" ဦးနောင် အလုပ်တွေ မပြီးသေးဘူးလား ဟင်။ "
လေးမြတ်လွန်းက အိပ်ယာပေါ်မှာ ဘေးတစ်ခြမ်းစောင်းကာ လှဲနေရင်းမှ မေးလာသည်။ တည်တံ့နောင်က laptopကို ပေါင်ပေါ်တင်ထားရင်းမှ ကျန်ရှိနေသော စာရင်းတွေ လုပ်နေရသည်။
" အင်း ... ပြီးတော့မှာ။ တစ်နာရီလောက်တော့ ကြာဦးမယ်။ လေး အိပ်ချင်ရင် အိပ်လေ။ ကိုယ့်ကို မစောင့်လည်း ရတယ်။ "
လေးမြတ်လွန်းက ခေါင်းလေးရမ်းပြသည်။ ဆယ်နာရီခွဲပြီးခါစမို့ အရမ်းမအိပ်ချင်သေးပါ။ လေးမြတ်လွန်းက စောင်ခြုံထားလျက်ဖြင့် တည်တံ့နောင်နည်းတူ ထိုင်လိုက်သည်။ ပြီးနောက် တည်တံ့နောင်လုပ်နေတဲ့ စာရင်းတွေကို ခေါင်းလေးငုံ့ကာ ကြည့်သည်။
တည်တံ့နောင်က လေးမြတ်လွန်းပါ မြင်ရအောင် laptopကို နေရာရွေ့ပေးသည်။
" ကိုယ်ရှင်းပြပေးရမလား။ရှင်းပြပေးစေချင်လား။ "
တည်တံ့နောင်က မေးလာတော့ လေးမြတ်လွန်းက ပြုံးရင်းမှ ခေါင်းတဆက်ဆက်ငြိမ့်ပြသည်။ တည်တံ့နောင်က ခုဏကလိုမဟုတ်ပဲ စာရင်းကို အကျယ်ချဲ့လိုက်ပြီးမှ အချိန်ပေးကာ တစ်ခုချင်း လုပ်ပြသည်။ ပါးစပ်မှလည်း သေချာနားလည်အောင် ရှင်းပြသေးသည်။
" ဒီလိုဆိုရင်ရော။ "
လေးမြတ်လွန်းက ကိုယ်တိုင်ဝင်လုပ်ကြည့်တော့ တည်တံ့နောင်က လေးမြတ်လွန်း၏ လက်လေးပေါ်မှာ ထပ်အုပ်ကိုင်လိုက်ပြီးမှ ဇယားကွက်တွေကို နေရာရွှေ့ကာ သေချာလေး ရှင်းပြသည်။
" တစ်နှစ်တာ ဝင်ငွေရဲ့ ပျမ်းမျှနဲ့တွက်ရတာလေ လေးရဲ့။ ဒီထဲမှာ ဝန်ထမ်းတွေရဲ့လစာ၊ စာရေးမတွေရဲ့လစာနဲ့ HRရဲ့လစာ စသဖြင့် အမျိုးမျိုးရှိတယ်လေ။ ပုံသေမဟုတ်ဘူး။ နောက်ပြီး ရှယ်ယာရှင်တွေမှာလည်း ပါဝင်ထားတဲ့ Percentageပမာဏက မတူညီကြဘူးလေ။ "
" သြော် ... အင်း "
လေးမြတ်လွန်းက စိတ်ဝင်စားနေတာမို့ ခန္ဓာကိုယ် တစ်ဝက်က တည်တံ့နောင်၏ ရင်ခွင်ထဲ ရောက်နေပြီ။တည်တံ့နောင်က လေးမြတ်လွန်း၏ ပုခုံးပေါ်မှာ ဝိုက်ကာ သိမ်းဖက်ထားသည့် အနေအထားဖြင့် လေးမြတ်လွန်းလက်လေးကို ကိုင်ကာ နောက်ထပ် ထပ်ရှင်းပြသည်။
