The Destiny Found in Holland (Completed)

veertien (14)

#Unicode

နယ်သာလန်ရဲ့ လူသိအများဆုံး အပန်းဖြေရာ‌ ပန်းခြံဖြစ်တဲ့ Vondelpark ကိုရောက်လာခဲ့သည်။ နေအရမ်းမပူဘဲ ရာသီဥတုသာယာနေတဲ့ နေ့လည်အချိန်အခါဖြစ်တာကြောင့် ပန်းခြံထဲမှာ အပန်းလာဖြေကြတဲ့လူတွေက အများအပြား။

ထယ်ယောင်းက ဂျောင်ကု ခါးလေးကိုဖက်ပြီး အတူတူ စက်ဘီးလေးစီးရင်း ပန်းခြံတစ်ပတ် ပတ်နေမိသည်။ ပန်းခြံရဲ့ တစ်နေရာရောက်တော့ ဂျောင်ကုက စက်ဘီးရပ်ပြီး နှစ်ယောက်လုံး စက်ဘီးပေါ်က ဆင်းလိုက်ကြသည်။ picnic အတွက် အကောင်းဆုံးနေရာကို တွေ့ပြီလေ။ ကြီးမားတဲ့ အရိပ်အာဝသပေးတဲ့ သစ်ပင်ကြီးအောက်မှာ နေရာယူလိုက်ပြီး ထယ်ယောင်းက အိတ်ထဲမှာ ထည့်လာခဲ့တဲ့ အခင်းကို မြက်ခင်းတွေပေါ်သို့ ဖြန့်ခင်းချလိုက်သည်။ အရှေ့မှာတော့ ရေကန်ငယ်တစ်ခုက သဘာဝရဲ့အလှတရားတစ်ခုနှယ် သစ်ပင်ကြီးနှင့် လိုက်ဖက်စွာ တည်ရှိနေသည်။

အခင်းပေါ်ကို ဝင်ထိုင်လိုက်ကြပြီး မျက်စိရှေ့က မြင်ကွင်းများကို ဟိုဟိုဒီဒီ လိုက်ကြည့်နေမိကြသည်။ ပန်းခြံထဲတွင် ခွေးလေးများကို လမ်းလျှောက်ထွက်ပေးနေကြ‌သူများ၊ စကိတ်စီးနေကြသော ကလေးများ၊ ပြေးလွှားနေကြသူများ နှင့် မြက်ခင်းပေါ်တွင် လှဲလျောင်းကာ အပန်းဖြေနေကြသူများ‌က ကိုယ့်အာရုံနဲ့ကိုယ် ပျော်ရွှင်နေကြသည်။