ياسمح المحيا جر الهجينية

٥١

      ،،الـجـزء الـواحـد والـخـمـسـيـن،،
.
...........****..........
        الـلـيـل
...........****..........
..بيت عادل..
،،غرفة فيصل،،
فيصل يلعب اكس بوكس وهو ماد رجله يريحها
بتّال دخل ووقف عالباب
فيصل طالعه وكشر بوجهه وكما لعبه عادي
بتال:ليش مانزلت عند الرجال؟
فيصل وعينه عالتلفزيون:رجلي توجعني ومعروف من مين
بتال زفر وهو يدخل للغرفة ويقفل الباب وراه وتكتف وهو يطالعه
فيصل مطنشه
بتال للحين مثبت نظره عليه وساكت
فيصل خاف وهو يوقف اللعبة والتفت يطالعه:نعم
بتال:اسف يافيصل حقك علي
فيصل اتسعت عيونه مصدوم
بتال:بعد انت مايصير طوالة لسانك وتبينا نسكت لك!!
فيصل مو مصدقه للحين وخايف منه:تبي تضرب اضرب ولاتقولي كذا!!
بتال:الحين مو زعلت مني!!ولا انت تسوقها علي!!
فيصل:يعني من جدك تتكلم!!
بتال يطالعه ساكت
فيصل انبسط وهو يشوف صدقه وأخفى ابتسامته وهو يبي يطول زعله:يعني حتى انتم مايصير تتعاملون معي كذا كل ماشفتوني ارسلتوني وفوقها ضربة!!
بتال:نضربك من حب وكل تعاملنا بهالبيت ضرب وهالولد محبة ماهو بعداوة ابد
فيصل:بس انا ماابي هالطريقة معي
بتال اخذ نفس يكتم غيظه خصوصا ان ضميره يأنبه عالضربة ومكانها تكتف:اوك المرك الجاية ابشر يحاول اتحكم بنفسي بس انت تحكم بلسانك
فيصل بابتسامة:والاحترام
بتال زفر:مااوعدك بحاول
فيصل:مافيه حبة راس منا ولا منا
بتال قطب جبينه:انتبه بعد اللي قلته لاتجيك محطة(ضربة)منا ولا منا
فيصل وهو يمد يديه قدامه بابتسامة:خلاص خلاص اهم شي انك فهمتني
بتال:انتبه لاياخذك حماسك وتصدق نفسك وماتدري بعمرك الا وانت بوسط المشب
فيصل اختفت ابتسامته
بتال مشى له ووقف جنبه وهو يرفع يده
فيصل نزل راْسه بردة فعل طبيعية من ضربهم له
بتال حاوط رقبة فيصل بيده وبابتسامة:والله وكبر اخوي الصغير وصرنا نحسب حساب لمشاعره الرقيقة
فيصل بلع ريقه وندم عاللي قاله كله
.
..بيت نشمي..
،،غرفة راشد،،
راشد فتح عيونه وغمضها بانزعاج من النور اللي يحسه قوي حرك راْسه يطالع لفوق وطاحت الكمادة اللي على جبهته قطب جبينه باستغراب وهو يطالع امه:يمه!!!
عذبة جالسة على كرسي جنب سريره تبدل الكمادات له ودموعها تهل بين فترة وفترة وهي تطالع حالته مسحت على راْسه وهي تسمي عليه:بِسْم الله عليك ياقلب امك بِسْم الله عليك
راشد طالعها باستغراب:وش جابك هينا؟
عذبة بابتسامة تكبح فيها دموعها:ماعليه ياعيني انت الحين عندي ووسط اهلك لاتشيل هم وانا امك وارتاح
راشد انخطف وجهه وهو يفز جالس ويطالع امه ويمسك يدها وبفجعة؛سووا لك شي؟؟ضروك يمه ضروك؟؟!
عذبة وقفت وهي تمسك يديه:بِسْم الله عليك يمه بِسْم الله محد جاني ياراشد محد تعوذ من الشيطان يايمه تعوذ
راشد بفجعة:يمه والله والله شفته يمه شفته بعيني يطير ماهو ادمي يطير يمه يطير والله يطير
عذبة بدموعها:بِسْم الله عليك ياعيني بِسْم الله الله يحفظك لي بِسْم الله
راشد سحب يمينه من يديها ومدها لها:مسكني يمه والله مسكني وسحبني معه يمه
عذبة مسكت يده وهي تسحبه لحضنها وتضمه:مصدقتك يمه مصدقتك انت بس اهدا لاتخاف يمه بسم الله عليك
راشد فك نفسه من حضنها وهو يحسها مكذبته:يمه اقولك شفته بعيوني ورب البيت شفته!!
عذبة:مصدقتك ياعيني والله مصدقتك
راشد قام من سريره وهو يرمي لحافه بعيد:بزر انا تكذبين علي!!عيونك يمه تقول شي ثاني
عذبة وقفت:ومن متى ياراشد أكذبك انا من متى!!
راشد بغبنة:ليش ماتصدقيني ليش يمه!!اسألي العيال كلهم شافوه معي شا،،سكت وهو يستوعب ان محد قابل هالحمدان غيره،،
عذبة ببكاها:يايمه لاتوجعني عليك اكثر يايمه تكفى والله مصدقتك والله
راشد طالع امه بصدمة من اللي بباله:يمه كيف جيت للبيت؟متى جيت عندك!!
