ياسمح المحيا جر الهجينية

٥٦

   ،،الـجـزء الـسـادس والـخـمـسـيـن،،
لاحول ولاقوة الا بالله العلي العظيم ،استغفرك ربي وأتوب اليك..
.
.
..بيت الجد نشمي..
الجدة منيرة:علامها ابطت؟
حصة وهي تطالع امها:يمه ليش تقولين لعادل والله ان مايرحمها
الجدة منيرة:لا لا ماهو بمسوي لها شي
ام غازي:تستاهل من متى تنادينها وماجاتك!!
ام جواد تطالعها باستغراب:وسمية!!وش فيك صايرة مثل عادل!!
ام غازي:الغلط غلط ياعواطف مافيها مثل عادل!!
الجدة منيرة وهي تطالع حصة:وينها بنتك؟
حصة:ريما نزلت عند شذى
ام غازي:كيف أمورها بالدراسة عـسـى تمام
حصة:ليتها تقعد معي مثل ماتقدر على كتبها
ام غازي ضحكت:والله ياحصة البني ادم مايرضيه شي حنا نبي اللي عندنا يمسكون كتبهم وانتي تبينهم يتركونها
حص:عاد ماهو بالترك الترك لا وسطية شوي هم اذا تركوا الكتب قعدوا يقرون وانا بس احط بهالفواكه والقهوة وهم مادروا عني
ام غازي:خليهم على راحتهم الحمدلله دام ماضروا نفسهم ولاضروا احد
الجدة منيرة وقفت وهي مو مرتاحة
حصة وهي تطالعها:يمه!!
الجدة منيرة:بأمغط رجيلاتي بالحوش
حصة بنص عين:علينا يمه قولي تبين تصلحين غلطك
الجدة منيرة ضغطت حصة على رجلها بالعكاز
حصة وهي تمسح المكان:اااه يممممههه
الجدة منيرة:كفي لسانش عني حصيص وتراني مانسيت عملتش مع الضعوف اللي لفونا!!
.
..بيت عادل..
فيصل نازل عالدرج بخطوات سريعة وهو كل شوي يقفل المكالمة بطفش واضح على ملامح وجهه
امجاد واقفة عالباب ببنطلون رمادي وبلوزة عودي رافعة شعرها كله لابسة عبايتها المفتوحة وطرحتها ع أكتافها وشنطتها السودا الصغيرة ع كتفها اليمين شايلة حافظة الكيكة وقدامها ثلاجتين قهوة وشاهي نزلت الحافظة وابتسمت وهي تطالع فيصل:فيصل
فيصل زفر بطفش:وين اوديه؟
امجاد بابتسامة وهي تقفل عبايتها:بيت جدي
فيصل قفل المكالمة وقفل جواله مرة وحدة
امجاد باستغراب:مين؟!!
فيصل:واحد غثيث ماعليك
امجاد:ماخلصنا!!
فيصل:امجاد قلت لك خلاص لاتخليني اندم اني قلت لك!!
امجاد زفرت وهي تلف طرحتها:روح روح بس عندي وعندك خير
فيصل شال الثلاجات والقهوة وخرج
امجاد اخذت جوالها اللي عالطاولة وهي تفتح شنطتها طالعت عدد المكالمات كشرت بوجهها؛اعطيها حظر وارتاح احسن لي
.
..بيت مسفر..
ابو غازي يدق الباب بقوة:افتحي يارهايف افتحي!!
رهايف ورا الباب مرعوبة وهي تسمع صراخه
جواد جنبها يطالعها:وش مسوية هالمرة؟
رهايف:كله منك ليش دخلتني كان انجلدت وانا برا اقل من مااطلع له الحين!!
جواد اتسعت عيونه:لا والله،،فتح القفل،،
رهايف مسكت يده وهي تهز راسها بلا:تكفى تكفى
جواد:وش مسوية طيب عشان أساعدك!!
رهايف:اقولك انت أشغله عني بس،،جرت وتركته،،
جواد:بنت بنت!!
ابو جواد يهديه:عادل!!البنت عذرها معها اكيد تعبانة ولا رهايف هبة ريّح ماتتاخر على احد
ابو غازي بعصبية:كل شي عندي يهون كل شي الا امي وابوي لا والف لا يامسفر مافيها هداوة،،صرخ،،رهايف وبلاا
جواد اخذ نفس وهو يفتح الباب اتسعت عيونه وهو يرسم ابتسامة:عمي!!!
ابو غازي دفه عن وجهه وهو يدخل:شغلك بعدين انت اذلف عني،،تلفت وهو يصرخ،،رهاااايف
شذى وقفت عندهم من الصراخ:عمي!!
