ياسمح المحيا جر الهجينية

٣٣

     ،،الـجـزء الـثـالـث والـثـلاثـون،،
استغفر الله العظيم من كل ذنب عظيم وأتوب اليه،لاحول ولاقوة الا بالله
.
..بيت عادل..
ابو غازي داخل لغرفة نومه وأخلاقه بطرف خشمه بعد اللي سمعه من بتال والمصيبة اصراره نزل شماغه ورماه عالتسريحة وهو يمشي متجه للسرير
ام غازي جالسة عالسجادة بجلال الصلاة تقرأ وردها اليومي قفلت مصحفها ثم وقفت والتفت له قطبت جبينها وهي تشوف الضيقة واضحة عليها تكلمت وهي تنزل جلالها:خير وش صاير؟عسى ماشر
ابو غازي جلس عالسرير وهو يمد يده للكومدينة وياخذ علبة الموية من عليها:بتال يبي يروح لأهل امه،،فتحها وسمى وشرب،،
ام غازي اتسعت عيونها ورمت جلال الصلاة فوق السجادة بدون ماترتبها كعادتها:وشو؟!!وش قايل له!!وش مسوي فيه حتى يروح برجوله لموته؟!!
ابو غازي وهو يقفل علبة الموية وبدون لايطالعها:هو راح لهم وسلم!!
ام غازي بعصبية:سلم لانهم مايدرون من هو ومن يكون!!وش قايل له حتى ينطق هالمنطوق ياعادل؟وش قايل له؟
ابو غازي:ماقلت له شي
ام غازي:ابد ماتقول له شي حافظك الله!!اكيد قايل له شي ومو بهين بعد اللي يبي روح لأهل امه!!
ابو غازي بنرفزة:وسمية الظاهر بديتي تخورينها!!(تغلط وماعليها بأحد)
ام غازي:وينه ياعادل؟
ابو غازي:وينه يعني!!ببيت ابوي اتركيه عنك عنادي(يعاند)وتعرفينه!!
ام غازي:محد عنادي كثرك بهالدنيا ياعادل واللي تبيه تسويه وماتضرب لاحد حساب وهه ناظر وش سوا عنادك بولدك ناظر!!
ابو غازي زفر وهو يرفع اللحاف ويتمدد ويتغطى:ماني بناقص صداع ياوسمية تبين ترقدين حياك ماتبين اطلعي برا ولايكثر
ام غازي انحنت وهي تاخذ الجلال واتجهت للباب وهي تقول:انا طالعة قبل ماتقول الشكوى لله من فعولك اللي بتجيب لنا مصيبة بيوم،،خرجت،،
ابو غازي غمض عيونه وهو يحس بجرح في وسط قلبه عالكلمة اللي قاله لبتال صحيح دايم يغلط عليه لكن عمره ماميّز بينه وبينهم مرت بخاطره ذكرى كأنها انعادت اليوم
.
>
عادل واقف قبال باب البيت يطالعه ينتظره يخرج
بتال(٥سنوات)واقف جنب ابوه وهو ماسك يده شد على يد ابوه بخوف من هالمكان الغريب عليه وبدون امه رفع عينه لابوه:يبه نرجع عند امي وغازي وجسّار بعد
عادل مارد مثبت عينه عالباب ودق الباب من جديد
بتال بترجي:يبه مشينا الله يخليك
عادل قطب جبينه بوسط تكشيرته وهو يشوف الباب اللي قبالهم ينفتح
بتال تخبى ورا ابوه بخوف
بادي بحدة:لاهلا ولا مسهلا بك علامك غادين يمّنا!!تبيني أذبحك!!
عادل وهو يقدم بتال اللي يده بيده لقدام وتركه
بتال واقف بين عادل وبادي
عادل:جاي ارد الأمانة لاهلها
بادي بحدته:مسموح بهالامانة
عادل:وصية جميلة قبل لاتموت يعود ولدها يمك
بادي:اللي عافنا(مايبينا)عفناه!!وهالولد ماهو بلنا راضعن(رضاعة)من حريمكم ورابين(تربى)وسطكم وانت برأسك عادّه واحدن من عيالك وش لي به!!
عادل بقهر:صدقت!!وهو واحدن من عيالي وقليبي متمزّع(متقطع)عليه وانا غادين به يمك!!مير الوصاة دينٍ علي وملزومن بها!!ثم يوم انك توجس انه راضعن ورابين وسطنا خابرن كم لي وانا اتوبعك؟
بادي بحدة:اوجسته لك مالنا به
عادل صرخ:اربع سنين!!اربع سنين وانا اتوبعك حتى تلمه لصدرك!!تكب عنك القسى وتأخذه يمك مير انت اللي صاد عنه!!وذالحين توجس انه ولدنا!!
بادي:مير هذا الصدق!!ولدكم ماهو بولدنا شايلن اسمكم مابنا له حاجة
عادل اخذ نفس يكتم تعصيبته:وصية امه اللي مابقى له غيرها قبل وتكبّه انه يعود يمكم ويربى وسط خواله!!
بادي ضحك وبقسوة قلبه:خوال من!!!هي ماهي بمنا من يوم تخيرتكم وبدتكم علينا!!وخابرتن العلم كله!!
عادل يغلي وهو يسمع كلامه:جميلة لاخر يوم بعمرها وهي تبكيك وتطلبك مير انت،،سكت وهو يبلع كلامه مايبي يغلط وهالمرة بتكون اخر مرة يقابله فيها،،
بادي:العلم ووصلك ماني بخابرن احدن يوجسون لها جميلة وهالبلوى اللي غادين بها يمي خذها معك
عادل دف بتال على بادي
بتال تقدم بخطواته من الدفة وتعلق برجول بادي
بادي دفه بطرف رجله وسط حدة ملامحه:
بتال طاح عالارض وهو يطالع بادي وسط دموع تنزل عالصامت بدون اَي صوت
بادي بحدة:اعقب يالخسيس تلمسني!!
