ياسمح المحيا جر الهجينية

٧٥

    ،،الـجـزء الـخـامـس والـسـبـعـيـن،،
.
.
..بالبر..
مناور يطالعها وهي عند النار تفتت الخبزة وتصب فوقها السمن وبنفس الوقت إبريق الشاهي عالحطب وبابتسامة:اعاونش؟
هدية بابتسامة:والله ان ماتنوش شين ابدن
مناور بابتسامة:ياعلش سالمة ياهدية كثر خيرش يابنيتي
هدية وهي تتجه له بالأكل:ماعملت شي ياعله بالعافية،،نزلت قدامه الفطور،،حيك ياعم،،رجعت للنار،،
مناور بابتسامة:ماشاء الله ماشاء الله سلمت هاليديات
هدية اخذت إبريق الشاهي ورجعت عنده وهي تجلس قباله وهي تصب بالكاسات
مناور:الله يازين التنفه
هدية بابتسامة:ياعم انت اللي مقصرن بعمرك ماتغدي يم البر وتونس
مناور:صدقتي صدقتي مير كل اسبوع نغدي انا وانتي يم البر نكشت هالكشتة الزينة
هدية:ابشر ياعم ابشر
،،بعد ماافطروا يتقهوون وهم يلعبون(راسمين عالارض مربع داخله خطوط متقاطعه وكل واحد معه حجر بألوان غير عن الثاني)،،
مناور بتفكير باللعبة:يابنت الظاهر بتحرزين على عمش
هدية نزلت فنجالها:ياعم
مناور وعينه عاللعبة:هممم
هدية بتردد:اريد اعلمك بعلمن
مناور انقطع حبل تفكيره باللعبة وهو يرفع عينه لها
هدية:مير اني ماني خابرة
مناور قاطعها:اوجسي ياهدية اوجسي
هدية اخذت نفس وهي تستجمع شجاعتها:بالاول عاهدني ياعم
مناور قطب جبينه:وش وراش ياهدية؟
هدية بإصرار:عاهدني ياعم
مناور:لفاش العهد يابنت اخوي لفاش
هدية:تمنع عني السو ياعم؟
مناور بقلق:علامش يابنت اوجسي وش وراش!!
هدية:تمنع عني مرتك ووغدانك واولهم غيث
مناور زفر
هدية:ترد عني صرايمهم ياعم
مناور:لفاش عهدي يابنت وش وراه!!
هدية اعتدلت بجلستها وهي تجلس على ركبها:انا داخلتن على الله ثم عليك ياعم
مناور شهق:استغفر الله يابنتي
هدية:امنع صرايمهم لاغدا العلم الصحيح
مناور:انتي بوجهي ولحيتي ومايغدي يمش شين غير الموت وانا حي ياهدية اوجسي العلم
هدية:اريدك تغدي بي يم المركز
.
..بيت مناور..
ام غيث بتكشيرة:خير وش غادين بش يمّنا هاه؟
ام مزون:لفيت حتى اعلمش ان الشيخ خطب بنيتي
ام غيث انصدمت وشدت على قبضتها وهي تحتد نظرتها لها
ام مزون:لو انه لفاني قبل عرس بخوت كان ذالحين مزون على راسش ياصيفة
ام غيث بحدة:والمغزى؟
ام مزون زفرت:مااريد ينعمل بوغيدتي ماانعمل بش
ام غيث بقهر تخفيه:اوحي العلم ياسلمى مناور كود انه رايدن الجيزة تجوز مير وغدتش ولا غيرها ولا اشقاني
ام مزون اتسعت عيونها:هذا مناور مناور ياصيفة!!اللي وزّيتي متعب ياخذ عذبة لانه يريدها!!
ام غيث:اكذاب ماغصبت احدن يم احد
ام مزون ميلت فمها بابتسامة:عذبة يامتعب ترد الخطاطيب تحتريك قليبها رايدك وعويناتها ماتراعي غيرك
ام غيث كشرت
ام مزون:لو اني مااوحيتش بأذني اوجست يتجنون يم الضعيفة
ام غيث بحدة:كلن عقله معه ماقضبته من رقيبته وتليته يم عذبة!!
ام مزون:صدقتي صدقتي مير الرجل ضيع اهله لاهو اللي زاهية ولا اللي يم عذبة وترا ذنب هالوغدان برقبتش ياصيفة
ام غيث بحدة:تعقبين!!مالي بدن بهم وثمن كودش لافيتن يمي بهالعلوم اقضبي الباب تخبرينه
ام مزون تنهدت:يعلم الله اني رايدتن لش الخير كبي قنقش واقضبي وليدش ركديه ياصيفة ركديه
ام غيث:تعقبين ولدي راكدن غصبن عنكم كل ابوكم مير الظليمة تعود يمكم هين
ام مزون زفرت بيأس منها:ماغديت يمش شامتن بش ابدن يعلم الله غديت يمش اريد الخير كود به خير لش
ام غيث:كود هاذي علومش اوجست يمش درب الباب تخبرينه اقضبيه!!
.
..مكان الشلة..
غيث جالس على اعصابه وهو ينتظر
هليل وقف عنده بالسيارة
غيث وقف وسط وجهه المحتد وهو يطالعه لحاله وبحدته:علامك غادين يمي بروحك!!
هليل تنهد:محدن غدا معي
غيث قطب جبينه:وشو!!
هليل:هذا هالعلم ياغيث
غيث عض شفته بقهر
هليل بتردد:غيث ورا مانغدي يم المركز قبل يلفون
غيث يطالعه بحدة:تريد اثور بك غلي!!(يفرغ غبنته)
هليل:اوحيت العلم ياغيث؟
غيث قطب جبينه:به علومن بعد!!
هليل:مرزوق توفى
غيث تغير وجهه
هليل:عني ذالحين مابنسلم من عيال عبري لااوحوا طاري علمنا ذا
غيث ضم يديه بتفكير:هليل
هليل:اوحيك
غيث:اغد يمهم وعزّهم(تعزية)بمرزوق
هليل قطب جبينه باستغراب:وثمن؟
غيث رفع عينه له بابتسامة:ابدن خذ عليماتهم
هليل يطالعه بشك
.
..قرية عيال عبري..
..بيت ضبعان..
فارس بوجه كله هم دخل للمجلس وبيده صحن كبير به الفطور تنهد وهو يطالع قفاه
ضبعان متلثم بشماغه ساند راسه فوق يديه وهو متمدد على جنبه معطي ظهره الباب
فارس نزل الصحن وهو يجلس:ياجد افطر كود إتقوى به ناسن واجد يحترونك
ضبعان مغمض عيونه ولاالتفت له:اوجس مابه عزا
فارس شهق:وش ذا العلم!!حرام ياجد وش هالوجس الشين!!
