ياسمح المحيا جر الهجينية

٤٢

   ،،الـجـزء الـثـانـي والاربـعـيـن،،
لاحول ولاقوة الا بالله العلي العظيم،سبحان الله وبحمده سبحان الله العظيم
.
..........****..........
أم جـلاجــل
.
..قرية عيال عبري..
جسّار يسوق السيارة بسرعة جنونية اتسعت عيونها وهو يشوف المجلس المفتوح قدّامه ومسك فرامل بالسيارة وتردد صوت سحبة الفرامل بالسيارة بالقرية ،،تصميم بيوت قرية عيال عبري مختلف تماما عن ام جـلاجــل اللي حالها مثل حال اي قرية اول ماتدخل للديرة قدامك على طول مشب نار كبير حجمه وعنده كم زولية(سجادة)ملفوفة على بعد مسافة بسيطة عن المشب وزولية وحدة بس مفروشة عنده والبيوت تلف هالمشب بشكل دائري بحيث أبواب الـبيوت تفتح مباشرة على هالمجلس المفتوح،،
جسّار وقف بالسيارة ونزل بهدوء وهو يلتفت حوله مصدوم من الرجال اللي خرجوا من البيوت وهم مصوبين أسلحتهم عليه بتكشيرة معتلية وجيههم رفع صوته وبحدته:انا ابي وادي السيل ماابي شي منكم ولاناوي أذية
ضبعان وقف من ورا نار المشب العالية اللي تاكل بعضها من شدة اشتعالها بظهره المنحني وهو يستند بخطواته ع مركوعه واتجه لجسار وهو يمر من المشب ويوقف قدّامه واستند بيديه هالمركوع وبجلافة صوت وبهيبة تكتسيه:ويوم انك توجس ماانت ناوي اذية وراه دخلت على محارمنا بالقوة!!
جسّار بسرعة:انا ماني من دياركم ولا لي شغل باللي يصير بينكم كل اللي ابيه المسيل ابي الحق على اخوي تكفى طلبتك
ضبعان تنهد وهو يرفع يده ويأشر بمعنى نزلوا السلاح ورجع يده لمكانها وعينه على جسّار:ياولدي لايغرك طواري الديار الشينة ماحنا بمعتدين على احد من غير وجّهْه(حق)ثمن كل ماصب المسيل غدينا يمّه نلحق من نلحق ونصلي عاللي مالحقناه
جسّار زادت نبضات قلبه اكثر وتوتر وهو يسمع كلامه
ضبعان:الحصيلة اليوم اثنين ياولد اثنين والله يلطف بهم ويرحم حالهم،،عطاه ظهره ومشى،،
جسّار مشى وراه بسرعة
ضبعان عدا المشب ووقف والمشب على يمينه بشي بسيط وقدامه على مسافة شخصين ممدين بشكل طولي بنفس الاتجاه وبينهم مسافة كم خطوة ومغطينهم ببطانيات بالكامل
جسّار تباطت انفاسه وهو يطالعهم من بعيد مو واضحة له الوجيه زفر بصوت عالي وهو يحس بجبل فوق صدره كاتم على انفاسه اللي بالقوة يسحبها
ضبعان التفت له عن جنب وهو يطالعه عن طرف:راع اي واحدن اخوك والله يعينك على مصابك ويجبره
جسّار تقدم بخطوات يجرها من زود الثقل اللي يحسه برجوله وهو يسمع صوت انفاسه البطيئة من الخوف يتمنى بتال يكون منهم وبنفس الوقت مايتمناه منهم وهو يشوف هدوء حركتهم اللي ماتدل عالحياة بشكل يخوف وقف عند الشخص الاول وهو ينحني شبه جالس وطالع يد الشخص الممتدة من برا البطانية ومد يده اللي ترجف بشكل واضح حتى يشوف نبضه ورغم انه أعلن عن حالات وفيات قبل لكن هالمرة غير غير ابد وكيف ماتكون غير واحتمال يكون المتوفى اخوه لامس يده وارتعب قلبه وهو مايحس اي نبض ابد رفع يده بسرعة وسحب البطانية عن وجهه بسرعة برعب نزل راسه بين رجوله براحة وهو متطمن انه ماهو ببتال بلع غصته ثم رفع راسه وهو