عادل شد قبضته وهو يقسي قلبه ويثبت نفسه لايجري لبتّال ويأخذه بحضنه وهو قطعه من قلبه مثله مثل اخوانه لف عنه وهو يبتعد
بادي رفع صوته وبحدة:كود مااخذت هالبلا عن عيني غديت به يمهم ياعادل
عادل التفت له وبابتسامة ثقة:ماهو بصاخين(يهون)قليبك تغدي به يم الموت،،مشى مبتعد،،
>
ابو غازي زفر وسط ضيقة مالية صدره وغمض عيونه بقوة يتغصب النوم وبينه وبين نفسه:سلمتك للموت مرة وشلون اصخى بك مرتن ثانية!!
.
..بيت نشمي..
ام غازي دخلت لبيت عمها بجلال الصلاة ومتلثمة ومرت من الصالة وهي تشوف عمها وقفت واتجهت له
الجد نشمي جالس بالصالة مثل ماهو بمكانه من جلسته مع بتال وعادل بوجه واضح عليه الهم والعرفان بتفكيره مو منتبه لاحد
ام غازي انحنت وسلمت عليه:صبحت بالخير ياعم
الجد نشمي اجبر نفسه عالابتسامة:هلا هلا ياوسمية
ام غازي واقفة:كيف أصبحت ياعم عساك بخير
الجد نشمي بابتسامة وهو يشوفها تلف حول السؤال اللي تبي تسأله:تدورينه؟
ام غازي:وينه فيه ياعم
الجد نشمي:أرسلته يم النخل يقص القنو(الصورة)
ام غازي بتوتر:علمته؟
الجد نشمي:اوجست له عقب مايزين النخل والرطب
ام غازي زفرت براحة وبقلق:بتعلمه ياعم؟
الجد نشمي:وشلون اردّه ياوسمية وهو بهالطول!!ماعاد ذاك الوغد(الصغير)اللي نغدي به ونعود به بسالفة!!
ام غازي تنهدت:تبي شي ياعم
الجد نشمي:تيسري له وانا عمش وقنعيه بلكن يلين راْسه ويهديه الله
ام غازي:تامر ياعم تامر،،خرجت واتجهت للنخل اللي بطرف حوش البيت الواسع وسط أشعة الشمس اللي بدت تحمي اكثر كل مامر الوقت وقفت عند النخل ورفعت راسها وهي ترفع يده قبال عيونها تغطي ضو الشمس اللي ضارب بوجهها وبسببه ماتشوف منه زين طالعته ورا ظل يدها،،بتال
بتال فارش عالارض فرشة النخل المعتادة ومتعلق فوق بوحدة من النخل وهو يقص القنو ويحذفه عالفرشة طالع امه وبابتسامة شلعت معها قلب ام غازي الرهيف عليه:الله الله اشوف الشمس زادت حرارة اثاريها ترحب بوصول الغالية،،ينزل من النخل،،
ام غازي بلعت عبرتها وهي تعرف اطلاعه مايتكلم لو صدره بينفجر من الضيق وابتسمت:ايه ياللسان يازينه ولاشفتك ولاقلت حتى امر اسلم على امي!!
بتال وصل الارض واتجه لها وهو ينفض يديه وسلم عليها وحضنها:اشتقت لك يمه
ام غازي برجفة صوتها:واللي يشتاق لامه يتركها يابتال!!
بتال بضيقة على امه وبضعفه قدامها ولأول مرة وهو يدفن نفسه فيها:والله يمه غصب غصب عني ماهو بيدي
ام غازي وهي تحبس دموعها اول مرة تشوفه او بالأصح تحس به بهالحالة وهي تمسح على ظهره:لك الله ياقليب صابر على الشقا لك الله
بتال بلع غصته
ام غازي فكته ومسكته بيده ومشت
بتال وقف وهو يمسك يد امه يوقفها:يمه جدي وعد عقب ماازين النخل والقنو يقولي
ام غازي مسكته من يده:محدن بيعلمك بالسالفة غير امك
بتال اتسعت عيونه
ام غازي مشت وهي تسحبه وراها:امش معي الحين امش
.
..مــكــة..
الجد بادي يكلم سعود بالجوال وبعد السؤال عن احواله وعن خواته نطق بتردد:ولد ياسعود
سعود:سم ياجد
الجد بادي:مامركم احد؟
سعود باستغراب:وشلون ياجد؟
الجد بادي:أحدن نشد عني منّا ولا منّا؟
سعود:لا ياجد
الجد بادي بنرفزة:ماودي من اهل الديرة الغبرا مير اقصد خلقن(ناس)من برا؟
سعود زاد استغرابه:انت تحتري احد ياجد؟!!
الجد بادي زفر:مابه احد؟
سعود:كود به ضيفن ناصيك ياجد علمني حتى اغدي يمه
الجد بادي:مابه احد مابه مير تحرص على خواتك وانا جدك
سعود:أبشر ياجد
الجد بادي:فمان الله ياسعود فمان الله،،قفل وبنفسه وهو يفكر بولد جميلة،،الظاهر عادل يوم اهدر دمه من شان ضناش ياجميلة مااوجسه عبث!!
.
>
>
بادي جالس بوسط حوش بيته
متعب متجه له بالدلة ووقف قباله وهو يمد له الفنجال:سم
بادي بابتسامة:سم الله إعداك
متعب جلس على يمين بادي
بادي التفت له:وينها عيني؟
متعب ابتسم:ذالحين تدني
بادي بصوت عالي وهو ينزل فنجاله :ام سعود بنت يا
جميلة قاطعته بدخولها مع الباب بثوبها الاصفر المنقش برسمات ورد صغيرة باللون الاخضر وطرحتها الطويلة اللي لتحت ركبتها ونقابها الطويل الواصل لتحت صدرها 
بادي ابتسم وهو ملتفت لها يطالعها:أقبلت أقبلت ام بريقع ياحياها ياهلا ياهلا
جميلة وقفت قبال ابوها بدموع ملت محاجر عيونها وبرجفة صوت وسط انكسارها:ماودك تنشد ام بريقع وشو له هالبريقع ملازمها(ماتنزله)؟!!
