ياسمح المحيا جر الهجينية

٢٨

  ،،الـجـزء الـثـامـن والـعـشـرون،،
لااله الا الله وحده لاشريك له له الملك وله الحمد وهو على كل شي قدير
.
..الاستراحة..
دانة متوترة من كلمها جواد وبلغها ان ابوه بيبارك لهم كل تفكيرها محصور بانه ام جواد بلغته وماراح يعديها لها
ام دانة:عمك برا
دانة بتوترها:يمه خليك عندي
ام دانة:وش هالكلام عمك ماهو بمحرم وبعدين بتدخل بنته معه وبيكون زوجك فيه!!وبعدين تقابلينه بدوامك وين المشكلة!!
دانة تطالعها بتكشيرة:يمه!!
ام دانة:بلا دلع خليني اطلع مو ناقصة مشاكل وواضحة هالعايلة كيف تعاملها من البداية الله يعينك عليهم بس،،خرجت،،
،،وبعد دقايق معدودة
سهام فتحت الباب:تفضلوا تفضل يبه حياك
ابو جواد دخل:السلام عليكم ماشاء الله ماشاء الله الف مبروك الف مبروك،،سلم على دانة وابتعد شوي لورا،،
دانة بهمس:الله يبارك فيك
جواد واقف جنبها بابتسامة عريضة
ابو جواد:الله يوفقكم ويكتب لكم اللي فيه الخير
جواد:امين يبه امين بحياتك
دانة على أعصابها تنتظر لحظة انفجاره عليها
ابو جواد تقدم وهو يخرج من جيبه ظرف وحطه بيد دانة بابتسامته:هاذي هديتك والمعذرة عالقصور وانا عمك
جواد طالع دانة بابتسامته
دانة:مشكور ماله داعي تعبت نفسك
ابو جواد:افتحي وشوفي هديتك
دانة بلعت ريقها وهي تطالعه بتردد
جواد بحماس:يالله
دانة فتحت الورقة وتغير وجهها للحظة
جواد اتسعت ابتسامة:يكثر خيرك يبه ماتقصر
دانة تقدمت له وسلمت على راسه:مشكور ياعمي ماتقصر
جواد:بس يبه كيف عرفت ان خاطرها بهالعيادة
دانة اخفت رجفة يدها
ابو جواد طالعها بابتسامة:انا اهم ماعلي راحة موظفيني ودانة قبل لاتصير زوجتك هي موظفة عندي وراحتها من راحتي عاد تقدرين تداومين فيها متى ماخلصتي من موظفينك
جواد باس دانة على راسها:بالبركة يادانة عساها عليك بالبركة
دانة:الله يبارك فيك
ابو جواد:استأذنكم انا ومبروك مرة ثانية مبروك،،خرج،،
.
.........****..........
أم جلاجل
.
..بيت بادي..
بتال دخل للبيت وطالع يمينه وهو يشوف الجدار اللي مبني عالزاوية وبهمس:اكيد هاذي البترة،،وقف يفكر وبنفسه،،وراها يعني ورا هالجدار ولا وراها يعني امشي قدام،،زفر وهو يطالع قدّامه وهو يشوف البيت وبنفسه،،مستحيل اكيد ورا هالجدار،،لف على يمينه وهو قاصد يلف ورا البترة يبي الحمام تنحنح وبصوت عالي بوسط هالظلام اللي يلف المكان،،لااله الا الله
عباير متسلقة البترة المتصدعة وواصلة أعلاها ومخبية جوالها بوحدة من فتحات التصدع اللي فوق عن جدها انخطف وجهها وهي تسمع صوته والفاصل بينهم البترة
بتال لف من ورا البترة
عباير من صدمتها بوجوده نطت من فوق لتحت مرة وحدة رغم المسافة البعيدة شوي عليها
بتال اللي ماانتبه لها فوق ماحس الا بشي يهبط من فوق لقدّامه بوسط هالظلام انخطف وجهه وهو يجلس برعب:سكنهم مساكنهم يارب!!
عباير كشرت بوجهها وهي تسمع كلامه وتفتح طرحتها اللي نافعة بالحنا وتلفها لقمة اَي كلام بسرعة وبصوت واطي: الله أكبر راعوا من يوجس نخلة الديرة!!
بتال عقد حواجبه بشك من الصوت ولا رفع راسه وهو شاك ان اللي قدامه بنت
عباير اسرعت بخطواتها ماتركت له مجال يرد وهي تمر من جنبه ودعست على يده
بتال عض شفته السفلية ورفع يده بسرعة وهو ينفضها من الم دعستها ثم وقف ومشى باتجاه الحمام اللي قباله بمسافة وهو يهز راْسه من اللي سمعه:اعوذ بالله من الشيطان الرجيم وش ذَا!!وفوقها لسان اللهم ياكافي بس!!،،وقف على بعد كم خطوة بسيطة عن الباب ومد يده بيفتح الباب ماحس الا بشي مر من جنبه وقشعر كل جسمه،،
عباير مرت من جنبه راجعة للحمام بخطوات سريعة فتحت باب الحمام ودخلت وهي تمد يدها بحركة سريعة لمفتاح النور اللي برا الحمام وتفتحه ونوّر الحمام(اشتغل النور داخل الحمام)
بتال اتسعت عيونه وهو يشوف قفاها  بوضوح بلحظة سريعة عبارة عن قميص اسود وطرحة غريبة صد بوجهه وكشر وهو تضرب براسه ريحة الحنا اللي بشعرها ورفع يده لأنفه يقفله عن الريحة اللي مايحبها وبهمس:وع يالقرف!!
