ياسمح المحيا جر الهجينية

٨٣

    ،،الـجـزء الـثـالـث والـثـمـانـيـن،،
لااله الا الله العظيم الحليم،لااله الا الله رب العرش العظيم،،لااله الا الله رب السموات ورب الارض ورب العرش الكريم،،
.
.
.........****..........
     يوم جديد
.........****..........
.
..المستشفى..
ابو غازي داخل للمستشفى بوجه واضح عليه الفجعة وبخطوات سريعة وهو يحس رجوله ترجف مابتطول وهي ساندته من هول الخبر وقف قبال الريسبشن وبصوته الراجف بوضوح:بتال بتال فاهد وينه؟
بتال داخل للمستشفى لدوامه قطب جبينه باستغراب وهو يطالع القفا بشك من وجوده اسرع بخطواته وهو يوقف جنبه وتأكد وبقلق وهو يطالع ملامحه:يبه!!
ابو غازي التفت وانصدم من وجوده:بتال!!!
بتال بقلق وهو يطالعه:وش فيك يبه عـسـى ماشر؟
ابو غازي جلس عالارض وهو ماتحملت الضغط اكثر
بتال جلس جنبه بفجعته:يبه وش صاير وش فيه!!
ابو غازي همس وهو ياخذ انفاسه:اصبر اصبر شوي
،،بعد فترة راحة لابو غازي،،
بتال جالس جنبه بيموت من القلق رغم انه تأكد من وضع ابوه مع الدكتور
ابو غازي كل شوي يطالعه بنظراته
بتال ملاحظ هالنظرات:يبه قولي وش فيك وش اللي صار لك قبل شوي؟
ابو غازي وهو يوقف:مافيني شي مافيني
بتال وقف جنب ابوه يمسك يده يسنده وهو للحين ماارتاح
ابو غازي التفت له وارتفع حاجبه وهو يطالعه وسحب يده
بتال رجع ومسكه بعناد
ابو غازي زفر وهو مافيه حيل يتهاوش معه طالع قدامه:جدك وينه؟
بتال:جدي جا معي يشيك على سكره وضغطه
ابو غازي قطب جبينه وهو يطالعه:وتقول ماتعرفنا ولاتبينا!!
بتال:والله لو قلبي حجر واشوف ابوي مريض يتفتت هالقلب يبه من خوفه
ابو غازي سحب يده منه:قولي وين مكان جدك ورح انت لشغلك
بتال:بس يبه
ابو غازي:اخلص علي
.
..بيت هلال..
هليل واقف قبال دولابه هو واخوانه بكامل كشخته ثوب وشماغ وكبك كأن اليوم عرسه فتح دولابه وهو يرش من عطره ورجعه لمكانه وقفل الدولاب خرج من الغرفة وابتسم وهو يطالع امه:صباح الخير
ام هليل مجهزة المبخرة وجالسة بالحوش تنتظره وقفت وهي تشيل المبخرة وتتجه له:ياصباح النور والسرور
هليل وقف قبالها وهو يسلم على راسه ويدها
ام هليل بابتسامة وهي تبخره:ماشاء الله ماشاء الله وش هالزين وش هالزين ابشر بالعروس وانا امك
هليل ابتسم:العوض بإخواني يااميمتي
ام هليل كشرت بزعل:وانت وش ينقصك!!احسن بنات الديرة يريدنك ياعين امك
هليل سلم على راسها
ام هليل:الله يرضى عليك الله يرضى عليك
هليل مسك كفاها وطبع بوسة عميقة وهو يكبح عبرته وطالعها:راضية علي يمه؟
ام هليل:ماعمرك اذيتني وانا امك راضية وكاد
هليل سلم على راسها وبرجفة صوته:اجل اوادعش وانا متريح؟
ام هليل قطبت جبينها بقلق:علامك ياهليّل علامك؟
هليل:غادين يم المركز يمّه
ام هليل:وثمن؟
هليل:البارحة يمّه ذبحت غيث
ام هليل طاحت المبخرة من يدها
هليل طاحت دموعه:يااميمتي اخذت حق شامة منه يعلم الله يااميمتي هو راس البلا احرمنا منها ليت ربي احرمنا منه من اوله يايمه
ام هليل انفجرت تبكي وهي تمسك يده وتجري به للباب:لاتغدي يم المركز هج وانا امك محدن خبر هج
هليل مسك يدها:وقليبي يمه وش يفكه لاهجيت؟ماعادني مثل اول ماعاد اقوى يمه شامة توفت وهي مغتاظة علي طعنة بصدري يمه تشويني شوي
ام هليل بدموعها:ماعليك انت اغد وثمن نراعي لنا دبرة
هليل هز راسه بلا:لا يمه لا لاتغدين مثله اهله واغدي عليكم مثله يايمه
ام هليل انفجرت تبكي بحسرة وهي تشوف عناده:ياحسرة قلبي ياحسرتي
هليل ضمها:حلليني يمه حلليني
ام هليل تبكي بحضنه بحرقة قلبها:ليش عملت هاللون ليش ليش
هليل بكى:حلليني يمه وبيحيني طلبتش
.