عذبة وهي تطالع وجـهـه المخطوف:جابك سعود ياراشد والله هو اللي جابك للبيت،،تقدمت له،،يمه راشد
راشد رجع خطوة لورا وهو مرعوب:لا يمه لا لاتلمسيني يمكن اللي يهددون حمدان يسوون لك شي لاتلمسيني
عذبة انهارت وهي تشوفه بهالحالة لأول مرة وبفجعتها:يمه ياقلبي يارب لاتختربني فيه يارب بِسْم الله عليك يايمه بِسْم الله
راشد وهو ماسمع كلام امه ومن الأساس مو منتبه لها ولا لخوفها الواضح عليه يدور بمكانه وهو ماسك راْسه يفكر بربكة وضياع افكار واضح وجدا عليه:ميت من١٥سنة!!كيف كيف!!انا لازم أتأكد بنفسي ماراح اصدق الا اذا  شفت قبره بنفسي،،مشى،،
عذبة اتسعت عيونه وهي تمشي وراه ومسكته على بداية الدرج:وش قبره!!راشد يمه تعوذ من الشيطان يايمه تعوذ
راشد سحب يده:يمه لازم اشوف حمدان واكلمه لازم يمه،،نزل الدرج بخطوات سريعة،،
عذبة وراها بصراخها:يبه يمه الحقوا ولدي تكفووون
راشد التفت يطالعها وبحدة:يمه وش فيك!!انا باتفاهم مع حمدان واشوف لي حل بهالموضوع
عذبة مسكته:طيب انا بأجي معك ماني بقاربة هالحمدان بس ابي أجي معك
راشد سحب يده:لا يمه لا،،مشى يهرول بخطواته متجه لباب البيت،،
جسّار واقف على باب بيت جده بيدخل للبيت جاي من بيت الشعر انفجع وهو يسمع صراخ عمته وفتح الباب بقوة وانصدم براشد قدامه وانصدم من شكله:راشد؟!!
راشد مر من جنبه:ابعد عن طريقي
عذبة:لا ياجسار لاتتركه امسكه تكفى
جسّار مشى وراه:طيب قولي وين رايح
عذبة تمشي وراهم وبوسط بكاها تهمس بحسرة عليه:يمه ولدي ياربي احفظه لي يارب يمه يايمه ولدي راح 
راشد يمشي بسرعة مارد عليه
جسّار اسرع بخطواته ومسكه وظل ماسكه يوقفه:راشد
راشد سحب يده بقوة وبصراخ:مالك كلمة علي
جسّار:وانا مارديتك سألتك بس!!
راشد بصراخ:كيفي اروح وين ماابي ومكان ماابي!!
ابو غازي خرج من بيت الشعر وقفل الباب وراه ووقف وبحدة:راشد!!
راشد التفت يطالع خاله بتكشيرة على وجهه عكس ملامحه هدوءه المعتاد:خير
ابو غازي ارتفعت حواجبه
بتال وفيصل خارجين من بيتهم باتجاه بيت الشعر ووقفوا يطالعونهم
ابو غازي مشى له بخطوات سريعة:وين رايح ماتشوف خوف امك!!،،وقف قباله،،وش صابك!!
عذبة تطالعهم وسط دموعها وهي مرعوبة عليه ومن كثر رعبها ماتبي تقول شي ويعاند اكثر
راشد بعصبية:مافيني شي رايح اخلص لي شغلة وراجع
ابو غازي:وهالشغلة عند رجل متوفي من ١٥سنة ياراشد!!
راشد بصراخ بوجه خاله:مامات وش اللي مات!!مجنون انا مجنون!!مين اللي اكلت معه وسولفت معه وساعدته وساعدني!!ها يعني اكذب نفسي واصدقك!!
ابو غازي ضربه كف بكل قوته
راشد طالعه بحدة
ابو غازي استغرب نظرته للحظة وكمل بنفس حدته:الرجل ميت وكل اهله ميتين ومن فترة ياراشد اصحى وحس بنفسك اللي شفته وعشته شي يبي له شيخ يطلعك منه
راشد بغيظ:وش قصدك انهبلت!!
بتال انحنى وهمس لفيصل:ادخل بيت الشعر ولاتخلي ابن امه يخرج منه
فيصل مشى بسرعة وهو يعرج
ابو غازي وهو يحاول يكتم غيظه:من اللي قال انهبلت!!يخسي ويعقب من يقوله اقطع لسانه من اخره!!
راشد زفر
ابو غازي:الديرة اللي رحت لها ماهي بزينة لازم شيخ يقرا عليك بس نتطمن
راشد:تم لكن على شرط
ابو غازي قطب جبينه:اللي هو!!!
راشد بغبنته:بالاول اشوف هالحمدان واذا كان مثل ماتقولون بروح الشيخ كل يوم بنفسي
.
..بيت عادل..
،،غرفة امجاد ورهايف،،
رهايف نايمة ع سريرها من الظهر ماتحركت
امجاد دخلت وهي لابسة بنطلون وبلوزة ووقفت قدام الدولاب تخرج لها فستان التفتت لها وهي تشوف ظهرها وباستغراب منها:رهايف بنت رهايف
رهايف وهي تضم اللحاف عليها بقوة:اوووف
امجاد ميلت فمها باستغراب:واوووف!!!،،مشت لها وسحبت اللحاف،،رهايفوه ووش مسوية؟!!
رهايف مغمضة عيونها:ماسويت شي
امجاد اتسعت عيونها:مررررة واضح من حالتك!!
رهايف جلست وبغبنة:تخيلي فرصة وجت الين عندي وضاعت اااه يالقهر ااااه
امجاد:وش الفرصة!!،،بضحكة،،اااه ماقدرتي تقولين له شي
رهايف زفرت:امجاد تدرين صايرة اكره نفسي والله
امجاد باستغراب:وليش ان شاء الله؟!!
رهايف:احس موقفي منه يتغير
امجاد تطالعها ساكتة
رهايف بقهر من نفسها:امس بدل ماأستانس عليه وانبسط احس اني حزنت عليه
امجاد:عادي جدا ليش هالقهر اللي تقولين عنه!!
رهايف تطالعها بفضول
امجاد:الكافر وهو كافر ترحمينه ويحز بخاطرك لادخل للسجن ظلم وشلون لاصار منك وفيك!!
رهايف:بـــــس أنـا
امجاد قاطعتها:رهايف تبين الصدق وبدون زعل
رهايف بتردد:أسمعك
امجاد:انتي بديتي تميلين له
رهايف اتسعت عيونها:نـعـم!!!
