ياسمح المحيا جر الهجينية

٧٤

    ،،الـجـزء الـرابـع والـسـبـعـيـن،،
.
.
..بيت الجد نشمي..
ابو جواد:ها ياعذبة وش رايك
عذبة تطالعه:من جدك تتكلم!!
ابو جواد:اَي والله قاله لي يبي رايك قبل يخطب من ابوي
عذبة:اول شي ماافكر بالزواج وثاني شي مستحيل اتزوج نشمي يامسفر قوله عذبة ماتبيك وأنسى الموضوع
ابو جواد ابتسم
عذبة قطبت جبينها باستغراب:وش فيك!!
ابو جواد:هو قال انك بترفضينه يعذبه
عذبة طالعته باستغراب
ابو جواد:وقال انه اذا رفضتي اقولك انه بيجي ويخطبك
عذبة بحدة:ماابيه برده قبال الخليقة كلهم
ابو جواد ضحك:ياربي منك ياعذبة!!
عذبة بنرفزة:قول بعد قاله!!
ابو جواد:حتى لو رديتيه قبال الخليقة بيخطبك من جديد
عذبة بنرفزة:ماابيه ماابيه
ابو جواد:انا مالي شغل وصلك الخبر انتهى دوري
.
..شقة جسار..
جسّار فتح الباب ودخل وهو ماسك الباب
بخوت دخلت وبحضنها حلايا النايمة واتجهت لغرفة النوم دخلتها وحطت بنتها عالسرير
جسّار واقف على باب غرفة النوم:بخوت
بخوت ماردت ولاطالعته وهي تغطي حلايا
جسّار دخل للغرفة ومشى لها مسك يدها وهو يوقف عندها ويلفها له وبحدة:بخوت!!
بخوت سحبت يدها منه وبحدة:علامك!!
جسّار:ازعلي مثل ماتبين لكن التجاهل ممنوع ابد فهمتي!!
بخوت تطالعه بتكشيرتها
جسار:اناديك تردين ماتسوين هالحركات معي فهمتي
بخوت تطالعه ساكتة وهي تغلي
جسّار:الاحترام واجب عليك لو تزعلين مليون سنة!!
بخوت:مااوجست شين انا!!
جسّار زفر وهو يستغفر:استغفر الله العظيم
بخوت:وثمن وش تريد؟
جسّار:ارتاحي ونامي الحين،،لف عنها ومشى،،
بخوت ارتمت عالسرير بقهر
جسّار رجع ووقف عالباب:بما انك مابتسألين ابد جهزي أغراضك العصر ماسكين طريق الديرة وارتاحي زين ماني براجع الا العصر،،مشى،،
بخوت بنفسها وهي تضم كف حلايا بين كفوفها وتبوسها:بهواك وش علي منك
.
.........****..........
       العصر
.........****..........
أم جـلاجـل
.
..المركز..
،،طلق وناصر خرجوا من المركز بعد ماكذّبوا شهادتهم السابقة،،
طلق يمشي متجه لسيارته وعينه بالارض يفكر
ناصر بابتسامة وهو يمشي جنبه:علومك ياطلق؟
طلق التفت له باستغراب:علامك انخبلت!!
ناصر بابتسامة:لا بالله ماانخبلت مير القليب ارتاح عقب العلم اللي اوجسته واللي علمناه
طلق بضيقة:لافيتنا تهاويل ياناصر
٧٠١
.
~
ناصر:حيها دام الراس مرفوع والوجه ابيض والنية زينة
طلق:فكوا التحقيق من اوله
ناصر:مالنا به حنا اوجسنا الصحيح
طلق:العلم ماهو بهين ياناصر به محكمة وطواري تسري
ناصر بتكشيرة:علامك ذال ياطلق!!
طلق:ماني بذال من العلم اللي انت تخبره انا ذال لايروح العلم اللي ذالحين مراح اللي قبله
ناصر هز راسه بلا بثقة:هالنوبة غير غير ياطلق غير
.
..بيت طلق..
هليل اللي ماارتاح ابد من كلام شامة البارح معه وقف قبال الباب وهو يدق عليه
شامة وهي تمشي الباب بخطوات سريعة ومن ورا الباب:من؟
هليّل:فكي لـي
شامة اللي عرفت صوته وبابتسامة:ها غادين يمي بعلم زين
هليل زفر:غادين يمش اريد اخبر من اوجس يمش هالاكذاب!!
شامة اختفت ابتسامتها وكشرت:رجل البيت ماهو بهنيا من اللي يريده؟
هليل اتسعت عيونه وهو يسمع كلامه:شامة!!
شامة:احتره بمجلس الشيخ يكرمونك ولاعود اوجست يمه لفاك ضيف يحتريك بمجلس الشيخ
هليل:علامك ياخية!!
شامة بحدة:ماني بخيتك استح يارجل!!
.
.........****..........
.
..بيت عادل..
،،جناح غازي،،
عذاري صحت وهي تحس بجسمها متفكك رفعت نفسها من عالسرير وجلست وهي تتلفت حولها زفرت وهي ماتطالعه موجود وقفت بتمشي للحمام اتسعت عيونها وصحصحت وهي تطالع التسريحة وارتسمت ابتسامة عريضة على وجهها وهي تمشي لها بسرعة وقفت عند التسريحة وهي تجلس عالكرسي على ركبها بوناسة سحبت الكرت اللي عالباقة الكبيرة باللون الاحمر وهي تقرأ كلمة وحدة بس(مـبـروك)شقت وجهها الابتسامة وقلبها تسارعت نبضاته بجنون رغم انها كلمة وحدة بس لكن تكفيها عن كل شي ثاني كانت متوقعته
.
..بيت الجد نشمي..
،،غرفة راشد،،
راشد بصداع منها:ليش طيب ليش
هيفاء:علامك اوجس يمك متشوقة!!به نشدة!!
راشد زفر:لمين متشوقة!!مااكفيك يعني!!