..بيت بادي..
عباير تمشي باتجاه الباب اللي غطى صوت الضرب عليه المكان:لافيتك لافيتك عوذا مابك صبر،،اعتلى الصوت اكثر وشهقت وهي توسع عيونها وبنرفزة وهي تفتح الباب،،لافيتن يمك ماتوحي!!
بخوت واقفة قبالها دخلت وهي ترفع نقابها لفوق راسها بدون لاتنطق حرف
عباير رمشت وهي تطالعها تدخل لداخل البيت باستغراب
حلايا واقفة عالباب وهي متكتفة وبتكشيرة وسط كلامها الطفولي:ماردت(مابغيت)ألفي يمش مير انغصبت
عباير اتسعت عيونها بصدمة من اللي تسمعه
حلايا صدت بوجهها عن عباير وهي تدخل للبيت واتجهت لغرفة جدها
عباير زفرت وهي تقفل الباب ومشت باتجاه غرفتها وهي متجاهلة وجود بخوت نهائيا
بخوت بغبنة:بتكبيني وراش!!
عباير التفتت تطالعها بتكشيرة:راعية بيت ماله لزوم اضيفش الا اذا انش تراعين روحش من الضيفان،،كملت طريقها لغرفتها اللي تفصل بينهم خطوات بسيطة،،
بخوت زفرت وهي تتعوذ من الشيطان بينها وبين نفسها وبهدوء:عباير
عباير رفعت راسها لفوق وهي تكتم نرفزتها:استغفر الله العظيم،،التفتت لها بابتسامة وهي تكتم غيظها،،ها يالبيه سمي وش تريدين يابخوت؟
بخوت بعتاب:اخطيتي وبالحيل ياعباير
عباير بحدة وهي تلف بجسمها كله لها وتطالعها:ماأوجست غير الصحيح
بخوت:مير اوجعتي قليب خيتش حتى لو انه صحيح!!
عباير:وانتي ماضربتي لاحد منا وجس وعملتي ماتريدين
بخوت:ويوم اني اخطي تردين الخطا بخطاين مثله!!
عباير سكتت وهي ماتبي تغلط بالكلام
بخوت بغصتها:وشلون هنت لش نومة وانا وانتي مغتاظين من بعضنا!!
عباير:غبنتيني شبّيت من الغبينة كل ماعملناه غدا بليّا فود(بدون فايدة)
بخوت:وانتي خابرة وشو له عملت ماعملته ياعباير
عباير بعناد:اجل مالش حقن تلوميني وانت خابرة وشو له عملت ماعملته
بخوت زفرت وهي تطالع عنادها ومافي اي امل تعذر لها فعلتها:بنت ياحلايا غدينا يابنت اعجلي علي
حلايا خرجت من الغرفة واخفت ابتسامتها وهي ترسم الزعل وعينها على عباير ومشت باتجاه امها
بخوت مشت باتجاه الباب
عباير مشت كم خطوة ووقفت قبال باب غرفتها ومدت يدها ليد الباب بتفتحه
بخوت رفعت صوتها:لفيت يمش اريد اوجس يمش علمن مضيقن خاطري
عباير قطبت جبينها وهي تلفت لها
بخوت:اريد اوجس يمش علم طلاقي من جسّار وشلون اعمل به لاغدا هالعلم
عباير اتسعت عيونها واسرعت بخطواتها لبخوت
بخوت وقفت قبال الباب وهي ترفع يدها لفوق راسها تنزل نقابها تجمعت دموعها بعيونها بقلة حيلة وهي تشوفهم يقفلون الباب بوجهها واحد واحد:مير ماانتي برايدتن تعذريني ولا توحين لي وجس،،مدت يدها بتفتح الباب،،
عباير مسكت يدها وهي تلفها لها بقوة وبعصبية؛وش هالعلم!!انخبلتي انتي لاعز الله انخبلتي!!
بخوت وهي تكبح هالدموع:ماانخبلت ابدن ماانخبلت مير انتم ماتراعون ماارعيه ابد ابدن
.