ضبعان:طفى الضو يافارس عقب طامي(ابو فارس)ومرزوق(اخوه)
فارس:وانا وين غديت ياجد
ضبعان بحزن:واشيب حالي حالك لاغدا بك الدهر ومحدن يمك
فارس:يمي عزوتي اهلي وربعي جماعتي عيال عبري ياجد مير انت ماتراعيهم ذالحين
ضبعان زفر بضيقة:كلن يغدي بدربه محدن بيظلي بهالديار وانا جدك
فارس وقف:مردي يمها لو نغدي يم أقصى الارض مردي يمها مير تريح ذالحين والعصر اذا ربي راد تغدي يم العرب اللي لافين يمك يعملون واجبهم
.
.........****..........
       الليل
.........****..........
..مجلس الشعر..
،،الشباب بالحوش جالسين عالقهوة وعينهم على بيت الشعر بفضول يقتلهم،،
يوسف بضيقة:ليش يردوني عنهم!!
جواد يتقهوى:وش عليك انت!!امور بينهم مالنا شغل فيها اترك عنك اللقافة
يوسف:لو انك مااوجست يمي مثل خيم قبرتك على هالعلم
جواد:يمه ماتخوف عيال عمي هم اللي يخوفون صدق
غازي ارتفع حاجبه:جواد!!
جواد:وش فيك!!هيبة هيبة!!
غازي:والله مدري عنك هي مدحة ولا غيرها!!
جواد بابتسامة:انا اقدر على زعل الحبايب!!
يوسف وعينه على بيت الشعر عشر دقايق زيادة محدن طلع لفيت يمهم انا
.
فاهد جالس جنب نشمي بهدوء مغطي المكان
نشمي جالس قبال الجد نشمي:ياعم القطيعة طالت وهاللون مايصلح مهما انعمل هذا هو لافين يمكم تايب وطمعان تفزع معه
ابو غازي ميل فمه بابتسامة سخرية:يم من!!ياكثر ماعمل وين يريدنا نغدي بسواد وجهه!!
الجد نشمي بحدة:عادل!!
فاهد كشر بوجهه
ابو غازي بابتسامة:علامك يبه!!هذا الصحيح هماني بأغدي معه لزومن اتخبر بالاول!!
نشمي:القطيعة شينة وأجر الصلح ياكبره ياعم نشمي
الجد نشمي:وثمن؟
نشمي:نريدك تغدي معنا يم ابوي بلكن اللي براسه يلين
ابو جواد التفت لابوه بفضول
الجد نشمي تنهد:بادي لذالحين مالان راسه تصبر شوي
ابو غازي:اسلم لك لاتغدي يم عمي بادي لايقضب بتال من غيظه ويعمل به ماعمل من اول
فاهد اخذ نفس وهو يتحمل رميات عادل
نشمي:عادل!!
الجد نشمي التفت لابو غازي:عادل عندك وجسن زين اوجسه ماعندك توكل عنا
ابو غازي وقف وهو يكبح نفسه مشى كم خطوة ووقف وهو يطالع فاهد:فاهد اللي عملته بس وبجميلة نسيته من عمر لخاطر وسمية وعيالي مير انك تعود وانت خابرن علومك وفعولك لزومن علي امنع الشر عن بيتي وعيالي
فاهد:وكود اوجست ياعادل اني رايدن امنع هالشر عنكم واعمل ماتريد
ابو غازي قطب جبينه
فاهد:انا مستعد اغدي يم ام جـلاجـل وادق بيبانهم باب باب وكلن ياخذ مايريد مني
ابو غازي سكت وهو يطالع جديته بالموضوع ثم ابتسم:صحيح!!
فاهد كشر وهو فاهمه
الجد نشمي:عادل!!
ابو غازي بابتسامة:دامك علمن وش عنيت كف روحك عن بتال يافاهد كفها لاتغدي يمّنا بصريمتن قشرا،،مشى وخرج تاركهم،،
الجد نشمي تنهد:ياولدي يافاهد
فاهد قاطعه:مااوجسه عادل صحيح ياعم لأجل هالسالفة رايدك انت وعمي بادي تغدون معي يمهم
.
..بيت خالد..
،،جمعة حريم،،
الجدة منيرة اللي جالسة بتكشيرة
حصة همست:يمّه فكي هالتكشيرة عاد ماصارت!!
الجدة منيرة:اوص عني اوص تركنا اختك لحالها بالبيت وهي ضايقة فوقها كله منك
حصة اتسعت عيونها:وش سويت!!!
الجدة منيرة:قلت لك ماني برايحة معكم وشو له تتصلين بسهام وتقولين هاللون
حصة:هذا جزاتي يمه ابي لك الوناسة
الجدة منيرة:وين الوناسة وهالرويشد قاهر امه!!
حصة تنهدت:يمه اتركيهم عنك ولد وامه بكيفهم وبعدين راشد مايصبر عن امه ابد
الجدة منيرة بقهر:بيكمل يومين وهو حتى الجوال مارفعه عليها اااه وغبنتي اااه!!
حصة:يمّه اتركي عنك راشد وعذبة عينك على سهام مالاحظتي شي
الجدة منيرة قطبت جبينها:وش فيها!!ياحليلها
حصة بابتسامة:شكلها حامل يمه
الجدة منيرة ضربتها وبعصبية:كبي عنك علوم الحريم متى تتوبين انتي هاه متى!!
ام غازي ابتسمت:وش فيك على حصة ياعمة تراها ماتقصد
حصة بتكشيرة:سمعتي يمه سمعتي!!بس تعصبين علي
الجدة منيرة:الله يلوم مَن لامني فيك وغيدتي محدن يخربش كثري
،،البنات بالمجلس اللي جنبهم،،
شذى طالعت سهام:قومي يااختي لضيوفك وانتي منرزعة عندنا
سهام:الله!!بيتي اروح للي ابي
رهايف تفصفص:صادقة الشذيا روحي لضيوفك احنا لاحقة علينا
سهام زفرت وهي تطالع امجاد اللي ساكتة
امجاد ابتسمت:اول مرة يقولون شي صح هالثنتين
سهام مشت
شذى طالعت رهايف:كأنها غلطت علينا
رهايف همست:اصلا وضعها مو طبيعي هاليومين
امجاد؛ترا اسمعك!!
رهايف بهم:بنسافر مع اني رفضت بس مارضى
شذى بابتسامة:انبسطي انبسطي وعيشي بعدين تذكرينها وتحنين
رهايف بابتسامة:اَي والله بعدين اطلبه نعيد هالرحلة وأيامها
امجاد اتسعت عيونها:يمّه تكفون لاتخوفوني خليكم مهابيل كالعادة!!
.
..بيت الجد نشمي..