هيفاء:الا والله تسدني وتملاني ملي مير اني متشوقة للبر وللنياق والعلوم الزينة
راشد:طيب خليها الاسبوع الجاي الحسن تعبان من الزواج واضبط أموري مع الدوام وابشري
هيفاء:لا مااريد الليلة نغدي
راشد اتسعت عيونه:هيفاء!!
هيفاء كشرت:علامك علي!!ولا عشاني ضعيفة مااحويلي احد!!
راشد بحدة:ماانتي صاحية اليوم!!وش فيك!!
هيفاء بكت:ماعمري اوجست هه يمك وذالحين لاني اريد البر خنفرت علي!!
راشد يطالعها بصدمته:الله لايرده من بر لاتبكين لاتبكين!!
هيفاء:راشد والله والله ان قليبي متمزع اريد البر تكفى طلبتك ماتردني
راشد تنهد وهو يمد يده ويمسح دموعها:ابشري وانا مارديتك ابد ياهيفاء بس ابي اضبط أموري اصبري علي بس بكرة اخلصها وابشري بالبر وابو ابو البر ياعيني
.
..بيت مسفر..
،،الكل يطالعها مستغرب،،
شذى متكتفة تطالعها بشك
رهايف بتنورة مرتفع خصرها كلوش ميدي باللون اللحمي وبلوزة بيضا هاي نك باكمام طويلة واسعة شيفون وكعب باللون الابيض تاركة شعرها مسدول وجالسة جنب جواد وقبالهم بكمامة
ام جواد:ياهلا بحبايبي ياهلا نورتوا البيت
جواد بابتسامة:منور باهله
ابو جواد:سلامات يابنتي سلامتك عـسـى ماشر
جواد كتم ضحكته
رهايف باحراج:الله يسلمك ياعمي بس شوية تعب
ام جواد:سلامتك يارهوف سلامتك
رهايف وهي تحس بحرارة من كذبها:الله يسلمك
شذى:سلامتك رهوف بس ليش الكمامة!!
جواد ريح بجلسته بابتسامة وهو يمرر نظره بينهم
رهايف:الله لايبتليك ياشيخة وتلبسينها مثلي بس قولي الحمدلله
شذى:الحمدلله دايم اللهم لك الحمد بس نزليها عادي يعني كيف بتتقهوين كذا!!
رهايف سكتت وهي تطالعها بحدة
جواد:تقهوي مو انتي تقولين مشتاقة للقهوة!!
شذى وقفت:رهايف فيه طلبية وصلت فوق تعالي نشوفها مع بعض
رهايف وقفت براحة: يالله
جواد:وين!!اجلسي تقهوي
ابو جواد:اتركهم على راحتهم،،وقف،،تعال معي لجدك يالله،،مشى،،
جواد وقف وهو يطالعها بابتسامة وبهمس:ربي راحمك
رهايف قطبت جبينها بتكشيرة
جواد مشى
شذى مشت
رهايف واقفة بتردد وهي تطالع عمتها كيف تتركها لوحدها
ام جواد:شذى
شذى وقفت وهي تلتفت:هلا يمه
ام جواد وقفت:خذي القهوة معكم وتقهووا
شذى رجعت وهي تاخذ الثلاجة
رهايف:وانتي ياعمة
ام جواد بابتسامة:بأخذي لي غفوة للحين ماارتحت وعاد خذي راحتك انتي راعية بيت من اول،،مشت،،
رهايف ضربت على كتف شذى وهي تمر من جنبها بقهر
شذى:اااه وش فيك!!
رهايف تكتفت:مسوية اعرف احشر هاه!!
شذى ببراءة:وش سويت!!
رهايف:واااع مسوية انك مرة اخوي واحشرك!!
شذى:وانا الصادقة ليش تلبسين كمامة اذا تعبانة كان خليتي جيتك بكرة!!
رهايف وهي تسحب الكمامة لتحت فكها وهي تتخصر:ها ارتحتي
شذى ضحكت:وش ذا!!
رهايف بقهر:اخوك يعني وش بالله!!
شذى ميتة ضحك:وش سويتي عشان يسوي لك كذا!!هذا وانتي عروس!!
رهايف بتكشيرة:اخوك جمل قالها بنفسه
شذى بضحكة:وش مسويتله عشان يحقد عليك!!
رهايف: اوص بس اوص حتى بعد ماحطيت الاساس واضح
شذى:والله يبي لك صورة على البرستيج والرسمة ذي
رهايف:وش اسوي الحين قولي لي وانتي فالحة تضحكين!!
شذى:مشينا للغرفة ندور لنا حل
.
..بيت عادل..
،،جناح غازي،،
غازي واقف قبال مرايته يعدل نسفة شماغه وهو كاشخ
عذاري وقفت عنده بعبايتها وطرحتها على أكتافها وشنطتها بيدها جاهزة
غازي التفت لها وهو يسحب عطره:هاه جهزتي؟
عذاري:ايه
غازي قطب جبينه وهو يطالعها:وبعدين مع ذا الكعوب!!
عذاري مدت يدها للعطر اللي محتضنه بيده الملفوفة وهي تاخذه منه وتعطره:وش فيه!!
غازي:شكلي بأجمعهن وارميهن بالزبالة وارتاح!!
عذاري نزلت العطر عالتسريحة:حبيبي قلت لك متعودة وش فيك علي!!ليش مو راضي تفهمني
غازي مشى لدولاب جزمها(تكرمون)الصغير اللي بالزواية ورا الباب وهو ينحني شبه جالس وسحب جزمة ورجع لها:ماافهم انا اللي اعرفه انك ماتلبسين كعب،،مد لها جزمتها وهو يوقف قبالها،،ولاتطلعين درج
عذاري قطبت جبينها:وش تقـ،،سكتت واتسعت عيونها،،من جدك!!بننقل الحين!!
غازي مشى باتجاه الباب:البسي جزمتك انتظرك تحت،،خرج،،
.
..مـجـلـس الشعر..