..المستشفى..
الجد نشمي خارج من المستشفى وهو يتجه للمواقف
ابو غازي واقف على بوابة المستشفى بتكشيرة
الجد نشمي:وشلونك ياعادل
ابو غازي بغبنة:وشلوني!!زين ماصار لـي حادث وانا جاي
الجد نشمي بابتسامة:زين زين الحمدلله عالسلامة
ابو غازي:وش هالكذب يبه؟انت من جهة وامي من جهة!!مايصير!!
الجد نشمي:زين اجل امك بعد مهاوشتك
ابو غازي:ماهو بالغصب يبه
الجد نشمي:واللي انت تسويه ماهو غصب ياعادل!!
ابو غازي بحدة:مارديته ابد!!
الجد نشمي:علمني يــوم علمتك انه مات وقضى وش صابك وش طرا لك؟
ابو غازي كشر:يبه انت تدري ان اخس شي على وجه الارض عندي الكذب
الجد نشمي ابتسم وهو يشوفه رده اللي مايمت بصلة لسؤاله:اوح العلم ياعادل الليلة بنغدي يم بتال مابي شدة عالقطيعة وان مالفيت
ابو غازي كشر:ماتبي تشوفني؟!!
الجد نشمي:زين اجل امك موجسته يمك من اول اقدت منيرة بيض الله وجهها
ابو غازي:ظلم يبه ظلم
الجد نشمي:محد اوجس يمك ريده(حبه)!!،،مشى،،اغد قدامي اغد بس يم البيت
ابو غازي بحدة وهو واقف بمكانه:هماك زعلان!!
الجد نشمي:اغدي بالبيت ثمن يبدا غيظي مير اغد قدامي ذالحين ولايكثر
.
.........****..........
         العصر
.........****..........
.
..بيت جسّار..
جسّار راجع من دوامه بتعب فظيع واليوم اول يوم دوام بعد اللي صار له دخل للبيت وقطب جبينه وهو يحسه هادي بزيادة عن هدوءه المعتاد كمل طريقه وهو مقطب جبينه مو مرتاح اتجه للمطبخ ولا فيه احد اتجه لغرفة الحريم مافيه احد طار تعبه وتبخر بلحظة وهو خايف ومتوتر اسرع بخطواته لغرفة النوم وفتحه بقوة وسط انفاسه السريعة اخذ نفس براحة وهو يطالعها ثم كشر بوجهه
بخوت جالسة عالسرير عبايتها جنبها وشنطة أغراضها جاهزة وقفت وهي تبتسم وهي تبلع عبرتها:اوجست احتريك كود تغدي بي يم اهلي 
جسّار تنهد بضيق:يعني خلاص نويتيها بيننا؟
بخوت عطته قفاها وهي تنحني وتسحب عبايتها بتلبسها وتتحاشى تطالعه بخوف انها تنفجر وتعترف باللي بقلبها له:مير السموحة منك اثقلت عليك وانت لذالحين دوبك بروحك
جسّار دخل للغرفة ووقف وراها وهو يحاوط خصرها ويضمها لحضنه ودفت طرف دقنه بكتفها وبضيقة:وأهون عليك يابخوت!!تروحين وتتركيني
بخوت حبست دموعها وبرجفة صوتها:صدك ياجسار سدني وخبرت وش اللي تريدني اخبره
جسّار تركها وهو يلفها له
بخوت نزلت نظرها للارض وهي ماتبي دموعها تفضحها رغم انها مفضوحة من الاساس
جسّار مسك يدها:زعلت يابخوت زعلت منك ماقدرت ماازعل
بخوت رفعت عيونها له وطاحت هالكم دمعة المتجمعة وسالت على خدودها:وش تريدني اعمل ياجسار كودكم قوايا(اقوياء)أنا أذل(تخاف)حيلتي انتم اذل عليكم حتى من روحي والله لو يغدي بكم شين ان يطير قلبي من مكانه وافطس(اموت)محلي ياجسار بوقتها
جسّار:بسم الله عليك وش هالكلام!!
بخوت ضغطت على يده:وانتم تلوموني تلوموني لاني مااخبر غير هالدرب ذي حيلتي امنع عنكم الصرايم بهاللون،،بكت بشهقاتها،،كل مامر اخويطري وجهك وانت ناقعن بدمك قدامي يفز قلبي من محله ياجسار هالنوبة سلمت النوبة اللي عقبها وش يفكك منه وش يفكنا منه
جسّار ضمها لحضنه:يخسي يسري شي مرة ثانية صادفت معه الاولى بس لكن يحلم يعيدها ويسلم يحلم!!