ابو غازي بحدة:وينها رهايف
شذى ماتدري عن السالفة:شفتها تجري للباب بتخرج
ابو جواد اتسعت عيونه وهو يشوفها تجري من قدامه
جواد اتسعت عيونه وهو يسمع كلام شذى ولف عنهم وهو يسرع بخطواته ومر من عند ابوه
ابو غازي لف وهو يجري خارج من الباب ومر من عند ابو جواد وجواد قدامه يهرول
رهايف تجري متجهة لبيت جدها
ابو غازي اللي شافها صرخ:رهااااايف
رهايف صرخت وهي تجري وتسمع صوته وراها وطاح جوالها منها وكملت طريقها
ابو غازي:جواد انثبر مالك شغل!!
جواد وقف وهو ماله كلمة عليها للحين
ابو غازي مر من جنبه
رهايف اتسعت عيونها وهي تشوف جدتها:جددددةةةة!!!
الجدة منيرة انصدمت وهي تشوف اللي يصير
رهايف وقفت ورا جدتها
الجدة منيرة بعصبية:اعقب ياعادل اعقب!!
.
.........****..........
أم جـلاجـل
.
..بيت الشلة..
جسّار وهو متجه للباب:طيب طيب جاي،،فتح الباب وانصدم من وجوده،،غازي!!!،،انصدم اكثر من اللي معه،،طلق!!
غازي التفت يمينه وهو يطالع ناصر:مشكور مشكور يكثر خيرك
جسّار كشر بوجهه وهو يطالعه
طلق:ماسويت الا الواجب اترخصكم
جسّار اتسعت عيونه باستغراب منه
طلق:بحفظ الله،،مشى،،
جسّار قشعر جسمه وهو يطالعه مصدوم
غازي مسك جسار من تيشيرته وهو يصرخ بوجهه:وينه ياجسار وينه؟
جسّار يفك نفسه:قل اعوذ بالله من الشيطان ياابن الحلال تعوذ
غازي تركه وبحدة:اعوذ منه الف وينه تكلم
جسّار:قبال المستوصف بالجهة الثانية من الخط بتشوف ناره بعد كيلوين
غازي اتسعت عيونه وصرخ:تركته!!
جسّار:طردني!!
غازي:وتتركه!!
جسّار:ماتركته الا بعد ماتاكدت من اموره!!ماني بقليل عقل اتركه كذا!!
غازي زفر:استغفر الله وين قلت؟
جسّار مد لغازي مفتاح سيارته بعد ماوصف له المكان بالضبط
غازي:خل مفتاحك معك جاي مشي مثلا!!،،مشى،،
جسّار زفر وهو يهز راْسه:خيرًا تعمل شرًا تلقى!!،،قفل الباب،،استغفر الله العظيم
.
..بيت مفلح..
عذبة جالسة بالحوش
ثريا قبالها بابتسامة وفرحة بزيارة احد لهم:ياحيها ياحي الضيفة ياحيها
هيفاء نزلت الدلة والفناجيل ومدت صحن التمر المتواضع عند عذبة
ثريا اخذت الدلة والفناجيل بسرعة وهي تصب الفنجال وتمده لها:حياش الله ياحياش
عذبة:يسلمك ويجمل حالك
هيفا واقفة لفت بتمشي
ثريا:وين غادية اقعدي اقعدي
عذبة تطالع هيفا بتمعن
ثريا بابتسامة:حي ضيفتنا اَي والله
هيفاء جلست وهي تشتت نظرها مو متعودة على احد
عذبة باحراج:انا ام الولد اللي ساعده زوجك
هيفا حطت عينها عليها بسرعة
ثريا اتسعت ابتسامتها
عذبة:جزاكم الله خير وبيض الله وجهكم عساكم الخير ومن اهل الخير دايم
ثريا:حياش الله ماعمل الا الواجب الحمدلله على سلامته الحمدلله هذا اللي توجيه ياخية
.
،،عند المشب برا البيت،،
مفلح يتقهوى ساكت وهو يكبح نفسه لايتكلم
راشد نزل فنجاله بعد ماخلص قهوته وهو يوقف:كثر خيرك ياعم
مفلح فز واقف:يارجل مسرعك وين غادي!!
راشد ابتسم:كثر خيرك وجمل الله حالك ياعم
مفلح:تعشى ولاحقن خير
راشد:أغناك الله ياعم أغناك الله،،بابتسامته،،ناد لي الأهل ياعم لاهنت
مفلح:ان شاء الله ان شاء الله،،مشى،،
راشد وقف عند سيارته وهو يفتح الشنطة وبدا ينزل منها كراتين(تمر وخضار وفواكه وعصير)
مفلح وقف ع الباب وهو يرجّع طريقه ووقف واتسعت عيونه وهو يشوف الاغراض:وش ذا ياولد!!
راشد بابتسامته:شي بسيط ياعم
مفلح:خذه ياولد هذه مامن قصورن مستورة والحمدلله!!
