ياسمح المحيا جر الهجينية

٦٦

   ،،الـجـزء الـسـادس والـسـتـيـن،،
سبحان الله وبحمده سبحان الله العظيم،استغفر الله العظيم الذي لاإله إلا هو الحي القيوم وأتوب اليه
.
.
..بيت بادي..
،،المطبخ،،
بخوت واقفة ورا المغسلة وهي تغسل الصحون
الجد بادي وقف عالباب وهو يطالعها وكشر بوجهه ثم دخل:بنت يابخوت
بخوت تركت اللي بيدها وهي تلتفت له:سم ياجد
الجد بادي وهو يمد يده ويمسكها من يدها يبعدها:كبي اللي بيدش كبيه
بخوت بوسع عيونها:علامك ياجد!!
الجد بادي:اغدي تريحي كبي المواعين عنش انا اغسلهن،،ثبت عكازه على طرف المغسلة وبدا يرفع أكمام ثوبه،،
بخوت شهقت وهي تطالعه ومسكت يديه:والله ماتنوشهن ياجد!!ماعملتها من اول حتى اعملها ذالحين!!
الجد بادي سحب يده وبحدة:اوجست يمش اغدي!!
عباير وقفت عالباب وبابتسامة:اغدي اغدي هي تحصل بادي يعمل عنك شي!!
الجد بادي التفت لها:لفت العوبا لفت!!
عباير كشرت بوجهها:وش عملت!!هاذي والله العقوبة!!
الجد بادي:ادني اشطفي المواعين وكبي خيتش تريح!!وانتي مغير متبطحة!!
عباير شهقت:ياويلك من الله ياجد ياشين الظليمة شيناه!!
الجد بادي دف بخوت لقدامه وهو يمشي وراها:برا برا
بخوت:ياجد مير انه
الجد بادي وهو يدفها لبرا ثم وقف جنب عباير بعد ماخرج بخوت من المطبخ ومسكها من يدها ودفها لداخل المطبخ:وانتي اغدي يم شغلش
بخوت واقفة ع باب المطبخ تطالعهم
عباير بتكشيرة:ياربي انك تفك منها بهالليلة
الجد بادي:اخلصي ثمن ادعي بهواش،،مشى ووقف جنب بخوت ومسك يدها وهو يمشي جنبها باتجاه غرفتها،،بكرة ان شاء الله لاتعين(تصحين)بدري ارقدي وانا جدش والفطور معفية منه
بخوت زفرت:ياجد
الجد بادي ضغط على يدها يقاطعها:كبي قنقش علامش غادية مثل المتروزة خيتش
بخوت ابتسمت:ماهو بقنق
الجد بادي قاطعها:اوحيتي العلم لااراعيش تعملين شين ابد هذاني علمتش
.
،،بمكان جمعتهم المعتاد سابقا،،
غيث جالس قبال النار يطالعها بهدوء
هليّل بغبنة:وتف على طلق وناصر ماغدوا يمّنا وتف
غيث زفر ومانطق حرف
هليّل بعصبية:مابهم خير يلفون يراعون خويهم وش غدا به تف تف كود تريد ذالحين غديت يم خيامهم وشبيت بها ياغيث
غيث رفع عينه له يطالعه ووقف ثم اتجه للحطب اللي جنب النار انحنى شبه جالس وهو ياخذ من الحطب ويرمي بوسط النار
هليّل ابتعد عن النار وهو يطالع الشرار اللي يتطاير حول النار بكثرة
غيث مثبت عينه عالنار ويرمي الحطب وهو يطالعها بهدوء
هليّل:يسد ياغيث يسد لاتشبها أزود!!ذالحين اغدي يم الخيمة ولاتعمل الغبنة بك هاللون!!
غيث وعينه عالنار:لا
هليّل عقد حواجبه:وشو اللي لا!!
غيث طالعه:لاتشب كبّ العرس يغدي على مايريدون
هليّل باستغرابه:وثمن
غيث ابتسم:تعود حليلتن لي غصبن عنهم كل ابوهم
.
.........****..........
     يوم جديد
.........****..........
صباح يوم جميل يوم كله فرح على العايلتين اللي افترقت سنين عن بعض واليوم رجعت العلاقة بأجمل رباط مقدس رباط يجمعهم عالحب من جديد
<<صباح زواج جسّار وبخوت>>
.
..بيت بادي..
بخوت فتحت باب غرفتها وابتسمت اول ماوصلت لها ريحة النار المختلطة بالقهوة وخرجت من الغرفة وقفت وهي تطالعهم كلهم حول المشب صاحين قبالها باستغراب توقعت جدها وخالها لكن الكل موجود اتجهت لهم وبوسط ابتسامتها:ياصباح الخير!!