بخوت ضمته لصدرها بقوة وهي تبي تحميه بكل مافيها وبدموعها:وتريدني احتري النوبة الثانية ياجسار اموت والله اموت ماعاد بي حيل عليه أرده هدني هدني ياجسار الله يهدّه بالاول حلايا وذالحين انت مااقوى هالوجع مااقواه
جسّار عض شفته بقهر كيف قسى عليها وهو يدري بخوفها من غيث ومن يكون غيث بالنسبة لها
بخوت بكت:والله ماخبرت غير هاللون اعمله مابيدي شين اعمله ولمنعه عنكم ياجسار مابيدي شين يعلم الله!!
جسّار باس جبينها وهو يمسح على ظهرها:خلاص يابخوت خلاص لاتبكين خلاص
بخوت زادت ببكاها وهي تسمع كلامه
.
..السيارة..
بتال قرب من البيت وقطب جبينه باستغراب
وهو يطالع السيارات اللي يعرفها زين واقفة قبال بيته هدا بسرعته وهو يحاول يتفحص بنظره ويلقط وش اللي يصير لكن ماقدر ولابيقدر اصلا وقف بسيارته وهو ياخذ نفس ونزل ووقف وهو يكبح ابتسامة فرحته لاتعتلي وجهه وتفضحه
،،فرشتين متوازيتين وبينهم مسافة متر وكل فرشة وقبالها دلتها وعدتها ابو غازي والجد بادي على فرشة والجد نشمي وفاهد على فرشة ثانية وسعود قبالهم عند مشب بتال يتقهوى لحاله،،
الجد نشمي يطالعه بابتسامة وكأنه يقوله كلامي وصار
فاهد يطالع بتال بابتسامة وهو مبسوط انه واخيرا يلتقي بولده بدون اَي حاجز بينهم
الجد بادي جالس بتكشيرة
ابو غازي بتكشيرة:قليل الحيا مايسلم!!
بتال اتجه لسعود وهو يتصنع الثقل وعطاهم ظهره وهو قبال سعود وعلى وجهه اعرض ابتسامة وبحماس:وش فيه وش اللي صاير؟
سعود:ابدن طال عمرك اللي تراعيه هماك تريدهم قدامك منكعمين هه راعهم
بتال جلس وهو بيطير من فرحته:بموت ماني مصدق مد يده لسعود وهو يقرصه بكل قوته
سعود بوسع عيونه:اااااه!!!
بتال بابتسامة:والله صدق
الجد نشمي:ولد يابتال
بتال فز وجرى لهم وبابتسامة:سم ياجد
الجد نشمي:والحين اللي تبيه وصار وش اللي بعده
بتال بابتسامة:اللي بعده ياعسى أعماركم طويلة وياعساكم فوق راسي طول عمري،،اتجه لابوه عادل وهو يسلم على راسه ويده ثم الجد بادي ثم الجد نشمي واخيرا فاهد اللي سلم عليه مثل الباقين بدون زيادة او نقصان،،
.
.
.
واخيرا بنهاية اليوم انتشر الخبر المشؤوم خبر هليل وفعلته بغيث وتناقلوه الناس بهالديرة اللي مايخفى عليهم خافي وانقلبت الأمور بهاليوم و بهالديرة فوق لتحت وتغيرت موازين الأمور
.
.
.
.........****..........
   ،،بعد شهر،،
.........****..........
أم جـلاجـل
.
..بيت هلال..
،،الكل مجتمع بالحوش اخوان هليل واخواته وامه بجو كله كآبة وضيقة وعيون تذرف دموع،،
ابو هليل دخل لبيته بوجه كاسيه السواد يجر خطواته بهمه
ام هليل فزت واقفة وبدموعها اللي ماوقفت على ولدها من شهر:بشر ياهلال بشر عفى مناور؟
ابو هليل طالعها:ادعي له بالرحمة ياعتيقة ادعي له
،،اعتلى البيت صوت البكا المكتوم من فترة وهم ينتظرون الخبر بأمل لكن خابت امالهم،،
ام هليل انهارت عالارض بصراخ وهي تنوح على ولدها:اويل حالش ياعتيقة غدا هليل ياعتيقة غدا،غدا يم شامة غدا اويل قلبي على عييلي اويله
ابو هليل برجفة صوته وهو يحبس دموعه:لموا مليبيساتكم(ملابسكم)واتبعوني يم السيارة احتريكم غدينا من هالديرة مالنا به ماوراها غير الصرايم غدينا،،خرج،،
.
..بيت مناور..