راشد اتجه له وهو يسلم على راسه:هذا شي بسيط ياعم واعتبرني ولدك
مفلح يطالعه بشك:دام توجس انك ولدي اجل علمني
راشد قطب جبينه:سم ياعم
مفلح:اصدقني هو انت الرجل اللي ارعيته بيت فالح صحيح؟
راشد كشر بوجهه للحظة
مفلح:اقصد يم البير اللي جوا البيت؟
راشد اخذ نفس:ايه ياعم انا
مفلح كشر بوجهه وبحدة:يوم اني صادفتك ذاك الليلة لافين منين؟
راشد:لاقلت لك من وين بتصدق اني جيت غصب عني؟
مفلح طالعه ساكت للحظة مايبي يظلمه
راشد:جيتك من
مفلح قاطعه:كثر الله خيرك كلفت على روحك
راشد ابتسم:مامن كلافة ياعم مامن كلافة
مفلح:عاد لاتقطعنا ياولدي دامك غديت ولدنا
راشد:ابشر ياعم ابشر مامن قطيعة ان شاء الله
مفلح:عاد اعلمهم يزهمون اهلك
راشد سلم على راسه:استودعتك الله ياعم
مفلح مشى باتجاه البيت
راشد ركب السيارة وشغلها وهو ينتظر امه
عذبة خرجت من بيت مفلح وركبت السيارة
راشد حرك وهو يوقف عند مفلح
مفلح واقف على باب البيت يوادعهم:حياكم الله ياحياكم
راشد:فمان الله ياعم فمان الله
مفلح:بحفظ الكريم ياولدي بحفظ الكريم
راشد بعد مابتعد عنهم التفت لامه:ها يمه؟
عذبة التفتت له كلها:ها انت قولي وش وراك؟
راشد:وش رايك بالبنت؟
عذبة:والله الواضح مسكينة والباقي الله يعلم به
راشد:يعني أتوكل؟
عذبة قطبت جبينها للحظة ثم اتسعت عيونها وسط ابتسامة:نويت!!
راشد:أعجبتك؟
عذبة بابتسامتها:مايهمني انا عليك فيك والله وتختار من وراي ياراشد
راشد وقف بالسيارة على جنب وهو يسلم على راسها ويدها:سامحيني يمه سامحيني
عذبة:وش هالكلام ياراشد الا افرح لك وادعي ربي يسعدك تعال قولي وين شفتها اكيد انت البلا ولا هي واضح مسكينة
راشد حرك السيارة وهو يتحاشى نظرات امه:مايهم وين شفتها المهم انها أعجبتك يمه
عذبة:انت اللي بتاخذها يمه وش يهم انها تعجبني!!
راشد:خلاص يمه احد كلمي جدي بعد جسّار يخطب لي
عذبة:جعلها زواجة الهنا ياعيني مبروك ياراشد مبروك الله يجعلها من نصيبك كان فيه خير لكم ياولدي
راشد:من نصيبي ان شاء الله من نصيبي
.
..السيارة..
جسّار جالس بمكان الراكب
سعود يسوق وهو ساكت
جسّار التفت له:هاه ياسعود قول اللي عندك
سعود وقف بالسيارة
جسّار يلتفت للمكان اللي يلفه الظلام:لايكون بتذبحني!!
سعود طالعه بصدمة
جسّار ضحك وهو يطالع صدمته:امزح امزح وش فيك!!،،اتسعت عيونه،،لايكون صدق بتذبحني!!
سعود التفت له:ايه كيف عرفت!!
جسّار انقلب وجهه
سعود فتح الباب ونزل ووقف عند السيارة من جهة جسّار وهو يثبت جبينه عالقزاز ويطالعه:بتندر(تنزل)ولا أندّرك؟!!
جسّار فتح الباب بشويش
سعود رجع بخطواته لورا مع فتحة جسّار للباب وهو لازال مثبت جبينه عالقزاز
جسّار بلع ريقه وهو ينزل:تعوذ من الشيطان ياسعود وش فيك!!
سعود عطاه ظهره وهو مايحب يمزح مع احد وبنفس نبرة جسّار:امزح امزح وش فيك
جسّار كشر بوجهه:ياشين مزحك والله لاعاد تمزح مرة ثانية
سعود وهو ينزل العزبة:من زين الوجس اللي اوجسته!!
جسّار يطالعه بتكشيرة:وش فيها أخلاقك اليوم!!ماااش ماانت بسعود الحبيّب!!
سعود جلس وهو يجهز مكان النار:لان العلم اللي باوجسه يمك شين وشين بالحيل ياجسار يمكن انك تهون عقبه
جسّار قطب جبينه:عن بخوت؟
سعود بدون لايطالعه:ايه
جسّار كشر بوجهه:انا عند كلمتي ياسعود قابل بها وبنتها اذا عندك كلام زين بأجلس واسمعك غيره لا،،لف بيمشي،،
سعود بعصبية وهو يوقف:بتوحي العلم كله ياجسار كود لاخبرت به عقب ماتوجس كذبتوا علي!!