امجاد بجدية:بتسمعيني للاخير ولاامشي؟
رهايف:وهالشي مو عيب ولا حرام هو زوجك بالنهاية واذا ربي تمم على خير بتكونون مع بعض طول العمر وانا اقول لك جواد مافيه عيب هو صح قاسي وكل العايلة كذا واتوقع هو ارحمهم لكن وبما انك بديتيها غلط حاولي تستغلين هالفرصة وتبدين صح مثل بنت ملكت وتتعرف على خطيبها
رهايف:واخواني؟!!
امجاد:اخواني عمرهم ماشكوا لك ولاطلبوا منك مساعدة وش بيفرق اصلا اذا تدخلتي بموضوعهم بيشكرونك مثلا!!والله عن نفسي اتوقع العكس صراحةً
رهايف سكتت وهي كلها حيرة
امجاد:اقول بماانك نايمة من اليوم اكيد مارديتي من اللي وصل العصر
رهايف باستغراب:مين؟
امجاد وهي ترفع وتنزل حواجبها بوسط ابتسامتها وكلها حماس:خطيبة جسّار واهلها
.
..بيت عادل..
،،غرفة الضيوف،،
..العشا خاص لعائلة نشمي وضيوفهم عايلة بادي،،
..البنات جالسين بزاوية وحدة كلهم ماعدا امجاد مو موجودة..
حصة جالسة جنب ام جواد ومثبتة عينها عليها بقهر خصوصًا بعد الخبر اللي سمعتها
ام غازي جالسة جنب ضيفتها بابتسامة مرسومة على وجهها
بخوت جالسة عن يمينها وهي مو مرتاحة للوضع ابدا وتعد الدقايق دقيقة دقيقة بانتظار سعود يعطيهم خير مشيتهم من هالمكان
عباير جالسة عن يمين بخوت وجنبها الجدة منيرة
الجدة منيرة فاتحة تحقيق مع عباير تسألها عن اهل الديرة بيت بيت
عباير طفشت زفرت:مالي علمن باحد اوجسته يمش ياام عادل
الجدة منيرة:علامش كم مرتن اوجس يمش ازهميني مثل البنيات جدة جدة
عباير:السموحة مير اني تعلمت مااوجس كلمة يم احدن واقعد بها تالي
الجدة منيرة قطبت جبينها:اهبي من بنية قنقش محدن يقواه
بخوت انحنت وهي تهمس لعباير:وينها حلايا؟
امجاد داخلة بالحلى وبابتسامة:الصغيرة قالت تبي سعود وأخذها جسّار معه
بخوت طالعت عباير بخوف بعد ماكانت تطالع امجاد وسمعت كلامها
عباير بابتسامة:مشكورة ماقصرتي،،همست لبخوت،،علامش!!ماهو بكل الرجال مثل رجال ديرة بقعا!!
بخوت بهمس:متى بنغدي يم الديرة؟
عباير همست وبنرفزة:وياعلها بصرايم تصرمها وش تريدين بها!!ماوراها غير التهاويل
حصة قاطعتهم:وش فيكم تسولفون لحالكم!!مو عاجبتكم جلستنا!!
عباير كشرت بوجهها
ام غازي طالعت حصة بصدمة
بخوت طالعتها وهي تبتسم:عساها دايمة بحسكم وشلون مانريد هالجلسة!!
حصة:ايييه ع بالي الا اشوف اسمائكم بخوت وعباير وحلايا اللي مسميكم شكله يبيع جملة،،ضحكت،،
الجدة منيرة بنرفزة:حصة!!
بخوت كشرت بوجهها وسكتت
عباير زفرت بابتسامة وهي تحط فنجالها عالطاولة قدامها:عاد وصلنا لمربط الفرس ياحبي للي ينشد عن شين بهاللون!!حتى ماتتبعني ملامة!!
حصة كشرت بوجهها
بخوت مسكتها من يدها وهي تهمس:عباير
عباير سحبت يدها من بخوت وهي تحط رجل على رجل:ابدعي لش من شان خويطر عجيزش اللي قاعدتن جنبي،،وهي تطالعها من فوق لتحت،،ولا انتي الشكوى لله
حصة اتسعت عيونها:نعم!!
رهايف تحمست وهي تطالع الهوشة اللي تطبخ بشويش
عباير بتطنيش لها؛مير الله يسلمش هذا جدي الله يطول بعميره يوم امي لفت،،وهي تأشر على بخوت،،بهالقمر اوجست يم جدي يسميها وسماها بخوت عاد يوجس انه يريد كل بختن زين بهالديرة يغدي يمّها بروحها
بخوت اخذت نفس وهي تذكر حظها اللي عكس مايبيه جدها
حصة ارتفع حاجبها وهي تطالع بخوت من فوق لتحت
عباير:وثمن يوم امي لفت،،رجعت شعرها اللي ع جنبها الأيمن بطرف اصابع يديها لورا ظهرها بغرور وسط ابتسامة،،بهالزين كله
حصة زفرت بضحكة خفيفة كلها سخرية
عباير:اوجست يم جدي يسميني وسماني عباير عاد خاطري تنشديني ليش سماني عباير
حصة وهي تتكتف:ماهو بلازم أعرف
عباير ضحكت:الا بالله لزومن تعرفين جدي غدا بامي يم المستشفى أوحى مرتن يزهمونها عبرة
حصة كشرت بوجهها وهي وصلت لمقصد عباير
عباير:وجدي لاضرب ضربتن وحدة وثم يسري علمها بين الخلق وتغدي الضربة ماهي عبرتن وحدة الا،،اتسعت ابتسامتها،،عباير لهم جميع!!
حصة عضت شفتها بغبنة
عباير تنهدت وهي تنحني وتاخذ فنجالها وتريح بجلستها:والحمدلله هذاني قدامه اسمن على مسمى
حصة وقفت وهي تبي تتهاوش معها
ام غازي طالعتها بحدة
حصة شدت على قبضتها وهي تطالعها وتذكر ان وسمية نبهتها ماتقول شي ابد
عباير:عاد حلايا سبحان الخالق من اسمها حلايا كلها كاملة الأوصاف
رهايف وقفت وهي تصفر وتصفق:واااااو وااااو ياشيخة يسلم فمك والله
عباير اغترت بنفسها اكثر وهي تتقهوى
حصة بعصبية:رهايف وووجععع!!!
