البارت السابع عشر
نعود بالزمن ليوم المحكمة، وقف عصمت متأثرًا وهو يقدّم أوراق ثبوت عدم نسب أبوته لزينة، التي كان يعشقها، ثم نظر لفيروز بمنتهى الحقد والكره
-"أنا قدمتلك كل حب وتقدير ممكن يقدمهم زوج لزوجته، وفي المقابل قدمتي خيانتك ليّا وغدرك.. طب مخوفتيش من ربنا؟.. مفكرتيش في أبنك الناس هاتبصله أزاي.. بعتي دينك ودنيتك.. عشان هواكِ وشيطانك.. أنتي متستهليش تكوني مراتي.. دي ورقة طلاقك"
أنهارت فيروز، ووقعت مغشيًا عليها
نعود لفيروز عندما ذهبت للشاليه عند نضال، الذي تفاجأ بها، وقال متوترًا وهو يلتفت نحو غرفة النوم
-" أنتي أيه اللي جابك هنا؟"
فيروز -" جاية أشوفك.. وحشتني"
نضال مزفرًا -" أحنا مش أنتهينا بقى من الموضوع ده.. أمشي أطلعي برة"
نظرت فيروز للأريكة، فوجدت عليها ملابس نسائية، فقالت والغيرة تنهش في قلبها
فيروز -" أه قول كده بقى..عندك حد.. يا ترى ضحية جديدة.. أوعى تفتكر أني هاسكت وأخاف من الفضيحة.. أنا مستعدة أخرج دلوقتي وأقول لرحمة وللكل على حقيقتك يا نجم.. وأن زينة تكون بنتك أنت .. أنا مش هافضل عايشة بتأنيب الضمير ده لوحدي.. ومش هاخلي غيرك يدفع تمن غلطك وأنت تكمل حياتك من غير حساب"
محسن بيه موجهًا تحقيقه لداغر
-" قولي يا داغر أيه علاقتك باللي حصل في الشاليه؟"
داغر والندم باديًا عليه
-" لمّا سمعت الخناقة اللي بين نضال ورحمة.. ومسمعتش تفاصيل المشكلة.. بعد ما خرج دخلت لبنتي لاقيتها منهارة من البكا.. ومقالتش سبب الخناقة أيه.. بس أنا مرتحتش غير لمّا راقبت نضال اللي راح الشاليه.. وفضلت مستني في العربية.. لحد ماشوفت فيروز بتدخل الشاليه.. الفضول والدهشة خلوني أخرج من العربية أتصنت عليهم.. وسمعت كل حاجة"
داغر بعدما سمع كلام فيروز، كسر باب الشاليه وهجم على نضال، وأطبق على رقبته قائلًا
-" يا ندل يا جبان مش كفاية ضيعت بنتي الأولى.. كمان بتاخد شرف التانية"
نضال محاولًا فك قبضة داغر
-" أنتوا هاتشتغلولي كل شوية.. وبعدين أنا مضربتهاش على أيدها.. هي جات بمزاجها لأنها رخيصة.. وخلاص أنا زهقت من العيلة العار دي.. أنا هاطلق بنتك واخلص منكم ومن قرفكم كلكم.. أمشوا أطلعوا بره"
داغر _" مش قبل ما اخلص منك القديم والجديد"
وبدأوا العراك بينهم، يسددون لبعضهم اللكمات، حتى أطرح داغر نضال على الأرض بقوة، ارتطمت على أثرها رأسه بحافة الطاولة، فوقع على الأرض مدرجًا في دماءه حتى مات، فوقف داغر يرتعش من الصدمة، غير مصدق ما حدث، حاولت فيروز في تلك اللحظة أن تهرب، ولكنه أنتبه لها وأقترب منها والشرار يتطاير من عينيه، وهي تتوسل له أن يرحمها، فجلست عند قدميه تبكي
أنت تقرأ
ومن الحب ما ظلم
Misterio / Suspensoدراما / جريمة وغموض الحب أجمل شعور في الوجود، ذلك الذي يجعلك على غير سجيتك، لتخرج منك المشاعر دون ترتيب أو إرادة، تفعل المستحيل من أجل من تحب أو ما تحب، ولكن الحب سلاح ذو حدين، إما أن يخرجك من وحدتك ويحلّ ضيفًا كريمًا على قلبك ليضيء عتمة لياليك، أ...