.
غازي وقف بالسيارة وهو يشوف النار على مسافة قباله نزل يمشي ووقف قباله وهو يطالعه جالس ورا النار
بتال متلثم جالس عند النار وهو ضام ركبه لصدره ومحاوطهن بيديه متكتف ومتكي بطرف دقنه على ركبته وفوقه بطانيته يطالع النار بهدوء
غازي قطب جبينه وهو متعود بمثل هالمكان وبالوضع عادةً عيون بتال تطالع لفوق تتأمل السما واللي فيها ويطرب نفسه ويطربهم معه بهجينياته كشر بوجهه وهو يكره هالهدوء اللي حوله تقدم خطوة
بتال رفع عينه وانتبه له اعتدل بجلسته بصدمة من وجوده:جيت!!
غازي ابتسم وهو يجلس قباله وبينهم النار:وكيف تترك الشمس الظلام ياخذ راحته ولاتجليه(تطرده)!!
بتال رفع عينه وانتبه له اعتدل بجلسته بصدمة من وجوده:جيت!!
غازي ابتسم وهو يجلس قباله وبينهم النار:وكيف تترك الشمس الظلام ياخذ راحته ولاتجليه(تطرده)!!
بتال ابتسم وهو يثني ركبه ويحاوطهن بيديه:عاد الود ودي اضيفك بس انت شايف الوضع مامعي غير بطانيتي
غازي بسخرية وسط ابتسامته:ومن متى الكرم!!
بتال ضحك بخفة:فعلاا!!
غازي اختفت ابتسامته وهو يطالعه بشك
بتال شال نظراته عن غازي وهو يشوف الشك بعيرنه وطالع عالنار
غازي ابتسم:الجو يبي له قهوة
بتال بضيق:الحال مرّ مايبي له زيادة مرارة
غازي بجدية:ومرارة الحال ماتطيب الا بمرارة القهوة وصاحب تشتكي له
بتال يطالعه ساكت
غازي وقف:ابرجع لجسار اجيب العزبة،،ابتسم،،وبعدها بتذوق احلى مرارة بالحياة اهم شي لاتتحرك خلك هينا
بتال ضحك:وانا لمين اقدر اروح ياغازي!!
.
.........****..........
..بيت الجد نشمي..
،،الصالة،،
،،عالقهوة،،
الجد نشمي يطالع ابو غازي بحدة
الجدة منيرة بعصبية:محدن يوجس يمك طواري ابدن ابد!!امهبول عز الله امهبول ماانت بعقلك!!
رهايف جالسة جنب جدتها وهي شبه متخبية تسرق نظرات لـه وتشيلها عيونها بسرعة اول ماتلتقي عيونه بعيونها
ابو غازي جالس قبال امه بعصبيته:ماني مهبول مير هي اللي بها صمخ ماتوحي شين ابد!!
الجدة منيرة:نعنبوا حيك ياعويدل مرسلتك واسطة يمّها
رهايف التفتت تطالع جدتها بصدمة
الجدة منيرة:واغدي وارعيها متروعة!!!روع الله عدوك اَي والله
ابو غازي بتكشيرة:وش واسطته!!!تحمد ربها مانتفت اذانيها!!
الجدة منيرة:اوص اوص ياعادل لااسمع لك حس اوص
ابو غازي اتسعت عيونه وبحدة:يمه تسكتيني عشان هالبزر
رهايف رفعت نفسها شوي وهي تشوف جدتها معها
الجدة منيرة:انت احمد ربك مانتفت اذنك عشان هالبزر
ابو غازي طالع ابوه:يبه!!!
الجد نشمي:تستاهل
ابو غازي بصدمة:يبه!!
رهايف كتمت ضحكتها وهي تشوف وضع ابوها نفس وضعهم مع ابوه وامه
الجد نشمي:اجل واحدن خاط الشيب بلحيته ورأسه يطارد ورا بنيته تقل عاملتن شين يروع!!الحمدلله ماانهبلت البنية!!
الجد منيرة:وهو الضعوف باقي بهم عقل!!كل ابوهم من أكبرهم لا أصغرهم غدت عقولهم من فعايله!!
رهايف ميلت راسها وهي تفكر بهالكلام مدح او ذم
ابو غازي:ايه ايه كبري راسها وانفخيه علي ثمن تغتاظين علي
الجدة منيرة:وانا من متى اغتاظ على عيالك!!والله انهم دوا دوا مير الشكوى لله!!
ابو غازي بتكشيرة:وش تقصدين يمه انا علة!!