بادي قطب جبينه وسط تكشيرة ارتسمت على وجهه
جميلة بغبنة:مانشدت روحك من متى وهالبريقع ملازم وجهي ووشو له ملازمني حتى في بيتك؟!
متعب وقف
بادي بحدة:اقعد يامتعب خلك شاهدن على هالعلوم اللي ماتخلص!!
متعب جلس بدون لاينطق حرف
جميلة ضحكت بغبنتها:مير اني مااوجست حرف من عقب ليلة عرسي!!وش انهي العلوم اللي ماخلصت يبه؟!!
بادي:مايحتاج توجسينه ياجميلة!!عيونش توجس اللي بصدرش كله!!
جميلة:وشو اللي توجسه عويناتي يبه؟علمني!!
بادي زفر:أوحي العلم ياجميلة ودخليه براسش وأذونش وصكي عليه!!علمتش زوجتش فاهد وعادل ماهو بمكتوبن نصيبن لش!!وش ذا الخاطر اللي معش لذالحين تصيحين عليه حتى وهو معيّل(عنده ولد)!!
جميلة:منعت الطريا والعين يبه من عادل من اعرست على هالفاهد اللي ماالله أصلحه
بادي بصوت عالي وحدة:اعقبي يامرة!!رجلش!!
جميلة بصوت عالية وبنبرة اهتزت من القهر:مير انه ياابو نشمي طاوعناك ووطينا(دعست)عالقليب وراعيه
بادي بحدة:اعقبي توجسين به وانتي على ذمة رجلن غيره!!استحي يامال الصرايم!!
جميلة:أعلمك يبه وشو له هالبريقع ملازمني ببيتي وببيتك وبكل بيوت الديرة؟
بادي كشّر بوجهه
جميلة شالت النقاب عن وجهها بقوة
متعب صد بوجهه عنها
بادي اتسعت عيونه
جميلة نزلت الطرحة ورمتها عالارض
بادي شهق شهقة وسط وجهه اللي شحب وهو يطالعها
جميلة بجسمها النحيف وبوجه ذبلان كله كدمات وشعرها اللي ينضرب به المثل وسط حريم الديرة مقصوص وملعوب فيه وواضح بقصد ابتسمت وهي تشوف وجه ابوها:هاذي تالي فعوله اللي اوجسته لك من اول ماعمل مير انك الجمتني كفن(كف)على عينه(قدام فاهد)وبديته علي ومن عقبه ماحصلت غير المهانة من وراه!!
بادي وقف ومشى لها ثم وقف قبالها ومد يديه لوجهها بحسرته عليها
جميلة رجعت بخطواتها لورا مبتعدة وبدموعها:كل ماراعاني يبه يوجس بيت شعرن من اقواله ثمّن مد يده ولايتريح الى منه يراعيني ماارف(ماتحرك)لو هو شعرة(تقصد فاهد يتغزل بشعر فيها مـن اشعار عادل ويطلع حرته فيها)
بادي احتدت ملامحه وارتسم على وجهه الشر وعطاها ظهره وهو ناويه
جميلة التفت:وين غادين يمه؟
بادي التفت لها وبحدة:يم هالخسيس اللي مابه مرجلة
جميلة:ماأحويلك أحد
بادي قطب جبينه باستغراب:وش العلم؟!!
جميلة:العلم انه غدا يمي بوجهن ماهو ساطي(فيه شي غريب)ويوم اني نشدته وش علمك زيّن فعوله مثل دايم(ضربها)ثمن ولم(جهّز)غريضاته ورمى يمينه وتوكل بدربه(طلقها)
بادي اتسعت عيونه وبصدمة:وش هالعلوم ياجميلة؟!!
جميلة وهي تنحني لطرحتها ونقابها وتلبسها:تولم ياابو نشمي وعلّم عمي نشمي يتولم هو بعد الظاهر هالنوبة ماهي بشين هين،،مشت،،
بادي استغرب كلامها ويطالع هدوءها الغريب:وين غادية وانتي مانش بحليلتن له!!
جميلة مرت من جنب ابوها:البيت بيتي وهو ماله به وَذَا عهدن بيني وبينه
بادي طارت عيونه ومشى وراها ومسكها من يدها وسحبها
جميلة التفت مع سحبت ابوها وهي تتوجع
بادي:وش هالعلوم اللي ماتطري عالبال!!
جميلة وهي تكتم وجعها وترسم القوة على تصرفاتها قبل ملامحها المخفية:بيت رجلي اللي توجس اقضبه من اول الحين ابقضبه صحيح ولاني بكابته عقب ماغدا بيتي
بادي مانطق حرف لكن يده نطقت وضربها على وجهها بقوة
جميلة وهي تحبس دموعها:خيرك سابق ياابو نشمي بيض الله وجهك،،عطته ظهرها ومشت،،
بادي بحدة وصوت عالي:جميلة!!
جميلة ماوقفت لابوها ومشت بخطواتها البطيئة وهي تخفي ألم جنبها وصلت للباب ومدت رجلها بتخرج
بادي مشى وراها بخطواته السريعة ومد يده ولحق طرف طرحتها ومسكها وسحبها بقوة
جميلة طاحت من السحبة عالارض وارتفعت طرحتها ووضح السبب اللي لبست عشانه الطرحة وتخفيه
بادي بحدة وهو يطالعها:وصريمة تصرم عمرش ياجميلة،،اتسعت عيونه وبردت عظامه وهو يشوف ثوبها الأصفر يكتسي باللون الأحمر من جنبها اليمين،،
جميلة بدموع وشهقات وهي تطالع ابوها:لي عشرة ايام وانا ادسه(تخبيه)عنكم لاترعونه(تقصد الجرح)!!يبه هالفاهد ماهو بعقله به شين عجزت اعرفه!!يبه فاهد باغين لي الموت يوم درا اني شايلتن ولده يتحلف ويوجس انه مو بله يبه!!يعريني(يتهمها بشرفها)يبه وانا على ذمته!!يعري عرضه يبه ولارحمني ابد!!
