ياسمح المحيا جر الهجينية

الجزء الخامس عشر

             ،،الـجـزء الـخـامـس عـشـر،،
سبحان الله وبحمده عدد خلقه ورضا نفسه وزنة عرشه ومداد كلماته..
.
..........****..........
بيت بادي
بادي واقف وجنبه شنطته
عباير وبخوت وحلايا سلموا على جدهم وكان سلامه لهم حار جدا
سعود قباله بكم خطوة تقدم بعد ماابتعدوا اخواته عن جده وسلم على راْسه ويده
بادي مسك يد سعود ماتركه:سعود
سعود:سم ياجد
بادي ضغط على يده:خواتك ياسعود
سعود:روحي فدا
بادي:الضيف ياسعود؟
سعود:نارنا حية(يكرم ضيفه)
بادي كشّر بوجهه:بلاوي هالديرة
سعود بابتسامة:انا ابلى منهم ياابو نشمي
بادي بتشديد:الضعيف عاونه والظالم ردّه والإحسان واجب
سعود:على امرك
بادي زفر:وينه الرجال مالفى لذوان(للحين)؟
سعود:الغايب عذره معه وحنا ماوقفنا عليه
بادي ترك يد سعود ومرر نظره عالبنات وبخوف:خيّاتك ياسعود خيّاتك
سعود:لاتوصي ياجد روحي عنهم
بادي طالعهم:استودعتكم الله ياقليباتي
سعود:فمان الله ياجد وادعناك الله
بادي ابتسم وهو يمشي بيخرج:فمان الكريم وحفظه
بخوت:ادع لنا ياجد
عباير:لاتنسى اللي وصيتك به
بادي:ان شاء الله ان شاء الله
حلايا:جب لسمايح اخت(لعبتها)
بادي التفت عليها وباسها:ابشري ثنتين ماهي بوحدة،،خرج جدهم متجه لمكة مثل ماتعودوا كل سنة،،
سعود رافق جده لحد ماركب السيارة اللي بتوصله للباص ورجع البيت وبابتسامة:عباير
عباير طالعت ابتسامته وفهمته:ابشر على امرك ياابو متعب
بخوت طالعتهم بتكشيرة وهي تعرف حركاتهم:الله يعدي هالشهرين على خير
.
عند بتال
بتال وقف بالسيارة قبال بيت مفلح
ثريا نزلت وميلت راسها تكلم بتال من ورا وهي ماقفلت الباب:كثر خيرك ياولد الاجواد ادري هالشايب مابيقول شي
بتال ابتسم
مفلح التفت عليها وبعصبية:طسّي لابارك الله فيش طسّي
ثريا قفلت الباب بقوة ومشت
مفلح:هين هين وصلنا البيت اعلمش طبش هين
بتال كاتم ضحكته وهو يشوفها
ثريا واقفة ع باب البيت وبصوت عالي:تعال وعلمني هذا اللي تقوله دايم وماوراك طب يالكذوب
مفلح فتح بابه
ثريا دخلت وقفلت الباب بقوة
بتال صدّ بوجهه مايبي ينفجر يضحك عند مفلح
مفلح نزل وصد بوجهه وهو يقول:استر ماواجهت
بتال بابتسامة:ماجا منك الا كل خير
مفلح طالعه:غيّر اللي عليك كان تبي احد يدلك محدن معلمك شين وانت بهاللون
بتال:ان شاء الله مشكور ياعم ماقصرت
مفلح:توكل توكل
بتال حرك بسيارته مبتعد عن بيت مفلح ووقف على جنب نزل منها وفتح شنطة السيارة خرج شنطته وفتحها وخرج ملابس يبي يبدل
....****....
،ورا البيوت تحديدا جهة المسبح،
جواد يطالعه بصدمة:عمي
ابو غازي عطاه كف على وجهه وبغبنة:وعمى يعميك ويقص يديك ورجولك
جواد زفر بغبنة وهو صاير ملطشة لهم
ابو غازي مسكه من بلوزته وحركه:مين تكون حتى تمد يدك على امجاد!!لاتغتر انك ولد مسفر بالعكس هذا سبب يشجعني أذبحك
جواد دف يده وبعصبية:اوو اووه تراكم زودتوها
ابو غازي مسكه من رقبته وضربه بالجدار
جواد انصدم
ابو غازي:اااه والعجرة(عصا حقت مضاربات🌚)اللي مطبّها برأسك
جواد بلع ريقه
ابو غازي ثبته بالجدار:من تكون حتى تمد يدك من انت ها!