عباير وقفت بابتسامة مرتسمة على وجهها وزغرطت بكل مافيها وغطى صوتها هدوء المكان حولها
الجد بادي ابتسم وحلايا جالسة بحضنه
حلايا نطت من حضنه وهي تتجه لعباير
سعود جالس جنب عباير وقف بابتسامة
راشد جالس قبالهم وقف وهو ياخذ كيس هديته معه واتجه لهم وهو يوقف جنبهم 
عباير:الف الف مبروك يابخوت ياعلها عيشة الهنا والسعادة الله يكتب لش الخير وين ماغديتي ياخيتي،،ضمتها تسلم عليها،،
بخوت بلعت غصتها وهي ترسم ابتسامة اعرض تغطي هالغصة:الله يبارك بش
سعود تقدم لها وهو يضمها له ويسلم على راسها:مبروك يااخوش مبروك الله يكتب لش الفرح والسعادة ياعين سعود
بخوت ضمته ونزلت دمعتها غصب:يسلم هالسعود لي ياعل الله لايخليني منه
حلايا وقفت عندهم وهي تفك بينهم:توحر توحر انا ذالحين
سعود ضحك وهو يترك بخوت:حكم القوي عالضعيف هاه كبينها
بخوت ضحكت وسط وجهها الاحمر وانحنت لها شبه جالسة وهي تفتح يديها:هـلا بحلوتي هلا بحلوة الخد
حلايا ضربت سعود على رجله بتكشيرة
عباير ضحكت
راشد ابتسم
سعود اتسعت عيونه:علامش!!
حلايا بعصبية:صيحت بحوت!!
بخوت سحبتها لها وهي تضمها لها:ياعين بخوت انتي الله يطول بعمرش لي ويحفظش ياعيني
حلايا طالعتها وهي للحين بحضنها:بحوت ذالحين اوزس يم زسار يصيح لس سعود
سعود شهق
راشد ضحك
سعود:اعوذ بالله منش يالفتنية!!
عباير بضحكة:ماله داعي توجسين يم زسارش شين ابد تخبره هي الليلة ويختلص(ياخذ)لها
بخوت كشرت:عباير لاتفطنين الوغيدة!!
سعود باستعباط عليها:عاد هذا الصحيح!!
بخوت وقفت وبخجل:سعود!!
راشد تقدم لها وهو يوقف عندها ويمد الكيس لها:مبروك الف الف مبروك وتفضلي
بخوت:الله يبارك بك مير وش انهو ذا؟
راشد:هديتك
بخوت:لا يسد حلفتك على ثوب العرس ماحطينا به ريال يكثر خيرك
راشد تقدم وهو يمسك يدها ويمسكها الكيس:ثوب العرس واجب اذا ماشراه اخوك من يشريه لك!!وبعدين هاذي هديتي انا وهيفاء منا يالاثنين ماينفع تردينها
بخوت:مير انه
عباير قاطعتها:كودش ماتريدينها انا اخذها عنش
سعود بوسع عيونه:عيب عليش يابنت!!
عباير بنرفزة:انا وخيتي نتفاصل وش عليك انت!!
راشد ضغط على يدها:عاد لاتردين اخوك يابخوت
بخوت زفرت وهي تطالعه
سعود:يابنت الحلال خذيها خذيها
بخوت اخذتها:مشكور ماقصرت ياعلك سالم
راشد مد يده:ويصير مااسلم وابارك مثلهم!!
بخوت ضحكت بخفة وهي تفتح يديها:الا احسن منهم ياراشد
راشد ضمها وهو يبارك لها
سعود:عاد اوجس يمش يابخوت علمن يهول
راشد ترك بخوت وهو يطالعه باستغراب
بخوت تغير وجهها وهي تطالعه:ياعلّه خير؟
سعود غمز لها:جسّار إحويلاته(حالته)ماتسر
عباير ابتسمت
راشد يطالعه مقطب جبينه
بخوت قطبت جبينها:وش غادين ومااعلمه؟!!
سعود:ايه وش اوجس مغير يمشي ويتغنى من همّه
بخوت ضحكت بخفة:ووش همه
سعود:يمشي وسط العربان وهو يتشكى ومحدن خابر علته ودواها غيرش
بخوت ضحكت وبتكذيب:صحيح!!
سعود:عاد انتي اوحي طواريه وثمن تضحكي
بخوت؛وش طاريه ياسعود؟
سعود غنى بصوته الثقيل وهو يصفق وصفقت وراه عباير وصفق معها راشد:
أرفـق عـلـى قـلـبـي تـرا قـلـبـي تـزايـد عـنـاه..
راشد وعباير ردوا وراه
سعود بوسط ردهم:سمي على قليبه يابخوت!!
بخوت ضحكت من قلبها
سعود غنى مع ترديد راشد وعباير وراه:
ذبـحتـنـي بـالـطـول والـخـد الـجـمـيـل الـعـفـر..
والـشـعـر الاسـود نـاسـفـه مـضـنـون عـيـنـي وراه..
مـرحـبـًا مـن غـايـة الـروح يـالـزول الـعـجـيـب..
مـن ضـمـيـر مـغـرم فـيـك مـابـيـن غـلاك..
دارت الأيـام والـدولـه تـجـيـب..
قـاطـع(ن)عـنـي مـواصـلـك مـدري وش بـلاك..
يـاطـبـيـب الـروح والله مـاغـيـرك طـبـيـب..
لا واهـنـي مـن مـلـكـوا لـه عـلـى خـلـه..
مـاخـذ لـطـيـف الـروح وارتـاح مـولـيـه..
وفـلان سـاعـدنـي تـرا الـحـال مـنـسـلـه..
والـقـلـب مـجـبـولـ(ن)بـعـيـنـه الـنـداويـة..
.
..بيت الشلة..