>
الجد بادي غرقان بوسط هالذكريات وهو يحس بتأنيب ضميره خرج جواله من جيبه وهو يضغط رقم ٣ويعلق عليه واتصل على نشمي(صاحبه)ووصله صوت كله صدمة وفرحة
الجد نشمي بصدمته:ياهلا ياهلا ياحي هالصوت ياحيه!!
الجد بادي شهق:ماانت بسعود!!،،قفل بوجهه ثم زفر وهو يلوم نفسه للحين صاحبه مثل ماهو حتى الرقم مثل ماهو من سنين تمدد وغمض عيونه وبينه وبين نفسه بحرقة،،الله لايحرمك يافاهد لاعلى وجه الارض ولاباطنها،،زفر بصوت وهو يطرد أفكاره،،علامك يابادي غادين قلبك رهيف!!وش غادين بك ماعليك ملامة وانت فعولك جزيلة!!
.
..بيت عادل..
ام غازي واقفة قبال باب الحمام اللي على يمينه غرفة فيصل ويدها بيد بتال ماتركته والتفتت لبتال:ادخل تروش وانا بأطرد فيصل برا
بتال زفر:يمه ابوي ان شافني
ام غازي:وهي بقى فيها ابوك!!امش بس يالله خلص انت وانا بروح لدولابك اجيب لك غيار وأفضي الغرفة لنا
بتال ظل يطالعها بتردد
ام غازي وهي تدفه للحمام:يالله وش تطالع!!
بتال دخل
ام غازي اتجهت لغرفة بتال وجسار خرجت بنطلون وتيشيرت من دولاب بتال ثم اتجهت لغرفة فيصل ودخلت:فيصل قم
فيصل بنوم وهو مارفع راْسه:وش فيه؟!
ام غازي بعصبية:بتقوم ولا انادي لك غازي!!
فيصل جلس وباستغراب وهو اول مرة يشوفها تعصب وبصوت كله نوم:قايم قايم ليش التعصيب بس!!
ام غازي:رح نام مع جسّار!!
فيصل بصدمة:جسّار فيه!!
ام غازي بنرفزة:رح ولاتطول الهرجة!!
فيصل وقف وهو يسحب عكازه باستغراب من تصرفات امه وخرج من الغرفة
ام غازي خرجت وراه ووقفت على باب الحمام وهي تدق على بتال وأعطته ملابسه ثم رجعت للغرفة وجلست على سرير فيصل تنتظره
بتال وقف عالباب والمنشفة ع كتوفه وطالعها وابتسم رغم ضيقته اللي يخفيها
ام غازي وهي تأشر عالسرير بابتسامة:تعال ماودك تعرف من اهل امك؟
بتال بسخافة رغم وضعه:اعرفهم
ام غازي اتسعت عيونها
بتال:مالها احد
ام غازي كشرت بوجهها
بتال بابتسامة ذبلانة:غير ولد اخوها
ام غازي بزعل:انت ولدي قبل لاتكون ولده انا اللي شلتك وربيتك واوجعني قليبي عليك محد غيري يابتال!!
بتال ضحك بحزن:وهو مادرا عني!!
ام غازي:الله يرحمه يابتال مهما يكون هذا ابوك!!،،اشرت بيدها عالسرير،،بتجي ولا اروح!!
بتال بابتسامة:ابشري ياعمة يوووه مااذكر اخر مرة نطقتها،،يحرك حواجبه لها فوق وتحت،،ياعمة
ام غازي بعصبية:عمت عين العدو وش اللي جاب الطاري!!انا امك امك يابتال لو تنطبق السما على الارض امك!!
بتال ابتسم براحة وهو يشوف يزعلها ومشى لها بسرعة وانحنى وهو يبوس جبينها وجاس جنبها:لاتزعلين ياعمة
ام غازي قرصته بقوة من جنبه وهي زعلانة صدق:عمى يعمي عدوينك قل امين!!،،وقفت،،خل غيري يقولك!!،،بتمشي،،
بتال مسك يدها وبترجي وضيقة وضحت على وجهه اخيرا بعد التصنع:يمممه!!
ام غازي جلست جنبه
بتال باس يدها اللي ماسكها للحين ولاتركها ثم حطها على خده:الله لايحرمني منك يالغالية
ام غازي ابتسمت:تراني زعلت صدق جت في قلبي كلمتك يابتال
بتال باس راسها ويدها:سامحيني يمه تدرين بخاطري اليوم ماهو زين
ام غازي زفرت:هات وش عندك؟وش اللي تبي تعرفه يابتال؟
بتال طالعها بنظرات رجى تجمعت فيها اخر لحظات امله وبيأسه:كل شي يمه كل شي
ام غازي بلعت ريقها وهي مضطرة تخبي عنه بعض الأمور ثم زفرت وهي تمسح على يده:ايه يابتال من وين ابدا عشان ابدا
بتال:ابدي من اللي تحبين كـلـي لك يمه
ام غازي تسترجع اهم الذكريات واخذت نفس
>
>
..ام جلاجل..
نشمي جالس جنبه:مير الله يسود وجه ويسلط عليه الله لايرده سويد الوجه ناكر الجمايل،،بخجل وهو يطالعه،،السموحة وانا اخوك السموحة يشهد علي الله مالي العلم بسواياه هالشين!!
بادي وهو صاد بوجهه عنه:وش يفيد ذالحين وهو ذوق بنيتي المر يانشمي
نشمي:على ماتحب امر يابادي وتامر جميلة
بادي ابتسم بحزن على وضع بنته:بنيتي ليتها تسلم من اللي حاصل لها هذا اللي اريده
نشمي:أبشر نغدي بها يم مسفر هو يخبر المستوصف الزين يمّه
بادي اتسعت عيونه:اطش بنتي يم ديار مابها وليتن(والي)زينة!!مابها احدن يخاف الله!!(دولة اجنبية)
نشمي:مسفر معها ماهو بكابّها
بادي بصدمة منه: وش وليته(وش يصير لها)؟!!وش صابك يانشمي!!تساهلت الأمور بعينك من غديت تنزل يم المدينة وتعود!!