جواد:عمي انا ماقصدت اضربها
ابو غازي:تقصد ولا ماتقصد الحق حق تشوتك مثل ماشتها
جواد تغير وجهه
ابو غازي ابتسم:علامك حقك ماخذه مآخذه
جواد حاول يفك يده
ابو غازي ماسكه ومثبتة مو وهو يجره وراه
جواد صرخ:ماابي امجاد ياعم ماابيها
ابو غازي وقف ووقف جواد معه والتفتت له:ومن اللي قال اني بزوجك امجاد!!!تعقب وتخسي ياقليل الخاتمة!!،،ثبته ع طرف الجدار واتصل وبحدة،،تعالي انتي وأختك بعبيّكم(عباياتكم)
.........****..........
بتال وقف عند رجال:السلام عليكم
الرجال ابتسم له:وعليكم السلام والرحمة
بتال:بغيت اسأل وين المركز
الرجال مد يده لقدام وأشر:كت تحت كيلو تفطّن لاتجنّب ثم تجيك المزارع احْدِهِن محادى ولاجنّب فيك الخط وميّل يسار عوّد وكت فوق ثم امش كيلو وبتعينّه
بتال يطالعه يحاول يفكك كلامه فهم شي واشياء لا
الرجال:ها عرفت؟
بتال ابتسم:ايه مشكور يكثر خيرك ماقصرت
الرجال دخل يده عند بتال وهو يمسكه:ياحياالله الضيف يالله ان تحييه
بتال:الله يسلمك ويبقيك
الرجال:والله ماتكتّ ولاتغدي مكان الا وانت متقهوي ومتعشي
بتال:يكثر خيرك ويجود الله عليك لكن مستعجل والله خلها مرة ثانية
الرجال:لامرة ثانية ولا أولة الحين الحين قهوتك وعشاك عندي
بتال بنفسه:ابوك يالنشبة..والله اني مشغول بالحيل يابن الحلال وابي الحق اخلص أموري قبل الليل تكفى خلها مرة ثانية
الرجال زفر:اجل لاعوّدت عشاك عندي،،ضرب صدره انشد عن ابو خالد ويعلمونك
بتال بابتسامة:أبشر أبشر كثر الله خيرك وبيض الله وجهك ماتقصر،،حرك سيارته،،استأذنك انا فمان الله
الرجال:تحّرص(انتبه)وانا اخوك من واحدن متشحّط أهل الديرة شافه ابو خلف يقولون انه ذابح له واحدن وهاج يمّنا تحرص وانا اخوك
بتال يطالعه بطيف ابتسامة وهو عارف انه يقصده وبنفسه:الله متى ذبحت احد وشارد بعد!!..مشكور رايتك بيضا الا ابي اسالك بيت ابو نشمي وينه؟
الرجال كشر بوجهه وبحدة:وش تبي فيه؟!!
بتال عقد حواجبه مستغرب من ردة فعله:لي شغلة بسيطة عنده ابي اخلصها وأمشي
الرجال:بيته قبال بيت الشيخ وبيت الشيخ تعرفه لاشفته
بتال:جزاك الله خير كلفت عليك واتبعتك معي
الرجال:ماهناه تعب لكن انتبه من هالرجال اللي انت غادين(رايح)يمّه تقابل المتشحّط ولاتجلس معهم
بتال كشر بوجهه ودخل قلبه الشك وعدم الراحة من ابو نشمي وحرك بسيارته داخل للديرة وهو يدور بيت ابو نشمي
.
بيت عوض
ام طلق بيدها المبخرة تبخر ثوب ابو فارس وهي مبسوطة سمعت صوت الباب وخرجت وشافته ثم زغرطت وسط ابتسامة كلها فرح:ياحي الله طلق ياحي الله معرسنا،،زغرطت وهي تمشي له،،ومبارك العرس الاثنين،،وقفت قدامه وهي تبخره،،ليلة ربيع عين وقمرا
طلق بجدية:يمه ماابيها
ام طلق اختفت ابتسامتها:وربي حرام فيك هالبنية
طلق:ودام حرام فيني خليها تشوف رزقها مع غيري
ام طلق بحدة:وانت بتشوف رزقك مع من؟
طلق:ماني متزوج انا مرتاح بوضعي الحين
ام طلق:عباير وأنساها ياطلق لو تقطع نفسك لها مارضت فيك عقب سواتك
طلق صرخ:يمممه!!