عباير قفلت الباب وراها بوجهه بقوة
بتال قطب جبينه مو فاهم حركتها برجعتها عنده ثم تجمد الدم بعروقه وهو يسمع اصواتهم وراه التفت يطالعهم بصدمة من وجودهم
سعود فز للبيت اول ماسمع صوت بتال رغم انه ماهو بعالي لكن بسبب هدوء المكان وضح للكل جسّار وراشد فزوا وراه لداخل البيت بعد اللي شافوه بهالديرة خصوصا ان صاحب الصوت بتال
سعود وسط انفاسه وهو يوقف قباله بالضبط :علامك يارجل؟عسى ماخلاف؟!
جسّار وراشد يطالعونه بقلق وهم وراه مباشرة بدون اَي مسافة
بتال هالموقف نشّف ريقه وشيّب راْسه يطالعهم ساكت وهو يتعرق من هول الموقف بعينه
عباير تسارعت انفاسها وامتلى  قلبها خوف وهي تسمع صوت سعود
جسّار تقدم خطوة:بتال
بتال لصق ظهره بالباب وهو يرجع يده ورا ظهره ويمسك يد الباب وبربكة واضحة وبصوت عالي:مافيني شي
،،الكل استغرب منه ويطالعونه بشك،،
بتال انتبه لنبرة صوته وحاول يكون طبيعي وقف وترك الباب وبابتسامة:بس لمحت كلب سبقني ودخل بالحمام
عباير داخل الحمام تنهدت براحة انه صرف الموضوع كشرت بوجهها وهي تعض شفتها بغبنة انها ماتقدر ترد عليه
سعود ارتفعت حواجبه باستغراب:مير حنا ماحولنا كلاب!!الكلاب ورا بيت ابو هليّل!!،،مشى له ووقف جنبه،،ابعد خلني اراعيه واطرده عنك
عباير ماتت بمكانها من الخوف بيذبحها سعود اذا شافها
بتال دف سعود عنه وبنرفزة:اقولك لمحت لمحت ماقلت دخل!!
،،الكل مصدوم من ردة فعله القوية،،
بتال حس على نفسه ابتسم رغم انه من داخله العكس خوف وتوتر من اللي موجودة وراه:انا قلت لمحت ياسعود لمحت الله يهديك وش فيك ماتفهم؟
سعود قطب جبينه وهو يفكر بينه وبين نفسه ممكن تهيؤات خاصةً وان بينهم ماينمزح الا المشب اللي بوسط الحوش عادةً والليلة ماشبّوها ولايعترفون بالأنوار ببيتهم
جسّار يطالعه وهو يتفحص حركاته الغريبة تصرفاته اللي تجيب الشك ميل فمه بابتسامة
سعود ابتسم:اقول يارجل كود انك
جسّار تقدم وهو يحط يده على كتف سعود يقاطعه؛الله يهديك ياسعود يقولك لمح وراك ماتلقطها!!
بتال قطب جبينه وهو يطالعه باستغراب
سعود يطالعه ساكت مو فاهمه
جسّار غمز لسعود وهو يعطي ظهره لبتال ويلف سعود معه عن بتال ثم طالع راشد وهو يبتسم
راشد فهم على جسّار ثم كتم ضحكته وعطى بتال ظهره
جسّار:يالله ادخل ننتظرك هينا ماراح نبعد
عباير قشعر جسمها وهي تغطي فمها لايطالع منها اَي صوت
بتال انصدم من الكلام وبلعثمة:ووييين اادخخخل صاحي انت!!
جسّار اخذ نفس وهو يكتم ضحكته:خلاص لاتدخل سوها هينا مابنمشي عنك
راشد عاض شفته بقوة مايبي ينفجر ضحك عليه قدامه مابيرحمه بتال
سعود يطالعهم وهو مميل فمه فهم انه مبسوطين على بتال الخايف
بتال بحدة:لا والله حلفت عليك انت وإياه!!اذلفوا بس يالله يالله!!
جسّار نزل يده عن سعود والتفت له يطالعه:طيب ادخل
بتال:ماني بداخل!!
جسّار:خلاص سعود يدخل ويتأكد لك من المكان
بتال فتح الباب شوي وهو ماسكه:ارتحت يالله اذلف عني!!
عباير لصقت نفسها بالجدار ورا الباب مرعوبة لايدخل صدق
جسّار ابتسم:عسى ماشر وراك ماتدخل اجيك أتأكد؟!
عباير تنجلط مرة ورا الثانية من هالصوت اللي تسمعه وبنفسها:الله يشغلك بعمرك طسّ طست عليك بقعا
بتال بغبنة:مافيه شي اذلف عني
جسّار مشى لعنده وهو يجر سعود معه وباستقعاد له وسط ابتسامته:عادي ترا يدخل يشيك عالوضع لعيونك
بتال بتكشيرة مرتسمة على وجهه فتح الباب كله بقوة قدامهم
عباير ضرب الباب فيها ومسكته لايرجع وهي ترتجف من الخوف
بتال دخل ووقف وهو يطالعهم وبحدة:اذلف عني وفكني من لسانك
جسّار يطالع ربكة بتال بيموت من وناسته وهو لأول مرة يشوفه متوتر كذا:متاكد؟!