الجدة منيرة اتسعت عيونها:الله اكبر عليك تقولني شين ماقلته!!
ابو غازي وقف وبزعل:هاذي هي عندك وانا اروح لمسفر احسن لي،،مشى،،
الجدة منيرة:عادل
ابو غازي التفت لها
الجدة منيرة:ماتقول لها،،وهي ترفع يدها وتقفل قبضتها ماعدا السبابة والإبهام اللي قربتهم من بعض،،هه سمعت؟
ابو غازي زفر:سمعت سمعت،،مشى،،
رهايف برد قلبها وهي تسمع تاكيد ابوها وتدري مايكرو كلام لامه وابوه زفرت براحة
الجد نشمي:ازعلتيه بالحيل يامنيرة
الجدة منيرة بنرفزة:كبّه يغتاظ مطيور مايقّر ابدن عوذا!!
رهايف بتكشيرة:جدة!!تراه ابوي لاتغلطين!!
الجدة منيرة طالعته:صحيح!!وراك هاجّة عنه!!
رهايف اتسعت عيونها:متى!!
الجدة منيرة انجلطت:الله اكبر عليك!!
رهايف:ماهربت الموضوع سوء تفاهم بسيط احتاج لحل مؤقت بس
الجدة منيرة صدعت منها:لاتخثردين(تتفلسف)علي امرضتيني
رهايف:يمه بالظلم متى امرضتك!!
الجد نشمي ابتسم
رهايف:وتهاوشين ابوي وهو مثلك!!
الجدة منيرة قرصتها ع رجلها
رهايف وهي تمسح على رجلها:ااااه
الجدة منيرة:يمه منش ومن لسانش!!
رهايف طالعتها بتكشيرة:جدة اثبتي على لهجة وحدة جننتيني!!
الجدة منيرة:وانتي وش لش علومي وانا اخبر بها!!
رهايف:انا يالله افكك شفرات كلامنا العادي مافيني على كلامك والله تكفين ياجدة مافيني عالصداع!!
الجدة منيرة:مير انتي وجعانة دايم مامن جــديــد!!
رهايف:طالعة عليك والله
الجد نشمي ضحك
الجدة منيرة ضربتها:بنت!!
رهايف:الحق دايم يزعل!!وانا كل عمري عندك يعني وجعانة مثلك!!
الجدة منيرة:اهب يابنت اعقبي ماتستحين!!
رهايف وهي تتقهوى وتاخذ قطعة من بوكس الحلا اللي قدامها:وش هالحلا الجديد!!،،اكلت منه اتسعت عيونها،،مكسرات!!!
الجد نشمي:اَي بالله يارهايف شين جــديــد!!تهولت وانا اوحيها توصي حصة
الجدة منيرة وهي تتقهوى وتتصنع عدم الاهتمام:اشتهيته
رهايف اتسعت عيونها:وضروسك اللي غثيتينا فيها!!
الجدة منيرة بعصبية:انتي ماتستحين صدق!!وبعدين معك ازهم ابوك!!
رهايف ابتسمت وبنص عين:مقبولة الرشوة ياام عادل مقبولة بس ماعرفتك والله!!
الجدة منيرة بعصبية:اعقبي من متى انا أرشي احد!!
رهايف بابتسامة وشوفة نفس:راسلة ابوي واسطة والحلا اللي احبه ولاتقدرين عليه من ضروسك
الجدة منيرة مكشرة وهي تطالعها
رهايف:يعني خلاص وش اقول بعد ذا الدلع مااقدر مااقدر ابد ولو انه قليل بعد ذاك الضرب
الجد نشمي قطب جبينه:وش ضربه!!
رهايف وهي تأكل من الحلا:حادث عرضي ياجد بس ماعليك سلمنا لاتخاف،،طالعت جدتها وهي تغمز منها،،احلى من يرشي ويرسل واسطات والله ماعليه مقبولة منك مقبولة يامنّور
الجدة منيرة اتسعت عيونها:يالله من فـضـلـك والصبر على هالوغدة!!
.
..عند الحريم..
،،البنات اخذين لهم زاوية وهم يتهامسون،،
ريما:خليك بالسيف(الأمان)واسكتي
شذى:انا لو من منك البسها مصيبة،،ارتفعت حواجبها،،وليش تسكتين!!ارفعي الأسعار وكبدّيها افدح المشاكل
امجاد كشرت بوجهها
سهام:واااع بس ناقصك رهايف اسكتي واللي يعافيك اسكتي
امجاد:اقولك رجعتني عندها بالشركة مانزلت اسمي باي مدرسة
سهام:عشان يشوفك بالدخلة والخرجة!!
امجاد:بالضبط!!لا وتقول لاتشتغلين ارتاحي ومتى ماتبين تروحين البيت روحي وحتى اذا ماتبين تداومين عادي لاتداومين راتبك مابينقص غير الفطور والغدا!!