ام طلق صرخت:وصمّة(صمم)تنافخ بوجهي اذا بتخنفر(تعصب)خنفر على روحك!!انت وسويدين الوجه
طلق بحدة:كم مرة اعلمش انا مالي شغلن بشي!!الوجه من الوجه ابيض!!علامش يمه انتي مع الناس على وليدش!!
ام طلق:ايه على وليدي اذا انه ظالم الله مايرضى الظلم!!
طلق ضحك
ام طلق كشرت بوجهها
طلق:يمه تراني خابرن الاول والتالي!!العلم الصحيح ماهو بظليمة العلم إنش من الاول تبين شامة لي وجت من الله هالمصيبة وافتكيتي من عباير وارتحتي منها!!
ام طلق ابتسمت:صدقت والله انك صادق ياولد والحين قم قم وتولّم عمك يحتريك
طلق بقهر:يمه ماابيها
ام طلق:تبيها ولا ماتبيها الليلة العقد وبعد بكرة بتاخذها لبيتك حليلةٍ لك
طلق انصدم ماتوقع ان كل شي يصير بسرعة حس برجفة سرت بجسمها وتوسعت عيونه:وش توجسين يمه!!
ام طلق:هذا العلم الصامل مير افزع وتولّم هي ليلةٍ وحدة وانا امك تونس بها واترك قنقك اللي مابيودي ولايجيب،،عطته ظهرها وهي تغني مبسوطة وتبخر نفسها،،ومبارك العرس الاثنين ليلة ربيع عين وقمرا واللي جمع بين قلبين الله يطول بعمره!!
طلق اللي كان صوت غنا امه المليان فرح يرسم بعينه مستقبل يشوف نهايته ممر طويل ينتهي بسجن للنهاية بدون سعادة بدون مفر من هالزواج اللي تدبس فيه جلس وهو يمسك راْسه انتهى كل شي بعينه بهاللحظة
.
بيت بادي
عباير بكامل حشمتها واقفة برا البيت وتحديدا تحت العشّة تفرش فراش من الخصف(سعف النخل)وهي تدعي:يالله انك ترده سالم غانم ويكيد العْدا
ابو هليّل مار من جنبها وبينهم مسافة بسيطة
عباير رفعت صوتها وهي منحية تعدل الخصف وتوازنه:وتجعله خنجر بنحورهم ياكريم
ابو هليّل وقف وطالعها بحدة:خير يابنت متعب تدورين المشاكل مثل جدش واخوش!!
عباير شهقت وهي تعتدل واقفة:لاااااإله الا الله اللهم ياكافي!!،،جلست وهي تسحب الفناجيل والكاسات اللي جايبتها معها من البيت ترتبها فوق الخصف بعدم اهتمام لكلامه،،علامك غادين يمي وانا مااوجست شين لك!!
ابو هليّل:مايحتاج توجسينه عارفين مغزاش ياعباير
عباير وهي تتنهد:مير الله يجازيك يوم انك ظالمني وانا ادعي لجدي يعوّد سالم!!
ابو هليّل:صكّي فمش وكملي شغلش وخليش بحالش المفروض إنش قانعة بعد اللي صار!!
عباير كشرت بوجهها وبحدة وهي تتصنع انها مو مهتمة لوجوده وكلامه:والله لولا الناس يوجسون عني وسط العرب ماربوها اَهلها وشانت أخلاقها مع رجلن غريب عنها وكبير بعد كان علّمتك وشلون قنعت من سنين من هالديرة اللي مابها خير!!
ابو هليّل ابتسم:مايحتاج توجسينه عارفين امرش!!
عباير حذفت الفنجال اللي بيدها عليه وضرب برجله:تخسي مربية غصب عنك وعن أهل الديرة واللي عنده كلمه يوجسها حياه والله لاعلمّه وشلون ربوني الرجال!!
ابو هليّل مسك رجله وهو يتوجع وبصراخ:اعقبي تصاوبيني ياقليلة الحيا!!
