البارت السابع
نضال –" برضو مش عاوزة تسافري معايا"
تنظر له رحمة بلا مبالاة
-" أحنا اتكلمنا في الموضوع ده كتير.. وأنت عارف ردي"
نضال –" أنتي قلبك بقى أسود كده ليه.. الموضوع اديله سنة.. أمتى هاتسامحي بقى"
رحمة بتعجب
-" أسامح!.. أسامح مين.. أسامحك أنت يا أكتر حد أذاني في حياتي ولا أسامح أمك وأخوك أنهم كانوا عاوزين يلبسوني قضية شرف عشان تخرج أنت منها والمصيبة أنك كنت موافق وراضي.. ولا مرات أخوك اللي بتكرهني ومش بتضيع فرصة إلا وتضايقني.. أنا كنت ممكن أسامح لو لاقيت ندم منكم واعتذار على اللي عملتوه.. بس صدقني أنا ببذل مجهود كبير عشان أتعايش معاك أنت لوحدك.. فبعد إذنك متضغطش عليا "
نضال " أنتي حرة بس أنا لازم أروح أشوف أمي عشان تعبانة شوية.. أنتي هاتعملي أيه؟"
رحمة _" هاروح أقعد عند ماما لحد ماترجع "
وسافر نضال للمنيا
_" ما أنتي كويسة أهو يا أمي.. أومال حامد قالي ليه أنك تعبانة "
قدرية _" عشان ترضى تيجي.. أخص عليك يا نضال سنة يا أبني متجيش تشوفني.. قستك عليّا بنت نهال "
قال نضال والضيق يعتلي وجهه
_" رحمة ملهاش دعوة.. كان عندي مشاكل في شغلي"
قدرية بقلق _" مشاكل أيه يا حبيبي "
نضال _" مش مهم دلوقتي "
قدرية-" يا أبني قولي متوقعش قلبي "
نضال –"كنت أنتجت فيلم ومثلت فيه وأتوقف من العرض وفلوسي ضاعت على كده "
قدرية _" فداك يا نور عيني متزعلش نفسك.. ولو عاوز فلوس قول لحامد وخد اللي أنت عاوزه"
نظرت نجات لحامد نظرات ضيق وهي تلوي فاهها، وأجتمع نضال وحامد في المكتب
نضال _" يعني أيه مفيش سيولة.. أومال فين إيراد الارض والمزارع"
حامد بتلجلج _" اللي جاي على أد اللي رايح يا أخويا "
نضال _" حامد أنت فاكرني عيل صغير هاتضحك عليه"
رد حامد بعصبية وأخرج أوراق من درج المكتب وألقاهم أمام نضال قائلًا
_" بتخوّني يا نضال.. أتفضل أدي ورق الأملاك كلها أقراهم وأتأكد بنفسك.. عشان أخوك حرامي"
نضال _" أنا مقولتش كده "
حامد _" قولتها يا أبن أمي وأبويا.. بس أنت مأخدتش بالك.. مأنت يا نجم النجوم عايش في فيلل ومقضيها سفر وانبساط وأنا أشتغل في الأرض زي التور في الساقية وتاخد أنت الفلوس على الجاهز.. وبعدين أن كنت ناسي أفكرك الفلوس اللي بتاخدها مني أديلك سنين تعدي حقك وزيادة.. وأنا بقول ده أخوك مينفعش تحاسبه.. بس صدق المثل اللي قال إن كنتوا أخوات أتحاسبوا.. تعالى بقى نتحاسب واللي ليه حق ياخده"
أنت تقرأ
ومن الحب ما ظلم
Misteri / Thrillerدراما / جريمة وغموض الحب أجمل شعور في الوجود، ذلك الذي يجعلك على غير سجيتك، لتخرج منك المشاعر دون ترتيب أو إرادة، تفعل المستحيل من أجل من تحب أو ما تحب، ولكن الحب سلاح ذو حدين، إما أن يخرجك من وحدتك ويحلّ ضيفًا كريمًا على قلبك ليضيء عتمة لياليك، أ...