.
..بيت الشعر..
،،الجلسة مابها احد غريب عليهم نشمي وعياله وعيالهم>>مسفر وعادل وجسّار وفيصل>>وبادي وسعود،،
،،الهدوء مغطي المكان،،
الجد بادي جالس وهو ساكت ماينطق حرف
الجد نشمي جالس جنبه التفت لأبو جواد اللي عن يساره:وينه جواد؟
ابو جواد:قال انه بيجي
ابو غازي جالس جنب ابو جواد:اتركه يبه اكيد يبي يرتاح شوي
سعود جالس جنب جسّار وهمس له:وشلونه  راشد؟
جسّار:ان شاء الله طيب ان شاء الله
سعود:صدق ياولد؟
جسّار:ماعليك ذيب راشد ماتعرفه!!
سعود بشك:والله مدري عنك،،سكت بتردد كيف يفاتحه بالموضوع،،ابي اوجس يمك علمن مير اني متحير وشلون أعلمك
جسّار اعتدل بجلسته:خير عـسـى ماشر
سعود:الصحيح ياجسار
جواد فتح باب بيت الشعر بثوب ابيض وشماغ لافه على راسه:السلام عليكم
،،الكل رد السلام وسط صدمة من اللي معه،،
جواد دخل وبيده سلاح
الجد نشمي اعتدل بجلسته:ولد!!وش فيك!!!
جواد مارد على جده واتجه لعمه وهو يجلس قباله بالضبط وينزل السلاح عالارض بينهم ورفع عينه يطالعه بجدية
الجد بادي وقف وهو يشوف اللي يصير:سعود
سعود وقف
حلايا اللي جالسة بينه وبين جسار وقفت على طول وهي تشوفه يوقف
الجد بادي:غدينا يم ديارنا
سعود:ابشر،،مسك يد حلايا بياخذها معه،،
الجد نشمي وهو يوقف:اصبر ياولد
سعود وقف
الجد نشمي:علامك مطيور يابن الحلال احتر العشا
الجد بادي بجلافة:يكثر خيرك مير إنا مستعجلين
الجد نشمي:على وش!!ماوراك شي يارجل!!
الجد بادي:حنا غدينا بالصبي(راشد)يمكم وحنا نراعي حويله(حالته)ماش وحطيناه عندكم وثمن لزمتوا بالقهوة وقعدنا من شان خاطركم غيره مالنا به يكثر خيرك
الجد نشمي مسك يده وضغط عليها:يابادي اخز ابليس واقعد
الجد بادي سحب يده:مشكور مرتن ثانية يكثر خيرك
الجد نشمي تنهد:على ماتريد على ماتريد
الجد بادي طالع سعود:علامك ياولد وش تحتري!!
سعود:ابشر ابشر،،مشى وهو ماسك يد حلايا،،
حلايا تمشي معه
سعود التفت لفيصل اللي عن يساره:فيصل لاهنت
فيصل بيوقف:ابشر
جسّار وقف وهو يأسر لفيصل يظل جالس:امرني ياسعود هـلا
سعود:بس عنيته يغدي بحلايا يم البنات حتى سعدت يمّنا بنسري
جسّار:ابشر ابشر،،مد يده لحلايا،،
حلايا اللي فردت يديها
جسّار ضحك:يمه منك!!
سعود باحراج:حلايا!!!
حلايا طالعته عن طرف:اوزس(اوجس)يم زسار مااوزست يمك سي(شي)
جسّار تقطع من وناسته على اسمه من فمها وانحنى وهو يشيلها:الله يقطع زسار اذا ماشالك ياشيخة،،خرج وهو شايلها،،
سعود خرج وراه
جسّار دار فيها
حلايا صرخت وهي متعلقة برقبته
جسّار نزلها وهو يضحك
حلايا طالعته بزعل
جسّار:ياربي ماتوقعتك خوافة ياورعة
حلايا:ماني بحايفة
جسّار بعباطته يقلد صرختها
حلايا تطالعه وهي مبوزة
جسّار بضحكة:ايه ماتخافين مرررة!!
حلايا جرت له وهي ترفع يدها بتضربه
جسّار هرب وبصوت عالي:ياااوك جاكم الموت ياعرب!!
حلايا ضحكت وهي تجري وراه
سعود اخذ نفس بهم وهو يطالعه مايدري وشلون يقوله
الجد بادي خرج شهق وهو يشوفه واقف وبحدة:سعود!!
سعود مشى للسيارة بسرعة:غديت غديت
>>ببيت الشعر
ابو غازي يطالعه بشك زفر:خير ياجواد؟
جواد:الخير عندك وبين يديك ياعم
ابو غازي ميل فمه وهو ينزل عينه للسلاح ثم طالعه:قول ياجواد وش عندك؟
جواد اخذ نفس:تدري ياعم اني منعت الوظايف عن جسّار وبتّال بطريقتي؟
ابو غازي ميل فمه بابتسامة خفيفة:ايه ادري
جواد:وليش ماتكلمت معي؟ليش ماعاتبتني؟!!
ابو غازي:رزقهم بيجيهم لو تبني حولهم سور الصين مرتين بيجيهم غصبًا عنك ماتقدر ترده!!
جواد اخذ نفس وهو يشد ع قبضتيه:ياعم انا اللي صوبت الراعي بذاك الوقت ماهو ببتال
ابو غازي قطب جبينه باستغراب من اعترافه بهالوقت
جواد:وانا السبب باللي صار لك من ورا السالفة
ابو غازي:داري لكن وش المقصد من ذا الكلام كله؟
جواد:خذ حقك
ابو جواد اتسعت عيونه بصدمة
ابو غازي:اخذ حقي!!
جواد:ادري ان اللي صار ماعاد بهو منمسح من ملفك ولا بيرجع امور كنت تبيها ومنعوها عنك(يقصد أشياء بدوامه)لكن خذ حقك بالطريقة اللي تناسبك حتى لو ترميني مثل مارميته
ابو غازي مد يده للسلاح وأخذه وتفحصه بنظراته وهو بين يديه:وش اللي ذكرك هالسالفة بعد هالسنين ياجواد؟
جواد سكت
ابو غازي رفع عينه لجواد:لايكون اللي صار معك حرك شي فيك!!
