احببت ساديه I loved a sadistic woman

بعد فوات الاوان

أحببت سادية

الفصل الواحد و العشرون

بعد فوات الأوان

كتير بنسمع أن الصح بيجي في الوقت الغلط و كمان بنصدق ده و بنقنع نفسنا بيه بس الحقيقة أن عمر الصح ما يجي وقت الغلط . يا أما يكون هو نفسه غلط ، يا أما يكون فرصة تنقذك من أللي أنت فيه . لازم تكون صادق مع نفسك عشان تقدر تعرف إيه هو الصح من الغلط و لازم يكون من جواك القوة اللي تخليك تختار الصح و تحارب عشان تحصل عليه . غير كدا متلومش غير نفسك لان وقتها فعلا حيفوتك كتير .

تعرف يا صاحبي أيه أللي فعلا بيكون مشكلة لما تحكم على حد غلط و متعرفش الصح إلا بعد فوات الأوان ، ذي إنك تتهم حد من غير دليل لان ده حيكون ظلم ليه و لما تعرف الحقيقة و تحاول تصلح الموقف يقولك بعد إيه ما فات الأوان . أو إنك تأجل قرار لازم تاخده لوقت طويل لغاية ما يضيع من ايدك كل شيء و تاخد القرار بعد فوات الأوان .

إفهم كويس إنك لازم تكون جريء ،الحياة عايزة مغامرة ، عايزة منك تطوعها عشان تكون ملك أيديك ، و متكونش أنت تحت رحمتها لإن وقتها صدقني مش حترحمك . أنت إتخلقت قوي مش ضعيف و ليك عقل يوزن كل شيء ، فحاول ديم تختار صح و تاخد القرار قبل ما تندم بعد فوات الأوان .

أحببت سادية ........ الراقي

صباح الخير يا سوزان

صباح الخير يا أستاذ محمود

مالك يا بنتي أول مرة أشوفك بالحالة دي من وقت ما إشتغلتي معانا في الشركة ، فيه حاجة حصلت ؟ شكلك فعلا النهاردة غريب

بكت سوزان كثيرا قبل ما تجيب على محمود و علم أن بداخلها ألم كبير تركها حتى هدأت لتحكي له ما حدث .

أنا كنت حتقع في مصيبة كبيرة يا أستاذ محمود بس ربنا عالم بحالى و عالم اني مش وحشه ذي ما الكل فاكر فسترها معايا و وقف جنبي

يا ساتر يارب مصيبة أيه خير قوليلي يمكن أقدر أساعدك بحاجة .

بص يا أستاذ محمود أنا عارفة إني في نظركم كلكم بنت طايشة مغرورة بتلبس أللي يعجبها و تبقى مبسوطة من نظرات الإعجاب ليها و أنا مش حنكر إنها الحقيقة بس فيه حقيقة تانية أنا من أسرة متوسطة و كان كل حلمي زي بنات كتير أخرج و اتفسح و أسافر و أحقق كل أللي بحلم بيه . سبت اهلى و جيت القاهرة و إشتغلت بس حسيت إني مهما عملت من شغلي مش حوصل للي بحلم بيه ، و بقى تركيزي كله إني ألبس أخر شياكة و أظهر جمالي يمكن أقدر ألاقي العريس أللي يكون فتى أحلامي و يحققلي أللي بحلم بيه .

مهما كان الدافع لكن الأسلوب غلط يا سوزان ده مش حيخلي عريس يقرب منك ده حيخليكي فريسة سهلة في نظر الجميع .

و فعلا ده أللي حصل

نعم إزاي يعني فهميني حصل أيه

إتعرفت من كام يوم على واحد قال إنه مليونير و ابن مليونير و لما عرف إن عيد ميلادي كان بعدها بيومين عملي حفلة في نيت كلب مستوى عالي أوي و أول مرة ألاقي أللي كنت بتفرج عليه في السينما بيتحقق بس مكنتش أعرف إن التمن غالي .