ياسمح المحيا جر الهجينية

الجزء السادس

              ،،الــجـــزء الـــســادس،،
.
.........****..........
مــجـلــس الـشـيـخ
.........****..........
،،عم المجلس الفرح والسرور بقدوم غيث ولد الشيخ مناور الكل كان عايش هالفرحة ومبسوط لفرحة الشيخ برجعة ولده له بعد غياب خمس سنوات ماعدا شخصين كانوا يتمنونه مارجع والثلاث مابين وبين،،
،،قرروا يأجلون الموضوع لبعد العشا وبعدها يصير كل خير،،
بيت الشيخ مناور
ام غيث وهي تحضنه وتسلم عليه بكل حب وشوق:ياروح امك ابطيت ياعلني مافقدك
غيث وهو يفكها ويسلم على يديها ورأسها ويرجع يلمها لحضنه:ولاافقدك يالغالية الله يخليش لي ولايحرمني منش
،،سلم على خواته وجلس معهم على قهوتهم اللي على قدهم وقاموا منها حتى يسلمون عليه،،
غيثة:الحمدلله عالسلامة يااخوي الله لايضيع لك تعب
غيث بابتسامته:الله يسلمش ياغيثة وامين الله يسمع منش
نوفة:ها جبت لي شي؟
ام غيث:انثبري ذا اللي مهممش!!حتى ماباركتي له!!
نايفة:وانا؟لايكون نسيتني
غيث يسمعهم بابتسامة
شريفة:اعوذ بالله من المفاجيع!!طيب باركوا اول!!
نوفة:يعرف اللي بقلوبنا مايحتاج!!
غيث بدقة لهم وهو يكتم ضحكته:ايه اعرف اللي بقلوبشن اعرفه وزين زين
هدية من ورا الباب:هلا بك ياولد العم
غيث اختفت ابتسامته
هدية:الحمدلله على سلامتك ومبروك مانالته ياغيث ومبروك ياعمة قرة عويناتش به
غيث نزل عينه عالارض وبرسمية:الله يبارك فيش،،وقف،،
ام غيث:على وين؟مااسرعك؟!
غيث انحنى وهو يبوس راسها:يمه بروح يم المجلس ابطيت عنهم وراجع لش،،غمز لها،،الليلة برقد معش هذاني علمتش!!
.........****..........
بالمستشفى
متمدد ع سرير الطوارئ للحين ماصحى حس بنغزات خفيفة بين عيونه وعلى طرف انفه قطب جبينه بانزعاج وهو يغمض عيونه يبي ينام اكثر يحس بألم بكل جسمه
ابو غازي رجع للكرسي اللي جنب سريره وجلس عليه وهو يزفر براحة وهو يحمد الله بينه وبين نفسه بعد ماكان متوقع المصيبة كبيرة وهالنغزات اللي حس بها بتّال ماكانت الا بوسات أبوية حنونة انطبعت على جبينه وطرف انفه انتبه له:بتّال
بتّال صحى بصوت ابوه لكن فضّل يتصّنع النوم
ابو غازي وقف وهو رافع حواجبه:بتالوه قم ادري بك صاحي
بتّال فتح عيونه بشويش وهو يطالع ابوه حس بصداع لكن خوفه من ابوه أقوى من صداعه للحين يظن انه بالبيت عقد حواجبه وهو يتلفت حوله ويستوعب انه بالمستشفى
ابو غازي انحنى له وبابتسامة:الحمدلله عالسلامة ياابوك
بتّال هالشي خوفه ورد بهدوء:الله يسلمك يبه،،توسعت عيونه وفز جالس بسرعة،،
ابو غازي انخرش منه:وش فيك؟!!
بتّال وهو يتحسس جسمه ويتفقد نفسه زفر براحة:الحمدلله،،تغير وجهه وهو يذكر شي طالع ابوه،،حلفتك ياابو غازي
ابو غازي بفجعة وخوف على بتال:وش فيك ياولد؟!!
بتّال:سألتك بالله يبه تقول لي الصدق
ابو غازي بقلق واستعجال له:انطق علامك؟وش فيك؟!