جواد:ايه حرك وحرك الكثير اهم شي ماانام الليلة وبقلبي هالندم راضي باللي تبيه ولا هالشعور يظل ساكن فيني
ابو غازي وهو يقلب السلاح يمين ويسار تنهد:تقول اخذ حقي بالطريقة اللي أشوفها؟
جواد بدون تردد:ايه
ابو غازي ثبت السلاح على كتف جواد:هينا صوبته صح؟
الجد نشمي بحدة:عادل!!
جواد وهو يطالعه بدون خوف:ايه
ابو غازي:اجل سم(قول بسم الله)
جواد بلع ريقه وهو شاد ع قبضته يخفي رجفة يديه
ابو غازي.بسم الله
جواد غمض عيونه
ابو غازي طالعه وهو يكتم ضحكته وضربه بطرف السلاح بخفة على راسه
جواد قطب جبينه وهو يفتح عيونه:اااه
ابو غازي وهو يخفي ضحكته:خبل انت خبل!!وش هالكلام اللي مابه سنع!!
جواد يطالعه مستغرب
ابو غازي:من اول اقول انك أحسن عيالنا وأعقلهم طلعت ثور مثلهم ابد ماابعدت عن عيال عمك
جواد:بس
ابو غازي قاطعه وبنص عين:الظاهر والله اعلم انك ناوي تحطني بالمكان اللي جيت منه!!
جواد اتسعت عيونه وبسرعة:اعوذ بالله الله لايقوله والله ان نيتي زينة ماابي شي لك مو زين ابد ياعم
ابو جواد يطالع جواد بصدمة
ابو غازي وهو يطالعه ابتسم:ادري ادري ياجواد
جواد طالعه:ياعم
ابو غازي:مافي ابو يعاقب بعقله يرمي ولده!!واللي فات مات وانت ولد اليوم ودامك صدق ندمان ارجع لإخوانك بتتعب لكن اصبر عليهم وانا عمك اصبر
جواد:الخاطر كيفه؟
ابو غازي:وسيعٍ من اول من قبل لاتجي
جواد رفع نفسه وهو يجلس على ركبه وسلم على راسه:الله يبرد ع قلبك ياعم مشكور مشكور،،بتردد،،فيه شي اقول شي ياعم
ابو غازي عقد حواجبه:خير؟
.
..بالسيارة..
،،المكان هادي بدون اَي صوت من حركوا،،
راشد مكان الراكب صاد بوجهه ساكت
بتال يسوق:راشد
راشد وهو صاد بوجهه:ماني مجنون يابتال عقلي براسي للحين
بتال ماالتفت له:محد قاله ابد
راشد:تكلمت معه يابتال
بتال:صدقت
راشد:ساعدته وقت ماكانوا يطاردونه
بتال:صادق
راشد:وصلته معي للدوام
بتال:صادق
راشد بغصة من صدمته بنفسه:اكلت ببيته،،عض شفته وهو يبلع غصته،،ولعبت مع بنته
بتال:صدقت
راشد التفت له وبصراخ:وش صادق!!يقولك ميت من١٥سنة تأخذني على قد عقلي انت!!
بتال وقف بالسيارة ع جنب والتفت له:لاوالله ماتكذب اَي والله صادق!!
راشد صرخ بقهر منه:بتاااال!!!
بتال:لو كل العالم تكذبك وتأخذك على قد عقلك وتسلك لك انا لا مصدقك ورب الكعبة مصدقك
راشد يطالعه وهو يبلغ غصته اللي تزيد كل شوي وبرجفة صوته الواضحة:ليش؟!
بتال:نسيت اني انسحبت معك بذيك الليلة!!
راشد:بس
بتال قاطعه:السحبة بذاك اليوم ماهي تهيأت ابد والدليل جروحنا بعدها،،حرك بالسيارة وعينه عالطريق،،
راشد بفرحة ان فيه احد مصدقه:شفته يابتال
بتال:اكيد شفته
راشد:بدون رجوله
بتال:عيونك ماتكذب مو سحبونا!!!
راشد:سحبني من مكان وحطني بمكان ثاني
بتال:الله اكبر عليه ابن الكلب روعك ليتني معك!!
راشد ابتسم وهو يتكي براسه عالقزاز وهو يصد بوجهه عنه:رجعنا للبيت يابتال
بتال التفت له:ليش!!!
راشد اخذ نفس:رجعنا للبيت
بتال:على كيفك هو!!!الحين اقتنعت انك ملبوس ماانت بصاحي كل شوي راي!!
راشد ضحك
بتال:وتضحك!!
راشد بابتسامة:شكلي ملبوس تصدق وشلون اترك امي وانا اشوف حالتها ديِور بس ارجع
بتال ابتسم وهو يلف يرجع طريقه:تصدق عاد بيمسكها عليك جسّار لحد ماتشيب
راشد وهو يسند راْسه عالمقعدة وهو يغمض عيونه:مايقدر
بتال ضحك:صاااادق خواااف من يومه
راشد بابتسامة وهو مغمض عيونه:يبي لي أشوف له طريقة اخوفه فيها
بتال اعتلى ضحكه وهو يتخيل جسّار مرعوب
.
.........****..........
     يوم جديد
.........****..........
أم جـلاجـل .
..بيت بادي..