عباير وقفت:ماقليل الحيا غيرك بهالمكان!!لافي يمي وترمي كلامك وتبيني اسكت!!والله ان أذبحك واشرب دمك!!
ابو هليّل مشى لها:والله انا اللي اعلمّش وشلون تربية الرجال
سعود وقف بينهم وبحدة:هذاني قدامك ورنّي تربية الرجال ياهلال!!
بتال اللي واقف بسيارته وحضر الموقف من البداية يطالعهم بصدمة ولاتدخل باللي يصير ابد
.........****..........
امجاد ورهايف متجهين لابوهم
ابو غازي يطالع جواد بحدة:صدّ!عطني مقفاك جعله بالهوايل!!
جواد زفر وهو يعطيهم ظهره وهو يدعي عليهم كلهم بحريقة تشيلهم وتمحيهم من الوجود
امجاد وقفت عند ابوها ووراها رهايف:سم يبه
ابو غازي بحدة:نقصي صوتك!!
رهايف:حاضر يبه
ابو غازي:والحين شوتيه ياامجاد
جواد التفت لعمه وبعيون متسعة:نعم!!!
امجاد تطالع ابوها بصدمة
رهايف ابتسمت تحت نقابها برضا عن اللي يصير له
ابو غازي دف جواد عالجدار وهو يلفه يخليه يعطي ظهره للبنات صرخ:شوتيه اقولك!!!
امجاد فزت
رهايف بكت
ابو غازي طالع رهايف وبعصبيته صرخ:علامك انتي بعد وش فيك؟!!
رهايف وهي تشاهق:يبه تكفى اتركه يبه طلبتك
امجاد التفتت تطالعها مصدومة
ابو غازي اتسعت عيونه
جواد قشعر كل جسمه وهو يسمعها
رهايف برجفة صوتها:يبه قبل السالفة اللي صارت لأمجاد جواد كلمني يبيني له واني انتظره يخلص اموره بس انا رفضت وقلت له ابوي موجود كانك صادق وسواتك ذي سواد وجه وهو شكله زعل عشان كذا سوا سواته
جواد انخرس من صدمته من كلامها ولف غصب عنه يطالعها من الصدمة
امجاد تطالعها برعب من اللي بيصير من كلامها
ابو غازي ضربها كف على وجهها بكل قوته طيحها عالارض
جواد انفجع من عمه ووقف بينهم وهو متوقع يذبحها بعد كلامها:ياعم قل لااله الا الله
ابو غازي طالع جواد وهو يزفر وعيونه كلها شر:اذلف عن وجهي لأدفنك الحين بمكانك،،صرخ،،اذلف
جواد واقف بينهم بتردد مايبي يترك عمه وهو يعرف اطباعه نطق وهو يستجمع شجاعته:ماهو قبل ماتحلف ماتسوي لها شي
ابو غازي طارت عيونه وضرب جواد
جواد واقف بمكانه ماتحرك
ابو غازي طالعه بغبنة وهو يصر ع اسنانه:اذلف وجب ابوك تعال ياويلك لو تتأخر دقيقة ياجواد ذبحتك انت وهي ودفنتكم الليلة اذلف!!
.
بيت ابو عادل
راشد دخل لغرفة امه
عذبة متمددة عالسرير
راشد جلس جنبها:اميمتي ياأم راشد قومي اشوفك ماشفتك اليوم؟ماشبعت منك
عذبة جلست وهي تبتسم:حياك الله ياراشد هلا بعيني
راشد:وليش تاركة عيونك لحاله؟
عذبة:وانت بتترك امك لحالها!!
راشد تنهد وهو يمسك يد امه يبوسها:شغل يمه والله شغل ثم ماني مطول يمه راجع كلها كم شهر وراجع
عذبة بضيقة:ادري ياروحي لكن قلبي مايطاوعني
والله اني محروقة لفراقك
راشد باس راسها:يمه!!كل نهاية اسبوع وانا عندك وبأكلمك كل يوم امريني شي ثاني؟
عذبة:الله ان يوفقك هذا اللي اقوله
راشد ابتسم:امين امين يمه عاد تكفين يمه مشتاق لدلتك اللي ترد الروح
عذبة:ابشر مالك الا طيبة الخاطر،،وقفت ومشت،،انت بس تريح على ماازين لك ذيك الدلة والحلا ثم نتقهوى سوا
راشد مشى وراها:يسلمك لي يمه ولايحرمني منك
عذبة التفتت له
راشد وقف
عذبة:اترك عنك العنا وتريّح
راشد بابتسامته الهادية:ان شاء الله يمه ان شاء الله ابشري
عذبة نزلت للمطبخ
راشد اتجه لغرفته ودخل
جسّار اللي متخبي ورا الباب اسرع بخطواته وهو يغطي عيون راشد بيديه:روش هل تحبينني؟
راشد زفر:اذلف عني ولّا بتشوف روش الصدقية!!