بتّال بقلق واضح على وجهه:كنت بغيبوبة؟
ابو غازي لاشعوريا رفع يده وضربه ع كتفه بكل قوة من غبنته
ابو جواد داخل توسعت عيونه وهو يشوفه يضربه
بتال:اااه يبه
ابو غازي مسكه من اذنه بقوة وهو يشدها:ووجعاه يابتال
بتال مسك اذنه:يبه يبه أذني بتقطعها
ابو جواد فك بتال ووقف بينهم:حتى وهو تعبان مارحمته!!خاف الله يارجل!!
بتال مميل راْسه من ورا عمه ويناظر ابوه:تعبان يبه تعبان والرحمة واجبة للمريض
ابو غازي:اَي والله انك مريض صدق لكن بعقلك قم بس قم عني مافيك الا العافية ماله داعي التبطّح قم!!يالله!!،،خرج،،
ابو جواد طالعه:وش مسوي؟!أمداك تنضرب خاف الله بنفسك!!
بتّال كشر:شفت ابوي ضايق صدره قلت اوسع عليه
ابو جواد زفر:ماجاب لك الضرب الا هالخبال اللي تسويه
ابو غازي وهو يمشي بالممر تبسّم وبنفسه:دامك إتعبط الحمدلله
.........****..........
مـجـلـس الـشـيـخ
.........****..........
سعود جالس جنب جده بابتسامة يغيظ فيها الحاقدين
الجد بادي يناظرهم بنظرات كلها جلافة تتركهم يسكتون غصب وهم ماودهم يتهاوشون مع هالشايب اللي يدور المشاكل معهم دورة
مناور متوسط مجلسه بمكانه المعتاد تنهد:اول شي ياابو نشمي(الجد بادي)لازم تعرف انك من اكبرية القوم وهذا يفرض علينا نحترمك ونقدرك لكن هذا بعد مايعطيك الحق تغلط علينا وتهينا بمجلسنا وانت بعد منا!!
الجد بادي ميل فمه بسخرية:وثم؟!
مناور زفر وهو يشوف مافيه أمل يتعدل:اللي وصلنا له ان سعود غلط وغلطته كبيرة ولازم يتعذر من ابو هليّل
هلال جالس قبال سعود وجده ابتسم بثقة وهو يطالعهم ومبسوط وهو يحس انه كسر خشم سعود
سعود بحدة وهو يطالع هلال:معصي اتعذر منه!!
الجد بادي ابتسم من رد سعود
هلال وقف وبعصبية وهو يمشي له:وشو؟!ياقليل التربية والحيا؟!
مناور بحدة وقفت هلال:بـــس!!
هلال يطالع بادي وسعود وهو بينفجر من غيظه ورجع لمكانه
مناور بحدته:دام راكبك العناد ومامن نفس تدور للطيب اثر اعلمك ياسعود وش اللي رسينا عليه
سعود قطب جبينه بشك
الجد بادي يطالعه بنفس نظراته اللي ماتغير
مناور:مقاطع من المجالس والمخدوميات شهر ولسانك مايلامس لسان ادمي بهالديرة ابد واذا عدلت عن عنادك تعرف هالمجلس وبعد صلاة العشا والشرط أتعذّر من ابو هليّل
هلال بعصبية:ومحارمي؟!
ابو فارس(عم طلق):البنت لنا يابو هليّل
طلق اللي جالس جنب عمه التفت بصدمة عليه يطالعه
ابو فارس ضغط على يده يسكته
هلال يطالع سعود بقهر وهو يعض ع شفته
الجد بادي بجلافته:امحق مجالس ومخدوميات اللي تذلونا بهن!!
،،الكل يطالعه بصدمة،،
سعود ابتسم
مناور بحدة:احشم عمرك ابو نشمي!!
الجد بادي:وراك مافصلت بالحق؟!ولا ذكرت خويك ونسيت أساس الهوشة!!