ياخذ نفس وغطى المتوفي قدّامه ووقف وعينه مثبتة عالشخص الثاني الممتد قدّامه بكم خطوة شد ع قبضته وهو يحس بالتوتر والخوف اهلكه وكبره سنين مشى وهو يجر خطواته ويستعد للتجربة من جديد وقف عند هالشخص وانحنى شبه جالس عند راسه وعقد حواجبه وهو يشوف طرف شعره واضح سحب البطانية عن وجهه بخوف  وانقبض قلبه وهو يشوفه ورفع البطانية وهو بنفس وضعه ورماها بكل قوته بعيد وهو يمسك يده يفحص نبضه وسط رجفته الواضحة لكل اللي حوله زفر وهو يجلس عالارض ماتحمل يظل شبه جالس من اللي مر فيه دخل يده داخل كم ثوبه وهو يطالعه بعيون امتلت دموع ومدها وهو يمسح الطين اللي على وجه اللي قدامه بطرف ثوبه وسط دموعه اللي طاحت وزفر:اااه يابتال!!،،واستمر بمسح الطين عن وجهه وسط دموعه اللي يبلعها وهو يحمد ربه بينه وبين نفسه على سلامته،،
بتال بوجه مو واضحة ملامحه مغطيه الطين كله مرتمي عالارض بهدوء حركة غريبة عليه ومغطى ببطانيات فوقه حتى تدفيه
ضبعان من وراه ابتسم:ماتوقعته خيّك(اخوك)توقعته المتوفي الله يصبر اهله الحمدلله على سلامته قرت عينك به الصحيح ماأحويلنا شين ابد لامستاصف ولاغيره والخط مايعاون بعد الغيث وأوجسنا الصبح نفزع به ومن اصبح افلح
جسّار ماانتبه للي يقوله الرجال  او بالاصح مااهتم ابد للي ينقال كل عينه على بتال مو مصدق انه لقاه وحي بعد
فارس دخل وهو يدف ناصر قدّامه بطرف سلاحه
ناصر يمشي قدّامه بهدوء وعينه بالارض
فارس بحدة:امش امش!،،دفه بقوة برجله،،الخوان خوان
ناصر تقدم بخطواته ووقف ورا ضبعان
ضبعان التفت لمصدر الصوت وطالع ناصر واختفت ابتسامته وبحدة:وش غادي به يمنا يافارس!!
فارس بغبنة:هالخسيس غادي ومعه،،انتبه لجسار ومشى له بخطوات سريعة وهو يوقف عنده ويشوته برجله بكل قوته،،
جسّار ماانتبه لهم ولاهموه ابد ماحس الا بالضربة ع جنبه وانخطف وجهه من قوة الالم وهو يحط يديه ع مكان الضربة
فارس بصراخ وسط غبنته:وهالخسيس اللي غدا يم الديرة رفيقن له
.
..........****..........
..بيت عادل..
،،الصالة،،
امجاد جالسة قبال ابوها تقهويه وهي متوترة بعد اللي سمعته
رهايف جالسة وهي تطالع ابوها تنتظر تفسير  منه
ابو غازي يتقهوى بهدوء
امجاد بخوف:يبه اللي قلته صدق؟؟ماراح نشوف بتال ابدًا؟!
ابو غازي مارد
رهايف بنرفزة:يبه رد علينا صدق راح يحرمنا ذا الشايب من بتال؟!
ابو غازي نزل فنجاله:صدق يارهايف صدق
رهايف بعصبية:مو بكيفه!!بتال اخونا وش يحرمنا منه!!وبعدين بتال عقله براسه محد له كلمة عليه!!هو يقرر من يقابل ومن يترك!!
ابو غازي بهدوء:رهايف بتال وضعه غير بتال كان أمانة عندنا والحين جا جده وبياخذه معه
رهايف وقفت وبعصبية:مو على كيفه!!لعبة هو يتركه متى مايبي ويأخذه متى ما روق!!وبعدين يبه انت ليش ساكت له؟!!
امجاد بنرفزة وغيظ تكتمه:ليش يبه رميت الخبر لامي وكأنك تبيها تتصرف مكانك ليش؟!!
ابو غازي بهدوء:امك هي اللي بتقدر على بادي وهي اللي عاشت مع ام بتال باخر أيامها ووصية امه كانت يتربى مع اهل امه ومحد يربيه من أهل ابوه
>
>
..بيت عادل المتواضع..