راشد يطالعه بصدمة
ابو غازي ارتفعت حواجبه مو مصدق اللي يسمعه
الجد نشمي ابتسم:للحين قليبك يريدها يانشمي؟
نشمي ابتسم:ايه أريدها ياعم
راشد يطالعهم وكان الموضوع شي عادي
نشمي:وهالنوبة غادين يمكم اريدها حليلتن لي على سنة الله ورسوله
راشد قشعر كل جسمه وهو يسمع كلامه كيف واحد ياخذ امه منه بهالسهولة وبهالطلب البسيط
ابو جواد:مير يانشمي عذبة ردتك
راشد طالع خاله بصدمة اكبر وهو يحس نفسه مطرود عن امه كل ذا صار وهو مايدري عنها
الجد نشمي شهق:متى غدا هالعلم!!
ابو جواد همس له:اليوم يبه
الجد نشمي:هذاك اوحيت العلم يانشمي وانا مالي علمن به مثلي مثلك ودام هذا رايها حيل الله أقوى ياولدي مالك بها
نشمي زفر:خابرن انها بتردني مير اوجسوا يمّها صبرت دهر ماني بمتعيجز عن صبر سنة
راشد وقف وخرج من المجلس بخطوات سريعة
نشمي:عاد اترخصكم
الجد نشمي:والله ماتغدي غير وانت ماخذن المقسوم
نشمي:استغفر الله العظيم وش هالوجس ياعم!!
الجد نشمي بإصرار:اللي اوحيته مقسومك حاصل حتى لو انك تغدي وتكبه
.
..بيت عادل..
رهايف معلقة ع جرس الباب وهي تهمهم
امجاد ردت عليها وهي تطالعها من الشاشة داخل البيت وبغبنة:وجع سمعتك بشويش،،فتحت لها بالزر،،
رهايف دخلت وبصوت عالي:جيت انا جيت محد بيستقبلني؟محد اشتاق؟،،جرت وهي تتجه لمكان جلستهم المعتادة وبصوت عالي،،يممممههههه ويننننككك،،وقفت بالصالة وسط انفاسها السريعة قطبت جبينها،،
امجاد جالسة عالارض فاتحة على فيلم بالتلفزيون وهي تتقهوى:حياك
رهايف كشرت؛وين امي؟
امجاد:راحت مع بتال
رهايف:تدري اني جاية وراحت!!
امجاد وعينها عالفليم:خفي علي ياللي ماشفناك من سنين ترا بس ماشفناك اليوم!!
رهايف كشرت وهي تدخل وتنزل عبايتها ورمت الشنطة عالكنبة اللي ورا امجاد وهي تجلس جنبها عالارض:شوي احساس!!مابتموتين!!
امجاد تصب لها قهوة:صدق مافقدتك اكذب يعني!!،،مدت لها الفنجال،،
رهايف اخذت الفنجال وهي تطالعها:باقي احد يتابع عالتلفزيون
امجاد:غصب والله ابي امسك نفسي عن النوم لو مسكت الجوال ممن بدون مااحس
رهايف زفرت:اشتقت لسريري ودرجي(أنواع الشوكولاة)
امجاد:درجك ودعيه
رهايف بنرفزة:ليش!!
امجاد:انتقل لثلاجة فيصل
رهايف:نعم!!،،وقفت وبصراخ،،فيصل!!!!
امجاد:بشويش بشويش مافيه احد بعدين تراك عروس اركدي شوي!!
.
..بيت الجد نشمي..
،،الصالة،،
راشد داخل وهو ممتلي غبنة وطالعهم
،،عذبة والجدة منيرة وهيفاء يتقهوون،،
هيفاء فزت واقفة:هـلا ياهلا حياك
عذبة ابتسمت:حياك يمه عالقهوة
الجدة منيرة:يابنت ارفقي بعمرش يخبر القهوة وشو له تفزين له!!
هيفاء وقفت وقطبت جبينها وهي تطالعه وجهه المتغير:عـسـى ماشر ياراشد
عذبة قطبت وهي تطالعه:وش فيك يمه عسى مابك شي؟
راشد:لا مافيه شي ابد سلامتك،،احتدت نظرته،،بس اني ماني محسوب عندك يمه
الجدة منيرة بعصبية:ولد!!وش هالكلام!!
عذبة وقفت باستغراب:وش صاير ياراشد لاتخوفني يمه قول!!
راشد:ليش اقولك!!وانتي وجودي وعدمه عندك واحد!!
الجدة منيرة وقفت وضربته بعكازها بخفة على كتفه:وصريمة يارويشد تصرم عدوينك وصريمة!!
عذبة:وش فيه!!وش اللي مضايق خاطرك قول لي
راشد:كل شي يصير ولا ادري عنه يمه انا اخر من يعلم!!
عذبة صرخت بوجهه؛قول وش فيك!!
راشد بصراخ:اولها اخواني
عذبة:سالفة اخوانك غصب ماقلت لك،،رفعت يدها،،سووا فيني كذا وش بيسوون فيك!!
راشد:ماني ببزر اقلها اعرف!!
عذبة بعصبية:والحين عرفت وصرت اخوهم وش اللي فتح هالموضوع هاه!!
راشد:والحين وش عذرك!!سالفة زواجك من هالنشمي اللي ذابحه حبك ومستعد يخطب الى مايموت لسواد عيونك!!والله العالم وش غيره اللي مااعرفه!!
عذبة ضربته كف على وجهه بقهر منه
هيفاء انصدمت
الجدة منيرة بعصبية:لو ماجلدتيه جلدته وجبت عادل يجلده بعد ياقليل الحيا ماتستحي!!
راشد طالع امه وعينه بعينها:هيفاء اجمعي أغراضك البيت اللي مال اهله فينا حاجة مالنا فيه حاجة
عذبة انصدمت من كلامه
هيفاء بصدمة من كلامه:وش هالعلم ياراشد!!
الجدة منيرة ضربته:اعقب!!