الجد بادي متلثم بشماغه ومتكي براسه ع قزاز السيارة بوسط غفوته
سعود وقف بالسيارة عند باب البيت على وقت صلاة الفجر
الجد بادي صحى بوقفة السيارة واعتدل بجلسته وهو يفك شماغه:ظلك مع خياتك لامـن توكد من قفلة الباب
سعود:على امرك ياجد ابشر
الجد بادي نزل وهو يتجه للمسجد عقد حواجبه وهو يطالع السيارة اللي واقفة عند المسجد دخل للحمام الوحيد اللي جنب المسجد ومخصص للوضوء توضى واتجه للمسجد وفتح الباب ودخل وهو يمد يده لمفتاح اللمبات وقفت حركته وهو يطالع اللمبات شغالة بجهة من المسجد وزاد استغرابه وهو يطالع الرجال المتمدد بزاوية المسجد ومتلثم بشماغه نايم كمّل طريقه باتجاه المنبر ولا صحاه وقف وهو يعطيه ظهره ومتجه للقبلة رفع صوته بالأذان:الله أكبر الله اكبر
المتلثم فز من نومته جالس وهو يلتفت بجسمه كله يطالعه بصدمة من وجوده خنقته العبرة وهو يتأمل ظهره وشلون انحنى وشلون صار يستند على عكاز بعد ماكان فارد طوله بهيبة بلع غصته وهو ياخذ نفس ويزفره ووقف وهو يفك لثمة شماغه رسم ابتسامة على وجهه وهو ينتظره ينتهي من الاذان
الجد بادي واخيرا وصل لاخر الآذان
المتلثم شد ع قبضته وهو يحس بتوتر يجتاحه من لحظة اللقى بعد فراق عمر
الجد بادي لف وهو يهلل ويكبر سكت وسط اتساع عيونه بصدمة وهو يطالعه قباله
نشمي بابتسامةصبحت بالخير ياوجه الخير
الجد بادي طالعه مكذب نفسه يمكن يتهيأ له لكن لااا ماوصل لمرحلة التهيؤات للحين بكامل صحته طالعه يتأكد نفس الوجه نفس الابتسامة نفس الهدوء اللي واضح على وجدًا على هيأته دقق نظره اكثر كشخص تغير اَيه تغير كبر وغزا راْسه الشيب اخذ نفس وبهدوء:ياصباح النور،،لف عنه وعطاه ظهره وهو يكبر ويصلي تحية المسجد،،
نشمي انصدم من ردة فعله الهادية الخالية من اَي مشاعر عكس توقعاته دخل قلبه الخوف من هالهدوء الغريب وهو حتى ماسلم عليه اخذ نفس وزفره خرج واتجه للحمام الوحيد حتى يتوضا وبعد الصلاة يصير خير .
>>بعد الصلاة>>
.
..بيت مناور..
مناور دخل للبيت ووقف وهو يطالع بناته اللي يتعاونون بتجهيز الفطور:السلام عليكم
،،البنات اتجهوا يسلمون على ابوهم وحدة وحدة وبعد السلام،،
مناور جلس عالفطور:بنت ياشريفة
شريفة جالسة عالفطور:سم يبه
مناور:اغدي يم غيث وهدية وازهميهم عالفطور
شريفة وهي توقف:ابشر يبه ابشر
غيثة بلعت لقمتها بسرعة وهي تأشر بيدها لشريفة
شريفة وقفت تطالعها باستغراب
غيثة:اقعدي اقعدي لاتغدين يمهم تريحي وانا اختش تريحي
مناور بنرفزة وهو يطالعها:اعقبي!!وانتي وش عليش حتى تردينها!!
نايفة بقهر:وهذا الصحيح يبه علامك خنفرت علينا!!
مناور بعصبية:انتم الثنتين تنكعمن ماتوجسن غير اكذاب!!
غيثة بغبنة:ماعمرنا اوجسنا اكذاب يمك يبه مير انه هدية توجس لانوينا نغدي يمهم نرسل يمها مراسيل كود تريد تقلطنا ولا لا!!
مناور بحدة:وشو!!!
ام غيث وهي خارجة من المطبخ متجهة لهم:اللي اوحيته!!،،جلست عالفطور،،
مناور كشّر بوجهه وهو يطالعها:مير اني اخذت عهدٍ مااوحي لكن شين ابد ماغير،،التفت يطالعها،،نوفة
نوفة اللي تنزل الخبز انصدمت وطالعته
مناور:علامش تراعيني ماتوجسين شي!!
نايفة:هذا العلم يبه
مناور بحدة وهو يكبح نفسه لايمد يده عليها:اوجست يمش انكعمي!!اوجسي يانوفة!!
نوفة:صحيح يبه صحيح
مناور قطب جبينه:هدية أعملت هاللون؟!!
نوفة:ايه يبه
مناور ضـحـك
،،الكل يطالعه مصدوم،،
مناور وهو يطالع شريفة:اغدي يمها اغدي واوجسي اني احتريها بالفطور ولاتوخر علي
.
الجد بادي يمشي متجه لبيته
نشمي يمشي وراه مايدري وش يقول او وش بسوي وهو حتى ماترك له فرصة يرد
الجد بادي بحدة:هين ياسعود هين هاذي آخرتها لاصلاة جماعة ولا حتى تبعتنا باخر ركعة اعقب من ولد مابه خير تف عليه تف ولاحتى غدا يتسنن(سنة)هين هين ياولد زاهية هين ان ماعزفتك(كرهتك)الربادة ماني ببادي هين هين
نشمي اتسعت عيونه وهو يسمع تهديد ابوه
الجد بادي قطب جبينه باستغراب وهو يشوف دخان النار المتصاعد من العشة اسرع بخطواته
نشمي لحقه
الجد بادي وقف وهو يطالع العشة
سعود وهو لاف شماغه يجهز القهوة ابتسم وهو يوقف ويضرب يديه ببعض ينفضها:حياك ياجد وحي الضيوف بهالساعة!!
الجد بادي قطب جبينه للحظة وهو يطالع الجالس باستغراب ثم ابتسم:حي الله الضيف ياحيه
نشمي تغيّر وجهه وهو يطالعه
يوسف وهو يوقف بابتسامة:الله يسلمك،،انصدم للحظة هو يطالع نشمي ماتوقع يقابله ثم كملها،،يبه!! الجد بادي التفت لنشمي يطالعه ينتظر تفسير
نشمي قشعر جسمه وبوسع عيونه:يوسف!!!
.
..........****..........
..بيت الجد نشمي..