جسّار تركه وهو مكشر وبزعل:يمه منك وش فيك الأخلاق زيرو
راشد التفت له وحواجزه مرتفعة:تعرفني وتدري اني اكره هالسخافات تسويها ليه
جسّار تنهد وسبقه لسريره وهو ينط ويرتمي عليه:اااه ياروشة اااه،،تمدد على بطنه وهو يصد بوجهه عن راشد،،
راشد عقد حواجبه وهو يشوفه ويسمعه اتجه لدولابه وهو يفتحه:وش فيك؟
جسّار بضيقة:نصفنا الاخر وراح وانت بعد وبتروح وبأقعد أنا لحالي
راشد ابتسم:وغازي بعد بيروح
جسّار جلس وهو يسحب المخدة ويحذفها عليه وبنرفزة:والتـ*** والله
راشد ضحك بعد ماضربته المخدة والتفت عليه:ادري كل هالضيقة مو بعشاننا عشان مافيه احد تبلع على حسابه
جسّار توسعت عيونه وهو يغطي فمه وبدلع:الله يسامحك!!
راشد قشعر جسمه:الله يجيرك ياجسّار اقرفت ام امي بهالمصاخة
جسّار رجع يديه ورا رقبته وهو يتمدد:تستاهل حتى ماتظلمني مرة ثاني
راشد:لا عز الله ماني بظالمك اذا مو عشان بطنك يالمعصقل عشان بيجيك جلد من خالي لحالك
جسّار يطالعه عن طرف:وش فيك صاير ظالم؟
راشد؛والله
جسّار قاطعه:لحظة لحظة لحظة
راشد كشّر بوجهه:لاتصير سامج وتغني عاد!!
جسّار:ذكرته والله!!ماني مخليها بخاطره!!
راشد توسعت عيونه:الحمدلله والشكر وهو وش درّاه!!!
جسّار:وظالم ظالم ظالمني..أبلا أسـ
راشد جرى للسرير ونط فوقه وهو يسحب المخدة ويغطي وجه جسّار:اوووووص عارف حركاتك انااا
جسّار انكتم ودفه عنه وطيّره ثم نط وجلس فوقه وهو يثبت راشد بيده من رقبته وبابتسامة:وش فيك؟خايف اذكرك بالحبيبة!!
راشد تغير وجهه ودفه بقوة وجلس فوقه وبعصبية:ذبحتوني كم مرة اقولكم مااحبها لاتورطوني فكني من لسانك وبلاويه ياجسار
جسّار دفه عنه بقوة
راشد جلس جنبه وهو يتنفس بسرعة
جسّار وهو يضحك:لاتصيح لاتصيح خلاص ماتحبها
راشد كشّر بوجهه وبحدة:جسّار!!
جسّار عطاه ظهره وهو يحط يده تحت رقبته
راشد:رح بيتكم جسّار
جسّار:وهذا مو بيتك بيت جدي
راشد زفر وهو فاهم جسّار:قم ياجسار بتال وراح الخين دورك
جسّار سكت
راشد وقف ومسكه من يده وهو يسحبه:قم قم رح لبيتكم قم
جسّار بدلع:مااابي تكفى راشد تكفى
راشد تركه:الحق علي اللي اواسيك
جسّار مد يده لراشد وبضحكة:قومني قومني
راشد مسكه من يده وسحبه يقومه:عاد لاتصير خبل وتزيد الموضوع
جسّار مشى خارج:ان شاء الله ان شاء الله
.
بيت مسفر
جواد داخل بوجه مخطوف يدور ع ابوه وقف عند امه اللي جالسة بالصالة ع جوالها:يمه وينه ابوي؟
ام جواد عقدت حواجبها:بالدوام ليش؟
جواد باستعجال وهو يلف عنها ويخرج جواله:مافي شي مافي شي،،اسرع بخطواته متجه للباب بيخرج وعينه بجواله يتصل ع ابوه وقف وهو يفكر،،خله يذبحها!!،،ابتسم،،منها انفك منهم كلهم!!