راشد التفت لها وبحدة:بتروحين معي ولا ارجعك لبيت اهلك!!
عذبة لأول مرة تحس بقهر من راشد لهالدرجة:الله يستر عليك ويسر دربك ياراشد
راشد انصدم من ردها ووضح على وجهه
عذبة عطته ظهرها ومشت لغرفتها
.
..المقهى..
،،يوسف وبتّال جالسين على طاولة قبالهم،،
يوسف جالس جنب بتال وملصق جهته اليسار ببتال رافع كوب عصيره وهو يشفط قرب من بتال اكثر وبهمس منزل نظارته لطرف انفه وعينه عليهم :اقولك وش هالتغير المفاجئ عندك خبر!!
بتال منزل نظارته لطرف انفه بنفس طريقة يوسف ومقرب منه وكوب قهوته بيده:علمي علمك!!
يوسف لف راسه له يطالعه:ياأخي ليش ماتركت لي من الطول شي شف وين واصل فيك!!شفطته كله!!
بتال ابتعد وبتكشيرة:اذكر الله بس
يوسف بابتسامة:لااله الا الله بس قولي الحين،،رفع يده وهو يتكي بطرف دقنه عليها،،
بتال ابتسم وهو يطالع الساعة اللي بيده:وش اقول!!
يوسف:وش سر هالساعة؟
بتال رفع يده وتكى بتقليد له وهو لابس نفس الساعة:الخبر عند الحب
يوسف التفت يطالعها زفر بابتسامة:اَي والله انها حب
بتال شات الكرسي بتكشيرة
يوسف انفجع من الحركة:وش فيه!!
بتال:هيه انت ماني بناقص مشاركة ترا
يوسف:والله عمتي!!لو تشوت الى بكرة مشاركك مشاركك!!
بتال يطالعه بتكشيرته:وش سويت بـعـد جلدت ابوي لنا البارح
يوسف بابتسامة:احلى جلدة ذقتها بحياتي
بتال يطالعه من فوق لتحت:ماشاء الله عاجبك جو الجلد!!
يوسف طالعه وبابتسامة:دامه جلدتي معكم حاسبني منكم
بتال يطالعه ساكت
.
فاهد جالس قبالها يطالعها بابتسامة:حي وسمية ياحيها
ام غازي تنهدت:وش اللي وراك يافاهد اصدقني
فاهد زفر:يعلم الله ماوراي الا كل خير ياخية
ام غازي سكتت
فاهد بفرحة وهو يشوفها تلين له:وش علومش ياوسمية
ام غازي:بخير الحمدلله
فاهد مد يده ومسك يدها واحتضنها بين كفوفه وبندم:عسى ماتغربلتي معه؟
ام غازي:ابدن ابو غازي تخبره يافاهد أكرمني وحطني بين عيونه وحتى وغدن كانه مَن وغدانه ماعمل به عمل به
فاهد بيموت من فرحته:وسمية
ام غازي قاطعته:فاهد
فاهد:سمي ياعين فاهد
ام غازي بجدية:ماهو بأني قبلت بوغدك اقبل بك
فاهد انصدم
ام غازي:انا رحمت يوسف لانه صادق مايتعلقه من فعولك شين ابد
فاهد قطب جبينه بعدم رضا
ام غازي:وحتى عادل اللي ماراده بالاوله وثار عليه غدا يفقده لاابطى عنا
فاهد بغبنة:وتالية العلم ياوسمية؟
ام غازي:علامك معود يمنا وانت خابرن ماعملت!!رايدن بنا شر!!
فاهد بحدة:الى متى!!الى متى وأنتم اتطارون اللي مضى!!
ام غازي:لاغدا به شر نتطاراه الى مايغدي عنا!!
فاهد:محدن يخبر شين عني!!وثمن ياوسمية اللي مضى مضى
ام غازي:لاااا لااااا يافاهد ماغدا!!شرن امحق بيلفينا!!
فاهد بجدية:وكود غدا هالشر ياوسمية؟
ام غازي كشرت بوجهها
فاهد:كود انه ماغدا شين من اللي ذالين منه تلفيني؟
ام غازي:وتريدني احتري هالصريمة اغدي بنا!!
فاهد رفع صوته:كود غدا العلم ياوسمية على خير تلفيني؟
ام غازي سكتت
فاهد:تلفيني ياوسمية؟تعودين يمي؟
ام غازي زفرت وهي توقف
بتال فز واقف وهو يطالعها توقف
ام غازي:الله لايجعله يغدي يافاهد وكوده غدا اللي يستر من تاليه،،مشت،،
فاهد يطالعها بضيق وهو يوقف:وسمية
بتال اتسعت عيونه بجلطة وهو يسمع اسم امه وتلفت حوله بالمقهى
ام غازي التفتت له
فاهد ابتسم:كود غدا على خير انا بألفيش واذوق خبيزاتش ترا روحي متشوقة لهن
ام غازي ماردت واكتفت بانها تبتعد
بتال لحقها ووراه يوسف
بتال فتح لها الباب
ام غازي خرجت
يوسف:عمة ليش تزعلين ابوي؟
ام غازي التفتت له تطالعه بحدة
يوسف:تراه اخوش ياعين اخوش
بتال طالع امه ثم قفل قبضته وهو يمد سبابته ويدف يوسف من نص جبهته:رح لابوي بس
ام غازي انصدمت من الكلمة وهي تلتفت له
بتال:واترك امي عنك
يوسف ابتسم وهو يسمعه:مقبولة مقبولة،،مشى،،
ام غازي مشت
بتال حط يده على كتفها وهو يضمها له
ام غازي دفته وهي تتلفت:عيب استح!!
بتال وهو يرجع يده على كتفها:امي!!محد له كلمة علي!!
ام غازي سكتت
بتال:يمه اذا مشتاقة لأخوك ماعليك من احد اهم شي انتي شوي اللي تبينه
ام غازي ضحكت بخفة:اسمعوا من يتكلم!!