،،الصالة،،
عذبة فاتحة التلفزيون عالمجد وهي تتقهوى تحاول تضيع ضيقة بالها وزعلها
راشد دخل للبيت
هيفاء وراه
عذبة طاحت عينها عليه وبكت
هيفاء بكت اول ماشافت دموعها غصب
راشد جرى لها وجلس على ركبتيه قبالها وهو يسلم على راسها ويدها:الله يجازيني على هالدموع ياام راشد 
عذبة بوسط دموعها:اعوذ بالله من هالدعوة اعوذ بالله منها
راشد وهو يبوس يدها ورأسها من جديد برجفة صوته ولمعت عيونه:سامحيني ياام راشد سامحيني غلطت بحقك سامحيني
عذبة:الكلمة كلمتك وانا امك ماغلطت بشي وانا تحت جناحك حقك حقك ياعين امك حقك تزعل 
راشد رفع كفها السليم وهو يرفع بيضرب نفسه:أدبيني ربيني حقك
عذبة سحبت يدها بسرعة من يده:استغفر الله العظيم استغفره
راشد مسك يدها من جديد وهو يحاول يضرب نفسه وامه تسحب يدها بالقوة:قليل الحيا اللي مابه خير نزل دموع اميمته يحق لك تربينه من جديد يحق لك
عذبة زادت دموعها وهي تسحب يدها بالقوة منه:ربيته يشهد الله ربيته احسن تربية ماكسر لي كلمة طول عمره الله يرضى عنه والله اني راضية عنه
راشد نزلت دمعته:يمّه سامحيني سامحيني
هيفاء راحت للمطبخ وهي تحاول توقف دموعها
عذبة مسحت دمعته:مسامح ياعين امك مسامح الله يسمح دروبك ياقليب امك
راشد ضمها وهو يسلم على راسها:الله يجعل يومي قبل يومك الله لايمتحني فيك يايمه
عذبة برجفة صوتها:الله لايروعني بك وش هالكلام بسم الله عليك
راشد تركها وهو يطالعها وضحك بخفة:والله يمه اذا رحتي اروح وراك
عذبة:ولد!!خلاص أقفل السالفة
ابو غازي دخل وهو يطالع قفا راشد ودموع عذبة وبصوت عالي وسط اتساع عيونه وعصبيته:اقــطـــع مــن ولـــد!!ابوك ياعادل!!
عذبة انصدمت من ردة فعله:عادل!!
راشد التفت له بفجعة:خالي!!
ابو غازي مشى له بسرعة وهو يمسكه من ياقة ثوبه وجره
راشد تغير وجهه انخنق من سحبة خاله
عذبة فزت وهي تمسك يد ابو غازي توقفه:عادل ذبحت ولدي تكفى اتركه اتركه تكفى
ابو غازي:معصي اتركه والله ان ياخذ جزاه!!
عذبة فكت ياقة ثوب راشد من يد ابو غازي وبصراخ:ذبحته!!!
راشد فتح ازرايره وهو يلقط انفاسه
ابو غازي بحدته:هذا هو مثل الثور مابه شين!!
عذبة:اتركه ولدي وانا أتفاهم معه
ابو غازي:ماهو بعلى هواك،،بحدة،،رشيد
راشد فز واقف وهو يحس بوجع برقبته:سم ياخال
ابو غازي:الحقني،،لف بيمشي،،
راشد طالع امه
عذبة:لا مايلحقك ماني ببايعة ولدي لك!!
ابو غازي التفت لها بحدة:لاتبيعينه مير انه يتبعني ولا ينقبر قدامش ذالحين!!،،مشى،،
راشد جرى وراه
عذبة بغبنة:حسيبك الله ياعادل
ابو غازي رفع صوته:أربيه زين وانا ولد ابوي أربيه!!
.
.........****..........
أم جـلاجـل
.
..قرية عيال عبري..
فارس يطالعهم بحقد يتطاير من عيونه وهو واقف عند المشب 
ضبعان جالس قبالهم وواضح عليه الحزن
سويلم وقف عندهم وهو مثبت عيونه عليهم بحدة
فارس بغبنة:هاذي والله الشيانة بعينها!!لافين يم العزا ومرته راس الصرايم!!
سويلم وعينه على بتال:عمي مااوجس يمه شين يافارس مير انكعم ماهو بحزة خنفرتك!!
فارس:والله لولا جدي ان مايطلعون من الديرة الليلة
سويلم التفت له بحدة:فارس!!
فارس مشى وهو متنرفز لاقصى درجة ووقف عندهم وهو يمد يده وبحدة:فنجالك
جسّار رفع عينه له وحط الفنجال عالارض وهو يطنش نبرته:سلمت
فارس طالع بتال اللي جالس جنب جسّار
بتال يتقهوى ولا رفع عينه له
فارس اتجه لجده وهو يغلي وصب له قهوة
جسّار انحنى لبتال وهو يهمس:ولد
بتال يتقهوى:اسمعك
جسّار وهو يطالع نظرات عيونهم اللي أحرقتهم:مشينا والله قلبي مو مرتاح
بتال نزل فنجاله وهو يزفر:يالله،،ووقف وهو يتجه لضبعان وانحنى يسلم على راسه،،
ضبعان جالس ماوقف
بتال:عظم الله اجركم وأحسن الله عزاكم
ضبعان همس وهو يبلع غصته:جزاك الله خير احتروا العشا
بتال:حنا جينا نعزيكم الله يرحمه ويغفر له فمان الله،،مشى،،
جسّار انحنى وسلم على ضبعان وعزاه ومشى ورا بتال
سويلم وهو يطالعهم بقهر مايختلف ابد عن قهر فارس لكن ماقدر يوصل لشي 
فارس:ياعم نحط العشا؟
سويلم زفر:حطوه
.
..بيت طلق..
،،المجلس،،
،،ناصر وطلق جالسين قباله يطالعونه،،
طلق وهو يطالعه بشك:خير!!خابرك اليوم اتهددني
ناصر يطالعه بعدم راحة
غيث بابتسامة وهو يستند عالمسند جنبه؛والله اني لافين يمكم شارين الخوة اللي جدعتوها ولا اديتوها حقها
طلق ارتفعت حواجبه وهو يسمعه
ناصر ميل فمه بسخرية
غيث:كود شارينها صحيح هذاني يمكم
ناصر:انت توجس ماعملت شين وحنا اوجسنا الصحيح ياغيث
غيث ارتفع حاجبه:وثمن؟
طلق ابتسم:ثمن تولم بكرة اذا ربي راد بيلفي الأمر
غيث اعتدل بجلسته وبابتسامة:هذا اخر علمكم؟
ناصر يطالعه بشك
طلق:كودك توجس الصحيح مابه ذلّتن يمك
غيث وقف وبابتسامته:اجل دام هاذي خوتكم،،رفع يده بمعنى سلام،،الله يبيحكم منها،،خرج،،
.
..بيت مناور..
،،غرفة النوم،،
ام غيث دخلت وهي تطالع وجوده بصدمة
مناور متمدد على جنبه عالسرير وهو متلثم
ام غيث باستغراب منه:علامك راقدن يمي الليلة!!
مناور:كبيني عنش الليلة مااريد اوحي شين ابد
ام غيث:يبس اظهيرك(ظهرك)من زولية المجلس،،بابتسامة،،يالله لك الحمد
مناور:صيفة طلبتش الليلة كبيني بروحي
ام غيث جلست ع طرف السرير وبقلق:علامك يامناور عسى ماخلاف؟
مناور:ولمي عمرش ياصيفة ولميها
ام غيث قطبت جبينها باستغراب:وش عنيت؟
مناور:الحمدلله على دبرة الله الحمدلله
.