،،ام غيث وبناتها وحتى هدية عندهم ينتظرون بنفس انتظار اهل هليل بنفس الجو الكئيب رغم اختلاف النية ماعدا نايفة اللي تتمنى العكس من كثر تأنيب ضميرها،،
مناور دخل ووجهه ينطق حزن وندم
ام غيث فزت له تجري ووقفت قباله وبغبنتها:علمني وش عملت علمني اعجل
مناور بضيقة:قصوه ياصيفة قصوه
،،البنات ضـاقـت خواطرهم رغم ان البعض كان وده بهالشي،،
ام غيث بابتسامة عريضة وفرح رغم دموعها اللي مستمرة تهل:الله اكبر الله اكبر،، زغرطت بصوت عالي غطى المكان وتردد صداه بفرحة،،
غيثة وقفت جنب امها وهي تسلم عليها
مناور احتدت نظرته وهو يطالعها
غيثة:هنيش يمه هنيش برد قليبش برد
ام غيث بابتسامة:علامش يابنت لذالحين ماتولمتي شوين غادين رجلش يمّنا ياخذش
غيثة كشرت:يمه كبيه يوم ثاني مايصلح الليلة
ام غيث الا الفرحة فرحتين غيث واختلصنا له(اخذنا حقه)وانتي بتغدين عروس،،زغرطت وثم ضحكت وهي للحين بوسط دموعها،،
مناور بتكشيرته وهو يطالعها:اوحيتي امش الليلة رجلش غادين ياخذش،،خرج،،
ام غيث اختفت ابتسامتها وجلست وهي منهارة من البكى على ولدها
نايفة طالعت امها:يمّه
ام غيث رفعت عيونها لها بوسط دموعها
نايفة:وشامة يمه من ياخذ حقها 
ام غيث بحدة:انكعمي يانايفة انكعمي
نايفة مدت يدها لامها:راعيها يمّه وراش اتوبعش من اربع ايام!!
ام غيث شحب وجهها بفجعة وهي تطالعها
.
.........****..........
        العصر
.........****..........
.
،،اليوم زواج بتال وعباير،،
،،الزواج عشا عائلي بسيط بدون اَي معازيم فقط الأهل ومكانه بيت بادي،،
..بيت الشلة قديمًا..
بتال متربع عالارض وهو ناسف شماغه على راسه وحاط البشت على أكتافه
جسّار جالس قباله يتغدا معه طالعه بتكشيرة من فوق لتحت:ندري انك العريس افصخه لاتبقى فيه ريحة الغدا!!
ام غازي جالسة عندهم تقطع لهم فاكهة:اتركه ياكل وش عليك منه!!
بتال ابتسم:غيران؟عادي خذ الثانية
غازي متمدد بعيد ضحك:لاتسمعك بخوت تذبحك قبل تذبحه
بتال بابتسامة:ماتقدر وراي ظهر الحين
امجاد خرجت من الغرفة واتسعت عيونها وهي تطالع امها:يمّه!!للحين ماااستشورتي تعالي مابقي وقت
ام غازي:من كبره هالعرس عاد
جسّار اللي يشرب موية نفثها بوجه بتال
بتال كشر وهو يمسح وجهه:الله يقرفك بالرخص
امجاد وقفت عندها وانحنت وهي تقومها:والله لو بس احنا تقومين تتجهزين بدري يمّه قومي
بتال طالع امه وبزعل:يمه مابتكشخين بزواجي!!
ام غازي:باكشخ باكشخ وانا امك بس اختك مستعجلة مدري وش فيها
بتال:ايه محد يبيني انا ولا احد يبي فرحتي
غازي مد رجله وهو يدف بتال
بتال مال شوي على جنب وهو يطالعه بتكشيرة
غازي بتكشيرة:ياشينك والله
بتال بنرفزة:وانت وش دخلك!!