،،غرفة الشباب،،
غازي وفيصل وبتّال نايمين عالارض
رهايف نايمة عالسرير
ام غازي فتحت الباب بعصبية وبيدها علاقة ملابس حديد وهي تنحني عند رجولهم ورفعت لحافهم واحد واحد وبدت تضربهم على سيقانهم من قهرها
،،فزوا من نومهم بفجعة،،
غازي بفجعة:يمه وش فيك!!
فيصل متخبي وراه مايدري وش السالفة
بتال يتثاوب وهو يتكلم:هلا يالحب نورتي الغرفة
ام غازي ضربت بتّال ع ساقه:نورت الغرفة!!
بتال يطالعها بنوم ولا كانه انلسع منها
ام غازي رفعت يدها بتضرب
غازي سحب بتال قدامه:وش فيه طيب وش فيه!!
رهايف وهي تغطي راسها بالمخدة وتتأفف من ازعاجهم
ام غازي:ابد مافيه شي ابدا!!!
بتال:طيب ليش زعلانة يمه،،مد يده ليدها وهو يمسكها وياخذ العلاقة،،اتركي هالحاجات مي حلوة بيدك
ام غازي طقت من بروده:والله ماينلام ابوكم يومه يجلدكم!!
بتال قرب منها وهو يمد يده ويرجعها من ورا رقبتها يحاوطها ويضمها له ويسلم على راسها:من مزعل عـيـونـي؟
ام غازي دفته وبزعل:ماتوقعت قلوبكم سودا على بعض!!ماتوقعت مافيكم رحمة!!
غازي:استغفر الله يمه وش هالكلام!!
ام غازي:اجل تربطون اخوكم وتتركونه!!ماله الا هالحل ياان قلوبكم سودا يامرضى اكيد انكم مرضى!!
غازي ضحك وهو يقرب ويسلم على راسها:يمّه نمزح معه!!
ام غازي دفته:ابعد عني انت الثاني يقال انك الكبير بينهم!!
غازي:مو رجع خلاص وطيب!!وش مزعلك!!
ام غازي بقهر منهم:ياربي بتذبحوني انتم!!
بتال وهو يقرب بيسلم عليها من جديد:بسم الله عليك
ام غازي دفته ماتركته يسلم:لو ماجا راشد وسأل محد درا انكم تاركينه هناك اااه منكم اااه
غازي بيسلم عليها مرة ثانية:بسم الله عليك من الاه بعدوينك
ام غازي دفته بزعلها:وخر عني انت الثاني
فيصل:يمه انا مالي شغل والله ماني معهم ماادري عن شي انا!!
بتال وهو يسلم عليها غصب رغم انها تبعده عنها:يمه ياحبيبي والله طيب مافيه شي لاتزعلين نفسك الحين يجي
ام غازي:الله يجيبه سالم ومابيجي لحاله بيجي الخير معه
غازي عقد حواجبه:وش معه يمه؟!!
ابو غازي اللي راح مع راشد ورجع للبيت ومعه جسار وراشد التفت لراشد وبحدة:أوقف عالباب ولاتتحرك خطوة
راشد هز راسه بايه وهو يبلع ريقه:ابشر
ابو غازي دخل
جسّار طالع راشد بتكشيرة
راشد:وش فيك؟
جسّار:مافيه شي تبي تقوله!!
راشد وهو يطالعه:انتبه تراني اخر العروس حسّن علاقتك معي
جسّار زفر:لو مو تعبان حسنت علاقتي زين معك،،مشى وتمدد بوسط الحوش بمكان جلستهم المعتادة واستسلم للنوم من تعبه،،
ابو غازي وهو يمشي متجه للغرفة صرخ:غازي!!!بتاااااال!!
،،غازي وبتّال فزوا وهم يطالعون الباب،،
غازي مسك يد امه وباسها:تكفين يمه
ام غازي سحبت يدها
بتال:ترا العرس الليلة يمه
ام غازي:والعريس نسيتم وش سويتوا فيه!!
غازي:يمه يرضيك نطلع للناس وجيهنا ملونة!!
ام غازي صدت عنه بتطنيش
ابو غازي بصراخ:ولد ابوي انا!!مايردون علي!!هين هين!!
ام غازي:هينا هينا
غازي بوسع عيونه:يمّه!!
ام غازي:وكلهم صاحين!!
بتال جرى الباب وقشعر جسمه وهو يطالع ابوه قدامه
ابو غازي ابتسم:هـلا والله ياهلا
بتال مد يده للباب وقفله بوجه ابوه لاشعوريا
غازي انجلط
ابو غازي اتسعت عيونه من الحركة وصرخ وهو يدف الباب ويرفسه:ابوك ياعادل يصكه بوجهك!!هين وانا ولد ابوي هين!!
رهايف جلست عالسرير وفيها البكية:استاهل استاهل اللي جيت انام عندكم ذنب طردتي لراشد استاااااهل
.
..بيت بادي..
،،غرفة بخوت،،
،،بخوت وعباير جالسين يرتبون اغراض بخوت اللي كلها على بعضها توصل شنطة وحدة بس،،
،،التفتوا يطالعون بعض وهم يسمعون دق الباب،،
بخوت باستغراب:مين جاي الحين؟
عباير بنفس استغرابها؛مدري!!
بخوت تغير وجهها:حلايا وينها؟
عباير:عند التلفزون علامش!!
بخوت بقلق:مير الرجال كل ابوهم غدوا يم خيمة العرس!!