بتال ارتفعت حواجبه وهو يستوعب طقطقة جسّار عليه وطالع جسّار وبحدة:الحين انا ليش من اليوم اسمع لك!!
جسّار بضحكة:اجل راح الخوف؟!!،،جرى،،
راشد اللي مبتعد بنفسه يبي السلامة من بتال رجع بخطواته لورا وهو يسمع سؤال جسّار ثم جرى بكل سرعته قبل مايوصله جسّار حتى
بتال جرى كم خطوة يخوف فيها جسّار حتى يتركه بحاله ثم وقف وهو يشوفهم يخرجون من البيت
سعود واقف بمكانه يطالعهم
بتال التفت على سعود باحراج وسط ابتسامته:المعذرة ياسعود المعذرة لاتعودت علينا بتعرف انا بهالشكل دايم
سعود ابتسم:الا الله يبيض وجيهكم اللي عديتوني منكم ولا قلبتوها دق صدور(يقصد رسميات) وثمن السموحة منك حنا ماحنا بعرب تولع اللمبات ضارين(متعودين)لضو النار،،مشى ومر من عنده،،خلص امورك وانا اخوك ثم عود يمّنا،،ابتعد وهو بيخرج من البيت وخرج،،
بتال تأكد من الوضع وأنهم خرجوا جلس وهو يمدد رجوله يحس بوجع بعظامه فظيع ثم وقف بعد لحظات ومشى عند الباب وهو يصد بوجهه عالبترة وزفر بغيظه حتى هيبته طاحت بعد هالموقف عند جسّار وراشد:هيه ياللي داخل جن ولا انس اطلع وخلصني
عباير خرجت وهي تبي تذبحه عاللي قاله لكن تتذكر كلام سعود اللي قاله قبل لحظة وهونت وهي تكتم غيظها وجرت بسرعة مبتعدة عنه
بتال بتكشيرة مرتسمة على وجهه وبحدة:مرة ثانية تأكدي قبل تروحين لأي مكان اذا فيه احد بوجهك او لا فهمتي،،قطب جبينه وهو مايسمع لها صوت التفت وراه وزفر بهم،،الله يعيني على غثاهم الحين،،رجع للشباب ونسى انه يبي الحمام من الأساس،،
،،المطبخ،،
عباير وقفت عالباب وهي تطالعها
بخوت بنرفزة:علامش أبطيتي والله لو إنش حافرة المدس(المكان اللي مخبية فيه)برأس البترة لقاعتها من جوا(داخل جدار البترة نفسه)إنش قاضية(مخلصة)
عباير بنكد:مير كود إنش مولمة العشا وماتبين شين مني ابغدي يم الغرفة
بخوت عقدت حواجبها:وش غادين بش؟!!موحية شي(يوجعها شي)؟!!
عباير:مابي شي مير اني ابغسل هالحنا عن شعري ثم لاخلصت أموري رقدت
بخوت توسعت عيونها:بترقدين!!هالوقت!!والجوال ماانتي مراعيته؟!
عباير قشعر جسمها ورمت الجوال عالارض عند رجول بخوت:خذيه الله لايعيده من بلا!!وكود اني شحدتش(طلبتك)اياه صكيه بالجدار وريحني منه الله يسلط عليه هو وذاك الادمي مثل ماتسلطت علي(تقصد جسّار)،،مشت لغرفتها،،
بخوت تطالعها مو مصدقة انها تترك الجوال وتنام
.
،،تعشوا الشباب بعد مااكرمهم سعود واتفقوا انها ماتكون نهاية جمعتهم بالعكس هاذي بداية صحبتهم ومشوا من عنده متجهين للبيت،،
..بيت بادي..
سعود دخل بوسط ابتسامته للبيت وهو متجه للمطبخ وقف عالباب
بخوت تنظف الصحون التفتت تطالعه وهي تغسل وبابتسامة:ياحيّ هالوجه
سعود ابتسم وهو يدخل ووقف جنبها وهو يسلم على راسها:اكرمش الله ياعيني
بخوت:وانت معي ياعين بخوت
سعود حط يده ع كتفها وهو يضمها عن جنب بحبه الاخوي:عليم الله إنش بيضتي وجهي يابخوت
بخوت بابتسامة:ماعملت شي وانا اختك!!مير انت مبطي عن الضيفان وتراعي اللي عملته هذا كبره
سعود باس جبينها من جهته:ايوا الله كبير بعيني لو تراعينه وش صغيره بعينش
بخوت توردت خدودها بخجل من هالمدح وهي تفرك بنفس الصحن من زود خجلها:ماعملت شي هذا واجبن علي ومثل ماأوجست ماعملت شي
سعود ابتسم وهو يطالع تصرفاتها:كثر خيرش وعساني مااعدم هاليديات
بخوت:بالعافية ياعيني بالعافية
سعود تركها وهو يزفر:وينها خوية الربادة(اقرب شي لمعناها الكسل)
بخوت:غدت يم الغرفة محتاج شي اعمله لك؟
سعود:لا لا مير اني ماارعيتها من العصر
بخوت:بالغرفة
سعود مشى واتجه لغرفة عباير وقف عند الباب وهو يفتحه بشويش
عباير بغرفتها متربعة عالارض فارشة المنشفة على رجولها وهي تمشط شعرها حتى ينزل بواقي الحنا عالمنشفة
سعود دخل وهو يعطيها ظهره
عباير ابتسمت من شافته:ياحيّه
سعود مارد وقفل الباب بالمفتاح مرتين
عباير عقدت حواجبها باستغراب
سعود التفت عليها بوجه كاسيه السواد من غبنته ومن بين اسنانه بشر:وش اللي كنتي تعملينه معه ياعباير؟!!