سهام:يمه تخوف
شذى بابتسامة وسط نبرة صوتها المسموعة للكل:يااااحظككك!!
،،الكل التفت عليهم،،
البنات ضحكوا يصرفون
سهام قرصت شذى وهي تهمس وسط ابتسامتها:ووجعوه شذى
ريما وهي تعدل نظرتها بربكة:ايه وبعدين
امجاد بابتسامة والعيون عليهم للحين:وبس والله
عذاري دخلت:السلام عليكم
شذى بابتسامة وهي تلتفت لسهام:قومي بسرعة بسرعة
سهام كشرت بوجهها
شذى بابتسامتها:بنت زوجك وصلت قومي استقبليها زين
سهام وقفت وهي ترسم ابتسامة وتطالع عذاري:يااهلا!!
شذى انصدمت ماتوقعت تسويها
ريما زفرت وهي تهز راسها وتوقف
عذاري سلمت عليهم بابتسامة وسحبت سهام معها وهي تجلس قبال البنات وبنظرات موجهة لأمجاد
امجاد عقدت حواجبها باستغراب
عذاري جلست وجنبها جلست سهام وهي تصد بوجهها عن امجاد
امجاد اتسعت عيونها مصدومة منها زفرت:هه!!
شذى طالعت امجاد:بسم الله وش فيها!!
امجاد:لاحظتي!!
شذى:هو انا لحالي الكل انتبه
امجاد زفرت وهي تطنشها وتلتفت لشذى:اتركيها ياشيخة،،كملت سوالفها مع شذى وريما،،
عذاري التفت وهي تاخذ القهوة من سهام واخذت نظرة سريعة لأمجاد وانغبنت وهي تشوفها تضحك ولاهمها
.
..بيت الشعر..
جواد جالس على جواله وقدامه القهوة
فيصل جالس جنب رامي بعيد عن جواد بيموت من الطفش
رامي يقرأ كتابه
فيصل:تكفى واللي يرحم والديك فكه اعتقه العب معي ياولد!!وش ذا طفشت وانا انتظرك!!
رامي وعينه بكتابه:عشر صفحات وأخلص العب قيم على مااخلص
فيصل:العب مع من!!كلهم طردوني من قروباتهم العب معي تكفى!!
رامي:عالعشر وأبشر
فيصل كشر بوجهه:غلطان اللي يكلمك!!اصلا وش احصل من وراك هذا انت بس على جوالك،،وقف وهو يتجه للتلفزيون وقف عنده وشغله وجلس وهو يشغل الاكس بوكس بوسط تكشيرة وجهه وبنفسه،،حسبي الله عليك يازيدوه قلبت الكل
جواد جلس جنب فيصل وبينهم مسافة بسيطة
فيصل التفت له باستغراب
جواد:ابي العب
فيصل رمى اليد عليه:العب لحالك
جواد ارتفع حاجبه:خايف؟
فيصل:اخر شي أكون خايف!!
جواد:طيب؟
فيصل:مااحب العب مع ناس ثقيلين عالقلب
جواد ضحك:نفس الشعور والله
فيصل كشر بوجهه
جواد:وبما اننا ثقيلين على بعض ومافيه غيرنا والوضع طفش وش رايك نلعب؟
فيصل يطالعه بتفكير
جواد:الا اذا صدق صدق خايف!!
فيصل:قلت لك ماني خايف!!ماتفهم
جواد سحب اليد ورماها بحضنه:اثبت طيب
فيصل وهو يعتدل بجلسته ويرفع اليد بيلعب:بس عشان طفشان ولا كلامك مايهمني ابد
جواد وهو يختار فريقه:اقول فيصل
فيصل وعينه عالتلفزيون:نعم
جواد:رهايف وش تحب؟
فيصل التفت له بتكشيرة:هذا اللي تبيه انت!!
.
..بيت مسفر..
ابو غازي جالس قباله وطفش من سكوته وبنرفزة:وثم يامسفر وثم تراها مختفرتن معي علامك انت بعد!!
ابو جواد:انا بغيتك بسالفة سهام وخالد
ابو غازي زفر وهو يطالعه:وش فيها؟
ابو جواد باحراج:والله العذر يااخوك كل شي صار بين الحريم مادريت غير والرجال يتصل
ابو غازي:هذا شي بينكم مالي فيه يامسفر
ابو جواد اتسعت عيونه:بس
ابو غازي قاطعه:دام البنت موافقة وقابله فيه من كل عقلها وقلبها تم والله يوفقهم
ابو جواد يطالعه ساكت
ابو غازي:خالد والنعم فيه وبيصونها ويقدرها مابه شك لكن سهام يامسفر سهام
ابو جواد:داري ياعادل داري
ابو غازي:فهمها قبل كل شي ماتجي بكرة وتزعل لاشفت الحال ماهو بعلى كيفها
ابو جواد:هي اللي غطت الناس كلمة بدون لاترد الراي لا لي ولا لامها
ابو غازي اتسعت عيونه وبحدة:وشو!!!