بتال:انا توني شباب لاحق بس انتي يمه وش وضعك
ام غازي اتسعت عيونها وهي توقف:وش!!
بتال ضحك وهو يضمها ع جنب وانحنى وهو يبوس راسها:جعل يومي قبل يومك يالحب
ام غازي ضربته:اعوذ بالله منك ومن هالكلام!!
بتال زفر بابتسامة:محد يموت ناقص عمر يمه كلن ياخذ اللي مكتوب له
ام غازي قطبت جبينها بشك وهي تطالعه
.
.........****..........
     يوم جديد
.........****..........
أم جـلاجـل
.
..بيت طلق..
غيث يضرب عالباب بصراخ هز الديرة:طــلــق!!اطلع ياطلق اطلع!!
هليل واقف وراه وهو يتلفت حولهم حط يده على كتف غيث:غيث اركد!!علامك!!
غيث دف يده:وين الركادة وذا خويي!!،،ضرب الباب بقوة وهو يصرخ،،طططلللقق!!!
هليل:بتفضح روحك وسط العرب وانت بهاللون!!
غيث طالعه بحدة:علامك راكد!!تراك معي!!مايمضي علي يمضي عليك!!
هليل كشر بوجهه
طلق فتح الباب وببرود:خير!!قلعت الباب!!
غيث بغبنة:خير!!خير!!
طلق خرج وهو يقفل الباب وراه
غيث:وين يغدي الخير وهاذي علومك انت وخويك!!
طلق:علامك مغتاظ وشايش!!
غيث:وش هالعلم اللي غدا يمي هاه!!
طلق:وش غدا يمك!!هماك توجس ماعملت شين ولاتخبر شين!!
غيث يطالعه بحدة
طلق:كـل العلم اني بريت ذمتي وناصر مثلي وانت لذالحين على مااوجست!!لاتغتاظ ابدن كودك موجس الصحيح!!
غيث بتكشيرة:وش عاني(تقصد)ياطلق!!
طلق بابتسامة:ابدا ماعنيت الا كل خير مير حياك حياك عالقهوة
غيث:هين ياطلق هين،،مشى وتركه،،
هليل زفر وهو يطالع غيث ثم طالع طلق وبعتاب:وش هالعلوم اللي غدت منك ياطلق انت وناصر هاذي تالية الخوة!!
طلق:هليل تلاحق روحك قبل يغدي علمن شين وثمن اتلفت مااحويلك احدن حتى هالغيث اللي نافخ راسه عليك،،دخل وقفل الباب وراه،،
هليل زفر بحيرة بينهم
.
..المركز..
جسّار جالس على كرسي برا غرفة الضابط ضام يديه ببعض طالعها وهو يسترجع حوارهم بالليل اول ماوصلوا بيتهم
>
>
جسّار يعدل فرشته بغرفة الحريم بينام وهو مفصخ بالبوكسر قرفان من كل شي مو بس نفسه
بخوت فتحت الباب وانصدمت وهي تعطيه ظهرها بسرعة
جسّار انصدم وهو يسحب ثوبه بسرعة ويلبسه
بخوت باحراج:ماخبرت هاللون،،بتمشي،،
جسّار بتكشيرة:وش بغيتي؟
بخوت التفتت تطالعه ساكتة
جسّار زفر وهو يتكتف:اسمعك؟
بخوت زفرت:عجزت ارقد وانا قليبي يوجعني
جسّار بزعل:وبعدين؟
بخوت بزعلها:صحيح اني غظتك مير اني اغتظت منك أزود انت خابرن العلم كله وعملت بي هاللون
جسّار تنهد وهو يفك يديه:قلت لك يابخوت قلت لك ماانتبهت ليش ماتسمعين لي ليش!!
بخوت:البلا اني خابرة خابرة انك ماتعمل هاللون خابرة  وقليبي يوجس صحيح ماتوجس صحيح مير بس ذلة ياجسار ذلك لأيادي هالعلم مرة ثانية
جسّار زفر:وش اللي يريحك يابخوت وشو!!
بخوت سكتت بتفكير
جسّار تقدم:بخوت
بخوت رفعت عيونها لـه
جسّار:الحياة بيننا مابتمشي بهالطريقة ابد مرة انا ارخي ومرة انتي
بخوت  قطبت جبينها
جسّار زفر:اقصد مرة تغمضين انتي ومرة انا اذا كل شوي  بتسوين هالشي واضح وش بيكون مصيرنا لازم انتي تبادرين بعد مو كل شي من جهتي بس يد وحدة ماتصفق يابخوت!!
بخوت تسمعه ساكتة
جسّار تنهد وهو يمد يديه ليديها ويمسكها
بخوت تطالعه وهي تحبس دموعها
جسّار:ادري اخطيت لكن والله ماقصدت غافلتني وخرجت وبعدين انا قبلت بك وبنتك يعني معقول اسوي شي بحلايا!!من جدك يابخوت!!
بخوت سكتت
جسّار ضغط على يديها:هاه وش قلتي؟؟
بخوت زفرت:وش اوجس غيّر على ماتريد
جسّار ابتسم:يعني خلاص طاح الحطب
بخوت تنهدت:ان شاء الله
جسّار:بخوت؟
بخوت:بتغدي ترقد يمنا ولا ترقد بروحك؟
>
>
جسّار زفر بتوتر وهو يطالع باب مكتب الضابط
الجد بادي جالس على اعصابه وقف وهو ماعاد قادر يتحمل وهو يتجه لباب المكتب
عباير طالعت جدها اللي مو قادر يتحمل وزفرت بتوتر وهي تشد على قبضتها
جسّار زفر وهو يوقف ويمسكه:ياجد مايصير والله مايصير اتركهم يشوفون شغلهم!!
الجد بادي سحب نفسه من جسّار:مااحرز شبيت وانا احتريهم علامهم ابطوا!!