.
،،بتال يتوسط جسّار وراشد الكل ساكت وهم يمشون،،
جسّار وراشد طالعوا بعض بابتسامة وكل واحد احتضن يد بتال اللي بجهته
بتال طالعهم باستغراب
راشد وهو مقطب جبينه يتصنع الخوف:ظلام يابتال
بتال كشر بوجهه
جسّار بتكشيرة وهو يضم يد بتال اكثر:انا خايف يابتال تكفى لاتتركني
بتال وقف وهو يسحب يديه منهم بقوة وبنرفزة:وبعدين؟!!
جسّار انحنى شبه جالس يطالع الارض
راشد وهو يرجع له ويضم يده:لاتتركني خايف بتال والله خايف
بتال طالعه بابتسامة:وش رايك اعطيك كف يغير ملامح وجهك وتعرف الخوف صح!!
راشد تركه:اعوذ بالله منك خلاص خلاص ماني بقايل شي يالشجاع
بتال طالعه بحدة
راشد ارتفعت حواجبه:خلاص قلت!!وش فيك حساس!!
بتال تقدم وهو يرفع يده بيضربه
راشد رجع لورا لعند جسّار
بتال من بين اسنانه بنرفزة:ألا رحمة الله على هالوجه
جسّار وهو يدور عالارض زفر وبنرفزة:يوووه منك يابتال بس
بتال وراشد طالعوه باستغراب
جسّار:كشفوا علي(شغلوا الكشاف)
بتال:جوالي طافي
راشد خرج جواله وفتح الكشاف
بتال وهو يطالعه:وش مضيّع؟
جسّار ابتسم:ايوه!!قرب الكشاف علي قربه ياراشد
راشد انحنى شبه راكع يقرب النور له اكثر وباستغراب منه
جسّار وهو يلقط شي من الارض بيده ويقفل عليه بين يديه والتفت لهم بابتسامة وهو يوقف وبهمس:قربوا شوفوه وأنتم ساكتين لاتطلعون صوت
بتال:وش
جسّار قاطعه بهمس وهو موسع عيونه:اووووش!!
راشد وبتّال قربوا من جسّار يطالعون يديه بتركيز
جسّار فتح يديه بشويش وبحماس:ها شفتوها؟!
بتال قطب جبينه وهو يشوف يدين جسّار فاضية
راشد باستغراب:مااشوف شي!!
جسّار بابتسامة:ام الركب اللي صابت بتال قبل شوي(يقصد خوف بتال)،،جرى وهو يضحك بصوت عالي،،
بتال جرى وراه
راشد يلحقهم وبنور جواله اللي يطلع وينزل بالمكان من حركة يده اللي فيها الجوال:هيه انتظروني هيييه
جسّار وقف عند باب البيت واختفت ابتسامته وهو يشوفهم قدامه
بتال وقف ورا جسّار وهو يمسكه من رقبته:جاك المو،،سكت وهو يشوفهم وارتسم على وجهه غيظ وكره للي واقفين قباله وبحدة،،خير!!وش فيكم مسنترين عند الباب عسى ماشر !!
جسّار بحدة:والخير وينه عن هالاشكال يكرم!!،،يثبت شماغه على راْسه زين،،اكيد ناوين يكملون اللي ماكملوه اليوم
بتال بعصبيته:قايله انا هالاشكال ماينفع تتنازل عنها كله منك لو انتظرتهم يعفنون بالسجن كم شهر
،،كل هالكلام والتهجم الواضح من بتال وجسّار عليهم وهم ملتزمين الصمت تماما،،
راشد يطالعهم باستغراب تقدم وهو يمسك جسّار وبتّال اللي ناوين شر كل واحد بيد ورجعهم وراه ،،بتال وجسّار سكتوا وهم يوقفون ورا راشد ومتعودين بالأول يسمعون من راشد ثم بعدها يتصرفون اذا ماعجبهم الوضع،،
راشد بهدوء:اذا انتم قاصدينا وناوين شر فتعوذوا من ابليس واقصروا الشر لان اللي ماصار اليوم ماهو بمتكرر،،طالعهم بتهديد،،الا بحالة واحدة ان واحد منكم بيكون مكان بتال وبالعناية بعد
غيث زفر وهو يتكلم غصبا عنه ماهو برأيه وبكسرة نفس وغيظ مشحون بداخله ابتسم وهو يخفي قبضته المشدودة:ياوجيه الخير انا جاي اتعذر وأنتم أهل الطيب والسماحة ماهو بغريبن عليكم الفعل الطيب يالنشامى
بتال ارتفع حاجبه وهو مميل فمه بسخرية من كلامه بينه وبين نفسه
جسّار يطالعه مو مصدق
راشد:ماسوينا الا اللي أملاه علينا الضمير وكان بنتبع كل فعولٍ شينة تواجهنا ماعشنا بهالدنيا لكن نصفح ونتغاضى ونمشيها على المزاج
طلق بنرفزة وسط تكشيرة وجهه:ودامك ماتتبع الفعول الشينة علامك ناوين تكملها الحين بهالعلم الماصخ اللي نطق به فيك(فمك)!!