.
بيت عادل
..غرفة غازي..
غازي جالس ع طرف السرير ببذلته العسكرية منحني وهو يقفل أربطة البسطار اتجه للتسريحة وهو يوقف قبالها ويطالع نفسه بالمراية بكل همة وشجاعة سحب البريهة(طاقية العسكر)وحطها على راسه ووازنها اخذ نفس وهو يرتب بذلته ويمسح عليها تقدم كم خطوة وانحنى لشنطة اغراضه وشالها بيده اليمين ثم اتجه لباب غرفته بيخرج وقف وهو يستجمع كل مشاعر الفراق ويطردها وهو مقتنع جدا بل راضي تمام الرضا بوضعه وفخور بمهنته لابعد مدى دام انه للوطن ولأجل الوطن يرخص دمه وهذا شعاره فتح الباب وخرج وهو يرسم ابتسامة واسعة على محيا وجهه ومشى متجه للدرج بينزل تحت ويوادع اهله
ام غازي قابلته وهي بتنزل ابتسمت وهي تشوفه:هلا يمه هلا بعيني
غازي سلم على راسها وهو يحط يده على كتفها ونزل الدرج وهو محاوطها بيده
ام غازي:مطول هالمرة؟
غازي:والله يمه ماادري بس تدرين اني تغطية يعني معهم بكل كبيرة وصغيرة
ام غازي رجعت يدها ورا ظهره وهي تشده اكثر:الله يحفظك ويحرسك بعينه ياعيني
غازي:واخوياي؟والجيش كله؟!!
ام غازي ضحكت بخفة:الله يردكم سالمين غانمين ظافرين ياولدي وتقر عيوننا بكم
غازي باسها على راسها:امين امين ياعيني  الله يسمع منك ويعجّل به
ابو غازي داخل للبيت وهو ماسك رهايف من شعرها يجرها معه
رهايف تبكي وهي تترجاه:الله يخليك يبه اتركني اتركني الله يخليك
امجاد ماسكه يد ابوها وهي تحاول تفكه عن رهايف وبخوف وسط دموعها:يبه اتركها تكفى يبه اتركها
ام غازي انفجعت وهي تشوف اللي يصير وصياح بناتها وترجيهم
غازي بنص الدرج ترك امه ونط الدرج بدون مايحس وانلوت رجله لكن وقف وكمل وسحب رهايف من يد ابوها بالقوة ورجعها وراه وهو يطالع ابوه بحدة وضام اخته بيديه ورا ظهره وبصراخ:يبه!!وش فيك!!
ابو غازي بحدة وهو يأشر بسبابته:اذلف عن وجهي وخلني مع سويدة الوجه اللي وراك
رهايف فكت يدين غازي عنها وبصراخ وهي تخرج من ورا غازي وتطالع ابوها وبدموعها:ليش سويدة وجه!!انا سويت جريمة!!قابلته!!كنت خارجة من بيت جدي وهو داخل قالها لي قال ابيك لي تنتظريني لحد مااكمل اموري بس وانا رديت وقلت له تعرف ابوي وش الجريمة ها!!هو اللي ينضرب وينذبح مو بأنا يبه،،صرخت،،مو بأنا!!
غازي طالعها بصدمة
ابو غازي صرخ:وتبيني اصدقك ها؟!!كم مرتن قابلتيه من وراي ها؟!!هاااا!!!!
رهايف:اذا انت شاك فيني وبتربيتك اذبحني يبه اذبحني وارتاح
ابو غازي عض شفته وهو يشد قبضته هايج ووده يذبحها:اااه منك اااه
غازي:يبه رهايف صادقة والبنت تربيتك وعلى حطت يدك!!مايصير تتهمها ظلم!!وبعدين يبه هاذي رهايف رهيفة قلبك وشلون ماتصدقها!!
ابو غازي اخذ نفس وهو يطالعها:اذلفي لغرفتك ولا جا عمك اتفاهم معك
رهايف طلعت لغرفتها ومشت وراها امجاد
ابو غازي طالع بغازي بحدة:وانت كم مرة قايل لك لاتلبس البذلة بالبيت البسها بدوامك!!
