ابو مشعل برفض شديد
: قلت لك لا يا مشعل شايف الوقت مناسب للخطبه ؟
مشعل بإلحاح : عادي مافيها شي و بعدين الحياه ماراح توقف ولا تقتصر على عمي ، وجدي وجدتي بيفرحون بدال الهم والحزن اللي هم فيه ماعندهم شي ينسيهم ولدهم و زواجي أفضل حل
أردفت امجاد اللي كانت زايره أهلها و بضحك :
اكيد أفضل حل دامه يخدمك ويفيدك .. يبه أنا اقول بس خطبه غيره لا لين تنتهي القضيه
ام مشعل : لازم نقدر الظروف و البنت حالتها النفسيه تعبانه مو في حال زواج يمكن ترفضك ؟
مشعل بكبرياء و غرور : حاصل لها واحد مثلي
امجاد : المقصد إن رزان متأثره في اللي حصل و احتمال كبير ترفض فـ احسن لك و لها تأجل موضوع الخطبه لين تتحسن أحوالهم و بعدها حط الملكه و الزواج بنفس اليوم
مشعل بابتسامه لما تذكر مواقفها : لا أنا ابي زواجي يكون هالفتره يعني خلال شهر او شهرين مين اللي كان يحن فوق راسي تزوج و تزوج ولما صار بخاطري العرس رفضتوا و عشان ايش ؟ ليته سبب مقنع و يدخل العقل .
علي بنظرة شك : انت شايفها
بلع ريقه مشعل بارتباك : شدعوه يالغالي لو تحصل لي فرصه أشوفها طبعاً ماراح افوتها بس للأسف ماشفتها
ضحكت امجاد ، و انصدم علي من رده : صدق اللي استحوا ماتوا و بعدين عندك هديل الكبيره تناسبون بعض
مشعل توهق ناظر باسل اللي شارد : لا هديل ما تناسبني باسل موجود ياخذها وأنا ابي رزان بعدين بيني و بينك ابي وحده صغيره
امجاد تحت تأثير الصدمه : ليش تبي صغيره ؟
باسل بسخريه : طول عمره يقول باخذ وحده صغيره عشان اربيها و اعسفها على ما أحب
علي بحده : أنا اتكلم بجديه ليش تبي تاخذ رزان يا مشعل ؟
استقام مشعل بجلسته و بهدُوء :
البنت معجبتني اكثر من كذا وش اقول لك .
علي تذكر اختفاء مشعل الفترات الماضيه و لما سأله و قاله ان رعد موصيه ينتبه لـرزان ابتسم له : الله يوفقك بس لا الوقت مناسب نسوي عرس و طقطقه و عمك ايامه معدوده
مشعل : نسوي حفله عائليه بينا مو لازم عرس و اكيد رعد و سلمان بيتفهمون الظروف
سكتت امجاد و أم مشعل مو مقتنعين بس اصرار مشعل و حماسه ماعطاهم أي فرصه انهم يبدُون رأيهم .. خرجت امجاد لسلمان اللي اتصل عليها
•
•
في مكان آخر :
ناديه بعدم تصديق : ريناد كلامك مايدخل العقل كيف تروحين لهم ناس مايبونك وش تسوين عندهم ؟
ريناد : اشتقت لهم
ناديه : محد بيسمح لك تطلعين ولمين لاستبرق
ريناد بنبره صارمه : بروح لهم .. بتروحين معاي ؟
هزت رأسها بلا : تبت مستحيل أعيد غلطي مرتين
ريناد بنبره هاديه مطمئنه : بس احنا بنروح لبنات نعرفهم لاتخلطين القصص ، و انتي شفتي ابوها طيب مره وعطاياه ماليه غرفنا
ناديه : عشان بناته
ريناد : بروح اكلم المديره الأفضل انك تطلعين معاي وتغيرين جو احسن من خنقة الغرفـه.
ناديه بقرار حاسم : لا و لا افكر أطلع
أرسلت ريناد لقوت اللي خبرتها عن انشغالهم هاليومين ، رجعت للغرفه بخيبة آمل
•
•
اليوم الثـاني .. اجتمعت العوائل في مزرعة رعد
فتحت الباب و ابتسمت لصاحبتها المدهوشه
رزان : ما اصدق استبرق عندنا الشمس اليوم اشرقت من وين !
استبرق بعباطه : من الغرب تعالي سلمي ياقليلة الذوق
بعد الاحضان و السـؤال عن الحال .. دخلوا غرفة
رزان و إسِتبرق نزلت عبايتها و حجابها اللي حـاس شعرها بدت ترتبه لفت على رزان بعد ما انتهت و هي تدور على نفسها : كيـف ؟
لابسه فستان باللون الاحمر و محاوط خصرها حزام ذهبي ناعم و نصف شعرها مرفوع و الآخر منسدل
على أكتافها : لا شكله أمي بتعجل في الزواج
استبرق بعفويه : ليـش
أستوعبت استبرق و تفجرت في خدها كل الأوعيه الدمويه قالت بهدُوء : جيت عشان استانس لا نقلبها نكد من البدايه
رزان بحده : دام طاريه يضايقك ليش توافقين ؟
استبرق بلعت ريقها وشتت نظراتها : مو وقته .
دخلت هديل اللي كانت بمثابة المنقذ لـ استبرق
سلموا على بعض و طلعت استبرق معها بارتباك
وبداخلها شتائم و دعاوي تشمل رعد فقط