جسّار:ياجد هاذي أقوال مو اَي احد يدخل وبعدين لاتنسى وضع بخوت
الجد بادي زفر بغبنة:لاحول ولاقوة الا بالله العلي العظيم استغفر الله
سعود فتح الباب وهو مرجع يده من ورا اكتاف بخوت ساندها وهي منهارة بكى 
عباير وقفت وهي تسرع بخطواتها ووقفت وهي تسمع العسكري ينادي عليها بلعت ريقها وهي تحس بخوف
سعود طالع جسار:خذ مرتك ياجسار وتوكل لبيتك
جسّار تنهد وقرب منها يطالعها بتردد
سعود حطها بحضنه
جسّار ضمها من أكتافها وهو يمشي خارج 
سعود طالع جده:ياجد انا باغدي مع عباير تريح
الجد بادي:مامن راحة كبني اغدي معكم
العسكري:واحد بس
سعود:على ماتريد ياجد على ماتريد
.
..بيت مفلح..
،،المجلس،،
هيفاء نزلت القهوة ولفت بتمشي
راشد:وين!!
هيفاء:عليك بالعافية
راشد بتقطيبة جبينه:وش فيك!!
هيفاء بتكشيرة:مابي شي
راشد زفر:هيفاء ماني ناقص صداع البر وهذا هو عندك سوي اللي تبين
هيفاء بتكشيرة:مير اني عفت البر وطاريه دامني غاديتن يمّه بهاللون
راشد بحدة:وش هاللون اللي مو عاجبك
هيفاء:كلن يخبر روحه مير اعجل اريد اعود يم بيتي البر مااريده
راشد بحدة:لعبة انا عندك لعبة اروح وأحب بكيفك!!
هيفاء:تراني مولمة الغريضات مافكيت منها شين مير اعجل علي اريد اغدي يم بيتي،،مشت،،
راشد عضت شفته وهو يوقف ويخرج من المجلس والبيت كله
.
~بالسيارة~
جسّار عينه لورا بقلق وهي الـلـي من خرجت مانطقت حرف ولايدري وش صار معها
بخوت متمددة ورا نايمة تحلم بذاك اليوم الشين فزت من نومها بصرخة فز معها قلب جسار بخوف
جسّار من خوفه مسك فرامل بوسط الطريق اللي رايح جاي للديرة
بخوت بدون شعور منها كل اللي تشوفه رجال معها بالسيارة فتحت الباب ونزلت تجري وهي تصرخ بهستيريا
جسّار نزل وهو يترك سيارته بوسط الطريق وشغالة ومفتوحة ابوابها من جهته ومن جهة بخوت الي نزلت نزل بصدمته وفجعته من اللي يصير وكل اللي سواه انه يجري وراه
بخوت تجري بكل مافيها وهي تهل دموعها تنطق بينها وبين نفسها:سعود سعود سعود
جسّار لحقها ومسكها وهو يضمها له من ورا
بخوت صرخت وهي تتحرك بين يديه
جسّار ثبتها وهو يسمي عليها بصوت عالي
بخوت تبكي بصوت
جسّار جلس فيها وهو يثبت حركتها
بخوت بوسط شهقاتها ورعبها:تكفى ياغيث تكفى كبني تكفى والله لااعمل ماتريد تكفى
جسّار:بخوت جسّار جسّار انا جسّار جسّار
بخوت تبكي ماسمعته
جسّار لفها لوجهه وبصراخ بوجهها يبيها تنتبه له:بخوت جسّار جساااار
بخوت هذا صوتها لكن تنفيها السريع بنفس وضعه طالعته وسط شلال دموعها:غيث ياجسار غيث
جسّار عض طرف شفته السفلية بغبنة وقهر وهو يبلع غصته ويضمها له:الصبر الصبر بياخذ جزاه يابخوت وتشوفين الصبر ياعيني الصبر
بخوت بكت بصوت عالي وهي تضرب عليه:متى متى اخذ روحي معه متى اراعيه متى
.
..المستشفى..
ضبعان اللي يسرع بخطواته بعد ماوصله هالخبر الشين وهو مابلغ احد مكذب اللي يسمعه ثقلت رجوله ماعاد تشيله وهو كل ماله يقرب من المستشفى غرقت عيونه بدموعه:يارب رحمتك يارب ارحم إحويلي ولاتروع قليبي يارب
بتال يلف حول المستشفى الفاضي من برا بطفش وهو ياكل بسكوت يطير نومه وهو اللي من وصل للديرة اتجه لدوامه وقف وهو يقطب جبينه ويطالع الشايب اللي قدامه اسرع بخطواته وهو يدخل بسكوته بجيب لابكوته وهو ينحني شبه جالس:ياعم
ضبعان رفع عينه له وهو يبلع غصته
بتال سحب يده يفحص نبضه:عـسـى ماشر ياعم وش يوجعك
ضبعان شد على يده وبعيون تلتمع:يوجسون مرزوق مات ياولدي بلكنه اكذاب
بتال سيطر على تعابيره:ايه اكذاب من هاللي مايستحي يوجس هاللون!!
ضبعان بربكة وهو يدخل يده بجيبه يخرج جواله النوكيا بيد ترجف:انا غادين يم المطحنة اطحن الدقيق ورن هالماخوذ ياعله الصريمة
بتال طالع رجفته وزادت ضيقته من الموقف اخذ جواله وفتحه وتغير وجهه وهو يطالع رقم المستشفى:مشينا لهم ياعم يمكن غلطانين
ضبعان وقف وهو يزفر
بتال سنده:ياعم ان شاء الله خير ان شاء الله خير
.
..بيت جسّار..
جسّار وهو يوقف بسيارته عند بيته التفت لبخوت
بخوت جالسة جنبه ويده بين يديها وهي نايمة
جسّار تنهد وهو يطالعها وبهمس:بخوت
بخوت ماصحت
جسّار رفع صوته:بخوت
بخوت فزت بفجعة
جسّار ضغط على يدها:بسم الله عليك بسم الله
بخوت طالعته وبرجفة صوتها:حلايا!!