نشمي:كل اللي بخويطري جميلة والله انها قطيعة من قليبي مثلي مثلك وأريد لها العويفية(العافية)
بادي بعتاب:وليه جوزتها فاهد وانت خابرن علومه؟!
نشمي:مير انت ارعيته اعتدل ماعاد ذاك الحمق(حق مشاكل)اللي يتصيد الخليقة وغدا معاون اهل الديرة كل ابوهم
بادي زفر:الشكوى لله كود انه راسم هالنية من الاول!!
نشمي يطالعه بفجعة:عوذا منه كان هاذي نواياه!!يشهد الله مااوحيت شين ابد كل اموره زانت وخاوى عادل وصار له اقرب من مسفر عضيده!!
بادي بحدة كان يحبسها وخرجت:والله يانشمي كود انك مزينها مع ولد اخوك وناوين على بنيتي
نشمي بحدة وهو يقاطعه:اعوذ بالله وش توجس يابادي!!جميلة بنيتي وانت اخبر بغلاتها بقليبي!!ولولا اني ابي لها الزين مابديت فاهد على وليدي عادل لعيونها يابادي!!
بادي بحدة:وهذا انا وراك بديته على عادل بشورك وراع وش عمل ببنيتي!!
نشمي:انا ارعيت الظاهر وعادل دامه تنازل عنها لفاهد معناته فاهد يستاهلها ماظنيت انه بيغدي هالعلم يابادي!!
بادي زفر بضيقته وهو يصد عن نشمي:حسيبه الله منين ماأدّا(راح)
نشمي:بادي يعلم الله مادريت انه بيغدي لعلومه الاولة الردية!!
بادي بهمه:يالله انها عليك
نشمي:الله لايرده مردّه يقضبونه(يمسكونه)والله لايفكه من يديهم
بادي التفت له وبقلق:الدبرة يانشمي الدبرة ذالحين؟!
نشمي ساكت يفكر
بادي بهمس:والله ان دروا انها شايلتن وليده ان يذبحون بنيتي قبل تشرق الشمس
نشمي طالعه:تطاوعني يابادي بشوري؟
بادي:اوجس واللي يرحم لي والديك اخلص علي
نشمي:الاولة لاتوجسون علم جميلة لاحد اوجسوا علم اليمين
بادي كشر بوجهه:وثمّن؟
نشمي:نغدي بجميلة يم ديار عادل
بادي اتسعت عيونه وبعصبية:هذا وقت هالطواري يانشمي!!نعود ياطير ياللي!!
نشمي:علامك انت شاب ضو!!قل لااله الا الله واوحني اصبر علامك مطيور!!
بادي زفر:لااله الا الله وش بتوجس ها هذاني اوحيك
نشمي:نغدي بجميلة يم عادل ونكبها عنده
بادي برفض تام:وش هالعلم صاحي انت!!لا لا ماادخل بنيتي على بيت مرة ابدن الحسرة شينة يانشمي!!وهي ذاقت الحسرة ولاتريدها لغيرها!!
نشمي اتسعت عيونه:ومن اللي اوجس نجوزها عادل!!
بادي:اجل وشو له تقعد وهي ماهي من اهل البيت!!
نشمي زفر:وش رايك تنزل يمّنا؟(يقصد يسكن المدينة)
بادي:لا لا مانتخارج(مانصلح)انا راعي بر ماتهنى لي الغلقة(الضيق)
نشمي:هماك توجس انها كسيفة(يقصد جميلة تعبانة)ولازمن يراعونها كل شوين
بادي تنهد:اَي بالله
نشمي:اجل طاوعني هذاني ابنزل قريّب وعادل من اول قاضين اموره ومسفر على وصول انزل معي ونتجاور مثل ماتجاورنا هنيا
بادي:والله لو اني احرز طاوعتك يانشمي مير قلبي متولعن بدياري ولاهو بصاخي على كبّها مااقدر على فراقها ولافراق عيالي
نشمي:والدبرة اجل يوم انك معيي توحي لي رأي؟!!
بادي:اجل هاك العلم يانشمي
نشمي:اسلم
بادي:خذ جميلة معك ولاتنزل ببيت عادل ابدن تنزل ببيتك انت
نشمي:أبشر
بادي:ولا منها تريحت(ولدت)الى وقتها نراعي الأمور
نشمي:على خير على خير مثل ماتحب يابادي،،يحاول يضيع تفكير بادي عن فاهد وجميلة،،الا وينه نشمي ماارعيته من جيت!!
بادي زفر:غدا يم الديار الشينة
نشمي بفجعة:اعوذ بالله!!
بادي بغبنة:كبّ الحلال يانشمي وكب ابوه وخواته وشب قنقه(عناده)وعيّا يظلي بهالديرة!!هج يم ديرتن مافيه مسلمين كل ابوهم كلاب
نشمي:علامه؟!!وش اللي غدا به وطيّره؟!!