،،غرفة راشد،،
راشد جالس ع كرسي مكتبه وممدد رجوله فوق المكتب وعينه بجواله
بتّال متمدد ع سرير راشد ع ظهره وهو رافع الايباد يلعب
راشد كشّر بوجهه وهو ينزل رجوله من فوق المكتب ويلف بالكرسي عليه:هــيــه انت متى ناوي تروح بيتكم؟
بتّال وقف اللعبة ونزّل الايباد ع بطنه وباستغراب:جاك النوم؟
راشد ارتفعت حواجبه:لاوالله!!!
بتال باستغراب:وش فيك؟!
راشد؛مين اللي مسنتر عندي ومطفشني ماتركني انام!!
بتّال:وش فيك صاير ماتتحمل!!
راشد اتسعت عيونه:أنـا؟
بتّال قطب جبينه وبشك:لايكون لمحت شي
راشد اخذ نفس:استغفر الله العظيم
بتّال باستعباط:اسف اسف لاتزعل علينا ويجوني اخوياك
راشد كشّر بوجهه من كلامه وهو يزفر بقلة صبر ويطالع بتّال اللي على سريره من فوق لتحت:وانت ماتحس فيه شي غلط ابدا؟!!
بتّال جلس وهو مقطب جبينه:صدق!!وش؟
راشد زفر:كمل لعب كمل الله يستر عليك!!
بتّال وقف وهو يمددجسمه:ااااه يازين سريرك والله اتعب وانا اقولك يريح!!
راشد:خذه لك وفكني من وجهك
بتّال ابتسم:والله
راشد كشّر بوجهه وهو طفش منه:امزح امزح تكفى رح
بتّال بابتسامة:هيّا والله مااردك كريم كريم الله يحفظك لعمتي ياشيخ
بتّال جلس عالسرير:يازينه ماشاء الله يازينه،،رفع اللحاف بيتمدد،،
راشد اتسعت عيونه وهو يشوف انه صدق بينام وبنبرة اقرب للترجي:بتاااال!!
بتّال طالعه:نـعـم؟
راشد:عمي اكيد ينتظرك
بتّال تمدد:تطمن يدري اني معك
راشد قفلت اخلاقه يبي ينام وقف واتجه له وهو يسحب اللحاف من عليه
بتّال باستغراب:وش فيه!!
راشد بعصبية:قم
بتّال:ليش!!،،اتسعت عيونه،،شفت شي؟!!
راشد:ايه على راسك بس قم وخلصني
بتّال كشّر بوجهه:ماني بجسار تلعب علي،،تمدد،،
راشد:قم بتّال
بتّال وهو يعطيه ظهره:انت قلت لي اخذه!!
راشد زفر ومسكه من رجله وسحبه وطيحه عالارض
بتّال مسك راْسه بألم
راشد:برا برا ماتحس ماتستحي ابي انام ياأخي ناموا عليك جن!!
.
..الصالة..
،،عالفطور،،
>>الجد والجدة وعذبة وابو جواد ورهايف>>
عذبة عينها ع المدخل تنتظر على اعصابها
الجدة منيرة زفرت:يابنت الحلال معه بتّال أفطري بس
الجد نشمي زفر:كبيها عنك يعني ماانتي خابرتها
الجدة منيرة طالعت رهايف اللي جنبها بشك:وانتي وش وراك؟
رهايف التفتت وراها:مافيه شي!!
الجدة منيرة قرصتها من جنبها
رهايف وهي تمسح على المكان:اااه ياجدة!!
الجدة منيرة:هاتي العلم؟
رهايف مسكت يد جدتها بين يديها وهي تمسح عليها وتبوسها وبابتسامة:منيرة منّورتي
،،الكل طالعها،،
رهايف احتضنت ذراع جدتها وهي تحط راسها على كتف جدتها:ام عادل الحلو اللي احلى واحد بالكون ولاقبله احد بالحلى غير امه
الجدة منيرة بنص عين:ايه هذا انتي واخوانك لابغيتم شي جيتوني بهاللسان اللي مامثله
رهايف جلست ع ركبها وهي تبوس خدودها
الجدة منيرة وهي تدفها:اذلفي عني ذبحتيني الله اكبر عليش
رهايف ميلت راسها وهي محاوطة رقبة جدتها بين يديها:قولي تم
الجدة منيرة:مامن تم الا الى سمعت وش تبين؟
رهايف:ابيك واسطة
الجدة منيرة:ابوك يعيي عن كل شي
رهايف:مو ابوي!!
الجدة منيرة قطبت جبينها:اجل عند مين!! رهايف:عند
بتّال دخل وهو يقاطعها ويرفع يده:سلامون علاكم ياقوم،،سلم عليهم جلس جنب عمته،، عذبة وهي تقرب له الفطور بسرعة:ها يابتال؟
بتّال:جوعان ياعمة ويديني توجعني
عذبة اخذت لقمة وأكلته
رهايف اتسعت عيونها:الله أكبر عليك!!
بتّال وهو ياكل:اوص اوص وش دخلك انتي
عذبة تطالعه بقلق
بتّال طالع عمته:لو ماادري انه كان تعبان البارح كان قلت اهب وش ذَا البعير شاتني ياعمة برا الغرفة
عذبة:ماقال شي؟وش يوجعه؟
بتّال:يقول يبي ينام تعبان
عذبة:قال شي عـ
بتّال قاطعها:عمة والله راشد مافيه الا العافية هي بس فجعة والله لايسامح اللي يلومه
عذبة:بس يابتال
بتّال مسك يدها:والله ياعمة والله مافيه الا العافية اول ماحط راْسه عالمخدة خمد(نام)لاتشيلين هم
الجدة منيرة:عذبة انتي براسك لو شفتي ماشاف ماظنتي بيبقى بك عقل
بتّال:عمة اول مايصحى بتشوفين راشد نفسه ماتغير بيغثك هو ووجهه
عذبة سكتت
بتّال ضغط على يدها:والله ياعمة والله مافيه شي والله اقولك سحبني من السرير وطحت على راسي،،قرب راْسه منها،،حتى شوفي اهب ياولدك ذَا ماتقولين تعبان
عذبة وهي تمسح على راْسه:بِسْم الله عليك بـس اذكر الله يابتال
الجدة منيرة لفت تطالع رهايف:اخلصي انتي مين تبيني اتوسط لك عنده
بتّال قطب جبينه:وش واسطته
رهايف طالعته:شي خاص
بتّال طالعها بشك:وش هالشي الخاص
الجدة منيرة:مالك شغل خصوصيات توكل بيتكم الفطور نفسه هو هو مسويته امك
بتّال بوسع عيونه:تطرديني ياجدةومن متى تعرفين خصوصيات!!