..بيت غيث..
غيث دخل للبيت عقد حواجبه باستغراب وهو يطالعها
هدية واقفة قباله بكامل زينتها جلابية باللون البني ميدي باكمام كت تاركة شعرها مسدول ببناجرها الذهب اللي تغطي يمينها واسورتين ذهب بيسارها خاتمين باليمين ومثلها باليسار بعقد عريض(رشرش)يزين نحرها وحلقها الطويل اللي اخفى طوله شعرها اللي يغطيه وخلخال يزين رجلها اليمين برسمة ايلانير وروج لحمي فاتح تحضر العشا ابتسمت وهي تطالعه ووقفت بابتسامة:ياحيّه حياك الله ياغيث
غيث قشعر جسمه وهو يطالعها بصدمة:وش وراش!!
هدية:ماوراي الا كل خير ادنى ياحيك
غيث مشى لها بشك وتوتر وهو يطالعها
هدية زفرت ومشت له وهي تمسك يده
غيث وقف يطالعها
هدية مشت وهي تسحبه معها:علامك برد العشا وانت لذالحين واقف تراعيه!!،،وقفته مكانه،،اقعد حياك الله على خيرك اقعد
غيث جلس بهدوء
هدية قطعت له خبز ومدته له:سم ياعله بالعافية
غيث اخذه وهو يميل فمه بشك
هدية:علامك ماتاكل!!
غيث قطع من الخبز وهو يغمسه بالفول اللي قدامه ومده لها
هدية طالعته باستغراب
غيث بابتسامة:كلي بالاولة!!
هدية تضايقت ووضح على وجهها زفرت وهي تمد يدها ليده وتسحبها لها واكلت اللقمة:ياعلك سالم غانم ياولد عمي
غيث يطالعها مو مرتاح لها
هدية صبت له كاسة الحليب وحطتها جنبه واخذت لقمة وهي تمدها له
غيث ارتفع حاجبه
هدية:هاك ياعله هني
غيث مد نفسه لها ماوده يكسر خاطرها
،،مر العشا بهدوء وسلام وسط ابتسامات هدية وهدوء غيث وسوالفها عليه والتزامه الصمت بتوتر من الوضع،،
غيث اتجه لغرفة الحريم وهو مكان نومه المعتاد دخل وهو مايشوف لافرشته ولا اغراضه التفت وراه وهو يطالعه ترفع اغراض عشاهم:هدية وين فراشي؟
هدية وقفت وهي متجهة للمطبخ:شوين وغاديتن يمك
غيث تكتف وعينه عالمطبخ ينتظرها
هدية خرجت من المطبخ وهي تنفض يديها من المويا واتجهت لغرفة النوم وهي تفتح الباب وتطالعه:حياك الله بيتك
غيث:هاه!!!
هدية:تريح وامغط(مدد)ظهرك عالسرير ازين لك من سدحة الارض
غيث:انتي علا
هدية مشت وهي ماردت عليه
غيث طالع الغرفة بتردد زفر:وهي الصادقة بيتي،،دخل لغرفة النوم،،
.
.........****..........
..الحوش..
أبو غازي بخيزرانته وبحدة:اعجل ياولد وش فيك!!
فيصل:يبه مااعرف رمزه والله
ابو غازي طالع راشد بحدة:بتعلمني ولا اتوطا ببطنك ذالحين
راشد مصلب عالجدار وجبهته تلامس الجدار:نسيت رمزي
ابو غازي مشى له بخطواته سريعة وضربه بالخيزرانة وبصرخة:خلصني!!
راشد التفتت له وهو يكتم الم الضربة وبترجي:ياخال راضي لو تجلدني مية جلده ولا هالشي
ابو غازي:مو انت قدوة لطلابك!!خلهم يشوفون اللي يرفع صوته على اميمته ويزعلها وش يصير له بالعكس بيدعون لك امهاتهم ويزيدون راتبك المدرسة
راشد هز راسه بلا:كرامتي إتمردغ على كيفك بس قدام طلابي لا
ابو غازي زفر وهو ياشر بخيزرانته بمعنى اجلس:اجلس اجلس وارفع يديك،،التفت لفيصل،،وانت خذ له صورة وأرسلها بموقع المدرسة
راشد اتسعت عيونه:ياويلك فصيل
فيصل يطالع راشد بحيرة بينهم
ابو غازي اتسعت عيونه:وشو!!،،مشى له بسرعة ووقف عنده ويلوي ذراع راشد ورا ظهره ويضرب راشد بركبته يجلسه،،
راشد جلس وهو يتالم
فيصل:يبه
ابو غازي التفت له بحدة:تبي تجي مكانه!!
الجد نشمي وقف يطالعهم وبحدة:والله انت اللي بتغدي مكانه ياعويدل ماكبيتهم!!
ابو غازي التفت له:انت معه يبه!!ماضاق خاطرك على عذبة بالأيام اللي راحت!!
الجد نشمي:وتعلم خطاه اتركه ياعادل اتركه
ابو غازي دف راشد وهو يتركه وبحدته:تصليب للفجر ورب البيت لو تحركت ذرة قبل الأذان مايفكك من يديني احد،،مشى،،
.
.........****..........
بــعــد اســبــوع
.........****..........
صباح يوم جديد
.
..بيت الجد نشمي..
الجد نشمي يفطر بهدوء
ابو غازي يفطر ويطالعه بشك من هدوءه اللي ملاحظه من البارح:يبه
الجد نشمي رفع عينه:علامك!!
ابو غازي تأكد من شكه:يبه وش فيك من البارح امورك ماش
الجد نشمي زفر بابتسامة:صحيح محدن يخبرني كثرك ياعادل
ابو غازي:ابشر يبه باللي اقدر عليه ابشر
الجد نشمي:تسلم ياعادل تسلم مير رايدن اعلمك اليوم قاضبن خط ام جـلاجـل
ابو غازي قطب جبينه:عـسـى ماشر!!،،كشر بوجهه،،لايكون
الجد نشمي:وصلت
ابو غازي بغبنة:من جدك يبه!!بتغدي معه لام جـلاجـل!!وانت خابرن علومه!!
الجد نشمي:هذاني علمتك وكودك صادق مااشقاك(ماهمك)كبّه يقضي اموره!!علامك مستقعدن له!!
ابو غازي:انت هابر وشو له مستقعدن له يبه!!
الجد نشمي:هذاني علمتك وانت بهواك ودامني غادين معه مرد بتال بيخبر
ابو غازي بحدة:يبه انت خابرن وشو له راكبن راسي!!علامك تغدي به وعلى مراعاة اهل الديرة كل ابوهم!!
الجد نشمي:لأجل انه تاب وتفطن ياعادل!!
ابو غازي ميل فمه وزفر بضحكة سخرية
الجد نشمي:مير به قليبن عقب دينه غدا اسويد!!
ابو غازي اتسعت عيونه:يبه!!
الجد نشمي وقف:عاد تريد اغدي معنا بخير حياك الله وكود غيره لابالله امنعنا من غديتك،،مشى،،
.