جسّار:حلايا مع خالتك ام مزون لاتخافين
بخوت لفت بتنزل وتجمدت وهي تضغط على يد جسّار بقوة لدرجة دخلت أظافرها بيده
جسّار التفت بسرعة للي تطالعه واحتدت ملامحه وهو يطالعه فتح الباب بينزل
بخوت مسكت يده وهي ترجف بوضوح لجسّار هزت راسها بلا
جسّار:اقفلي الأبواب عليك لاتفتحين لو وش يصير
بخوت تهز راسها بلا مرعوبة
جسّار بحدة:واذا صار شي حركي السيارة وادعسيه،،سحب يده من بين يديها ونزل وبابتسامة،،خير وش عندك جاي عندنا
بخوت ترجف برعب وهي تتحرك من مكانه وتركب مكان السواق وهي تنزل نفسها ورا الدريكسون بخوف
غيث بحدة:مالي وجسن يمك طسّ
جسّار بحدة:اذلف اذلف بس لااحط اللي بقلبي فيك!!
غيث طالعه:من انت!!مردك تكبها وتعود يمي
جسّار هجم على غيث وضربه بكل حقد متجمع بقلبه
غيث ماقصر واخذ حقه
الـعـم مصلح اللي خرج من بيته على اصواتهم اتسعت عيونه وهو يطالعهم وجرى لهم وهو يفك بينهم وفك بينهم ووقف
غيث بصراخ بوسط وجهه الدامي:طسّ عن وجهي من طلب منك معونة
الـعـم مصلح:اعقب!!
جسّار بابتسامة وهو يمسح شفته اللي تنزف بيده:احمد ربك فكك من يـديـنـي يالخسيس
غيث مشى بخطواته له وبصراخ:والله لااذبحك
بخوت منهارة بكت داخل السيارة وهي تسمع صراخه
الـعـم مصلح اشر بعكازه بوجه غيث وبحدة:كود بك خير تعداني وتراني ماني من ربع ابوك
غيث كشر بوجهه
الـعـم مصلح بحدة:طسّ عن وجهي ياقليل الخاتمة لااصوت بالديرة وكل ابوهم يراعونك فازعن يم مرة غيرك ياقليل المروة!!
غيث بقهر:والله ماتغدي عنك وانا ولد ابوي
الـعـم مصلح:الله لايردك طسّ
غيث طالع جسار وابتسم وسط غبنته:هين هين والله ماتغدي عنكم على خير،،مشى بخطوات سريعة،،
.
.........****..........
         الليل
.........****..........
.
..بيت نشمي..
،،غرفة عذبة،،
ابو غازي دق الباب وفتحه بدون لايسمع ردها:إعذيبه
عذبة جالسة على سريرها ابتسمت وهي تقفل المصحف:ياحيّه ياحي عيون إعذيبه
ابو غازي ابتسم:الا والله انتي عيون عادل ياعذبته
عذبة ابتسمت وهي تسمع كلامه وحطت المصحف بدرج الكومدينة ووقفت وهي تقفله:هلا بعادل ياهلا
ابو غازي:ماشفتك اليوم وينك عني؟
عذبة بابتسامة:انت اللي وينك ماشفتك
ابو غازي وهو يمسك يدها ويحتضنها:سمعت ان راشد مطول لسانه
عذبة اختفت ابتسامتها وهي تتنهد
ابو غازي:الثور ماسواها وهو صغير يسويها ذالحين وهو كبر الثور
عذبة بزعل:علامك على وليدي تهاوش فيه
ابو غازي:عوذا منك فازعتن معه يوجسون الخي(الاخ)ازين من الوغد
عذبة:مير انك مهول به
ابو غازي بضحكة:هذا هو غدا رجل
عذبة سكتت
ابو غازي بحدة:وابغدي يمه وأعلمه وشلون مرجلته تحيد هاللي مابه حيا
عذبة:عليك وجه الله تكبه ياعادل
ابو غازي:معصي اكبه!!غادين مع مرته للبر كاشت وخيتي مغتاظة يعقّب اكبه والله ان تغدي ليلته قشرا وانا ولد ابوي
.
..السينما..
جواد واقف قبال شاشة عرض الأفلام ويدها بيده:اش رايك اَي موفي ندخل؟
رهايف تطالع الأفلام ساكتة
جواد التفت يطالعها:كوميدي؟
رهايف:لاا وع مو حلو،،ابتسمت،،رعب احلى
جواد:مااحب رعب نتابع درامي احسن
رهايف:الأحسن عندي والله
جواد قطب جبينه:اللي هو؟!!
رهايف التفتت له تطالعه:كل واحد يتابع اللي يبيه وبعدها نتقابل هينا من جديد
جواد اتسعت عيونه:تمزحين صح!!
رهايف:لا والله اقول الصدق!!
جواد مشى ويده للحين بيدها:هالمرة نتابع رعب مثل ماتبين المرة الجاية كوميدي غصب عنك
.
.........****..........
أم جـلاجـل
.
..كشتة الشباب..
بتال جالس قبال النار يطالعهم بابتسامة وهم كل واحد منهم مرتسمة تكشيرة عريضة على وجهه وبسخرية:ايييه  ماجابتكم الحاجة تجيبكم الطردة،،ضحك،،
راشد طالعه بتكشيرته:يرحم امك فكنا مو وقتك مرة
جسّار زفر وهو يقوم لعنده ويجهز الدلة وهو مانطق شي
بتال ميل فمه وهو يطالع وضعهم:اقول بتنفسون كذا قدامي كل واحد يذلف لاهله يكفيني اللي شفته اليوم بدوامي!!
جسّار:وهو يحط الدلة عالحطب:أطربنا بتيل
بتال:حلفت عليك تطلب وفوقها بتيل!!
جسّار رفع عينه له وهو مميل فمه بضيقة
بتال طالعه ثم طالع راشد اللي متمدد وعينه عالسما زفر وهو يغني لسميرة بابتسامة:يـومـيـن والـثـالـث ع فـراق الـحـبـايـب..