الجدة منيرة:واطرد ابوك معك تيسر يالله
رهايف وهي ترفع حواجبها وتنزلها له بوسط ابتسامة
بتّال اشر على رهايف:تطرديني عشانها
رهايف بشوفة نفس:مواضيع خاصة
بتّال زفر بضحكة خفيفة
الجدة منيرة:وليش مااطردك تيسر تيسر أعجل علينا بس
بتّال وقف:هين هين يالعجوز هالخبلة اللي جنبك لاتزوجت بتسحب عليك مابتلقين غيري هين
الجدة منيرة رفعت عكاز نشمي بتضربه:عيب عليك استح!!
بتّال:ايه عجيز المشكلة اني احبك يالعجوز لكن هين هالنتفة بتروح وترجعين لي هين هين
الجدة منيرة:رح بس رح يالله
بتّال:بروح بروح،،مشى،،
الجدة منيرة التفتت وهي تمسك رهايف من اذنها وتشدها:عسى الموضوع يستاهل طردته يارهايف
.
..بيت عادل..
ابو غازي وهو يمرر نظره عالحلا اللي يحبه وقدّامه واللي ابدا مو بوقته على ذَا الصباح والورد اللي قبال ام غازي:ايه ياجسار وش عندك؟
جسّار جالس قبالهم وبجديته:يبه يمه اذا ماتبوني أتزوجها ابشروا تم على امركم لا رحت هالمرة للديرة اعتذرت من الناس
ام غازي وهي تاخذ الباقة وتوقف:مشكور عالورد ياجسار ورايي تعرفه،،مشت،،
جسّار اتسعت عيونه وهو يشوف امه تتركه بمواجهة ابوه لحاله اخذ نفس وهو يطالع ابوه
ابو غازي زفر وهو ينحني للفناجيل وياخذ فنجال ويمده لجسار
جسّار فز وهو ياخذ الفنجال ويصب لابوه قهوة
ابو غازي وهو يمد يده الحلا ويتقهوى بهدوء وسط تفكيره
جسّار يطالع ابوه الساكت بتوتر ويحس بكل دقيقة تمر عليه وكأنها سنة
امجاد واقفة عالمطبخ وهي بيدها ثلاجة(ترمس)أعشاب تراقب الوضع بفضول
ام غازي وقفت وهي تمد يدها:جيبي
امجاد أعطتها وهي تطالعهم
ام غازي سكتت عنها وهي نفسها تخاصمها عاللقافة لكن تركتها ورجعت لهم
ابو غازي زفر وهو ينزل الفنجال ويوقف
جسّار يطالعه بصدمة
ام غازي وقفت عنده
ابو غازي:تأخرت على ابوي وامي اليوم
ام غازي مدت له الثلاجة:أعشاب لعذبة تلاقيها الحين قرت كل أمراض العالم ولقتها بولدها
ابو غازي وهو ياخذها:الشكوى لله الله يربط على قليبها
ام غازي :شوي امرهم ان شاء الله
جسّار يطالعهم بوسع عيونه من تصرفاتهم الطبيعية بدون اهتمام لسؤاله الجدي لهم:كل همكم راشد!!!وانا؟!،،احتدت نظرته،،يبه ابي اعرف جوابك؟
ابو غازي طالعه:وش تبيني اقول!!الزواج سنة الحياة وانت ماانت اول ولا اخر من يتزوج!!
جسّار بجرأة:يعني؟!!
ابو غازي:يعني نهاية الاسبوع الجاي انا وأمك بنخطبها لك رسمي
ام غازي ابتسمت:مبروك ياجسار مبروك الله يوفقك وماله داعي هالكلافة!!
ابو غازي تنحنح:الصدق كنت متردد لكن انك تجيب الحلا وورد لامك على غير العادة وانا خابرن طبعك أقنعتني انك تبيها ماهو بلعب
جسّار تغيّر وجـهـه
ابو غازي قطب جبينه
ام غازي باستغراب:وش فيك!!
بتّال دخل بتكشيرة وهو يطالعهم ويشوف امجاد اللي تراقبهم من بعيد
جسّار:يعني خلاص بأتزوج!!صدق صدق بأتزوج
بتّال ابتسم
ابو غازي اتسعت عيونه وبعصبية:ولد!!اثقل!!مبلشني تبيها والحين يتلون وجهك!!وش ذَا العلم!!
بتّال غنى وهو يرقص متجه لهم:ومباركين العرس الاثنين ليلة ربيع عين وقمرا
ابو غازي التفت له وبحدة:ولد!!
جسّار اتسعت ابتسامته وهو يشوف عباطته وسلم على راْس ابوه:باصير عريس يبه
ابو غازي يطالعهم بصدمة
جسّار اتجه لبتّال وهو يتصنع الثقل:بـس عيب ياولد!!،،اتسعت ابتسامته،،عيد بالله عيد
بتّال غنى:ومبارك العرس الاثنين ليلة ربيع عين وقمرا
جسّار يطق رقبة قدّامه
ام غازي زغرطت لهم وهي تضحك
ابو غازي بعصبية:بــس!!اقطع من رجال إترقصون عندي لاحيا ولا مستحى!!
جسّار طالع ابوه وهو يغمز له:لاتزعل انت ابو العريس واذا تبي ابشر بأشوف لك معي عروس
ابو غازي اتسعت عيونه:اعقب من ولد!!!،،مشى لهم،،
جسّار جرى وخرج برا البيت
بتّال لحقه يجري:الله لايوفقك ياجسار
ابو غازي وراهم:اهب يَاذَا الوجيه مابكم حيا تعالوا تعالوا
.
.
اللهم صل وسلم على نبينا محمد
.
.