،،المطبخ،،
راشد دخل وابتسم وهو يطالع امه اسرع بخطواته وهو يسلم على راسها:صباح الخير والنوير وصوصة الطير 
عذبة ابتسمت وهي توزع البيض بالصحون:ياصباح النور ياهلا،،التفتت له،،وينها هيوف؟
راشد كشر بوجهه؛تكفين يمّه خليها تمام
عذبة كشرت:رشود وش فيك عالمسكينة!!والله ماتلاقى مثلها!!رح حط الكاسات بالصينية بس
راشد زفر وهو يمشي لطرق المطبخ ويحط الكاسات بالصينية مثل ماطلبت امه؛اصلا ماابي غيرها ابد يمه
عذبة ابتسمت وهي تجهز الفطور
راشد:بس يمه هالايام غاثتني غثا مايعلم فيه الا الله
عذبة التفتت له:ياويلك من ربك!!هيفاء تغث احد!!
راشد:ايه انا!!
عذبة:وش سوت لك يالظالم!!
راشد:يمه!!تراني انا ولدك!!
عذبة:وهي بنتي مثلك مثلها!!
راشد بحلطمة:يمه بس تبكي على اَي شي تبكي وتزعل وناشبة لي بالبر علت قلبي مع هالبر الله يحرمنا منه
عذبة قطبت جبينها:من متى هالكلام؟
راشد:من زمان يمه من زمان
عذبة:راشد
راشد:سمي يمه
عذبة:رح اكشف على زوجتك!!
راشد قطب جبينه باستغراب:ليش!!
عذبة شالت السفرة بيد وصحن من الفطور بيد:روح لدكتورة نساء ياراشد ماهو بضارك تتاكد
راشد اتسعت عيونه وهو يستوعب
عذبة وقفت ع باب المطبخ وهي تلتفت له بابتسامة:المفروض انك منتبه لها وتعرفها اكثر من غيرك وانا امك
راشد ابتسم:يمه لو صدق
عذبة بابتسامة:البشارة؟
راشد:ابشري باللي تبين
.
..المطار..
جواد بظهره شنطة ويسحب شنطته وشنطة رهايف وهو يجزي
رهايف تجري وراه:جواد
جواد زفر بطفش من كثر مارجعت طريقهم وتأخروا:هالمرة اللي نسيتيه باشتريه فكينا يالله نلحق عالرحلة،،وقفوا عند بوابة الدخول للطيارة،،
رهايف بترجي:جواد ضروري والله
جواد:اشتريه بك رهايف خلاص
،،دخلوا للطيارة وجلسوا بمقاعدهم،،
رهايف وجهها عالشباك
جواد التفت لها وهو يسمع تعليمات الطيار مد يده لخصرها وهو يقفل حزامها
رهايف مالتفتت له ابد
جواد مد يساره ليمينها ومسكها:حبيبتي وش فيك؟
رهايف بدون ماتطالعه:مافيه شي
جواد لف بجسمه لها وهو يحتضن يدها بيديه:طالعيني طيب
رهايف التفتت له وعيونها غرقانة دموع
جواد زفر:من امس وانتي متضايقة وش هالدموع!!زعلتك بشي؟ضايقتك طيب؟
رهايف هزت راسها بلا
جواد:طيب وش فيك؟
رهايف سكتت
جواد ضغط على يدها:قولي لي لاتشيليني هم يارهايف
رهايف طاحت دموعها غصب وبرجفة صوتها:ماابي اسافر
جواد:ليش!!
رهايف سكتت
جواد:كنت حاس سالفة النسيان ذي مـاهـي لله وراها شي
رهايف:جواد ماني متعودة اروح عن اهلي ماابي اسافر خل نرجع تكفى
جواد:غلطتي كل يوم واحنا عندهم طول هالاسبوع
رهايف ضغطت على يده وبترجي:جواد من البداية قلت لك ماابي اسافر تكفى حبيبي تكفى خل نرجع
جواد ابتسم:يازين حبيبي منك بس لا
رهايف دفت يديه وهي تصد عنه بزعل
جواد تكتف وهو ينزل كابه على وجهه:صحيني اذا وصلنا
رهايف التفتت له بوسع عيونها:نعم!!بتنام وتخليني!!
جواد غمض عيونه:انتي زعلانة وش تبيني اسوي
رهايف:راضيني طيب مو تنام وتتركني
جواد مارد
رهايف رفعت كابه:جواد!!
جواد طالعها:رضيتي؟
رهايف كشرت:اكيد لا
جواد بتكشيرة:اصلا حتى انا زعلان
رهايف قطبت جبينها:وليش ان شاء الله
جواد:حبيبتي ماتبي تسافر معي
رهايف بوزت بخجل:متى قلت!!
جواد اتسعت عيونه:الله يرزقني قوة جحادتك والثقة!!
.
.........****..........
ام جـلاجـل
.
..المركز..
مناور جالس وهو قبالها بوجه واضح عليه الهم ولولا كلمته لها ماراح معها ابدا
هدية جالسة قباله وهي خايفة وترجف من خوفها
الضابط ورا مكتبه:يعني رجع للبيت حدود الساعة عشر ونص وبدل وطلع لغدا العرس كذا تمام؟
هدية هزت راسها بايه وهي ضامة يديها لبعض وشادة عليهم
الضابط بتشديد:كذا صح؟
هدية:ايه
الضابط طالع الخاتم:وهالخاتم طاح منه؟وماهو لأهل البيت؟
هدية:ايه
الضابط:تعرفين مين أصحابه قد شفتيه قبل؟
هدية:ايه ارعيته من اول قبل هالنوبة وكل اهل الديرة يخبرون لمن
الضابط بحدة:ماعلي من اهل الديرة سألتك انتي
هدية بلعت ريقها:ايه
الضابط؛يخص مين؟
هدية:بخوت
مناور نزل عيونه للأرض وهو يعض طرف شفته بندم انه وصلها
الضابط ميل فمه وهو يربط الاحداث ابتسم:وقعوا برا عند الجندي وتجهزوا باي وقت تستدعون للمحكمة لتأكيد الأقوال
مناور:خلصنا نمشي؟
الضابط:تيسروا انتهى الموضوع من جهتكم
مناور وقف ووقفت هدية وعينها عليه
الضابط طالع مناور:خير؟فيه شي ثاني؟!!
مناور بتوتر:وغيث وش وضعه طال عمرك؟
الضابط طالعه:ماوصلكم الأمر!!
مناور قطب جبينه
الضابط:طلعت الدوريات اليوم
مناور:هاه!!
الضابط:صدر امر من المحكمة بإعادة فتح القضية من جديد وصدر امر القبض عليه خصوصا بعد وفاة مرزوق
مناور دارت الدنيا فيه
هدية مسكنه بدموعها:عمي
مناور جلس بصدمة ومسك راسه بفجعة
الضابط وقف وفتح الباب وهو ينادي:ياعسكري
هدية جالسة عند وجوب عمها وبدموعها:سامحني ياعم سامحني
مناور غرقت عيونه دموع:ياستر الله ياستر الله!!يالله استرها ياربي استرها!!