عباير وهي توقف:ماهو بغادين اليوم غير الفرح كبي هالتروع عنش!!تممي امورش وانا باغدي يم الباب،،خرجت من الغرفة وهي متوترة حالها حال بخوت لكن تخفيه عنها اتجهت لغرفة جدها وفتحت الباب زفرت براحة وهي تطالع حلايا اللي تتابع بانسجام قفلت الباب بشويش وهي تمر من البيت طالعت غرفتها وهي تسمع دق الباب اللي زاد هرولت لغرفتها ودخلت للغرفة وهي تاخذ سكينها اللي متعودة عليها وخرجت باتجاه الباب وقفت وراه وبهدوء،،مَن؟
مزون بنرفزة:فكي لي ولاتريدين اتغدى بعشتكم!!
عباير فتحت الباب باستغراب:مزون!!!
مزون دخلت وهي تنزل عبايتها عن راسها على أكتافها وبعدها طرحتها وبيدها كيس ووقفت وهي تلتفت لها وبتكشيرة:ايه مزون اجل من!!
عباير قفلت الباب وهي توقف عندها:وش غادي بش يمّنا ذالحين!!وببيتنا!!!
مزون:اعود دربي يعني!!
عباير بعصبية:علامش شايشتن علي كني ذابحة وغدن لش!!
مزون خافت منها ومشت:عوذا منش ماينوجس يمش شين ابدن!!
عباير مشت وراها:غاديتن يمي منخفرة وتريدين اتضحك لش!!والله ان
مزون وقفت على باب غرفة عباير والتفتت لها وهي تقاطعها:العروس وينها؟
عباير:بغريفتها!!والله ماانتي بصويحية اليوم!!
مزون مشت لغرفة بخوت اللي جنب غرفة عباير على طول:كبيني عنش وعلميني وراش ماولمتي!!
عباير مشت وراها:بدري عالغدا
مزون وقفت على باب غرفة بخوت وهي تلتفت لها وبعصبية:لا ماهو ببدري انش اهل العرس كود ماتخبرين!!ماانتي من الضيفان
عباير:انتي علامش اليوم!!وثمن وشلون غديتي يمّنا ومحدن منعش!!
مزون:اغدي تولمي وإفزعي يم خيمة العرس امي قدامش هنا تحتريش وانا بأولم العروس
عباير بصدمة:هاه!!!
مزون:هواه تهوي بعدوينش لقاع الصرايم اوجسي امين!!،،فتحت الباب،،
عباير ماتحملت وضربتها ع كتفها وبصراخ:علامش انتي علامش!!
مزون وهي تنط مكانها:وكصم(كسر)يكصم العدو نصين وكصم اهبي ماتخافين ربش يالعوبا
بخوت ضحكت وهي تطالعهم
عباير بعصبية:انتي ذالحين المفروض انش ساجدة اتشكرين ربش انش خويتي ولا قبرتش بعد وجسش الشين يامال العافية
مزون صرخت وهي ماتبي تضربها:ورا ماتطسين يم امي لاتقبرش هي لاغديتي يمّها!!
.
..بيت الشلة..
ابو غازي متربع وماد يديه وتلامس نهايتها لركبتيه وشاد قبضتينه وهو يطالعهم بحدة
غازي واقف عند راس جسار النايم منحني شبه راكع وهو فارد شماغه يظلل راْسه
راشد يمسج رجول جسّار
جسّار نايم ولاتحرك رغم الشمس اللي ضاربة منتصف جسمه
ابو غازي التفت يطالع فيصل وصرخ:القهوة!!
فيصل فز وهو ياخذ الدلة ويصب لابوه
رهايف وقفت عندهم بعبايتها وهي تنزل الشاهي وهي تلفت تطالع اشكالهم بضحكة تكتمها
ابو غازي صرخ عليها:وش رايك تكبينه علي!!
رهايف فزت:ابشر يبه
فيصل كتم ضحكته
ابو غازي بوسع عيونه:وشو!!
رهايف:اقصد بسم الله عليك يبه
الجدة منيرة:تستاهل والله!!اجل تخوفها ونبيها تقول شين زين!!عجيب امرك ياعويدل!!
ابو غازي بنرفزة:يمه اتركيني عيالي وانا أتفاهم معهم
غازي يطالعها بحدة من فوق لتحت وهو يهمس لها ليش تتكلم قدام راشد
ابو غازي انتبه له:خلك بعمرك لااكسر عكاز امي على راسك
غازي كشر بوجهه وهو يتحلطم بينه وبين نفسه
حصة خرجت من الغرفة:لااله الا الله محد ينام زين بهالبيت!!،،طالعت غازي وراشد ثم طالعت ابو غازي،،وش فيك عليهم وش فيك!!ارحموا من فالأرض يرحمكم من السماء ياعادل!!
ابو غازي بحدة وهو مايبي يجادلها:حصة!!
حصة زفرت بتكشيرة:بكيفك ان شاء الله تذبحهم استغفر الله العظيم بس،،جلست جنب امها،،
عذبة خرجت من الغرفة واتسعت عيونها وهي تطالعهم اسرعت بخطواتها لهم:خير خير سلامات،،وقفت عند غازي وهي تسحب الشماغ من يده وبعصبية،،اعدل ظهرك
غازي بالقوة اعتدل بوقفته من الم ظهره
عذبة طالعت راشد:وقف يمه وقوم خلاص
راشد وغازي يطالعون ابو غازي
ابو غازي بعصبية:عذبة اتركيهم مالك شغل فيهم
عذبة بعصبية وهي تطالعهم:اقولكم بس يالله روحوا ارتاحوا
ابو غازي صرخ:عذبة!!