مناور كشر بوجهه
الجد بادي وقف
سعود فز ورا جده
الجد بادي يأشر على هلال بمركوعه وهو يطالع مناور:ولد هالرجال يستاهل ماجاه وقليل بحقه لان حقه الجلد بشرع الله
هلال تغير وجهه
مناور:ياابو نشمي
الجد بادي رفع مركوعه بوجه مناور يسكته:وسعود ماغلط علمه مقدار كلامه وقليل بحقه بعد واذا على عاللي تسوونه بنا فماهو موازي شين من سواياكم اللي خابرين!!
مناور وقف وبحدة:الظاهر سكوتنا ماعاد خلاك تحشم احد ابد!!
الجد بادي قاطعه بابتسامة سخرية:وهليّل؟!!
مناور عض شفته مغبون منه
سعود ابتسم برضا
هليّل نزل راْسه
هلال يهتز بمكانه من القهر من سعود وجده
الجد بادي بنفس الابتسامة:وش علمه؟!
مناور بحدة:شهود يابادي مامن شهود
الجد بادي اللي هالمرة هو غطت ضحكته المجلس وسط ابتسامة سعود الساخرة من رد مناور:ايييه يامناور عوّدنا ياطيري اللي!!
مناور:وينهم شهودك ان هليّل قاله؟
الجد بادي التفت يطالع طلق وناصر
طلق وناصر صدوا بوجيههم يتحاشون نظراته
الجد بادي ميل فمه بسخرية منهم ثم طالع مناور وبحدة:ماراعيتوا الأولة وش ارجي بالتالية لكن اللي يتقّوى على أنيثية(تصغير أنثى يقصد انها ضعيفة)
هلال وقف وهو يقاطعها وبصراخ:اقضب لسانك والزم الحشيمة ولا ورب البيت ماعندها تفرق بشي يابادي!! 
الجد بادي بحدة وعيونه تنطق بشر:احشم اللي يستاهل الحشيمة ويحشمنا ويقدر الواجب ويعرفه ماهو مثلك،،وزع نظره عالكل،،وشرواك!!
هلال مشى له ناوي يضربه فاض كيله
مناور رفع يده يوقف هلال ويسكته بغبنة:نعرف الواجب ياابو نشمي ونـ
سعود قاطعه بضحكة طالعه من قلبه بصوت عالي
الجد بادي وهو يطالع مناور ثم مرر نظره عالباقين بتحدي:معصي ماتعرفونه ولاتدلون له طريق وعلمن ياصلكم ويتعداكم واحدن منكم يتعرضنا بكلمة نشرب دمه،،مشى بخطوات سريعة ولاترك لهم مجال يردون وهو يزيد اللي يكرهونهم كره اكثر وحقد عليهم،،
سعود مشى ورا جده وهو يوزع نظراته المختلطة بابتسامة سخرية عالجالسين وفقع قلوبهم اكثر
،،ثاروا اللي بالمجلس هالاهانات كيف ينسكت عنها والمفروض انه هالشايب وعياله يذلفون من الديرة وهم منبع الشر لكن وصلهم صوت غيث،،
غيث بابتسامة وهو يمرر السبحة بين يدينه:اكرموا الردي لاتكشّف رداه وأنتم هل الطيب ياديرتي!!ودواهم بالأيام بتمر النوايب وتشوفون وشلون يعودون يمنا ذليلين!!
.........****..........
السيارة
ابو جواد يسوق
ابو غازي بمكان الراكب جنبه
بتّال جالس ورا وكل شوي يفز ويتكي بين عمه وابوه ويناظر ابوه بتفكير وشك ثم يرجع مكانه وهو يكلم نفسه بصوت مسموع:لا لا ماظنتي صدق،،واستمر على هالوضع فترة،،
ابو غازي فاض كيله ومسك بتّال باذنه اول ماتكى بينهم:انطق وش تبي؟اقلقتنا؟!
بتال وهو يحط يده فوق يد ابوه:يبه يبه تعوذ من ابليس للحين مريض يبه
ابو غازي:اقلقتني انطق ولا بأمصعها(اقطعها)
بتال اختفت عباطته وناظر ابوه بجدية:يبه انت تركتني بيوم؟
ابو غازي قطب جبينه وهو يترك اذنه:لايكون رابطك معي بكل مكان اروح له وانا مدري!!