،،جميلة عازمة نشمي وعياله بعوايلهم عالقهوة عندها،،
نشمي باستغراب من وجود مسفر بنفس المكان معهم ماعدا زامل برا:عسى ماشر يابنيتي عسى مابش خلاف اليوم
جميلة بوجه مكتسيه التعب وهي متنقبة لوجود مسفر:ياعم انا مليمتكم(جامعتكم)الليلة حتى تشهدون ،،الكل يطالعها باستغراب،،
عادل متربع وبحضنه بتّال صاحب الثلاث سنوات وغازي متكي ع طرف رجله قطب جبينه:خير ياجميلة؟عسى مابه صريمة؟!!
جميلة طالعت عادل بنظرة قاسية كلها كره ولاردت عليه
عادل ارتفعت حواجبه بصدمة منها هي تغيرت عليه بعد سالفة حرق عذبة اللي سببتها بس هو ماله ذنب باللي صار بينهم لكن من ذيك الليلة جميلة تغيرت وكأنها قطعت علاقتها فيه للأبد
جميلة وعينها على نشمي:كود غدا يوم وأصبح صبحكم وانا مالي حس وسطكم عليكم وجه الله وبالله هالحشاشة(تقصد بتّال)مايربى بينكم
،،الكل انصعق من طلبها،،
وسمية جالسة وبحضنها جسّار بزاوية الغرفة وتحديد عند الباب طالعتها مصدومة اكثر من الكل
عادل اهتز قلبه من فجعته وهو يسمع طلبها
نشمي:استغفر الله وش هالعلوم!!وثمن محد مربي ولدش غيرش يامرة كبي هالعلوم عنش!!
جميلة بحدة:مااريده يربى بينكم ولا يربى بيدين عادل ابد
عادل بردت عظامه وهو يطالعها بصدمة:ليش!!وش اعمل به حتى ماتريديني أربيه!!
جميلة طالعته وبحضنها:مااريد لامن كبر وراعيته عملت به شين لأجل انه ابوه فاهد مثل ماعمل بي فاهد كل ماراعني!!
عادل بكسرة قلبه:انا غديت مثل فاهد عندش ياجميلة!!
جميلة طالعت نشمي ولااهتمت لكلام عادل ابد:أوحني ياعم نشمي كود غدا مثل مااوجست وليدي يربى يم اهلي ولاتخبرون يمه درب
نشمي:استغفر الله حرام عليش تمنعينا منه ياجميلة
جميلة:عند ربي أنشدك عن أمانتي
نشمي فز بفجعة:اعوذ بالله
عادل قوم بتّال عن حضنه ودفها لها
بتّال اتجه لامه وجلس على رجولها
جميلة ماضمته لها ابدا وظلت تطالع عادل مستغربة حركته وهو يموت على بتّال اكثر من كل عياله
عادل بحدة وغصة ملت قلبه بخيبة من عدم ثقتها فيه وأخفاها عن الكل:تم ياجميلة تم
جميلة طالعته بتكشيرة
عادل:اعاهدش بالله قدام نفسي وثمن قدامهم بتّال يربى يم اهلش ومايخبر دربن يمنا وانا اللي باغدي به يمهم
جميلة برسمية:راعي جمايل وخيرك مغطيها الضعوف قبلنا ماقصرت عساها بميزانك عند ربك
عادل بهدوء وهو يتقبل طعناتها:وكود اهلش عيّوا عنه وعجزت بهم لاياخذونه معهم اغـ
جميلة قاطعته بسرعة:مالك به بـد!!
عادل شد قبضتيه وهو يكتم حسرته:يم من اغدي به؟
جميلة:تغدي به يم ام غازي ياعادل
وسمية انصدمت
عادل طالع وسمية:تريدين يربى عندش ياأم غازي؟
وسمية سكتت مصدومة وكل الأنظار عليها
جميلة تطالعها تنتظر ردها
وسمية بدموع ملت عيونها وهي اخيرا احد ياخذ رايها بشي:لامااريده!!ولااريد له شوف ببيتي
،،الكل يطالعها بصدمة،،
جميلة ابتسمت بهدوء عكس الكل وهي تسمع ردها
عادل طالع جميلة:وعيت عنه ام غازي وين اغدي به؟
جميلة:طشه بام جـلاجــل بياخذونه اهلها محدن كابه(تاركه)يدوج(يدور او يهيم على وجهه)وسط الديرة بليّا احدن معه
وسمية بغبنة منها:وشلون تطشينه وهو مايعرف يعمل شين بروحه
جميلة بهدوء:هماش ماتريدينه!!كود يراعيه ابوي ويرحم هالضعيف!!