عذبة:لاوالله تبيني اشوف الظلم واسكت
ابو غازي:واللي سووه بهالمسكين ماهو بظلم!!
عذبة:وانت ناسي ان وراهم كرف الليلة ليش تسوي فيهم كذا!!
ابو غازي:ووراهم يوقفونه طول ليلته البارح والليلة وراه وقفة هاه!!
غازي:يبه توقعت العمال يفكونه
ابو غازي وقف وهو يصرخ:انكعم!!
عذبة وقفت قدام غازي ورفعت صوتها:لا بتسمع السالفة منهم
راشد:ياخال والله توقعت انهم بيرجعون له ورحت وانا متطمن ييرجعون ماتوقعت يتركونه صدق
ابو غازي بعصبية:ولو انه صار باخوكم شي هاه وش كان بيصير اليوم!!الفرحة تنقلب مصيبة!!
الجدة منيرة دفته بعكازها من رجله وبفجعة:عوذا منك قلبك ماقبلناه!!
ابو غازي بحدة:وهذا الصحيح يمه!!
عذبة:عارفين انهم غلطوا عاد انت لاتصعبها عليهم زيادة!!
حصة تنهدت وهي ترفع فنجالها لفمها:بتتعبين ماتعرفين اخوك ورأسه اليابس!!
ابو غازي شهق:حصة!!
حصة نزلت فنجالها:يعني واذا بهذلتهم الحين وش بتستفيد ها!!وبعدين،،مدت يدها تأشر على جسّار،،حتى المسكين ذا مابيتهنى بنومته!!
رهايف ضحكت:جسّار مايتهنى بنومته!!!،،كمان ضحكتها،،
فيصل:غلطانة ياعمة
رهايف بضحكة:ومليون غلط بعد!!
غازي بحدة:رهايف!!
ابو غازي بصراخ:انكعم لاتوطاك ذالحين!!
حصة مسكت راسها:يمه يمه صدعت صدعت بموت
عذبة:وبعدين وينه بتال!!وش مسوي فيه ياعادل هاه!!وش؟!!
.
عباير تسوق السيارة متجهة لخيمة العرس ابتسمت وهي تطالع طيف الخيمة اللي قبالها بمسافة بعيدة وواضح انه مكان العرس عقدت حواجبها وهي تطالعه
بتال شايل كرتون مليان اغراض وهو يتصبب عرق من الثقل والمسافة اللي مشاها وهو شايله وبهمس:يارب ثبتها عالكراتين جعله مايجلدني يارب يارب
عباير مرت من جنبه وعرفته وكملت
بتال عرف السيارة وانتبه للي تسوقها وعرفها همس:وش ذا!!ماوقفت لي حتى!!مابقلبها رحمة ذي الآدمية!!،،انتبه لنفسه،،سلامات وش دخلها فيك!!ايه يابتال من الشمس هلوست!!
عباير حنت عليه وهي تطالعه بالمراية وقفت وهي ترجع له ووقفت عنده
بتال وقف وهو يطالع السيارة باستغراب
عباير ماتكلمت ساكتة
بتال ابتسم وحط الكرتون بالبدي حط يديه ع طرف السيارة بيطلع:اذا طلعت مابيصير شي؟
عباير قطبت جبينها باستغراب من سؤاله وبدون لاتلتفت وعينها عليه بالمراية:وش بيغدي يعني!!
بتال:اقصد اهل الديرة و
عباير قاطعته بنرفزة:يعقبون الا يعقبون!!ولد خالتي وعاونته!!واللي يوجس شين جزيت لسانه!!
بتال نط للسيارة:الحمدلله اني عارف ان لسانك طويل وقد كلمتك
عباير ابتسمت وكسرت على طول وهي ماتدري مدح او سب لها حركت السيارة بسرعة بزعل من كلامه
بتال اللي ماتوازن ولاتوقع حركتها طاح بالبدي وضرب راسه بطرف السيارة مسك راسه وهو يتلوى من الالم وبنفسه:حسبي الله عليك ياجسار اكيد داعي علي وش ذا المصايب اليوم!!
عباير بعد مانزلت بتال على مسافة من جهة خيمة العرس الخاصة بالرجال حركت لخيمة العرس اللي بجهة الحريم وقفت السيارة عند الخيمة وهي تطفيها وتنزل منها وتقفلها ثم طالعت الخيمة بوسط مشاعر فرح وتوتر وهي مو عارفة تسيطر عليها غيّر بهالابتسامة اللي ارتسمت على وجهها دخلت للخيمة واستقبلتها ريحة البخور عقدت حواجبها باستغراب ماتوقعت فيه ضيوف بهالسرعة اسرعت بخطواتها وهي تدخل:ياحيهم يا،،سكتت وهي تطالعها تبخر توقعت حضورها مجرد مجاملة فقط لكن كان العكس تماما،،
ام مزون بجلابية عودي مطرزة كل اطرافها بالذهبي لافة طرحتها اللي تزينها فصوص ذهبي بكحلتها السودا الثقيلة وروجها العودي تبخر الخيمة وهي تدعي وتحصن المكان واصحابه التفتت على صوت عباير:يسلمها ويبقيها وينش مالفيتي من الصبح هاه!!