ام غازي وقفت:تغدوا زين هاه محد فاضي لنقنقاتكم شوي،،مشت،،
ابو غازي خرج من الغرفة واتجه لهم:هاه جهزت؟
بتال فز واقف:جاهز يبه بس اغسل،،اتجه للمغسلة وغسل وهو يوقف عند ابوه،،
ابو غازي رفع العطر اللي بيده:هذا،،سكت وهو يطالع اللي داخل ورا فيصل بتكشيرة،،
فيصل دخل للبيت:حياك ياخال حياك
فاهد دخل ورا فيصل:الله يسلمك ويبقيك،،ابتسم وهو يطالع بتال اللي واقف ببشته،،السلام عليكم
غازي وجسار وقفوا
ابو غازي صد بوجهه
فاهد سلم عليهم
بتال اتجه له وسلم عليه بابتسامة
فاهد:ماشاء الله ماشاء الله مبروك ياابوك مبروك الله يوفقك ويسعدك
ابو غازي وهو مايطالعهم:ولد يابتال
بتال رجع له:سم يبه
ابو غازي رفع العطر:خذ تعطر الليلة من ذا
فاهد رفع الكيس اللي بيده بابتسامة:جايب معي عودة مخصوص لزواجك
بتال بلع ريقه وهو يمرر نظره بينهم بورطة
جسّار واقف جنب غازي وهمس:ياولد احتريت الحمدلله ماني مكانه
غازي همس:ماينلام يوم خلا زواجه كذا والله
ام غازي وقفت قبال بتال وهي تطالع وجهه المخطوف وبيدها المبخرة:لا عطرك ولاعودته
بتال كتم ابتسامته وهو يحمد ربه ان امه تدخلت
ام غازي وهي تبحر بتال:كل واحد جاب له شي لعرسه بحوره وعطره علي محد له كلمة عليه سمعتوا
فاهد ابتسم:زين زين
ابو غازي تنحنح وهو يرفع حاجبه:خذه لك هالعطر جايبة لك من الاول
بتال اتجه لابوه(عادل)وسلم على راسه:مشكور يبه مشكور يكثر خيرك
ابو غازي مشى راجع للغرفة:شغلوا السماعات وش فيكم هاجدين على غير العادة
،،الكل يطالعه منصدم،،
بتال همس:يمه ابوي وش فيه!!
ام غازي ابتسمت؛مافيه شي مافيه شي
.
..بيت بادي..
مزون تحط بها المكياج زفرت بطفش منها:وبعدين معك وبعدين!!
عباير تنهدت:عطيني اياه انا اخبر منش بروحي
مزون:لا والله!!حتى كحلتش تغدي بطول خط الديرة خابرتش انا!!مير انثبري وكبيني ازينه!!بخوت لاتهزينها واجد أبلشتني وانتي زدتيها!!
بخوت ورا عباير تفير اخر خصلها:خلاص اخر شين خلاص،،تركت الشعر وهي خلصتها ووقفت،،اعجلي يامزون ورانا ضيفان
مزون بعصبية:هو برايي هالبلوى علتني ماتكبني اعمل شين!!
عباير بنرفزة:تراني صابرة ومنكعمة عنش من اليوم لاتحديني اخطي عليش!!
مزون:حلفت عليش ذليت ذالحين غمضي غمضي وخليني اقضي محدن موخرني غيرش
عباير غمضت:تحمدي ربش انش خويتين لي ولا كان به علوم
مزون بتكشيرتها:اوص بس اوص غمضي وسدي حلقش عني
.
.........****..........
       الليل
.........****..........
.
..بالسيارة..
هيفاء رافعة نقابها عن وجهها تطالع لقدام ساكتة وهي تحبس دموعها
راشد بابتسامة وهو يسوق:الله ياهيوفتي الله لو نعيد زواجنا
هيفاء برجفة صوتها:وشو له؟!!
راشد:يعني ماودك نعيده ابد
هيفاء بكت
راشد انفجع:وش فيك!!تعبانة يوجعك شي
هيفاء ماردت
راشد وقف بالسيارة على جنب الطريق وبخوف وهو يلف عليها كله يطالعها:وش فيك؟!!
هيفاء:مابي شين
راشد:ليش تبكين طيب؟
هيفاء سكتت
راشد زفر:نفسية الحمل؟
هيفاء هزت راسها بلا
راشد:ماني بمتحرك الى ماتقولين وش فيك حتى لو مانحضر الزواج الليلة
هيفاء وهي تبلع غصتها؛عتقى
راشد رجع بظهره للمقعدة:لااله الا الله!!وش فيها؟
هيفاء بدموعها:ذا النوبة بدال مااني اراعيها بالشبك اراعيها بصحن المفطح وسط الضيفان،،بكت،،
راشد انفجر يضحك
هيفاء طالعته بحقد وسط دموعها:ايه تستأهله هذا جزاتي اتضحك علي
راشد:احلى كبسة حاشي يحبها قلبك الليلة لاتفوتك ذوقيها
هيفاء ببكى:وشلون تريديني اتطاعم(اذوق)خويتي عوذا من قليبك عوذا،،صدت بوجهها عنه وهي تحاول توقف بكاها،،
راشد بابتسامة:هيفاء
هيفاء ماطالعته
راشد تنهد؛وانتي مصدقة اني باذبحها بعد ماشفت وجهك ذاك اليوم
هيفاء طالعته بسرعة
راشد:والله مابقلبي رحمة اذا ذبحتها بعد ماشفت وجهك
هيفاء بعدم تصديق:صحيح ياراشد عتقى مابها خلاف؟
راشد:مااخذتها بالشبك شريت من عمي غيرها
هيفاء ابتسمت بفرحة:صحيح عليك الله صحيح؟
راشد فرح من فرحتها:صحيح الصحيح
هيفاء مدت يديها له وهي تمسك وجهه وتقربه منها وباسته على خده بقوة
راشد ضحك
هيفاء طالعته ووجهه بين يديها للحين وبابتسامتها:مشكور مشكور ياعيني الله لايخليني منك
راشد:العفو وآمين بس ماابيها كذا
هيفاء باسته على شفته وتركته وهي تنزل نقابها بسرعة على وجهها وتطالع قدام
راشد تنهد برضا:يعني ولو انها ماتسوى شي جنب جميلي بس يالله مقبولة ماعليه
هيفاء التفتت له تطالعه:هاه!!