بتّال:لا يبه اقصد وانا صغير؟
أبو جواد تغير وجهه للثواني لكن رجع لوضعه بعد ماسمع كلام اخوه
ابو غازي:كل يوم!!
بتال توسعت عيونه
ابو غازي:عند امك
ابو جواد كتم ضحكته
بتال كشر بوجهه:يبه!!
ابو غازي طالعه بشك:ماانت بمضبوط الليلة؟
بتال ارتبك وأخفى ربكته اللي مافاتت ابوه ابد:اكيد ماني بمضبوط يبه!!واللي براسي وشو؟!!
.........****..........
بيت بادي
ابتعدت عباير وبخوت وحلايا عن الباب مسافة بسيطة وهم يسمعون الخطوات ويعرفونها زين
الجد بادي دف الباب بمركوعه وهو يزفر بغضب والباب ماانفتح لانه مسكر مو مردود كالعادة اذا خرج واحد منهم
بخوت فتحت الباب بسرعة
الجد بادي دخل
سعود دخل وراه
الجد بادي التفت عليه وضرب سعود بمركوعه على جنبه بقوة
بخوت وعباير وخلايا انفجعوا وخافوا
سعود غمض عين وحدة من الم الضربة ثم فتحها بسرعة وهو يأخذ نفس
الجد بادي رفع مركوعه مرة ثانية بيضربه
بخوت بخوف وهي تتقدم لهم:جدي
عباير مسكتها بيدها ترجعها جنبها وهي تناظرها بحدة
الجد بادي نزل مركوعه بعد مااستوعب وجود البنات وبحدة:كم مرة معلمك لاتنوي الشينة!!
سعود سكت
الجد بادي:سو اللي تبيه ماني برادك عن شين ابد الا الشينة ياسعود!!حد الله بيني وبين الذبح!!شرع الله يحكم وبأتلك من رقبتك واحطك تحت السيف بيديني لو تسويها!!
سعود:ماقصدت ياجدي كنت ابي كتفه بس
الجد بادي بعصبية:كتفه ثم بعدها ياقلبه ولا عروق رقبته ياسعود!!
سعود:لا ياجدي لا حد الله بيني وبين الكباير!!
الجد بادي بحدة:سعود اللي يذوقها مرة يعيدها مرات
سعود حب راس جده:وعد ياجدي لو يذبحوني ماذبحتهم وعد
الجد بادي زفر وهو يناظره مشى للغرفة ثم وقف والتفت عليهم وعينه على سعود:جرحك وشلونه؟
سعود ابتسم:مامن خلاف الحمدلله
الجد بادي:أدنى لي
سعود مشى له ووقف قباله
الجد بادي:اشوف
سعود حنى نفسه حتى يشوفه جده
الجد بادي وهو يضيق عيونه يشوف جرحه:رح للمستاصف خلهم يطببونك
سعود اعتدل بوقفته:أبشر
عباير بنفسها:وين هالمستوصف المفتوح الحين ياجدي
الجد دخل وهو يقول:ارقدوا ماابي اسمع حس،،قفل الباب وراه بقوة،،
سعود التفت عليهم
عباير بقهر:بشّر اخذت حقي ياسعود؟
بخوت توسعت عيونها من سؤال عباير
.........****..........