عباير اتسعت ابتسامتها:ياحيها ياهلا ومسهلا ياهلا
.
..بيت الشلة..
بتال دخل وهو متنقع عرق يلقط انفاسه السريعة:يبه
حصة التفت له وبضيقة واضحة على وجهها:وانت من وين جاي بعد؟!
رهايف همست لها بضحكة:ابوي مخليه يوصل الاغراض للخيمة مشي
حصة اتسعت عيونها:وشو
رهايف:حلف ابوي يهد حيله اليوم،،ضحكت غصب بصوت عالي،،
ابو غازي بحدته:يالله الكرتون اللي بعده يالله
عذبة طالعت بتال:والله ان ماتشيل شي،،طالعت ابو غازي،،وش فيك انت عليهم!!خلاص اتركهم يكفي ماجاهم!!
ابو غازي:عذبة تراني سكت عنك كثير!!
عذبة بتحدي:وش بتسوي هاه!!هاه؟!!
بتال وهو يطالع وضعهم:يبه جداني ينتظرونك انت وجسّار المملك وصل
جسّار فز جالس وهو يطالعه بنوم واضح بوجهه:وصل!!
.
.
،،غرفة الشباب،،
رهايف واقفة وهي ماسكة له المراية وكل ماارتخت ونزلت المراية شوي
جسّار وهو ينحني يطالع نفسه ضربها على يدها:تراك ذبحتني!!
رهايف بطفش:يوووه متى تخلص ترا كلها نسفة شماغ ذبحتني!!
جسّار وهو يترك شماغه ويطالعها بنرفزة:اوص عاد اوص اشوفني مااشتكي وانا افرفر فيك للأسواق!!
رهايف شهقت وهي تنزل المراية
جسّار ضربها على يدها وهو يرفع المراية لمستواه
رهايف:يمه يالكذب!!
جسّار وهو ماسك شماغه من النص بيساره وينسف طرف الشماغ بيمينه طالعها بتكشيرة:ايه ايه بوش كذبت بوش!!
رهايف:فرفرة وين وانت متوظف هينا هاه!!يمه يالكذب يمه كذاااب مسيلمة مسيلمة الله اكبر عليك!!
جسّار ترك شماغه واعتدل بوقفته وهو يطالعها:مسيلمة بعينك!!والاعياد اللي كارفانيا فيها بالأسواق وين راحت!!اغراض المدرسة اللي قطعتي قلبي بها وين راحت!!هاه هاه!!،،ابتسم وبنص عين،،ايه ايه خلني ساكت بس
رهايف بتعصيبة:قول قول سمعني عادي ترا!!اللي ببالك صح خلاص ارتحت!!وش فيها يعني الله!!
جسّار:يمه منك مافيك حيا
رهايف:لو وجع يـديـنـي فيك حتى انت مافيك حيا!!
جسّار وعينه بالمراية يمسح على ثوبه بتشييك لاخر مرة على شكله:عادي وليش استحي!!
رهايف اتسعت عيونها من كلامه
جسّار مشى وتركها
رهايف بوسع عيونها:لاحمدًا ولاشكورا!!!
جسّار فتح الباب وانصدم وهو يشوف امه وابوه وجدته وعماته واخوانه قباله ابتسم غصب وهو يسمع فرحتهم اللي تترجمت بصوت عالي وسط تصفيقهم
،،عريسنا يابدر بادي..دامت لياليك السرور،،
جسّار وقفهم وهو يرفع يديه بتكشيرة:لا لا تكفون لا غيروها ماابي اسمع،،قفل اذانيه بأصابع يده،،ماابي اسمعها ابدا بتاتا البتة
الجدة منيرة بابتسامة:ابشر ابشر على ماتريد،،غنت لحفيدها بفرحة،،باركوا له عسى عمره طويل وافرحوا له خذا غاية مناه،،
ام غازي وقفت قباله وبيدها المبخرة تبخره
جسّار سلم على راسها وضمها
حصة ورهايف زغرطوا 
ام غازي أبعدت يدها اللي فيها المبخرة عنه بخوف عليه:مبروك ياعيني مبروك
جسّار ترك امه وهو يسلم على راس جدتها ويدها:يسلم لي هالصوت وراعيته عسى عمرها طويل
الجدة منيرة:مبروك ياجسار مبروك والله وغديت عريس بسم الله عليك
جسّار وهو يتركها:لو علي ارجع بالكوفلة عشان انام واكل بس
الجدة منيرة ضحكت:ماتكب سوالفك ياجويسر
ابو غازي وقف عندهم وبيده البشت البني لف من ورا جسّار
جسّار مسكه وهو يسلم على يده وثم راسه وياخذ بشته منه
ابو غازي شد على البشت بإصرار
جسّار تركه باستسلام
ابو غازي حط البشت على اكتاف جسار
جسّار التفت له بسرعة وهو يسلم على راسه ويده
ابو غازي بابتسامة:مبروك ياجسار مبروك ياولدي
.
.........****..........
الليل
.
..بعد صلاة المغرب..