غازي تنهد:مستعجل يبه
ابو غازي:الشكوى لله من ناسٍ ماتفهم لحد ماتصيبهم المصيبة!!،،مر من جنبه وطلع لغرفته بسرعة،،
غازي تنهد وهو يطالعه:فمان الله يبه استودعتك الله،،طالع امه وسلم عليها وابتسم،،انتبهي عليهن يمه لو اقدر كان جلست وجلست الموضوع
ام غازي:توكل ياعيني توكل بحفظ ربي الله يحميك ويردك سالم
.........****..........
         الليل
.........****..........
..بيت بادي..
،،الجزء المهجور،،
سعود بعد مالف ببتال داخل البيت بابتسامة:وهذا هو بيتك ياطويل العمر والسلامة
بتال وبينه وبين سعود مسافة ولازال مشهد التحدي بين سعود وابو هليّل بباله طالعه وهو يقارن ابتسامته معه ووقاحته قبل شوي مع الشايب جامله بابتسامة بالغصب رسمها على وجهه:سلمت سلمت
سعود مد له المفتاح:وهذا هو المفتاح منزلن مبارك وانا اخوك
بتال مد يده واخذ المفتاح وبرسمية:مشكور ماقصرت
سعود وهو يمشي متجه للباب بيخرج التفت عليه اول ماوصل للباب ومد يده
بتال صافحه رغم التردد اللي لاعب فيه
سعود بابتسامة:اذا احتجت شي خذ دورة حول البيت تعرف الباب وأبشر وانا اخوك اعين واعاون،،ترك يده،،عاد اكبّك تريّح ثمّن من اصبح افلح فمان الله،،خرج،،
بتال قفل الباب وراه وقفله لحد ماوقف ماعاد يقفل اكثر وجلس وهو يتكي بظهره عالباب ويمسح على يديه يحس بقشعريرة مرت بجسمه:يمه وش هالرجال!!وش هالديرة اللي محد يحترم الثاني،،مرت بباله عباير وهي تتهاوش تغير وجهه،،اويلي عليك يابتال حتى حريمهم يمردغون رجالهم!!،،تذكر ابوه وزعله،،تستاهل هاذي بداية عقوقك تستاهل يابتال والخيبة والله والخيبة!!
سعود برا ورا الباب ابتسم وهو يشوف تصرف بتال الرسمي عكس كلامه معه عالجوال واضح انه اجتماعي ابتسم وبخاطره:الظاهر روعّته انت وأختك،،مشى كم خطوة وقف وهو يشوف واحد متلثم قباله عقد حواجبه وبحدة،،انزع لثامك واوجس اللي عندك
الملثم خرج خنجره وسدد لسعود طعنة ببطنه
.
..بيت عادل..
...المجلس
ابو غازي يروح ويجي بالمجلس مو قادر يجلس على أعصابه كل شوي يطالع ساعته زفر وهو يشوف الوقت يمر ومافيه اي بوادر استجابة لتهديده خرج جواله من جيبه واتصل وبحدة:وينك؟!!
ابو جواد بشغله استغرب:بالمستشفى ليش؟
ابو غازي توسعت عيونه:اسمعني يامسفر ان ماحضّرت قدامي انت وهالعلة ولدك ورب البيت انه اخر مابيني وبينك،،قفل بوجهه وهو يتحلّف بجواد،،
..غرفة امجاد ورهايف
رهايف على سريرها متغطية كلها
جسّار جالس ع طرف سريرها يطالعها بوجه اسود من الهم بعد مادرا بالموضوع
فيصل واقف جنب الباب ومتكي بظهره عالجدار وهو متكتف يطالعها بصمت وواضح على وجهه القهر
جسّار بهدوء:رهايف ارفعي اللحاف عنك خليني اشوفك
رهايف شدته اكثر عليها
جسّار زفر:وبعدين اجلسي خليني افهم الموضوع عشان ارد على ابوي لو قال لك شي!
رهايف ماردت
فيصل اسرع بخطواته وسحب اللحاف بقوة من عليها وبعصبية:اخلصي علينا خلينا نتفاهم معك
جسّار وقف وسحب اللحاف من يده ودفه عالخفيف لورا وبنبرة عالية شوي:وش فيك انت؟!!