بيت عادل
ام غازي تروح وتجي عند الباب على أعصابها وجوالها بيدها تتصل فيه ويقفل بوجهها ماعاد تحملت خرجت من البيت وهي لابسة عبايتها ولافة الطرحة وراميتها على وجهها وطالعت العيال اللي ينظفون الحوش وبعصبية:غازي
،،كل الموجودين التفتوا لها،،
غازي جرى لها:سمي يمه
ام غازي وهي تمشي وهو وراها:مشينا لاخوك مشينا
غازي مسكها بيدها:يمه
ام غازي التفتت له وبعصبية وهي تسحب يدها:ماانت موديني فيه جسّار واذا عييتوا كلكم مشيت بتكسي مو محتاجة لكم،،مشت،،
غازي مسكها مرة ثانية:اعقب مااوديك ياالغالية لكن شوفينا زين يمه دققي النظر
ام غازي كشرت بوجهها:ماهو بوقت حركاتك غويزي
غازي:حبيبتي امي كلنا خايفين عليه مثلك وابوي وتعرفينه
ام غازي:ماعلي من ابوك ابوك ماعليه من احد وابسوي فيه مثله امش بس امش،،مشت لسيارة غازي،،
غازي:يمه بتال طيب لاتخافين
ام غازي التفتت له:كلمته وشلونه وش قالوا وش فيه
غازي باس راسها يطمنها:ماعليه طيب لكن ماكلمته
ام غازي ضربته على كتفه:يالكذوب ماابي منك شي اذلف عني،،نادت،،جسّار تعال ياجسّار
غازي:يمه حبيبتي شوفي فيصل
ام غازي ناظرت فيصل واستغربت وضعه
فيصل واقف عند النخل مصلّب
ام غازي:وش فيه فيصل لايكون انهبل!!
غازي ابتسم:يمه ابوي اتصل على جوالي وكلم فيصل قبل نص ساعة وهذا هو من كلمه ابوي على وضعه ذَا عرفتي ليش اقولك بتال طيب
،،انفتح باب البيت الكبير ودخلت سيارة ابو جواد معه،،
بتال مخرج جسمه من قزاز السيارة وبابتسامة شاقة وجهه:حلفت عليكم تتركون الرشاشات حلفت مايحتاج والله!!
غازي ابتسم وهو يشوفه سلم على راسها وحط يده على كتف امه:قرت عينك ياام غازي الحمدلله على سلامة ولدك
ام غازي ارتاحت وهي تغالب دموعها:الله يسلمك ياولدي الله يسلمك
بتال شهق دخل السيارة بسرعة
،،وقفت سيارة عمه بقوة وسط استغراب الكل،،
بتال:طالبك يامسفر عليك وجه الله ماتردني خايب طالبك!!
ابو جواد ابتسم
ابو غازي توسعت عيونه:اعقب ماتستحي!!عمك ياولد!!
بتال طنش ابوه وكمل:والله لو بيدي جدعت(رميت)هالشاش وأنا أنخاك واعتزي فيك بس انت خابر الفلقة!!
ابو غازي منجلط من حركاته:إبتيل!!
ابو جواد بابتسامته طالع ابو غازي:وانت من داس لك على طرف هو نخاني انا!!جاك يابتال أبشر 
بتال مسك يد عمه
ابو جواد للحين ماسك الدريكسون بيده الثانية ولا التفت يطالعه
بتال بترجي:تكفى عمي تكفى حط فيني النون ومايعلمون خلني اتغلى شوي
ابو غازي:فالك ماقبلناه ياقليل الخاتمة تبي العلل لروح!!
بتال التفت يطالع ابوه بزعل من فوق لتحت بنظرة سريعة
ابو غازي توسعت عيونه
بتال برجا وهو يضغط على يد عمه اكثر:عمي تكفى
ابو جواد كمل الطريق لموقف سيارته:ماني بحاط فيك علل خل عنك بس!!
بتال بزعل:عمي!!
ابو غازي ابتسم:انكعم لااسمع لك صوت يالمريض
بتال بزعله:افااا يامسفر ماهقيتها منك والله!!خيبت ظنوني!!هاذي نهاية جدعت الشاش!!،،وهو يهز راْسه يمين ويسار بزعله،،افااا افاااا
ابو غازي قطب جبينه بشك وهو يطالعه
ابو جواد:مو بأنا اللي اردك وانا عمك أبشر جاك!!
بتال ابتسم بوناسة
ابو جواد:لكن ماهو على هواك معك بس الليلة بقولهم شيٍ بسيط!!
بتال برجا:تكفى عمي
ابو جواد:اجل مافيه
بتال:خلاص خلاص رضينا،،زفر،،رضينا بالمر والمر مارضى فينا
ابو غازي وهو يفتح الباب بينزل:قل المثل صح ثم اندب حظك ياالخبل!!
.
.
.