راشد بابتسامة:كل يوم مثلها ولا عتقى عالمصلخ
هيفاء؛تروعني انت!!
راشد ضحك:اي والله أروعك وش وراي انا!!
.
..بيت بتال الجديد..
سعود دخل بابتسامته ووراه بتال:يالله ان تحييه ياحيّه
بتال اخذ نفس وهو يهدي نبضات قلبه وكيف مايتوفر وهو بيقابل عروسته الليلة قطب جبينه:هو بيتي من يرحب بالثاني انا ولا انت!!
سعود ضحك:صحيح!!صدقت
بتال بابتسامة:ماعليه كلنا واحد
سعود وقف وهو يطالع حلايا واقفة برا الغرفة اسرع له بخطواته وباستغراب:حلايا علامك لحالك هنيا!!
حلايا بفستانها الابيض:مابي شين احتريكم
سعود:وينها امش؟
حلايا رفعت اكتافها لفوق بمعنى ماادري 
سعود قطب جبينه بشك من وجودها برا لحالها:لفيتي بروحش!!!
حلايا هزت راسها بايع وسط ابتسامتها
سعود اتسعت عيونه:ليش!!الحين امش تنخبل عليش!!
حلايا كشرت:كبيرة انا!!
سعود:كبرت حبتش اَي والله(دعوة معناها تحقيق الطموح)علميني به احدن يم عباير؟
حلايا هزت راسه بلا
سعود مد يده ليفتح الباب
بتال مسك يده:لاتصدق هالنتفة تراها نكبة
حلايا كشرت وهي تطالعه:مابه احدن داخل غير امك واختتينك وعباير
بتال:شفت قلت لك نكبة
حلايا بزعل:والله لاعلم زسار
بتال:علميه،،مد لسانه لها،،
حلايا حبست دموعها
بتال انحنى لها:امزح امزح لاتصيحين
حلايا تطالعه بتكشيرة:بعاير بتغدي بها خلاص مانراعيها؟
بتال باستغراب:كيف يعني؟
سعود:من اوجس هالعلم
حلايا:هو اخذها معه مانراعيها بعدين؟
بتال ضحك؛ايه باخذها وأروح
حلايا بكت
سعود:لاااااله الا الله!!بتال!!
بتال مسك يدها وبابتسامة:ياخذها ونروح نشتري لك لعبة ونجيكم ببيتكم
حلايا:صحيح؟مابتغدون بعيد؟
بتال:لا هذا بيتنا متى ماتبين تعالي
الجد بادي دخل:السلام عليكم
بتال وسعود التفتوا له وردوا السلام
الجد بادي:علامكم لذالحين في ذا!!
سعود:ابدن نحتريك ياجد
عباير داخل الغرفة جالسة عالكنبة بفستانها الابيض باكمامه الطويلة وطرحتها الدانتيل المثبتة تحت اكسسوار شعرها الناعم اللي مثبت ورا البف البسيط وشعرها المفير المسدول على ظهرها بحلق ناعم وعقد يزين نحرها بمكياجها الناعم تسولف مع بخوت ورهايف اللي واقفين جنبها بعباياتهم وتضحك عادي
الجدة منيرة جالسة جنب عباير التفتت لام غازي اللي جنبها:وش فيهم تاخروا؟تركنا معازيمنا
ام غازي واقفة جنبها:ماعليك عذبة فيه ماتقصر وهيفاء جاية اكيد وصلت ياعمة،،التفتت لأمجاد اللي واقفة جنبها وهمست لها،،ماشاء الله يازوجة اخوك مرتاحة
امجاد بهمس:يوه يمه نسيتي رهايف!!كانت مثلها
ام غازي:لااا وين
امجاد:والله نفس عباير الحين واول ماقالوا جواد بيدخل،،بضحكة،،رهايف نشف دمها
الجد بادي تنحنح وهو يمد يده لباب الغرفة ويفتحه:ياعرب
عباير تغير وجهها
امجاد ابتسم وهي تهمس لامها:شفتي!!
