفى رافد يوم كامل

إلى ساعه 2 بالليل يله أتصل عليه وما حچى شي بس گلي (وسناء اطلبچ بالآخره ) بعدها أنقطع الإتصال وهذا چان آخر مره أسمع بيها صوت الحبيب رافد من كرر هاي الجملة 3 مرات بأثناء ما دى يكرر هاي الجملة چنت أسمع صوت الانفجارات والرمي من نفصل الخط بينه

بوقتها گمت اعيط بخبال ما چنت مصوره هاي نهايتي ويه رافد وحلم البدلة والعرس والحب كله أنتهى بلحظة ومن عياطي كل الموجودين بالبيت من ماما وبابا وأخواني اجوي لغرفتي من لوبة گلبي يريدون بس يفهمون مني شبيه كل شي ما يفهمون ظل بابا لازمني ويصيح بيه شبيچ بنتي

گتلهم/ رافد بعد ما يرجع

وبهاء يگلي / شلون عرفتي
رجعت عدت نفس كلام رافد والصوت مال الرمي بس بابا ظل يهدئ بيه
ويگلي / لا بابا لا تخافين هسه يرجع
طلع الفجر وكلها تتصل على رافد بس ماكو خطه مغلق
وظلت تتوالى الاخبار انه داعش سيطرت على الجانب الأيمن من الموصل ومعارك ضارية بين الجيش العراقي وبين تنظيم داعش والحرب كر وفر مره نسمع مستشفى الموصل مسيطر عليها داعش ومره نسمع مسيطر عليها الجيش العراقي

واجى الخبر الأكيد باستشهاد رافد قرب مستشفى الموصل وبوقتها الحكومة العراقية رسلت تعزيزات للموصل وهاي التعزيزات اخذوهم بالهليكوبترات وسووا انزال على مستشفى الموصل وگدروا هاي التعزيزات آنه سيطر على مسشفى الموصل ومحيطها وگدروا عن طريق الهليكوبترات الي راحت وصلت التعزيزات انه ينقلون جرحى الجنود وجثث من الضباط ومن ضمن الجثث مال الضباط الي جابوها چانت جثة رافد

بس من جابوهم ما جابوهم لبغداد لا جابوهم لمستشفى سامراء العام وبلغوا أهليتهم انه الي يريد يجي يستلم جثة ابنه يجي يستلمها من مستشفى سامراء وبيت عمه أسمهان كذلك تبلغوا انه جثة رافد موجوده بمستشفى سامراء خلي يجون يستلموها بوقتها چانت سامراء هم وردت انه داعش متواجدين بيها وخطره

لكن اخوان رافد رفضوا رفض قاطع انه الا يستلمون جثة رافد وبوقتها 3 من اخوان رافد وابن عمهم راحوا لسامراء على الرغم من هاي مخاطره كبرى وعبدالله اخو رافد يسولف

يگول عبدالله/ آول دخلتنه لسامراء طبيعيه لكن من استلمنه جثة رافد الله يرحمه ومن طلعنه من المستشفى بدينه نشوف اشخاص همه ولحايهم وملابسهم السوده وحتى وصخين والله اذا اگول چنهم شياطين ما مكذب واحنه من گد ما خفنه حتى تيهنه الطريق ودخلنه بطريق شلون كأنه طريق بساتين وطلعونه جماعه والله احنه گلنه خلاص هاي نهايتنه وگفوا السيارة مالتنه واكو واحد يطلع عمره بالاربعين