بادي:من كم شهر وأموره ماهي بمضبوطة
نشمي قطب جبينه
بادي:وقبل أسبوع بالليلة اللي رحلت بها واندرت(نزلت)منيرة والبنيات لافى يمي ورأسه شايش وحالفن مايقعد بهالديرة ابدن
نشمي عقد حواجبه باستغراب:بِسْم الله!!وش غدا به وهو يموت بهالديرة ووديانها(جمع وادي)
بادي:الولد انهبل عجز يقرّ بمكانه الى منه غدا
نشمي:بيعود؟
بادي:ايه ماهو بمبطين عنا يوجس يلفينا ماهو بقطيعة،،احتدت ملامحه،،والله لاقطعه قبل يعملها
نشمي زفر:مير انه غدا الحين الله يصلحهم بس
بادي:الا مبروك مبروك ماعملتوا لعذبة
نشمي انصدم:هاه،،ضحك،،ايه ايه الله يبارك بك وعقبال ماتفرح بنشمي
بادي:والله اني اغتظت(زعلت)منك يوم علمني نشمي ورا ماعلمتني حتى اشد ظهرك وانا اخوك لكن ماشفع لك ووهدا شياطيني غير ان السالفة لعذبة عساها موفقة
نشمي:ايه عملناه بمعاجل(بسرعة)حتى هي اغتاظت مافرحت مثل البنتّى(البنات)
بادي:عاد كان الخاطر يوجس ان عذبة لنشمي مير الله ان يوفقها ويفتحها بوجهها والله ان غلاتها من غلاة بنياتي
نشمي:تسلم تسلم والله يرزقه باللي احسن منها
بادي:من هو الرجل
نشمي بربكة:ماهو من الديرة
بادي:من مَن؟(من وين)
نشمي:من خوالي بعيدن عنا ماتخبرهم وراعني مزوجهم من مبطي حول الشهرين
بادي ارتفعت حواجبه:هاه!!وش هالعلم!!كل شين دسيس(مخبينه)
نشمي:ياابن الحلال الرجل عسكري وديرته يم عادل واهله مير انه غدينا بها يم عادل وأخذها رجلها
بادي:اااه الله يبارك لكم وعساه خيرن عليكم
نشمي:وظلت(بقت)عند اخوها لامن رجلها يزين بيتهم
بادي هز راْسه وهو يزفر بهم:مير الله يسعدها ويوفقها
نشمي مسك يد بادي وشد عليها:جميلة بعويناتي والله روحي دونها يابادي
بادي ابتسم بهم:من طيب اصلك يانشمي ماتقصر
نشمي:مثل ماأوجست لك علمهم البنت معيونة والشيخ يم المدينة ومابه احدن الا انا وانت وانا وانت واحد ومحدن يوجس كلمة يمّنا
بادي:على ماتوجس يانشمي على ماأوجست يااخوي
،،نزل نشمي واهله للمدينة ببيته الجديد ونزلت معهم جميلة وأسعد الخلق بنزوله وخبر طلاقها عادل رغم انه يخفي هالسعادة عن امه وابوه لكن كان مفضوح قدام جميلة ووسمية ومرت شهور حمل جميلة اللي ماكانت سهلة ابدا بوضعها الصحي وجميلة ماعادت جميلة اللي قبل تغيرت بعد اللي شافته من فاهد،،
.
عادل داخل لبيته المتواضع بوسط ابتسامة عريضة ع وجهه شايل بيده ذَاك الصغير بلفته اللي توه كمل اسبوع اسرع بخطواته وهو يسمع صياح صغير ثاني بلفته موجود ببيته طالع غازي(٣سنوات ونص)اللي يمشي له بابتسامة وانحنى له بمستواه على ركبه وهو يقرب بتال اللي بلفته بين يديه لغازي وبابتسامة:هذا اخوك اللي اوجست لك بجيبه
غازي بابتسامة:كلللللهم عيال
عادل ضحك بخفة:من كبرك الحين كل ابوهم عيال وين امك؟
غازي:عند النونو الثاني
عادل اعتدل بوقفته شايل بتال بيده اليسار وماسك غازي بيده اليمين يمشي معه دخل لغرفتهم الصغيرة وبابتسامة:وسمية
وسمية على فرشتها عالارض بحضنها جسّار شالته بعد مابكى وترضعه
عادل وعينه عليهم:ياقليبي انا عالمزايين
وسمية ابتسمت والتفتت واختفت ابتسامتها وهي تشوفه بحضنه
عادل ترك يد غازي وتربع بجلسته جنبها وهو يحط بتال على رجوله وسحب جسّار منها اللي لازال يرضع من امه
جسّار بكى من السحبة اللي جته
عادل وهو رافعه ويبوس خدوده وكله فرح:الله يسعد هالوجه قل امين
بتال بكى
عادل ضحك:يمه يالغيرة،،ضم جسّار لصدره وهو يطالع بتال اللي ع رجوله،،اخوك اخوك ماتصلح الغيرة بين الإخوان
غازي بزعل:يبه وانا؟!!
عادل:ياقليب ابوك انت،،ثبت جسّار ع صدره بيده اليسار ولازال بتال ع رجوله والاثنين يبكون ومد يده لوجه غازي ومسكه وقربه منه وطبع بوسة ع خده وتركه،،انت أخوهم بعد والكبير فوقها سابقهم لك الغلا كله
غازي ابتسم ثم سد أذنيه بانزعاج:يبه قلهم يسكتون!!
عادل ضحك:مالي شغل امك تعرف لهم
وسمية مدت يديها واخذت جسّار لحضنها ورجعت ترضعه:جسّار ماله اخو غير غازي
عادل كشّر بوجهه:وش هالعلوم؟!!
وسمية:ودّه لامه هي اخبر به!!
عادل بحدة:وسمية!!
وسمية:ماني بملزومتن به
عادل بنرفزة:امه مريضة الله يرفع عنها ماتقدرين تكسبين اجر هاليتيم!!
وسمية:الله له هاليتيم انا مالي قدرتن به
عادل صرخ:وسمية!!
وسمية:اغد به يم
عادل ناظرهها بحدة:انا وش قايلن عن هالهرجة
وسمية:رح به يم اختك ترضعه مع ولدها
عادل نزّل بتال ع فراش جسّار ثم وقف:هالولد لو يموت جوع اليوم مايرضع من غيرش ياوسمية،،مسك يد غازي وخرج من الغرفة وقفل الباب بالمفتاح،،
وسمية بكت وسط المكان اللي امتلى ببكى جسّار وبتال وغطوا على صوت بكاها وبقهر:حسبي عليك من اخو يافاهد ماعينت من وراك غير الغبينة حسبي عليك!!
.
،،مرت ثلاث شهور على ولادة جميلة وصار عمر بتال ثلاث شهور وكان بادي ينزل ويسلم على بنته ويشوف تعبها ويتركها ببيت نشمي ولافكر بيوم على كثر جياته يسال عن حفيده ابد او حتى يلمحه واذا انفتح موضوعه وقف وخرج من المكان لكن الأغرب من بادي جميلة طول هالشهور اللي مرت مافكرت تسال عن ولدها او حتى تشوفه وطول هالمدة كان مابين وسمية وعذبة،،
.