غيث التفت على يساره يطالعه بحدة يسكته
هليّل زفر بشبه راحة بعد مارد طلق على راشد
راشد زفر نفس خفيف وسط ابتسامة سخرية وهو رافع حواجبه:تـرا الـجـزا بـيـن الـعـرب جـنـس الاعـمـال!!وكـلـن مـاقـفـه(موقفه)يـنـحـسـب لـه!!
طلق عض شفته من غبنته وهو يسكت وسط مسكة غيث ليده يسكته
غيث ابتسم:مـن طـاب لـك طب له على كل ابو حال ثم
جسّار بحدة وهو يقاطعه:ومـن خـاب لـك عـلـى كـل ابـو حـال خـب لـه!!(يقصد انهم خايبين وماوراهم طيب)
بتال ضحك بصوت كله سخرية على مقصد جسّار
غيث بابتسامته الهادية الغريبة عليه:حنا عملنا اللي عملناه بحزة طيش وهذانا غادين يمكم ناصين طيبكم باغين السمح الجزيل
راشد زفر:الله يستر عليكم من البداية تنازلنا وهذا دليل على السماحة ماله داعي هاللي يصير
غيث طالع بتال:الوجه من الوجه ابيض؟
راشد وجسّار التفتوا له
بتال:انا مااكسر كلمة لأخوي ابد!!
راشد ابتسم
بتال زفر:الله يستر عليكم واللي حصل اعتبروه ماحصل ابد بيوم
غيث تقدم له وهو يمسك يد بتال بيد ويضغط عليها بيده الثانية:مشكور مشكور يالسمح،،مرر نظره على راشد وجسّار،،انا اشهد أنكم راعين الفعول الجزيلة كثر الله خيركم عساكم عالقوة
طلق بتكشيرة وهو يكره المجاملات:دام الوجه من الوجه ابيض تصبحون على خير،،لف ومشى،،
هليّل مشى ورا طلق وهو مو راضي عاللي يسويه غيث رغم انه عارف ان ابوه اجبره على هالشي
غيث ترك يد بتال:عاد مثل مااوجس طلق تصبحون على خير فمان الله
راشد:وأنتم من اهله ياهلا حياكم الله
غيث عطاهم ظهره واختفت ابتسامته وارتسم شر على وجهه من الذل والمهانة اللي يحس فيها رغم وجهاهة اللي سواه وأنهم يستاهلون بعينه لكن ابوه كسر كل قناعته وماحسب له حساب اسرع بخطواته وهو يشد ع قبضته يلحق هليّل وطلق
راشد فتح باب بيتهم ودخل:بِسْم الله
جسّار دخل وتقدمهم ثم التفت يطالعهم وبزعل:ليش ليش سكتوا لهم!!
بتال دخل وقفل الباب وراه
راشد طالعه وهو رافع حواجبه:انت اخر واحد تتكلم وانت اللي تنازلت!!
جسّار توسعت عيونه
بتال تكتف وعينه على جسّار:الله ينور علييك!!ماودك تقولي وشو له تنازلت وكل هالزعل بصدرك!!
جسّار سكت للحظة وهو يشوف هجومهم عليه ثم زفر:بيوصل لأبوي الخبر
بتال:ويعني؟!!
جسّار:وش اللي يعني!!اذا درا ابوي والله ان يجي بالشاص ويربطنا ويسحبنا عالاسفلت بطريق الرجعة للبيت!!
بتال:انت مكبر الموضوع جسّار
جسّار:لا مو مكبره!!انت تدري وش شرطه علي حتى أجي لهالمكان تدري؟!
بتال:كالعادة مثل شروطه
راشد:اذا شميت ريحةٍ حولك ذبحتك
بتال وهو يفك يديه:هاه حتى راشد قاله هالكلام يعني تطمن
جسّار بضحكة لكن مضمونها خوف:لااا هالمرة غييير النظرة غير الكلام نفسه غير والمقصد والمخفي يخوف ياعيال
بتال عقد حواجبه
جسّار:ان شميت ياجسار بس شميت ريحة انك انت ولا واحد من السرابيت اخوانك مصاحبين ولا متمشكلين مع احد من اهل ذيك الديرة جيتك وتليتك(سحبتك)من اذنك وغديت بك يمّ مقبرتهم ودفنتك بها وانت حي
راشد قشعر جسمه:من جدك ياولد؟!!
بتال بعدم اهتمام:ماتلاحظون كلام جدي والعايلة الكريمة يشبه كثير من كلام اهل هالديرة؟!!
راشد وجسّار طالعوه بصدمة من بروده
جسّار بتكشيرة ونرفزة:بالله ذَا وقته؟!!
بتال زفر:وانت ليش متخوف!!يعني أكثرها أكثرها بيمردغنا وهالشي مو جديد علينا عادي وين المشكلة!!
جسّار:بتال ابوي ماكان راضي ولا رضى للحين بسالفة جيتك لهالديرة يعني السالفة وهالتهديد مو مجرد مردغة معتادة!!