جسّار كشر:بتال!!
بتال بضحكة واضحة وهو يغني:والـشـوق يـاقـلـبـي والـحـسـرات عـالـغـايـب..
راشد جلس وهو يرمي نعلته على بتال
بتال مسكها بابتسامة
راشد بتهديد:والله مو احسن لك!!
بتال وقف:والـدار مـاتـحـلى لـنـا الا بـوجـود أحـبـابـنـا..يـومـيـن
راشد جرى له:اوريك انا اليوم الثالث
بتال هرب وهو يضحك بصوت عالي:خلاص امزح والله امزح
جسّار يطالع راشد باستغراب
بتال ماابتعد ابد عن مكانهم يدور حول جلستهم والسيارة
راشد وراه مغبون
بتال وقف ويلتفت له وبوسط انفاسه وهو يتحرك يمين ويسار:والله خلاص وش فيك ماينمزح معك
راشد قباله بحدة وهو يحاول يمسكه:مو وقتك قلت ولا ماقلت!!
بتال:لاتخليني اطيرك لبيت عمك من هينا عاد قريب بيت عمك،،ضحك،،
راشد ارتمى عليه ومسكه من وسطه
بتال طاح على ظهره وهو ميت ضحك وماسك راشد مثبته
راشد وهو يتحرك يبي يضربه بس بتال مو معطيه مجال وبقهر:صدق انك بقرة ضاحكة
بتال دفه بقوة عنه
راشد ارتمى على جنبه جنب بتال وهو يطالعه بحقد:يجي يوم وهالضحك مابينفعك
بتال زفر بصوت وسط ابتسامته والتفت يطالع راشد:اضحك ياراشد اضحك وش تبي بالنكد ونهايتك حفرة!!اضحك اضحك وش تبي بالزعل!!مافيه شي يستاهل تزعل عشانه وتزعل اللي تحبهم بعد!!
راشد تمدد على ظهره وهو يزفر
جسّار ابتسم وهو يسمع كلامه ويتقهوى من الدلة اللي عالحطب تغلي للحين
بتال جلس وهو يضم ركبه لصدره وغنى بابتسامة:أبـتـونـس دامـنـي فـوقـهـا حـي..مـحـدن خـذا غـيـر الـشـقـا مـن حـيـاتـه..نـركـض بـهـا مـن طـلـعـت الـفـجـر والـضـي..أمـا مـمـات الـذيـب ولا غـنـاتـه..نـزعـل ونـرضـى والـنـتـيـجـة ولاشـي..مـاغـيـر كـثـر أمـراضـهـا والـشـمـاتـة..
جسّار:اقول اترك عنك وسمعنا شي حلو
بتال بنص عين:ايه ايه عرفت وش تبي بس لحظة،،وقف،،
جسّار:لااله الا الله!!وين ترا ماصارت!!
بتال وهو يفتح سيارة راشد
راشد جلس وهو يطالعه باستغراب
بتال خرج فروته وهو يحطها فوق راسه ويغطي وجهه ويمشي قدامهم وغنى:يـامـعـشـر الـلـي عـلـى ضـو الـقـمـر سـاهـريـن،،نزل الفروة من راسه لاكتافه وهو يدور حول نفسه،،مـامـركـم عـود مـوز(ن)فـي عـلـوه ثـمـر..
جسّار زفر بتكشيرة وهو يوقف
راشد وقف واتجه لسيارته
جسّار اتجه لسيارته:شف لك احد ترجع معه
بتال اتسعت عيونه:هيه امزح معكم!!
راشد ركب وحرك
جسّار ركب سيارته وقفل الأبواب بسرعة
بتال وقف عنده:جسّار تترك توأمك!!
جسّار وهو ينزل شوي من القزاز:ماعندي توأم اصلا!!،،حرك ومشى،،
بتال يطالعهم وهم يبتعدون صرخ:لاابوكم لاابو جوكم يالخايسين!!
.
.........****..........
     يوم جديد
.........****..........
أم جـلاجـل
.
..برا بيت مفلح..
هيفاء نزلت الفطور ولفت بتمشي
راشد بطفش من حالتهم:هيفاء
هيفاء وقفت والتفتت له:سم
راشد:الى متى بتقعدين زعلانة؟!
هيفاء:ووشو له اغتاظ!!
راشد:ادري ان اللي سويته غلط مع اني وقفي هالحركات!!
هيفاء اتسعت عيونها:صحيح!!تخبر!!
راشد احتدت ملامحه:بلا عباطة هيفاء!!
هيفاء زفرت وجلست قباله:عاد اريد اوجس يمك علمن ولاتغتاظ مني
راشد تكتف وارتفع حاجبه اليسار:ايه!!
هيفاء:به وجسن من قبل البارح يعيث بي عيث الله لايسلطه يم مسلم
راشد:قولي اسمعك
هيفاء:عقب اللي عملته بعمري تستاهل يزهمونك يالغضيب
راشد اتسعت عيونه:وشو!!
هيفاء:اَي بالله غضيب!!هي وحدة اميمتك وحدة مابه اميمة غيرها وتعمل بها هاللون!!
راشد زفر:غصب ولاكنت اقصد
هيفاء:عنيته ولا ماعنيته اخطيت بعملتك بهاللون
راشد بنرفزة:بس حتى هم غلطانين كيف يخطبون امي ولاعندي خير ديكور انا يعني!!
هيفاء:وعمتي وش ذنبها عليك بالرجل تلّه من رقيبته واوجس هالعلم بوجهه هو اللي اخطى!!ماهي بعمتي الضعيفة!!
راشد تنهد وهو يفكر
هيفاء ابتسمت:وشلون طاوعك قليبك ماترفع البلوى وترن يمّها هاه
راشد طالعها:ماني بران لها
هيفاء قطبت جبينها:اجل!!
راشد وقف:مشينا لها ياهيفاء مشينا
.
.
<اللهم صل وسلم على نبينا محمد>
.
.