بادي جالس جنب فراش جميلة:ها يابنيتي تغدين معي؟وش لش ووش ببلشة الناس!!
جميلة اللي كبرت بهالسنة أضعاف عمرها بوجه تغطيه الهالات السودا وبرزت عظام فكها من النحافة جالسة ع فرشتها وهي مغطية رجولها باللحاف طالعته بتعبها:كود عودت معك اعود ببيتي
بادي:ابشري لاغديتي مثل الحصان بصحتش عودي يم بيتش والوغد
جميلة قاطعته:مالنا به يبه ولدهم
بادي ابتسم:على خير على خير احتريش عند الباب،،وقف وخرج،،
جميلة وقفت وهي تضغط على عمرها من تعبها وتعبها كان اغلبه نفسي اكثر من ماهو جسدي لبست عبايتها وجرت خطواتها بتعب وخرجت من غرفتها واتجهت لغرفة جلستهم وقفت عالباب وهي تطالع الجالسين منيرة وع رجولها غازي وسمية وبحضنها جسّار وعذبة وبحضنها راشد وحصة تتقهوى وهي تتأفف من ازعاج البزورة طالعتهم بابتسامة وبحة صوتها التعبان:جزيتم خير يااهل الجميلة
منيرة فزت واقفة:علامش يابنية وين غادية؟!!
جميلة:عملتم ماعليكم وربي يكتب اجركم وهذا هو ولدكم وسطكم عاد انا اترخصكم
منيرة:يابنيتي مابريتي من علتش(مرضها)للحين
جميلة بكسرة خاطر:لابرا القلب ياعمة تبري العلة!! عادل دخل بملامح مخطوفة وانفاسه السريعة بعد ماعرف موضوع رجعتها للديرة من ابوها وثبت عينه عليها:وين غادية ياجميلة؟
جميلة وهي تعدل نقابها:بيض الله وجهك ياابو غازي ماقصرت رايتك بيضا
وسمية وقفت وخرجت من الغرفة وهي تمر من بينهم وبحضنها جسّار
عادل:للحين علتش مايخبرونها؟
جميلة:الشافي الله،،التفتت لهم وبدون لاتسلم،،وداعة الرحمن يااهل الجزايل،،مشت وتركت عادل المفجوع على فراقها من جديد حتى لو ماجلس قبالها يكفيه شوفة زولها بين فترة وفترة اتجهت لابوها اللي عند الباب،،غدينا يبه غدينا
نشمي باستسلام بعد مابلغه بادي ان الولد بيكون معهم:يابنيتي وليدش وش سميتيه لنا ثلاث اشهر وحنا نزهمه وليد جميلة
جميلة بحدة:ولد فاهد ماهو بولدي أتعبني مثل ابوه الله لايسامحه
نشمي سكت ونزّل راسه
بادي مشى قدامها
جميلة مشت وراه
عادل وقف وراهم وبين يديه بتال يبكي:وهالضعيف ياجميلة بتكبينه؟
جميلة عضت شفتها ومشت
عادل:جميلة لاتكبينه وراش حرام عليش وش اللي عمله وش هالقسوة اللي بقلبش له!!
جميلة وقفت
عادل:لاكبيته ماظلى له احد لا ابو يلهيه(يلعب معه)ولا اميمة ترحمه!!
جميلة التفتت له:انت ابوه ياعادل ووسمية أمه
عادل عض شفته بقهر ونزله عالارض
بتال مستمر يبكي
جميلة شدت على عبايتها تكبح مشاعرها وهي تطالعه
عادل مسك يد ابوه
نشمي يطالعه بصدمة
عادل بحدة:هذا ولدكم فاهد ماهو بولدنا،،سحب ابوه ودخل وقفل الباب وراه وكله خوف انها تمشي فعلًا وتترك ولدها،،
جميلة تقدمت لعنده وهي تطالع بتال وهو يبكي وقلبها متقطع عليه تفادت هاللحظة كثير وقست قلبها عليه حتى تتركه معهم قاطع مشاعرها صوت ابوها الحاد
بادي بحدة:لاتدنين منه كبيّه عنش وش ترجين من ورا هالوغد وابوه سويد وجه معش ومع خلق ربش!!
جميلة طالعته بدموع ملت محاجر عيونها
بادي:وان غديتي به بتهنين به كم؟عشرين؟ثلاثين؟أربعين سنة؟وعقبها ياجميلة بيغدي دروب ابوه وبتموتين بحسرتش عليه!!كبيه يربى وسطهم ولااحدن درا عنه اسلم له
جميلة بحدة:ووش عليه وليدي بفعول ابوه!!
بادي صرخ:جميلة!!
جميلة انحنت وضمت بتال اللي يبكي لصدرها وبكت معه:ليش يبه اكبه وراي؟ضناي يبه قطعت قليبي!!
بادي بصراخ:نعنبوش اوجس اش اسلم له ماتوحين!!ثمن تقعدين هنيا وش تعملين وسط ناسن غرب حتى لو انهم قرب!!
جميلة:مايمنع يبه اظلي معهم هذا عمي نشمي يبه عمي نشمي
بادي بحدة:الولد وكبيه معهم وانتي قدامي ذالحين يالله
جميلة بدموعها:تكفى يبه والله قليبي ماهو بصاخين اكبه وراي تكفى
بادي:انتي وش اللي ماتوحينه لاعطيتش كفن يرد عقلي توحين!!