راشد طالع بتال:تذكر ذيك الليلة
بتال يسمعهم ساكت
راشد:اقصد يوم درا انك توظفت بهالمكان
بتال:عااااادي تمردغت كالمعتاد لكن هالمرة قدام الكل
راشد:مااقصد خالي
بتال طالعه باهتمام
راشد:مستحيل أنسى وجه جدي يوم درا انها ام جلاجل ماانتبهتوا؟!
بتال سكت بتفكير وهو يسترجع سؤال مناور اللي طرا بباله وكأن راشد ينبهه على شي غافل عنه
جسّار:ماانتبهت له الصدق كل عيني على هالعملاق لايذبحه ابوي!!
راشد:تصدقون احس فيه شي مانعرفه
بتال وهو يمشي يضيع الموضوع:مافيه شي اخمدوا بس ورانا صلاة فجر بالمسجد يالله يالله النوم النوم،،وقف عند جسّار ورفع رجله وهو يدف جسّار برجله،،انت بالذات تخمد الحين ماشاء الله عليك تسبقنا للصف الاول كل يوم يالله يالله
.
طلق مسرع بخطواته متجه لبيت ناصر
هليّل وراه:طلق
طلق واقف والتفت له وهو يكبح غيظه
هليّل:يم من غادي!!!نسيت ان عندك بيت!!
طلق بعصبية:وانت وش عليك مني!!اغدي يم البيت ولا يم جهنم الحمرا،،مشى عنه،،
هليّل مشى ورا طلق يبي يتهاوش معه لكن وقفه صوت غيث اللي يناديه من وراه وقف والتفت عليه
غيث وقف بمكانه ويأشر له بيده بمعنى تعال
هليّل عقد حواجبه وهو يشوفه ثم التفت يطالع طلق اللي يبتعد عنه اكثر وأكثر لف متجه لغيث وهو يهمس بينه وبين نفسه:هين ياطلق بكرة اعلمك انا،،وقف عند غيث،،
غيث مشى
هليّل مشى وراه ثم لحقه ومشى جنبه
،،اتجهوا لمكان جلستهم المعتاد برا الديرة،،
غيث:ارتاح ارتاح على مااجهز الدلة
هليّل جلس وكله شك من تصرفات غيث لكن ملتزم الصمت
غيث وهو يجهز الدلة وسط ابتسامته وهو يهمهم بلحن
هليّل ابتسم وهو بدا يروق شوي على ريحة الدلة اللي تغلي فوق النار ويريح بجلسته
غيث قطع هاللحن وبدون لايطالع هليّل وبابتسامة:أوحيت العلم اللي سارين بالديرة؟
هليّل باستغراب:وش علمه؟!!
غيث وهو يصب له فنجال:سم
هليّل اعتدل بجلسته وهو يأخذ الفنجال وسط ابتسامته رفع الفنجال يتقهوى
غيث:انت خابر اللي انعمل بسعود واهله؟(ليلة طعن سعود)
هليّل تجمد الدم بعروقه وكمل يتقهوى وهو يتصنع انه مايدري
غيث طالعه:يوجسون انت اللي تسببت به
هليّل نزل فنجاله بربكة واضحة مافاتت غيث وبعصبية:وش هالعلوم الشينة!!ثم انت الله يهديك توحي هالمصاخة وتوجسها مايصير!!
غيث:علامك شبّيت!!بالهون بالهون!!ثم انا اوجست اللي اوجسته لك حتى تدري وش يوجسون من وراك
هليّل:وقطع لهالديرة مايوجسون الا العلوم البايزة(مافيها خير)ماوراها طب
غيث ابتسم:مير اني داري انه انت ورا هالعلم ياهليّل لو انك توجس انه ماهو باأنت
هليّل بعصبية:وش هالسلوم اللي مالها سنع ياغيث!!
غيث:لاتظن اني ناقد عليك ياهليّل!!الا بيض الله وجهك!!اقديت به وانا اخوك
هليّل يطالعه بشك
غيث:عيال عبري؟
هليّل قطب جبينه
غيث:الظاهر انك للحين موالفهم(صاحبهم)
هليّل ساكت مارد عليه
غيث:تخبر بعد اللي رميته عليهم من كم سنة مايدانوني مير كود انك للحين موالفهم خلك مثل ماانت،،ابتسم بشر،،بيغدي يمّنا يوم نعتاز(نحتاج) لهاالمواليف(الاصحاب)!!
.
..بيت بادي..
عباير رافعة راسها تطالع سعود بتكشيرة معتلية وجهها وهي تشوف نار الشك تاكله وقفت وهي تطالعه ساكتة وسط نظراتها الحادة
سعود مسكها من يدها وسحبها له بقوة
عباير حست بيدها انخلعت من مكانها من سحبته طالعته بنفس النظرات والسكوت
سعود بغبنة وهو يضغط على يدها بيكسرها:علامش ماتوجسين شي!!اوجس لي وش عندش معه!!
عباير وهي تحس بحرارة انفاسه تلفح وجهها:ماعندي شي اعمله معه!!
سعود ضربها كف بكل قوته على وجهها وهو لازال ماسكها بيده الثانية وبحدة بين اسنانه:كبي عنش الكذب ياعباير!!
عباير ابتسمت رغم المها:صدق من قال انك ولد بادي ماانت بولد متعب مااخذت منه شي!!