.
سيارتين غير عن باقي السيارات على مدخل ام جـلاجـل وحدة وقفت واعترضت الطريق حتى تمنع الخروج والدخول والثانية كملت طريقها ودخلت للديرة صحيح سيارة لكن تختلف عن باقي السيارات كليًا سيارة مميزة وتميزها بالعدل مهما طال الوقت نهايته عدل سيارة باللونين الابيض والأسود الاسود يلون مقدمتها وجوانبها ماعدا البابين باللون الابيض وعلى هالابواب من يمين ويسار شعار عريض واضح وضوح الشمس شـعـار الـدوريـات الأمـنـيـة دخلت وسط أنظار وتعجب الكل وتاكيد للكلام اللي يدور بين الناس فترة وقفت عند باب مجلس الشيخ ونزل منها عسكري بالزي الرسمي ووقف عالباب وهو يطالع الجالسين داخله:السلام عليكم
ابو هليل وقف:وعليكم السلام والرحمة حياك حياكم تعدوا
العسكري تفحص وجيههم واللي يبيه مو بينهم وبجدية:غيث مناور وينه؟
ابو هليل:عـسـى ماشر و
العسكري قاطعه بحدة:وينه فيه!!
.
..مكان الشلة..
غيث رفع عينه وهو يقطب جبينه من سرعة السيارة اللي واضح الغبار من وراها من بعيد
هليل وصل بالسيارة عنده نزل وجرى له بتوتر واضح غيث:علامك!!
هليل:ارعيت الدورية غدت يم مجلس الشيخ
غيث اتسعت عيونه بصدمة
هليل برعب:لو انك طاوعتني ياغيث ليتك طاوعت كان ذالحين ماغدا هاللون بنا ماغدا
غيث وقف وبحدة:هليل!!
هليل سكت وهو يطالعه
غيث بتهديد:حنا مانخبر شي وهاك اليوم ماارعينا شين ابد وحتى ماارعينا بعض ياويلك تحيد عن هالوجس اوحيت!!
هليل سكت
غيث بابتسامة وهو يتجه للسيارة:وثمن كبّهم يعملون مايريدون!!مردنا نطلع منها!!همانا مانخبر شي!!
.
..بيت جسّار..
عباير تطالعهم بابتسامة
بخوت جالسة جنب عباير وهي تطالعهم مو مرتاحة لهم
عباير بابتسامة:اوجسن وش العلم وهالوجيه الودرة خابرين ماوراها خير
نايفة احتدت نظرتها
عباير:مير اوجسن ولاتطولنها وهي كبر يديتي
غيثة بابتسامة:الاولة خابرين وينها الوجيه الودرة
عباير ضحكت بخفة:وثمن؟
غيثة بابتسامة:وثمن لاغدا علمكن الشين اللي كبر وجيهكن الودرة،،طالعت بخوت بحدة،،اجحدن لاانشدوكن
نايفة تطالعهم بابتسامة
بخوت كشرت
عباير انفجرت بضحكتها العالية
غيثة كشرت
عباير بضحكتها وهي تلتفت لبخوت:ياخيّة أذني بها علة!!!
غيثة:ياعلها معتلة دايم ولاتطيب مير اللي اوحيتيه اعمليه
عباير بابتسامة:تعقبين ماني بمغيرة وجسدي ياعلش اتهولين
غيثة طالعت بخوت بابتسامة:هذا العلم موصى يمش يابخوت وانتي خابرة الوصاة من وراها
بخوت ضمت يديها وهي مكشرة
نايفة:وكودش مااوجستي العلم الصحيح تخبرين وش يغدي!!
عباير بابتسامة:مير حنا اوجسنا الصحيح وانا بتكرم عليكم واعلمكـ(ش)ـن وش اللي بيغدي بيتلون غيث من رقيبته ويحكّون(يمسحون)به الارض وتصيح الارض،،بصوت عالي،،واشيب حالي مابي حيلتن به النجس نجس مابه سناعة!!لو تحكونه بي لقبا!!(ضحكت بصوت عالي،،
بخوت ابتسمت
غيثة بحدة:تعقبين محدن بينتل غيرش انتي واختش يالكذوبات!!
نايفة بصراخ وهي توقف وتمسك صينية القهوة اللي بينهم وتحذفها بقوة عليهن:اعققققببببي ماالنجس غيرش انتي واهلش،،
،،عباير وبخوت كل وحدة سحبت نفسها وهم جالسات ومرت الاغراض من بينهم،،
بخوت اتسعت عيونها والتفتت لها بحدة
عباير بابتسامة وهي تتربع زين وتطالعهم:اويل قليبي عليكن يارحمة الله أغشيهن!!تخبلن تخبلن!!،،مدت يدها لقميصها وهي تمسكه من عند صدرها وترفعه وتنفث على نفسها وبابتسامتها،،ياستر الله ياستر الله يالله لاتضيع عقيلاتنا يالله
غيثة وقفت وبحدة:اوحيت العلم مير اعملن مااوجست لايغدي شين مايسر عداكم قبلكن!!،،لفت بتمشي،،
عباير؛مير ذالحين لش عهدن علي
غيثة ونايفة التفتوا لها
عباير:مااوجس انه غيث ولاارعيته ابدن ابدن بهاك اليوم وبخوت اوجست اكذاب من التروع اللي غدا بها بهاك اليوم
غيثة كشرت بوجهها
عباير بابتسامة وتحدي:كود عملتي اللي عجزت اعمله!!
غيثة عضت طرق شفتها بغبنة
>
>
قبل خمس سنين
>
>
..بيت مناور..
عباير جالسة قبالها بدموعها وبترجي:تكفين ياخالة طلبتش خيي بيغدي عمره بالهسجون طلبتش ياخالة اوجسي يم غيث يكبه طلبتش
ام غيث تتقهوى ساكتة
غيثة واقفة متكتفة وبحدة:ويغدي من السجن كود يكمل عليه!!انخبلتي اَي بالله انخبلتي!!
عباير طالعتها وهي تضرب على صدرها:لش علي والله والله مايخطي درب يم هالديرة،،وهي تمرر نظرها بينهم،،مير تكفون تكفون افزعوا يمي ياعل الله مايراعيكم سو بعزيز
ام غيث نزلت فنجالها وبحدة:عباير
غيثة قاطعت امها بابتسامة:ابشري
عباير بفرحة:صحيح!!
ام غيث بحدة:غيثة!!
غيثة:مير على شرط
عباير بسرعة وسط فرحتها:امري وتم على ماتريدين تم تم
ام غيث وقفت:غيثة!!
غيثة:كود غديتي مع هالباب وعودتي يمّنا ومعش احدن من اهل الديرة لو هو وغيد وغيد ويحيد(تصغير واحد)مغيره يوجس كبوا خيّها ابشري
ام غيث زفرت وسط تقطيب جبينها
عباير انخطف وجهها:مير
غيثة اتسعت عيونها:ماتريدين!!