وسمية بغبنة منها:هالولد ماعاد بولدش من دخل بيتي وشلون تغدين به وتطشينه يم أبوس اللي مارحمش وانتي بنيته!!
جميلة ابتسمت: وليدي أمانتي عندش كود عيا ابوي عنه واعملي به ماتريدين اخبرش وأخبر قليبش مايخبر القساة ولايخبر يمها درب
وسمية وقفت وهي شايلة جسّار وببكاها:اجل اوحي العلم وشهودش يوحونه كود ابوش عيّا عنه فاني باخذه واحطه ببيتي مير والله لأخذ قهري منكم منه لأرد كل غبنة ومر بحياتي به وأعلمكم ان الله حق،،مشت عنهم،،
>
>
ابو غازي يتقهوى ساكت
رهايف طالعت هدوء ابوها وحست بغبنة وقهر ومشت طالعة الدرج لغرفتها
امجاد بتوتر:يبه مابتروح لامي وتهديها وتتفاهم مع جد بتّال يمكن يسمع لك؟
ابو غازي:محد له كلمة على امك لاصار الموضوع يخص عيالها
.
..بيت الشعر..
ام غازي بحدة:وش تبي منا ياابو نشمي؟
الجد بادي التفت يطالعها وبهدوء:جاي اخذ الأمانة اللي موصى عليها والشرط مالكم به بد!!
ام غازي بنفس الحدة:والأمانة تنازلت عنها من سنين وغدت يمي ومن نصيبي!!
الجد بادي:وجزاش الله خيرن على خير ورايتش بيضا ماقصرتي مير انا الحين غادين اخذه واراعيه على عيني
ام غازي:مالك به بد!!ذالحين توالي العمر طرت عليك الأمانة!!عقب وش!!عقب ماربيت وتعبت وشقيت به!!عقب ماغدا من اصابع يديني وعروق قلبي!!غادين تاخذه!!معصي ماتاخذه لو على رقبتي!!
الجد بادي اتسعت عيونه منها:اعقبي!!تعصّيني يامرة!!
ام غازي بصراخ:تاخذ ولدي وتقطعني منه وتريدني اضحك لك!!لا لا ماهو انا اللي احدن يتل وليدي من عويناتي واسكت عنه!!
الجد بادي بعصبية:الولد مالش به وكود تريدين جزية عن عملتش باليتيم اطلبي وابشري ياوسمية!!
ام غازي بعصبية:ماابي جزا عن شي جزاي هو ولدي يظلي على مراعاتي وعلى مااريد!! رهايف دخلت وهي لابسة عبايتها وبوسط انفاسها من ورا امها وبعصبية:هيه انت!!كنت جد بتّال ولا ابوه مايهمني!!مالك حق تحرمه من اهله وهو حر يختار اللي يبيه ويسويه واذا سويت اللي براسك انا باشتكيك للشرطة!!
الجد نشمي بحدة:رهايف انكعمي وبلا!!!
رهايف فزت وتخبت ورا امها:بتّال حر يسوي اللي يبيه هو محد يجبره على شي مايبيه!!
الجد بادي قطب جبينه وهو كله غضب
ام غازي بتحدي:مثل ماسمعتوها كان احرمتوني منه باشتكيكم كلكم لكن ماهو للشرطة للمحكمة!!
الجد بادي يطالعها بغضب
الجد نشمي بصدمة منها:انهبلتي ياوسمية!!
الجد بادي بغضب:تم ماني بمانعش عنه مثل ماتريدين
رهايف ابتسمت بفرحة
ام غازي قطبت جبينها من موافقته مستغربة
الجد بادي:مير على شرط
ام غازي بتكشيرة:اللي هو؟
الجد بادي:لاخلص الولد من العشة اللي تريدها امه يحق لش تراعينه متى مابغيتي وش قولش؟
عذبة تضايقت من شرطه خصوصا وان هالعشة هي مكان اللقى بين عادل وجميلة
ام غازي اخذت نفس وهي تكره هالعشة:تم مير مايحق لك بعدها تمنعني عنه
الجد بادي بابتسامة:عهدن ماامنعه منش ابد،،وقف،،غدينا ياسعود قضينا مانزلنا لاجله
سعود جالس وهو يطالع الارض بتفكير وهو شاد قبضتيه متردد
الجد بادي دخل قلبه الخوف وبتشديد على كلامه:غدينا ياسعود!!