جميلة:تكفى يبه طلبتك وليدي
بادي تقدم منها وسحبه بقوة من يديها ونزله بالارض مسكها بيدها وسحبها وراه:لاغدا الزمن وارعيتيه رجال قبالش مابه علة تحبين راسي
جميلة تسحب يدها منه ولاهي قادرة وبدموعها:تكفى يبه تكفى طلبتك
بادي بحدة:انكعمي
جميلة صرخت:أسميه يبه أسميه
بادي تركها وهو يدري انه بيندم  على هالشي
جميلة ضمته وهي تبكي ولاهي قادة تفكر حتى باسم له
عادل وهو يشاور نفسه ورا الباب وهو يسمعهم وبتردد انه يتخذ هالخطوة اللي بتقلب بيته تجرأ وفتح الباب بقوة
جميلة رفعت عينها تطالعه
عادل طالعها وبنبرة هادية اقرب للهمس:سميته بتال ياجميلة
جميلة طالعت بتال بابتسامة وهي تناديه بينها وبين نفسها
عادل تقدم وخرج ووراه ابوه:ياعم جميلة من اليوم زوجتن لي على سنة الله ورسوله وهالولد ولدي قبل لايكون ولدها
بادي بحدة:مخبول انا اطشها عليك معصي ياعادل مالك نصيب عندي
جميلة وقفت وهي تضم بتال لحضنها:تـم تم
بادي بحدة:جميلة!!
عادل:رضت ياعم
بادي:ماني براضين عنش ياجميلة كان اخذتيه!!
جميلة تخبت ورا عمها نشمي وولدها بحضنها
نشمي:تعوذ من الشيطان يابادي واخزه عنك!!
بادي بغبنة:ناوين تغدي ببنيتي مثل ماغديت بمتعب!!
نشمي انخطف وجهه
عادل اتسعت عيونه
بادي بحدة:بتغدين معي ياجميلة ولا اغدي بروحي؟
جميلة برجفة صوت:ووليدي يبه؟
بادي بحدة:خليش مع وليدش وانا بنيتي ماتت من علتها
جميلة انصعقت من اللي سمعته
بادي مشى وتركها وراه
جميلة أغمى عليها من الصدمة
>
بتال يطالعها بشك:يمه فيه شي غيره؟
ام غازي:ابد مافيه غير اللي قلت لك
بتال بتكذيب:جدي بادي اقشر ورفض زواج ابوي من امي وزوج ابوي فاهد ثم ابوي طلق امي وتزوجها ابوي !!بس كذا السالفة!!
ام غازي:جدك لايدري انك ولد فاهد يقوم الدنيا ولايقعدها!!
بتال:لييييشش!!
ام غازي:لاقابلت جدك بتعرف وش اقصد!!ولااحد من أهل الـديـرة يدري من تكون
بتال ابتسم وتمدد عالسرير وحط راسه على رجل امه وغمض عيونه:يمه فيه شي كبير صاير ماقلتيه
ام غازي ضربته على كتفه:تكذب امك!!
بتال بابتسامة:كلها يـومـيـن واعرف السالفة
ام غازي بلعت ريقها من توترها
بتال بابتسامة:مصيري اعرف اللي ماتبوني اعرفه
.
<الـعـصـر>
بتال خرج من غرفة فيصل بنطلونه الاسود وتيشيرته العودي اللي حصلها عند راسه وبدّل اول ماصحى وبعد ماصلى الفروض اللي فاتته من نومته الطويلة من تعبه وإعجاز انه صحى بهالوقت والمتوقع يصحى اليوم الثاني عقد حواجبه وهو يمشي بالبيت ويشوف حركة مي طبيعية نزل الدرج وقابل امجاد وابتسم وهو يهرول لها فاتح يديه وبابتسامة:مجيدة!!
امجاد ابتسمت والتفتت وراها:وينها مجيدة؟!!
بتال انحنى وضمها له وهو يرفعها واعتدل بوقفته
امجاد ارتفعت معه وصارت فوق
بتال وهو يعصرها بحضنه:مجيدتي اشتقت لك
امجاد كحت:ترا امجاد انا مو رهايف
بتال ضحك ونزلها وانحنى وسلم عليها وبعد اخذ وعطى عن الأحوال وهو يتلفت حوله:وش السالفة البيت مقلوب واهله كلهم ماهم بفيه
امجاد:امي ورهايف بالمشغل والشباب ببيت الشعر يوزعهم جدي
بتال عقد حواجبه:ليش؟وش صاير؟
امجاد زفرت:ملكة رهايف الليلة وعائلية لكن تعرف اختك ورأسها
بتال رمش وهو يطالعها:الليلة؟!!
امجاد اتسعت عيونها:ماقالوا لك؟
بتال ضحك:ليش يقولون لي!!اقرب لها انا!!
امجاد انصدمت من رده ولاردت عليه
بتال طالع وراها واشر بيده:وذي؟
امجاد التفتت:اها عاد ماتكمل الحفلة الا فيها
بتال:ابيها بس خمس دقايق
امجاد بتوتر:على راحتك
.
..بيت الشعر..
،،الجد نشمي والشباب وابو غازي وابو جواد وحتى جواد موجود،،
جسّار بملل:جدي عارفين التوزيعة مايحتاج هاللمة!!
الجد نشمي:جسّاروه انت اخر واحد تتكلم
جسار:بس ياجدي،،سكت وهو يسمع صوت الموسيقى العالي برا،،
الجد نشمي باستغراب:وصلت رهايف؟!!وشو له هالطربقة والناس مابعد جت!!
،،الكل خرج من قوة الصوت اللي هز المكان،،
بتال ساحب السماعة قبال بيت جده بمسافة وقبال بيت الشعر وواقف بالنص بينهم وهو يدبك لحاله بحماس ع صوت سميرة اللي هز المكان:
يا بو ردين يا بو ردانة وشقلنالك يا دادا زعلانة..
ضربني بخنجره الشامي بصوابه ايه دقق عظامي..
يا ويلي من جرحي والامي طال الليل وعيوني سهرانة..
يا بو ردين يا بو ردانة وشقلنالك يا دادا زعلانة..
الياشفته بمرابيعه ومحني روس اصابيعه..
وحبيبي والله ما ابيعه ولو عطوني كنوزك يا سليمانا..
يا بو ردين يا بو ردانة وشقلنالك يا دادا زعلانة..
ابو غازي كشّر بوجهه وهو يغلي وبصراخ:بتاااااال!!!!
جواد ميّل فمه بابتسامة
بتال طالعهم بابتسامة وبصوت عالي وهو يدبك:اررررحــبــواااا!!!
.
.
.
<اللهم صل وسلم على نبينا محمد>
.
.
.