سعود تركها وضربها بيده ضربة طيحتها عالارض وشاتها برجله بكل قوة
عباير شهقت بصوت وهي تحس أضلاعها تكسرت من الالم
سعود بحدته وبنبرة عالية:لاغدا الموضوع به وجه ابوي وجدي أذبحش واشرب دمش ياعباير ولاتسوين بعيني لو هو ذرة(نملة)!!
بخوت برا الباب تدق وهي خايفة ماتدري وش صاير بينهم:سعود عباير علامكم فكوا الباب ياسعود فك لي!!
عباير وقفت وهي تلقط نفسها بصعوبة:أرعيتني معه!!جالستن معه بنفس المكان!!ولا شفت الشينة وانا عنده!!
سعود بغبنة وهو يشوف مراددها له:مطا(اثر)رجولش لعلها الكسر ياسويدة الوجه!!والمطا رطب ماهو بمبطي الله لايبارك بش!!
عباير:ايه صدقت مطا رجولي
سعود ضربها على وجهها
عباير سال من فمها الدم من قوة ضربته:غديت يم البترة ابي الجوال
سعود دفها بقوة
عباير ضرب ظهرها بالجدار عضت شفتها وهي مو قادرة تتحمل اكثر
سعود بصراخ:تعقبين ياعباير مااطريتي الصحيح!!
عباير:انشد بخوت وهي بتعلمك
سعود يطالعها بتكذيب
عباير زفرت:يوم انك ماانت مصدقني وش تحتري!!اشرب دمي ياسعود!!
سعود يطالعها بحدة ساكت
عباير اتجهت لفراشها اللي بزاوية الغرفة انحنت وشحب وجهها وهي تحس روحها بتطلع من الالم وطلعت من تحته خنجر أعطاها اياه سعود بعد السالفة اللي صارت لهم اعتدلت بوقفتها والتفتت عليه ورمت الخنجر عند رجوله:هاك سم(قول بِسْم الله)واذبحني ووكد(أكد او اثبت)علوم الناس اني ردية وأخوها ماصبر على رداها!!
سعود عاض شفته وهي جت عالجرح وبحدة:وينه جوالش؟!
عباير:عطيته بخوت ليش؟ودك تراعي من اكلم!!يمكن اكلمه؟!!
سعود مشى لها بسرعة ومسكها بيده من رقبتها يخنقها
عباير انخطف وجهها وهي مرعوبة لأول مرة يتعامل معها سعود بهالاسلوب
سعود وبغضب:انكعمي ياعباير انكعمي!!وتطلبي ربش تغدي هالسالفة على خير!!لو ارعيت به شين منا ولا منا ذبحتش انتي وهو وعزمت اهل الديرة يراعون وشلون عدل سعود،،دفها وهو يتركها،،
عباير طاحت عالارض
سعود فتح الباب بقوة ووجهه ينطق بالغضب
بخوت بوجهه وبقلقها:علامكم!!وش غادين معكم ياسـ،،سكتت وهي تشوف وجهه،،
سعود بحدة:وينه البلوى؟
بخوت بلعت ريقها:وش انهو؟
سعود صرخ:الجوال يابخوت الجوال؟!!
بخوت فزت:بالمطبخ
سعود بنبرته العالية:افزعي جيبيه يمي وش تحترين!!
بخوت جرت للمطبخ
سعود التفت لعباير اللي جالسة عالارض:وانتي هالباب ماتعتبينه الى مااني اوجس لش،،خرج وقفل الباب وراه بالمفتاح عليها،،
عباير هلت دموعها لكن ماهلت من الالم بس هلت من الظهر اللي كان بعينها الحامي الكبير وانكسر كسرها سعود وكسر ثقتها فيه للأبد وهو يأكد كلام اهل الديرة بدون مايحس على نفسه تمددت عالارض وسط شلال دموعها بخيبة وانكسار وهي تشوف الماضي يعيد نفسه باختلاف الأشخاص!!
.
.........****..........
يــوم جــديــد
.........****..........
..بيت نشمي..
الجد نشمي يستغفر وهو توه راجع من الصلاة
الجدة منيرة جالسة جنبه وبيدها سبحتها
الجد نشمي:وينها عذبة؟للحين ماقامت؟!!
الجدة منيرة:صلت وغدت بتولم الفطور وعييت(قلت لا)عنها وجهها مو بزين ثم غدت ترقد توجس تعيبانة
الجد نشمي:علامها وش يوجعها؟
الجد منيرة زفرت:كبّ الضعيفة عنك خلها تريّح
الجد نشمي:كود بها شي يفزعون بها اخوانها يم المستشفى
الجدة منيرة:مابها شي تريح ثم تقوم ان شاء الله نهي مابها خلاف ثم ووشو له المستشفى والدكتور براسه عندك!!
الجد نشمي:اجل اتصلي بمسفر واوجسي له يجي يمّنا هالحين
الجدة منيرة:مير اقطع هاللغوة لايوحينا عادل وهو حالف يمين مانهرج بهاللغوة(الهرجة)قدام العيال
الجد نشمي:وانا ماضربت لهالعادل ولغوته حساب وبنيتي تعيبانة!!مير اتصلي بمسفر خليه يفزع لنا
>
>
عذبة جالسة قبالها وبينهم المشب وبحضنها راشد ولد الثلاث السنين يطالع اللي قبالهم بابتسامة بريئة
زاهية الحامل بشهرها الاخير تطالعها بحدة وكلها غبنة وقهر
عذبة نزلت راشد من حضنها وهي تطالعه:رح لابوك ياراشد رح وبتلقى بتال وجسّار رح العب معهم رح
زاهية انعصر قلبها وبلعت غصتها وهي تحبس دموعها وهي تسمع كلمة(ابوك)يعني اللي شافته حقيقة مو حلم
راشد طالع زاهية وهو يأشر لها بمعنى مع السلامة وسط ابتسامته ومشى خارج بحماس وكل همه اللعب
زاهية بغبنة:عديتش أخت وتغدرين بي!!قلّوا الرياجيل ياعذبة!!تاخذين رجلي!!مازان بعينش الا ابو عيالي!!