ابو جواد زفر:اللي سمعته
ابو غازي:أعقلوا من عيال كلن يسرح ويمرح بكيفه دام هاذي سالفتها اجل علمها من الحين يامسفر زواجها من خالد ماهو بلعبة ولاتكسر ظهرك بين الرجال بكرة دام هاذي اولها وحرّص عليها وانا اقول اعقلهن سهام طلعت مثلهن!!
ابو جواد:ابشر ابشر
ابو غازي:ولا انا اعلمها عنك احسن
ابو جواد بسرعة:لا لا انا اعرف لبنتي وطبايعها
ابو غازي:اسمع يامسفر خالد اصيل وراعي جمايل بكرة لاشافت البنت شي ماهو بعلى رايها لاتسوي شين يضر وانت خوين له قبل تكون نسيبه
ابو جواد:وهذا اللي مخوفني ياعادل استعجلت وبالحيل
ابو غازي:علّم البنت ونورها للحين انت بالبر وخالد حتى لو انك ترده الحين ماهو باخذن عليك يامسفر
ابو جواد زفر
ابو غازي بتأكيد على رايه:انت للحين بمنطقة الراحة رده كود انك متحير يامسفر رده
ابو جواد:خالد مابه عيب وماينرد
ابو غازي قال اللي بقلبه اخيرا:سهام كبر عذاري يامسفر!!!
ابو جواد:والعمر ماهو بعيب
ابو غازي:خابر خابر العلم ومتوكل من خالد وطبعه مير سهام تصبر يامسفر هذا هو مربط الفرس!!
.
..بيت فاهد..
يوسف دخل للبيت بيده شنطته وهو يمر من الصالة المفتوحة عالبيت كله
فاهد بكوب قهوته المرة جالس بالصالة على معاملاته يتقهوى اتسعت عيونه وهو يطالعه
يوسف وقف يطالعه بملامح خالية من اَي تعبير وسط حيرة تحتويه
فاهد نزل اوراقه اللي بيديه وهو يرسم ابتسامة على وجهه ويوقف:هـلا هـلا!!هلا بالتيس الأجرب اللي مايوحي لاحدن كلمة،،طالعه باستغراب وهو مايشوفه يتجه له يسلم عليه،،
يوسف تبادل النظرات مع ابوه بهدوء ثم ترك الشنطة من يده وطاحت عالارض
فاهد قطب جبينه وهو يطالعه
يوسف فتح يديه وهو يرسم ابتسامة عريضة على ملامح وجهه ويمشي باتجاهه:داااادي
فاهد ماتحرك وهو كله شك من وضعه
يوسف حاوط ابوه وهو يسلم على راسه وتنهد وهو ضامه وبالانجليزي:ابي مارايك ان نعود من حيث اتينا؟
فاهد تاكدت شكوكه بعد اللي سمعه اكيد فيه شي صاير فكه عنه وبلهجته:هماك مذينا(ازعجهم)ابي اغدي يم ديرتي مااريد هالديار!!
يوسف طالعه ساكت وسط تكشيرة معتلية وجهه
فاهد:عقب ماتعبنا على النقل وبالقوة دبرنا امورنا توجس هالعلوم!!!
يوسف:مثل ماجينا نعود
فاهد وهو يكتم غيظه:علمني وش العلم اللي قالبن خلقتك!!
يوسف ضحك وبابتسامته:العلم!!والله ماظنتي بتستانس
فاهد بحدة:اوجس يايوسف!!
يوسف:ماعلمك خالي
فاهد يطالعه بتقطيبة جبينه
يوسف:وشلون يعلمك وهو بنفسه ماهو بمصدق العلم!!
فاهد:يوسف اعجل علي لااغدي بك شرق ورب النعمة!!
يوسف:انا والله متحير اوجس يمك مبروك واوجس لروحي يافرحتك
فاهد يسمعه بكل اهتمام وسط اعصابه المشدودة
يوسف اختفت ابتسامته وبحزن:ولا اوجس ياشين ماارعيت يابتال طول هالسنين وصبرت على فعول غيرك!!
فاهد قطب جبينه:من هو ذا؟!!
يوسف:من هو!!،،ضحك بخفة وسط وجع قلبه وهو يتخيل بس كيف عاش بتال وسطهم،،ولد جميلة يبه
فاهد تغير وجهه:جميلة من!!
يوسف:جميلة يبه جميلة اللي تخبرها جميلة ماغيرها!!
