عرس الفاميلة

الفصل الثاني

مرت يومين...بها بدات التجهيزات لعرس ابنة العم لبنى،باقي لعرسها غير القليل لي تختارت حالتو الجدة لي كلشي كايقدرها ويهابها..

كانو مجموعين فالكوزينة فالطاج التحت ديال الجدة كايوجدو فالغذاء بحكم خصصو لتحت للأشغال بحال الطياب الخ..

والباقي خلاوه للضياف وكيف كان مفروض على الباقي أغلب البيوت خواوهوم لعائلة العريس لي جايين من مدينة بعيدة...

شادة مع عمتها العازبة لحم كايقطعوها وكايضحكو..حتى ذخلات عليهم الأم "عزيزة"كاتنشف فيديها ومشطونة..شافت فيهم وحركات يديها بسرعة:خففو يدييكم راه قربوو يوصلو..

منال حكات جبينها بذراعها لأن يديها عامرين،وشافت فمها بعياء:واخة هاحنا راه كانحاولو هادشي كثيير!!

عزيزة شدات جنابها وحركات راسها:آححح على هااذييك فلييفلة داارت هكك وداازت هرباات من شغوول!!

العمة "رشيدة":خلييها حتى نتي هااذيبك ذراعهاا رااشي هاالحوييرة هيي مناال التااوييل والحدااكة..الله يجييب ليييها شي نقرة فين يغبر نحاسهاا...

عزيزة هزات يديها للفوق وراسها:أمييين من فمك للسماء

منال شافت فيهم مصغرة عينيها وقالت مخنزرة:شكوون قال ليكووم انا بااغة زوااج..أنا مزاال باااقة الحيااة قدااميي

رشيدة هزات حاجب ونزلات لاخر:مصغييرتك 20 عاام!!كلسيي حتى تبووري بحاال عمتكك..وكلسييي حداايا ونسيينيي حييت مكااين لي يخلذ فهااذ الخربة من غيييرناا!!

عزيزة تفتفات فحوايجها:تف تف تف لهلاا يدييرها..

تسمع صوت كايناديها..

"عزييزة..عزييزة النااس وصلوو جييبيي المرييشة..وااعزييزة"

تحركات بسرعة كاتقلب جنابها:فيينها وييلي على شووهة...

مشات بسرعة كاتقلب على المريشة لي عامرة بريحة العود..هزات زوج كل وحدة فيد،وتمشات بيهم ناحية الباب هازاهم وابتسامة على ثغرها،لقات عكوزتها"الجدة"كاترمقها بنظرات حادة لتأخرها..

بسرعة مشات كاترحب بالناس وترش ليهم الريحة وكاتهتف غير ب 'مرحباا مرحباا نهاار كبيير هااذا شرفتوونا فييه'

سلمات على النساء والبنات لي كانو سابقين كل وحدة يااوحدة بالهمة والتاويل لابسين جليلبات ثقال بالعقييق،واليديين كايشرشلو بدبالج وبارسلياات الذهب..الفولار على شعرهم ملفوف بطريقة شييك،والمشية والجواب كلاس واخة هكاك مصاوبين ومتواضعيين..

عاد الرجال لي كتافات غير تريحهم وتهز راسها بترحيب،أما الشاب لي تلاو حتى لخر كايذخلو معاهم العريس و ثلاثة شباب آخرين..كل واحد ياواحد الطولة والنخوة وهيبة سابقاهم لي بداوه الرجالة كملوه هوما،ريحة لي رشات ليهم مابقات كاتبان قدام ريحتهم الرجولية لي فايحة منهم ذغيا تعكرات بيها أرجاء الدار وتغلغلات فنيوف العيالات،كل واحد كايتمشا كايتمختر ماشي متعمد!لكن بنيتو كاتفرض على جسمو ديك النخوة والرجوولة والهييبة...