،،خيمة العرس،،
،،عند الحريم،،
ام مزون واقفة على باب الخيمة وهي تزغرط بأعلى صوتها وتحيي:ياهلا ياهلا ومسهلا الله ان يحييكم
ام غيث دخلت بتكشيرة:السلام عليكم
ام مزون بابتسامة:حياش الله ياهلا بمرة الشيخ ياهلا يالله ان تحييها هي وبنياتها يالله عقبال ماتفرح بكم مثل فرحتنا وازود،،زغرطت،،
ام غيث بتكشيرة:وينهم اهل العرس!!ولا مايحشمون ضيفانهم!!
هدية دخلت من ورا ام غيث وهي تسمع كلامها زغرطت باْذن ام غيث بأعلى صوت
ام غيث غطت أذنها بانزعاج:وصريمة!!!
هدية بابتسامة وصوت عالي وهي تسلم على ام مزون:مبروك ياعله بالمبارك!!الف الف مبروك ياخالة منها العيال ومنه المال الله يسعدها ويبارك لها
ام مزون بابتسامتها:الله يبارك بك يابنيتي الله يبارك بك ان شاء الله توحي طايرن زين يمش!!
هدية التفت على ام غيث وسلمت على راسها:علامش ياعمة ماتراعين خالتي ام مزون!!هي ام العروس مايريد لها نشدة!!
ام غيث ميلت فمها ماعجبها الجواب
ام مزون بابتسامة:سلم فيش(فمك)يابنت ياهدية فطينة فطينة حافظش الله،،طالعت ام غيث،،اوحيتي مرت ولدش وش اوجست وكل أبوكم تراعونه مايريد له نشدة ياام غيث
ام غيث زفرت
ام مزون:وثمن خابرة ان العروس نغدي بها يم بيتها المغرب
ام غيث بحدة:خابرته!!مير وش عنيتي بهاللون!!
هدية قاطعت الهوشة قبل تبدا:تعلمش ان اهل العرس يتوخرون من شان المعاريس علامش خنفرتي ياعمة!!
ام غيث بوسع عيونها وهي تطالع هدية وبحدة:مااوجست يمش شين ياهدية
ام مزون:حياكم حياكم الله اغدوا داخل ياحيكم حياهم،،زغرطت باعلى صوتها،،
.
..بيت ابو هليّل..
هليّل خرج من البيت يهرول وقف وهو يطالعه قباله باستغراب
ناصر بكامل كشخته:هلا بهليل ياحيّه
هليّل قطب جبينه:علامك هنيا!!
ناصر:اوجست لروحي اغدي معك يم العرس من مبطي ماتطارينا عليمات بعيضنا
هليّل يطالعه بشك:مير اني غادين يم غريضن لي!!
ناصر بابتسامة:ماعليه اغدي معك يمه ثمن نادي يم العرس .
..بيت غيث..
غيث خرج وهو يعدل طاقيته وبيده عقاله يتدلى منها شماغه وقف وهو يطالعه باستغراب:علامك قاعدن على بابي!!،،قطب جبينه بشك،،وش طواريك اللي ادعتك تغدي يمي!!
طلق شبه جالس متكي بظهره ع جدار البيت اللي قبال باب بيت غيث وقف وهو يضرب يديه ببعض ينفضها:ابدن مير كود نفسيتك تعيث برويسك اوجست احتريك هنيا اتوكد بروحي
غيث كشر بوجهه:اتوكد من وشو؟!!
طلق ميل فمه بابتسامة جانبية بسخرية
غيث زفر وهو يشيل تكشيرته ويقفل باب بيته وبهدوء:اخز ابليس عنك ولاتناوش بالصرايم اوحيت!!
طلق اتسعت عيونه بصدمة
غيث يلبس شماغه ويعدله وهو يمشي:الله يوفقهم ويكتب لهم خير
طلق قطب جبينه بشك من كلامه
غيث وقف والتفت يطالعه باستغراب:علامك واقف بمحلك لذالحين!!بتغدي يم العرس وإلا هونت!!،،كشر بوجهه وهو يسمع اصواتهم اسرع بخطواته بدون لايحس بنفسه،،
طلق مشى وراه يلحقه
غيث وقف وهو يطالعهم بحدة وحرقة واضحة على وجهه
.
..بيت بادي..
الجدة منيرة واقفة عالباب
رهايف معها طبل واقفة ورا جدتها وجنب امها:وش ذا يمه!!عيب يمكن ماتبي!!
امجاد هزت راسها بطفش من كثر اعتراضات رهايف
الجدة منيرة التفتت لها وبتكشيرة:هاذي علومكن يابنات الحين ماهي بعلومهن!!وثمن هن يخبرن طبوعنا ولذالحين عليها ماهن بمثلكم الله يخلف!!،،قطبت جبينها،،وينها حصة؟!!
ام غازي:ببيت جسار
الجدة منيرة اتسعت عيونها وبنرفزة:وش هالوجس!!ماهي خابرتن سلوم العرب!!
شذى بيدها الطبل وبحماس:يالله متى ابدأ؟
ريما معها الكاميرا وبطفش:ليت ورحت مع ماما احسن بدل هالازعاج
الجدة منيرة:اوص انكعمن لاتفضحنّا مع الناس!!