ام غازي ضحكت بخفة
بخوت:حياك ياجد حياك مابه احد
الجد بادي طالعهم:اصبروا شوي،،دخل وحلايا معه،،السلام عليكم
بخوت بابتسامة:وعليكم السلام والرحمة حياك ياجد حياك،،اشرت لحلايا  تروح لها ووقفت حلايا عندها،،
الجد بادي ابتسم وهو يطالع عباير وتقدم لها
عباير وقفت
الجد بادي سلم عليها:مبروك يابنتي مبروك
عباير همست:الله يبارك فيك ياجدي
الجد بادي:سعود ياسعود أقلطوا حيكم
سعود دخل وهو منزل راسه:السلام عليكم
بتال وراه:السلام عليكم
عباير نزلت عينها عالارض وقشعر جسمها من وصلها صوت اللي متعودة عليه لكن هالمرة وصلها غير وصل لها وهو زوجها حلالها وهي حلاله
ام غازي والجدة منيرة زغرطوا بفرح اول مادخل وغنت الجدة؛باركوا له عسى عمره طويل وافرحوا له هذا غاية مناه..
رهايف تشققت من الحماس لكن كابحة نفسها من كثر تهديدات جواد لها مايبي صوتها يـطـلـع ابد مسكت بد بخوت وهي تضغط عليها تكبح حماسها
بخوت التفتت تطالعها باستغراب وطنشت الموضوع
سعود سلم على عباير:مبروك ياعين اخوش مبروك
عباير بهمس:الله يبارك فيك
سعود باستعباط وهو يقرب اذنه منها:هاه؟
عباير رفعت عينها له بتكشيرة
سعود ضحك وهو يضمها لحضنه:مبروك يالعبرة مبروك الله يوفقش ويسعدش يااخيتي
عباير حبست دموعها
سعود ابتعد وهو يترك المجال لبتّال
عباير اخذت نفس وعينها عالارض وهي تحس فيه يقرب
بتال تقدم لها بعد ماسلم على امه وجدته وامجاد وضاعت عينه عن رهايف اللي جنب بخوت وهو مثبت عينه عليها
عباير مع كل خطوة يخطيها ويوصل صوتها لها توتر وتحس المكان يضيق رغم اتساعه
بتال وقف قدامها ومد يده لها:مبروك ياعباير
رهايف صرخت صرخة مكتومة وهي تشد على بخوت
بخوت كتمت ضحكتها وهي اخيرا استوعبت ان رهايف فرحانة بس ماتبي تتكلم
عباير بلعت ريقها وهي تمد يدها وتصافح يده وبهمس:الله يبارك فيك
بتال سلم عليها خد بخد وسط ابتسامته وتركها وهو يوقف جنبها
امجاد صورتهم بالكاميرا وهي كل شوي تتجه لبتال وتهمس بخجل من سعود وجده:قربوا من بعض
،،بعد التصوير الكل خرج واتجه لبيت بادي ماعدا الجد بادي،،
الجد بادي قبالهم طالعهم للحظة وهم واقفين جنب بعض وبينهم مسافة بسيطة مد يمينه بابتسامة ليمين عباير ومسكها وهو يطالعها:ولفى شوق عباير ياعباير
عباير تلون وجهها من إحراجها
بتال قطب جبينه مافهم
الجد بادي:مبروك الله يصلحه لش ويصلحش له،،طالع بتال ومد يساره ليسار بتال ومسكها وللحين يمينه بيمين عباير وطالع بتال،،وغدت عباير عبرتك وشريانك يابتال
بتال ابتسم وهو يفهم انها القاب
الجد بادي:مبروك يابتال مبروك،،حط يديهم بيدين بعض واحتضنها بين يديه وطالع عباير،،ياعبرة بتال وشريانه حطيه بعويناتش وعلى راسش،،طالع بتال،،وياشوق عباير حطها بقلبك قبل تغدي بعيونك،،مرر نظره بينهم بحب وفرح يحتويه وهو محتضن يديهم للحين،،ياعلكم مبروكين ياعله
.
.
<اللهم صل وسلم على نبينا محمد>
.
.