رهايف جلست وطالعتهم بشعرها المنكوش وبوجهها اللي عليه اثر ضرب ابوها وبعيونها الحمرا من كثر بكاها رغم انها وقفت بكى من فترة وبأخلاقها القافلة:نعم خير!!وش تبون انتم بعد؟تبون تكملون علي مثل ابوي!!
فيصل طالع شكلها بصدمة ماتوقع ابوه بيوم يسوي كذا بوحدة من خواته وهو يدري ان البنات خط احمر عند ابوه تغير وجهه وارتسم الحقد وخرج بخطوات سريعة من الغرفة
جسّار تنهد وهو يشوف وجهها:متى قلت اني بأسوي فيك شي!!انا سألت عشان اعرف أوقف معك قولي لي كل شي لاتخبين لو هو مثقال ذرة خليني اعرف
رهايف:مثل ماقالوا لك جسّار تكفى لاتغثني يكفي ابوي
جسّار اخذ نفس وهو يضبط أعصابه رغم قلة أدبها معه وقف وهو يصد بوجهه عنها:الحين مالي كلام معك بعدين اتفاهم معك زين نامي الليلة وريحي،،خرج،،،
امجاد طالعة الدرج على نزول فيصل بخطواته السريعة وبيدها قطن وكمادات باردة كشرت وهي تشوف وجهه ووقفته:وين؟!
فيصل:رايح لابوي
امجاد بحدة:فصيل لاتتدخل خل الموضوع ينحل بين ابوي وعمي
فيصل طالعها بتكشيرته:وانا قلت شي!!
امجاد مدت يدها وهي تمسك يده:فيصل حبيبي مانبي مشاكل اكثر اركد شوي وربك بيسرها
فيصل سحب يده وهو ينزل بسرعة ويخرج من البيت
امجاد عقدت حواجبها وهي تشوفه يخرج والمفروض انه رايح لابوها كملت طريقها ووقفت وهي تشوف جسّار:جسّار حبيبي إلحق فيصل
جسّار باستغراب:وش فيه هو بعد؟!!
امجاد:ماني بمرتاحة روح له شوف وش فيه
جسّار بنرفزة وهو يشرع بخطواته يلحقه:الله يعدي الموضوع على خير بس
امجاد كملت طريقها للغرفة دخلت وقفلت الباب وراها بقوة مشت لسريرها وهي ترمي القطن بوجه رهايف وجلست على سريرها وهي تحط الكمادات على الكومدينة بين أسرتهم وبنرفزة:عساك مبسوطة
رهايف طالعتها بملامحها التعبانة وتكشيرتها المرسومة على وجهها اختفت التكشيرة وارتسمت مكانها احلى ابتسامة رغم الملامح اللي ماليها التعب!!
..عند فيصل..
فيصل خارج من بيتهم بسرعة متجه لباب البيت الكبير اللي يدخل على بيوتهم وهو يتصل بجواله:يزيد وينك؟
يزيد(صديقه)متمدد على سريره جلس وهو يحس بنبرة صاحبه المتغيرة:فيصل وش صاير معك؟!!
فيصل:اسمع ابيك تكلم شاهر
يزيد تغير وجهه:اعوذ بالله منه ومن سيرته وش تبي فيه؟!!
فيصل:اللي بأقوله يظل بيننا يزيد
يزيد ابتسم وبجدية:ازهلها وانا اخوك امر؟!!
فيصل قفل جواله بعد مااتفق مع يزيد على كل شي لف وعلى وجهه ابتسامة رضا اختفت الابتسامة وهو يشوف وجهه المصدوم
راشد اللي كان يسقي النخل سمع كلام فيصل كله يطالعه بصدمة مو مصدق
فيصل بتوتر وهو يحاول يجمع أفكاره:أنا أنا
راشد اختفت ملامح الصدمة واحتدت ملامح وجهه الهادية اللي مايليق لها الحدة ابد وهو يلف اللي(الخرطوم😅)اللي يسقي به حول يده وبحدة:ورب البيت ان ماعرفت وين بيترصده خويك   إني لا أعلقك من رقبتك بهاللي فوق النخل واتركك شهر تتدلى يافيصل!!
<اللهم صل وسلم على نبينا محمد>
.
.
اللي يقولون طولي البارت وينكم الله الله بالتفاعل
.
.