،،اعتلى صوت عباير ومزون من داخل البيت،،
الجدة منيرة بحدة:اوص اوص عدوا يمّنا اوص
،،داخل البيت،،
عباير فتحت باب غرفة بخوت بابتسامة وهي ماسكة يد بخوت بيدها وهي تكبح دموعها:الف الصلاة والسلام عليك ياحبيب الله محمد
بخوت خطت خطوتها الاولى لبرا غرفتها وعينها عالارض بفستانها الابيض المنفوش تغطي وجهها شرعتها الخفيفة والطويلة من وراها بشعرها المرفوع بحركة لف بسيطة من يمين ويسار ومنسدل على كتوفها وظهرها مكياج ناعم جدا وروج احمر كسر نعومتها قبل نعومة المكياج خطت هالخطوة اللي بداية جديدة بداية لكل شي جديد حياة جديدة مع شخص جديد كلها خوف وتوتر من الجاي خطت وسط زغاريطهم البسيطة اللي خلتها ترفع عينها لهم بابتسامة
مزون اللي واقفة قبالهم عالباب زغرطت وسط ابتسامة وفرح
عذبة ابتسمت وهي تردد:بسم الله عليك الرحمن الرحيم ماشاء الله الف من ذكره
حلايا واقفة قبالهم تطالعها بوجهها الاحمر وهي تكبح دموعها
مزون تقدمت وسلمت على بخوت وباركت لها
عذبة تقدمت لها وسلمت عليها وباركت لها
بخوت طالعت حلايا اللي واقفة بمكانها:مابتسلمين علي ياحلوتي؟
حلايا نزلت دموعها عالصامت
بخوت شهقت وهي تسرع بخطواتها لها:بسم الله عليش
عباير تركت يد بخوت وهي تسرع لها وتنحني قبالها:علامش؟!!
حلايا تشاهق
عباير بلعت غصتها وهي على طرف وباستها على خدودها وتمسح دموعها:لاتصيحين وعلميني علامش!!
حلايا طالعت عباير:مرررررة حللللووووة بحوت
مزون ضحكت
عباير ابتسمت والتفتت تطالع بخوت واتسعت عيونها وفزت
بخوت تبكي
عباير:لاتصيحين يخرب هالبلا اللي ذلتنا به مزون
مزون التفتت تطالع بخوت وشهقت:لااااا لاتصيحين تكفين
بخوت ضحكت وهي تطالع خوفهم عالمكياج
مزون رفعت شرعة بخوت عن وجهها وبنرفزة وهي تطالعها:اتضحكين!!شوين وبيراعيش رجلش كود راعى هالسواد هج مايرده لو انه خط الديرة!!
بخوت زادت ضحك
عباير:اهبي فالش ماقبلناه!!
مزون:وهذا الصحيح علامش خنفرتي علي!!
حلايا ضمت بخوت وبالأصح الفستان وهي تبكي
عباير سحبت حلايا بعيد عنها:لاتعدمين(توسخين)فستانها ياعل عدوش الصريمة!!
بخوت انحنت وهي تشيل حلايا لها وتسلم عليها
عذبة تطالعهم وهي تقارن حركاتهم بحركات البنات ابتسمت وهي تمد يدها لبخوت:مشينا قبل يوصل العريس للبيت
بخوت اخذت نفس وهي تمد يدها وتحطها بيد عذبة
مزون زغرطت
عباير بابتسامة وهي تحط عباية بخوت على راسها:الف الصلاة والسلام عليك ياحبيب الله محمد،،زغرطت،،
بخوت مشت وخرجوا من البيت
الجدة منيرة ابتسمت وهي تطالعها وسلمت عليها وباركت لها
ام غازي سلمت عليها وباركت لها وظلت ماسكة يدها
الجدة منيرة مسكت يد بخوت اليسار وهي تزفها لبيت جسار بأعلى صوتها وسط صوت طبول البنات وزغاريطهم وحماسهم وفرحتهم:تخطي يم سعدش وعين الرحمن تراعيش وتحميش..تخطي يم مخدعن كله كرم وجود وامان(ن)يتكوفنش ويدين(ن)تحتويش..
غيث واقف يطالعهم وعيونه مثبتة عليها يطالع وجهها المكشوف له وهي بكامل زينتها بابتسامتها وفرحتها اللي مليانة خوف لكن ماانتبه لخوفها ابد انحرف قلبه وارتسم شر على ملامح وجهه وهو يقارن بين ليلته معها وليلتها الحين ماحس الا بيد تلفه عنهم
طلق يطالعه بحدة:علامك انت!!ماتنتخي ماتستحي على وجهك!!تراعي أعراض الناس!!
غيث متنقع عرق من الحقد اللي يحس فيه طالعه وهو يرفع يده اللي ترجف من غيظه ويمسح جبينه بطرف شماغه ورسم ابتسامة على وجهه الشاحب:غدينا يم العرس غدينا ياطلق
طلق يطالعه مصدوم من تناقض تصرفاته الواضحة
غيث مشى وهو يحس برجوله تضرب ببعض من غيظه وهو يذكر انها تزف لغيره خارت كل قوة تحمله وهو يذكر انها بتروح لبيت غيره وقف وصرخ بصوت عالي من كل قلبه
طلق فز للحظة وهو يطالعه بصدمة
غيث مشى وهو يضغط على نفسه للعرس ويتناسى انها رايحة لغيره
.
.
<اللهم صل وسلم على نبينا محمد>
.
.