احببت ساديه I loved a sadistic woman

اختيار صعب

أحببت سادية

الجزء التاسع عشر

الإختيار

سؤال موجود ديما في كل عصر و أون ، الإنسان مخير ولا مسير ، رأيي إن الإنسان خليط بين الأثنين ، هو مخير لان ربنا أداله العقل أللي يختار بيه و يتحاسب على تصرفاته و مسير لان فيه حاجات مكتوبه عليه من قبل ما يتولد زي النوع و السن يعني حيعيش قد أيه و امه و أبوه مين و غيره ، و هنا لازم ناخد بالنا جدا أن أي حاجة حتختارها حتتحاسب عليها ، و أنك تبقى عارف ده و فاهمه كويس جدا حيديك قوة أكبر مما تتخيل حتقولي إزاي حقولك لما أنت عارف إنك ممكن تقول لأ حيخليك مترضاش تكون مغصوب على حاجة و قبل ما تسمح لحد يغصبك على حاجة حتدور على ميت بديل للحاجة دي ، و حتى لو إتغصبت على حاجة حيفضل جواك مستني الوقت أللي تاخد فيه القرار عشان ترفض كل ده و تقول لأ .

ودي أهم حاجة في العلاقات ، أي نوع من أنواع العلاقات مفيش طرف مجبر على حاجة ، تقدر تقول أنها بتتم بنوع من الإتفاق حتى من غير كلام ، و عشان تكون فيها مرتاح لازم تنتبه و تختار صح أللي يناسبك و يفهمك و يحافظ عليك و يراعي ربنا فيك غير كدا يبقى ملهاش لزوم لانها بدل ما تكون العلاقة سبب للسعادة حتكون مصدر للألم .

مساكم سعادة ..... أخوكم الراقي

و دون مقدمات ألقت بجسدها إليه لتصدمه مفاجأة كل ما حدث ، تشبثت نظراتها بعينيه و كانها طوق النجاة أو أخر ما أرادت رؤيته بهذا العالم . لم تعلم أنها أحبته لتلك الدرجة ، فهى القوية التي ترتمي القلوب تحت أقدامها لكنها إختارته هو حتى دون أن تدري ، و رغم ما كان منها من كبرياء لرفض هذا الحب لكن ما حدث أثبت لها قبل أن يثبت للجميع أنها حقا أحبته .

لحظات تلاقت بها العيون لتصف أروع إعتراف بالحب و تغمض عينيها ليجد هو الدماء قد غطت يديه ....

فلاش باك

ياااه يا معلمة صفاء و الله الواحد ما عارف يرد جمايلك إزاي بس حقول أيه طول عمرك أم الجدعنة كلها يا معلمة .

إيه لزمته الكلام ده يا دقدق ده أنتم رجالتي و اخواتي و أولادكم أولادي و البت عزة بنتك ليها غلاوة بنتي بالظبط و يحز في نفسي ألاقيها بتتوجع كدا .

تقومي تدفعي تمن العملية بالكامل من جيبك أنتى و كمان من فجر ربنا واقفة على رجلك معانا في المستشفى

ياااه يا دقدق أنا كدا حزعل منك ده إحنا عيش و ملح سنين سوا و ربنا يبعد عنا ولاد الحرام . يلا أرجع انت المستشفى ، لولا حلفانك أنك توصلني الحته أنا كنت رجعن لوحدي .

ده أبسط حاجة قصاد جميلك اللي حيفضل في رقبتي العمر كله .... بصي كدا يا معلمة !!!

فيه أيه يا دقدق ؟!

بصي كدا على قهوة الواد زغلول مش أللي قاعد جوا ده و مداري نفسه يبقى محروس

أيوة صحيح ده هو بس إيه أللي جايبه هنا الساعة دى و أيه أللي عامله في نفسه ده ؟ ليه لابس شال على دماغه و كانه خايف حد يشوفه . إستنى يا دقدق هى الساعة تجيها كام دلوأت .