عذبة ضمت يديها بتوتر وبرجفة صوتها:ابوي غصبني يازاهية انا مابغيته
زاهية بصرخة وسط دمعة نزلت غصب عنها:انكعمي يالكذوب!!ابوش لاقلتي له مابغيت يوجس على ماتحبين ياعذبة وانتي أغلى من عويناته!!لكن انتي ماتزين بعينش غيره!!
عذبة برجفتها الواضحة:الشاهد الله اني عييت عنه يازاهية
زاهية ضحكت بغبنة:واللي ارعيته من قليل(قبل شوي)غصب عنش!!
عذبة نزلت عيونها ساكتة تزري لو تتكلم مابتصدقها
زاهية بقهر وسط رجفة صوتها ودموعها:علامك ابطيت!!راشد ينشد عنك تشوقنا(اشتقنا)لك ياابو راشد!!،،صرخت،،وهو ماهو ياابو راشد عنده ولد يشيل اسمه ياعذبة!!
عذبة فزت من صرختها وبنفسها:هو مايحب يتسمى الا بابو راشد
زاهية وهي تفرك ركبتها بيدها من الغبنة:وتوجسين مغصوبة!!
عذبة:اللي تامرين به يصير يازاهية!!
زاهية بغبنة:وش عقبه!!وش عقبه ياعذبة!!ااااه ياقليبي وانا اللي متعنية(متعبة نفسها)يمش يوم أوحيت إنش مرضانة اااه ياغبنيتي على خيي اللي وعدتيه تحترينه وهو باغيش حليلتن له!!
عذبة نزلت دمعتها وهي فعلا للحين تحبه لكن الظروف أجبرتها على غيره:لاتقولين هالكلام عني انا مرة متزوجة!!
زاهية ضحكت وبابتسامتها:متزوجة رجلي ياعذبة!!
عذبة سكتت
زاهية ناظرت يدين عذبة اللي كل يد بها أسورة ثقيلة عليها الكلام:توجسين اللي امر به؟!
عذبة ابتسمت براحة وهي تشوف فرصة للصلح بينهم:ايه ايه يازاهية اللي تبينه
زاهية زفرت:ادني مني ياعذبة ادني
عذبة قامت من مكانها بسرعة واتجهت لزاهية وانحنت جنبها شبه جالسة
زاهية لفت عليها وصاروا مقابلين بعض مدت يديها الثنتين لعذبة:عطيني يدينش
عذبة استغربت من طلبها لكن ماتركت هالشي يحول بينها وبين الصلح مدت يديها وهي تحطها بيدين زاهية
زاهية مسكت يدين عذبة وطالعتها:كود إنش انتي سامحتيني انا بعد مسامحتش
عذبة قطبت جبينها باستغراب:وش اللي تطلبين السماح عنه يازاهية!!
زاهية ابتسمت:الحين اعلمش،،ضغطت على يدين عذبة بقوة وسحبتها بسرعة وهي تدخل يدين عذبة الثنتين بوسط الجمر اللي بالمشب عندهم،،
عذبة اعتلى صراخها المكان وهي تحاول تفك نفسها من زاهية اللي معروفة بقوتها لكن ماقدرت
زاهية تركتها وهي تشوف وسمية وحصة ومنيرة دخلوا المجلس عندهم
عذبة ضمت يديها لصدرها وسط دموعها وصوت أنينها العالي من الالم اللي تحس به
زاهية تطالعها بابتسامة
حصة صرخت وهي متجهة لإخوانها بفجعة على اختها
وسمية تطالع اللي يصير بصدمة وهي ساكتة
منيرة جلست جنب عذبة بفجعة وهي تشوف شكل يديها المحترقة طالعت بزاهية وبغبنة وسط دموعها:حسيبش الله يازاهية والله لاآخذ حقها منش!!والله ماكبش لو تحبين رجولي!!
زاهية وقفت وبابتسامتها:تبطين!!والله ان ماتلمسين شعرة من راسي!!،،طالعت عذبة،،كود سامحتيني ياعذبة انا مسامحتش!!،،مشت،،
>
>
عذبة صحت من نومها بفجعة من هالكابوس اللي تتناساه ويرجع لها غصب طالعت يديها المحترقة اليمين مختفية معالم أصابعها وكأنها ماانخلقت لها اصابع اما يدها اليسار اللي قدروا يرممون منها جزء بسيط وصاير شكلها مشوه من كثر العمليات لكن هي اليد الوحيدة اللي تستخدمها زفرت وهي تشوف شكل يديها:الحمدلله على كل حال،،تغير وجهها وهي تتذكر مايرجع هالكابوس لها الا وراشد فيه شي فزت بسرعة وهي تدور على جوالها وتتصل فيه،،
.
.
<اللهم صل وسلم على نبينا محمد>
.
.