عباير وقفت:كثر خيرش يكثر خيرش ذالحين ذالحين اغدي شرين ومعودة،،جرت خارجة من بيتهم،،
هدية تطالعهم بتكشيرة
شريفة:خافن الله خافنّه،،طالعت امها،،يمه
ام غيث:انكعمي ياشريفة واغدي يم نوفة مااريد اوحي حس!!
شريفة مشت بخطوات سريعة للمطبخ وهي زعلانة
هدية مشت ورا شريفة
نايفة بحدة:غيثة!!وثمن لاحدن لفى معها يمّنا تعملينه غصبن عليش!!
غيثة ضحكت:كود به احدن يلفي بالاول!!
عباير تدور بيوت الديرة بيت بيت وهي تدق عليهم باب باب تطلبهم وتترجاهم يساعدونها وسط دموعها ولا احد فتح لها مجرد إهانة من باب لباب وهي عارفة مقصد غيثة لكن توقعت احد يرحمها ويفزع لها جلست على باب بيتهم وهي منهارة وسط دموعها وبحرقة قلب:ياعل الله لاييسر لكم رزق ولايفتح بوجيهكم خير ياام جـلاجـل كل ابوكم
>
>
عباير بابتسامة:ووكاد بيغدون معش يمّنا هماش بنت الشيخ!!
غيثة:تعقبين اللي تريدينه ماهو بغادين ابد لو اني اموت
عباير بابتسامة:مير موتي محدن مانعش!!وتكحلي كحلي عويناتش بخيش وهم يتلونه
نايفة بحقد:تلش الذيب اللي مايخلي بش روح
عباير ضحكت:حظيظان هالذيب بيعين لحمن من حلوه يوجس هذيل لحيمات ولاعسل،،ضحكت بصوت عالي كله سخرية،،
نايفة مشت
غيثة مشت
بخوت وقفت:غيثة
غيثة التفتت لها بابتسامة:ها عود عقلش يم محله!!
بخوت:اوجسي يم اخوش وراك ليالين طوااااال تعد بهن النجوم وتخطيهن
عباير ضحكت بأعلى صوت من المعتاد
.
..مجلس الشيخ..
هليل وقف بسيارته قبال مجلس الشيخ
غيث نزل وسط أنظار اهل الديرة اللي تجمعوا حول الدورية وهذا شي غريب عليهم نزل وهو كله غرور وثقة قفل الباب وراه
العسكري مشى له بخطوات سريعة
ابو هليل ورا العسكري:اصبر ياابن الحلال علامكم
العسكري بحدة:اسكت لاتركب جنبه!!
غيث ابتسم:ابشر ابشر علامك مخنفر!!
العسكري وهو يحط الكلبشات بيده:احترم نفسك مانبي بخويك!!،،دفه للسيارة،،
غيث ركب وهو على وجهه ابتسامة عريضة
هليل يطالعه بشك وتوتر مو مرتاحة لهالابتسامة رغم انه المفروض وضعه يكون العكس!!
.
.........****..........
       العصر
.........****..........
..المستشفى..
راشد جالس بالانتظار ويده بيدها شاد عليها
هيفاء جالسة جنبه وهم ينتظرون النتيجة تطالع الارض بتوتر رفعت راسها وهي تلتفت له:راشد
راشد التفت لها بابتسامة:ياعيون راشد امري
هيفاء:كود ماكتب الله
راشد قاطعها بابتسامة:حتى لو ماانكتب شي الحمدلله راضين وبعدين ذاك التحليل كان يسر وش فيك خايفة الحين
هيفاء زفرت وهي تطالع الارض
راشد:هيفاء
هيفاء طالعته:سم ياعيني
راشد:حتى لو ماانكتب لنا شي تونا متزوجين الأيام والسنين جاية والله يكتب لنا اللي فيه الخير
.
..بالسيارة..
غازي يسوق وهو مرتسمة على وجهه اعرض ابتسامة انرسمت عليه بيوم
عذاري بيدها صورة الايكو(السونار)تطالعها بمشاعر فرح اللي فاضت وغرقت عيونها دموع وهي اللي بكت اساسا يوم سمعت نبضات جنينها اخذت نفس وهي تحبس دموعها لاتبكي من جديد وتلتفت له ابتسمت وهي تطالع ابتسامته:ماشاء الله مستانس!!
غازي مارد
عذاري:لي الله مستانس وحتى مبروك ماقالها
غازي تنهد بصوت:اَي والله مستانس
عذاري ارتفعت حواجبها:صدق!!على اساس ماتبي!!سبحان مغير الأحوال!!
غازي:عذاري!!
عذاري:لا بس اذكرك يعني وانت حتى مبروك ماقلتها مدري متى بتقولها!!
غازي:لا ولدتي
عذاري اتسعت عيونها:نعم!!!
غازي ضحك:اَي والله
عذاري:مو من جدك غازي!!تستعبط!!
غازي:وصلتك كتابة الصوت لاولدتي
عذاري تطالعه بصدمة ماعرفت ترد
غازي:وبعدين مالها طعم اذا قلتها الحين واقولها مرة ثانية لا ولدتي
عذاري من صدمتها:واااو عالافكار الجهنمية وااااو!!
غازي وهو يرفع ياقة ثوبه باستعباط:الله يسلمك بس ترا اكبر دليل على افكاري اني أخذتك مشكلة مالاحظتي!!
عذاري:اسفة اسفة أستاذ غازي اعذر مستوى ذكائي اللي ماارتقى لمستواك
غازي:عاذرك من أخذتك ماتشوفيني راضي،،انفجر يضحك،،
عذاري كشرت وهي تتكتف وماردت
غازي:تكفين اضحكي لايصير بزري نفسية
عذاري اتسعت عيونها وهي تلتفت له:نعم!!
غازي ضحك
عذاري بنرفزة:بأنفس طول وقتي عشان بدل ماانت مبتلش بنفسية وحدة يصير عندك نفسيتين
غازي بابتسامة:ومعترفة بـعـد!!
عذاري طالعت لقدامه وهي متنرفزة منه
غازي:عذاري
عذاري ماطالعته ولاردت عليه
غازي:حبيبتي
عذاري زفرت وهي تلتفت له
غازي بضحكة:عذاري طلبتك بلاش تنفيس مو زين لللبزر
عذاري عضت طرف شفتها بغبنة
غازي:واذا على سالفة التبريك ذي اللي مزعلتك بتسمعينها كثيييير
عذاري زفرت:منك غير غير!!
غازي:وصلتك مكتوبة!!وانتي ماكلفتي على نفسك ورديتي علي!!
عذاري باستسلام وهي تطالع لقدام:الله يبارك فيك
غازي كتم ضحكته:متى تبين نبلغ
عذاري التفتت له:بسم الله وش تبلغ عنه!!
غازي:اقصد نقولهم
عذاري:اسمها نبشر نقول لهم وش نبلغ الله يهديك!!فجعتني مطلوب هو!!
غازي بابتسامة:الحين؟
عذاري:قولهم وانا مو معك
غازي بنص عين:ياعيني ياعيني عاللي مقطعها الحيا ياعيني!!