فاهد ثقلت رجوله وهو يسمع هالخبر الصادم اللي ماتوقعه ولو بيوم بحياته وبصوت ثابت رغم تداخل المشاعر الغريبة اللي بصدره وهو يتمنى مايكون ولده:ولد لجميلة ماشاء الله الله يحفظه لجده اكيد تزوجت بعدي الدنيا ماهي بواقفتن علي
يوسف بغبنة وهو يشوفه يرمي المسؤولية عن نفسه وبصراخ:الا ولدك!!ولدك يبه يعني اخوي اخوي يبه!!
فاهد بفجعة وضحت وضيعت ملامحه الثابتة الجدية:كيف ولدي!!وش عمره!!وثمن جميلة مرضت من عملتي وتوفت مابه ولد ابدن مابه!!
يوسف وهو يطالع ارتباكه وبحقد:لا به ولد يبه به!!انت بس راعه وبتوكد(تتاكد)انه ولدك!!ملامح وجهك يبه هي ملامحه تقاسيم وجهه نفس تقاسيمك حتى خطّة(رسمة)عوارضك يبه هي هي مابها خلاف،،صرخ،،المريّة(العلامة)اللي ماهي بك شامتين بوجهه
فاهد جلس بصدمته وهو يهمس لنفسه وبنفسه يتأكد ويستوعب الملامح ملامحه والشامات من جميلة وقف وبربكته وهو يمشي:انا لازم اراعيه،اراعيه بعيوني حتى اتوكد
يوسف مسكه يوقفه وبغبنة:تتوكد من وش يبه!!اوجس يمك ولدك وش وراه!!نفس الخلقة وش وراه!!!وش تريد منه!!تريد تراعي حالته عقب مااوحى العلم اللي يضيق الصدر من جدي!!والله العالم وش اوحى غيره طول السنين!!
فاهد يطالعه بتوتر وخوف ملى صدره:وش اوجس يمه؟!
يوسف ضحك:ابد مااوجس يمه الا انه لو تربي ياعادل ماتربي الدم هو الدم مايتغير!!
فاهد انخطف وجهه:ربى يم عادل!!،،سحب يده ومشى وهو يمر بباله أنواع العذاب اللي تفنن فيها عادل بهالولد المسكين ويردد برعبه،،ربى يم عادل وذالحين عند بادي،،بحسرة فاضت معها مشاعر غرقت عيونه دموع رحمة بهالولد من اللي شافه طول عمره وبحرقة قلبه عليه،،اويلي عليه اويلي وش انعمل به من وراي وش!!
يوسف يلحقه:يبه وين غادين يمّه!!
فاهد:غادين يم ذنبي اللي مالي علمن به وكابّه وراي يظلمونه!!
.
.........****..........
أم جـلاجـل
.
..بيت الشلة..
غازي يدق الباب بقوة
راشد فتح الباب بفرحة وهو يطالعه:غازي!!
غازي ابتسم وهو يسلم عليه:هـلا برويشد هلا!!
راشد دخله وهو للحين مصافح غازي بيمينه وقفل الباب وراه بيده اليسار وهو يهلي به ويرحب وسط ابتسامته
عذبة استقبلتهم وهي تفتح يديها له:ياحي الغازي ياحيّه
غازي ترك يد راشد وهو يسرع بخطواته لعمته ويحتضنها ويسلم على راسها:وشلونك ياعمة وشلونك عساك بخير
عذبة بابتسامة:بخير جعلك بخير ياعيني
غازي تركها وهو واقف قبالها:وش ذا الخيانة ياعمة تارك جدي وجدتي والله يضيعون من وراك
عذبة ضحكت:مابيضيعون اخواني فيهم الخير والبركة
غازي بنص عين:علينا هالحركات علينا ياعذبة انتي بس تبين تشوفين وش يسوون بدونك صح؟
عذبة:ارتاح بس وخل هالسوالف عنك لاحقين على المناقر
غازي:عاد بذي اسمحي لي يالعذبة
عذبة بتقطيبة جبينها:خير
غازي:الليلة الوعد سمرة مع بتال
راشد ميل فمه وهو يطالعه بشك بس ظل ساكت ماتدخل
عذبة:وش فيه بتال ياغازي؟
غازي بابتسامة:مافيه شي بس اشتاق للسمرات وجوهن
عذبة سكتت وهي تسمع تصريفته واتجهت للغرفة
غازي طالع راشد:وين العزبة حقتكم؟
راشد:داخل بالمطبخ،،اتجه المطبخ يجيبها،،
عذبة وقفت قباله ومعها بطانيتين مدتها له:تدفوا زين هالجو ماهو بجو سمرات وانا عمتك
غازي اخذها منها وهو يسلم على راسها:ابشري ياعمة ابشري الله لايحرمني منك
راشد وقف ومعه العزبة:وين احطها لك؟
.
.
<اللهم صل وسلم على نبينا محمد>
.
.