سعود اخذ نفس وطالع راشد اللي جالس قباله:مااريد اغدي مكان قبل اتخبّر اخوي
الجد بادي اتسعت عيونه وبحدة:وش توجس ياولد!!!
..........****..........
..قرية عيال عبري..
ضبعان امتلى وجهه غضب وهو يطالع ناصر:هالرجل معك صحيح؟؟
ناصر سكت
فارس بغبنة:اي بالله معه ياجد واكيد انه خسيس مثله!!ماراعيت وشلون غدا يم الديرة ماحشم اَهلها!!
ضبعان رفع يده لفارس يسكته
فارس سكت وهو يغلي
ضبعان بحدة:ولد ياناصر
ناصر بهدوء:سم ياعم
ضبعان:ارعيت بك شين ماهو باهل هالديرة القشرا أوجس يمي الصحيح هالرجل منكم؟!! فارس بغبنة:توحي له ياجد توحي له عقب ماعملوا بنا!!عقب ماعمل هو بنا!!
ضبعان بحدة:انكعم يافارس انكعم!!
فارس بغبنة:ماني بمنكعم وانا ارعيك ترخي له مسمعك(يسمع منه)!!
ضبعان صرخ:فااارررس!!!
فارس بنفس عصبيته وغبنته:كود نسيت ماعملوا بنا مانسيت!!
ضبعان بتهديد:هالنوبة ان أوحيت حسّن(صوت)منك قصيت عمرك يافارس!!
فارس عض شفته بقهر وسط عدم رضا بقية الموجودين مثل فارس وهم يطالعونهم بسكوت
ضبعان طالع ناصر وبهدوء:ناصر
ناصر:سم ياعم
ضبعان:ماني بناشدن راعي الشينة بأنشد راعي الجميلة
فارس قطب جبينه ماهو فاهم
ضبعان:ابنشد ناصر اللي مااحترى جزية عن فعوله ماهو بناصر ولد ام جـلاجــل
>
>
قبل اربع سنوات
>
>
ناصر يسوق بسيارته وهو يتثاوب خارج من الديرة يوصل ملفات لمستشفى المحافظة ويرجع للمستوصف اللي به دوامه قبل الدوام خارج قبل صلاة الفجر حتى يوصل بدري ويسلمها لاي احد من الموظفين عقد حواجبه وهو يشوف على نهاية نور السيارة على الطريق بغير مصدوم هدا سرعته وهو يوقف بسيارته قبال هالبعير نزل وهو يوقف عند البعير وانحنى شبه جالس وهو يتفحص البعير بعيونه تلفت حوله باستغراب وهو مايشوف اثر لسيارة وبشك واستبعاد للفكرة اللي بباله مشى على جنب الطريق ولا لمح شي تنهد براحة طالع البعير بورطة وشلون يسحبه عن الطريق وهو مامعه شي زفر وهو كل اللي بيده يبلغ المركز اللي بالمحافظة رجع وركب للسيارة وكمل طريقه ومسك فرامل وهو يطالعه ويسمي ويتعوذ من الشيطان قطب جبينه وهو يطالعه يستند عالمركوع ويجر خطواته وهو يغطي وجهه الدم نزل بسرعة:عسى ماشر ياعم
ضبعان وهو يمسك يده وبرجفة من المه:افزع ياولدي يم الصبي لايقضي يم ابوه تكفى
ناصر:ابشر ابشر
ضبعان جلس وهو ياشر بيده للجهة المعاكسة لطريق ناصر وهو يكتم المه وسط انفاسه المتعبة:ارعه عقب البعير بمد(بمسافة)
ناصر:ابشر ابشر
،،المستشفى،،
ضبعان صحى بعد فترة من وصوله للمستشفى وبعد ماتطمن على حفيده فارس سأل عن اللي وصله وبلغوه انه مشى بعد ماتطمن عليهم
>
>
ضبعان:ناصر هالرجل منكم؟
ناصر:لا ياعم ماهو من اهلها لاهو ولا اخوه
ضبعان تنهد والتفت لجسار
جسّار ماسك مكان الضربة وهو للحين دايخ من المه
ضبعان:ياولد خذ خيك واغدا عن ديارنا الله يسهل عليكم
فارس:ياجد!!!
جسّار طالعهم بتقطيبة جبينه ماهو فاهم هالكره اللي بينهم لبعض:وناصر؟
ضبعان:مالك بـد به
ناصر نزل راسه وهو راضي باللي يصير له بدون اعتراض
جسّار كشّر بوجهه وهو يميل فمه
٣٤٦