عذاري:اَي والله يامحلاني جالسة وتقولها!!
غازي:وش فيها طيب!!
عذاري:قول لعمتي وعمي وانا مو عندكم وبس!!
.
.
.
.
.
..الطيارة..
جواد متكتف وصابر عالصغير اللي جالس وراه ويرفس فيه من فترة زفر وهو يعض طرف شفته يكتم غيظه
رهايف ميلت فمها وهي تطالعه وهمست له بنرفزتها:خاصمه!!
جواد طالعها:بزر!!
رهايف:ويومه بزر!!كلم ابوه طيب!!
جواد:اتركيه عنك رهايف يرفس فيني مو فيك
رهايف كشرت:كيفك
جواد تنهد
الصغير رفسه بأقوى شي هالمرة
جواد تقدم لقدام بجسمه بحركة واضحة
رهايف اتسعت عيونها ولاتحملت التفتت لورا وهي تطالعه بحدة
الصغير كشر بوجهه وهو يطالعها باستغراب
رهايف التفتت تطالع اللي جنبه
ام الصغير نايمة مو حاسة فيه
رهايف ابتسمت له:حبيبي خطأ اللي تسويه عيب
الصغير طالعها ورفس بعناد
جواد زفر
رهايف اتسعت عيونها:ورع!!
الصغير مد لسانها لها
رهايف همست له بتهديد:ولد والله اضربك
جواد:رهايف اتركيه قلت لك بس نبهتيه علي!!
الصغير يرفس ورا بعض بعناد
رهايف ماتحملت حركاته وبعناد:ياانا ياهو اللي تمشي كلمته اليوم،،جلست على ركبها على كرسيها وهي تكلم امه،،لو سمحتي ياأخت
الام نايمة
رهايف مدت يدها ولمست كتفها:اختي لو ينحني
الام فزت بفجعة:خير!!
رهايف:الله يعافيك ولدك كشر ظهورنا برجوله
الام ماخلصت رهايف كلامها الا وهي ضاربة الولد:معليش اسفة
الصغير اعتلى صوت بكاه الطيارة
رهايف جلست بابتسامة
جواد حط يده على جبهته وهو يغطي عيونه بانزعاج همس لها:لا اله الا الله!!!ارتحتي!!
رهايف وهي تعتدل بجلستها اكثر:اَي والله ارتحت الحمدلله،،ابتسمت وهي تشوف الرضيع اللي بحضن ابوه من بين الكرسيين اللي قدامهم ووجهه عليهم غطت وجهها بيديها وفتحتها وهي تهمس،،هووووو
الرضيع انفجر ببكا خايف
رهايف تغير وجهها وهي تلتفت للشباك بسرعة تبعد الشبهة عنها
جواد زفر وهو يسند راسه عالكرسي ويغمض عيونه:ياليل مااطولك!!
.
.........****..........
ام جـلاجـل
.
..الوايت..
بتال جالس فوق الوايت وهو يتنهد من جده اللي اجبره رغم تعبه من دوامه اليوم ولا عذره وماسك بالشيك من فوق وهو يتحلطم بينه وبين نفسه من هالحالة
عباير تسوق بسرعة بالطريق البري المعتاد وهي مكشرة
الجد بادي:بالهون لايطيح بتال
عباير ماردت
الجد بادي:وثمن لاتعدّين حلال مصلح حطيني يمه
عباير بتكشيرة:بأتعدّاه هماك ماكبيتني اخذ عدة قهوتي
الجد بادي:وش اوجست يمك!!
عباير سكتت بتكشيرة
الجد بادي:اريد نعود بدري واغدي مع سعود يم المركز
عباير:مابه احد بالليل!!وثمن كبّ غيث يتنقع الله لايسلم به مغز إبرة
الجد بادي بتكشيرة:ماني بغادين لعويناته ياعله العمى،،ابتسم،،اريد ارعيه وهو بالحبس محل سعود
عباير التفتت له بوناسة:ابشر ياابو نشمي ابشر بعزك ذالحين اقف بك يم عمي مصلح الله يديمه،،اسرعت،،
بتال انتفض قلبه وهو يشد بيديه عالشبك حق السيارة
الجد بادي بحدة:يابنت الولد فوق!!
.
..بيت جسّار..
جسّار راجع من دوامه وقف قبال باب بيته وارتسمت الضيقة على وجهه وهو يذكر الاستدعاء اللي وصله ميل فمه بوسط تكشيرته وهو يفكر كيف يفاتحها بالموضوع نزل من السيارة وهو يتنهد ابتسم وهو يطالع الثلاث شباب بأعمار فيصل يلعبون كورة بمسافة بعيدة عن بيته شوي مشى لهم وهو يهرول ويرفع صوته:تبون كمالة فريق؟؟
،،التفتوا يطالعونه بابتسامة،،
(١)اكبرهم بابتسامة:اي والله نريد بيض الله وجهك
جسّار نزل لابكوته وهو يرميه عالارض وبابتسامة:يالله انا معك وهم فريق
،،بعد لعب عشر دقايق وسط ابتساماتهم وحماس اللعب،،
جسّار التفت لـ(٢)
(٢)متمدد على ظهره عالارض بعد ماعرقله جسّار بهجمة على مرمى فريقه
جسّار انحنى شبه راكع وهو يمد يمينه له يساعده يقوم وسط ابتسامة:يدك
(٢)مد يمينه
جسّار وقفه واختفت ابتسامته وهو ينزل راسه يطالع وش صار
(٢)غرز السكين تحت صدر جسّار بكم سانتي بيساره
جسّار بوجهه الشاحب وهو يطالعه همس:ليش!!
(٢)غرزها اكثر وهو يبتسم:اول الغيث قطرة امنع الشر نمنع الشر
جسّار همس من المه مو قادر يرفع صوته وهو يمسك السكينة بيساره ويتصبب عرق:لاتسحبها
(٢)سحبها بكل قوته خرجت السكينة من مكان الطعنة وجرحت يده بطريق خروجها وجرى
(١)و(٣)جروا وراه
جسّار جلس على ركبه وضغط على جرحه بيمينه وهو يلقط انفاسه بالم مع كل نفس يدخل ويخرج
.
..عند الحلال..
عباير تسوق للغنم بعد مانزلت جدها وهي تفكر هل تنزل وتتركه يسوي كل شي لحاله او تنزل وتمسك البهم(صغار الغنم)عنه زفرت بحيرة وهي توقف عند شبك الغنم
بتال وقف وهو يضرب يديه ببعض ينفضها مشى باتجاه السلم حتى ينزل
عباير مدت يدها للمفتاح بتطفي السيارة قطبت جبينها وهي تطالع السيارات اللي وقفت عندهم اتسعت عيونها وهي تطالع اللي ينزلون صرخت:إدّرك(تمسك)،،ضغطت عالبنزين بكل سرعتها وحركت،،
بتال اختل توازنه وطاح من فوق الوايت
عباير ماانتبهت له وهي تبعد بالوايت بكل سرعة عنهم
.
.
<اللهم صل وسلم على نبينا محمد>
.
.