(#شمسين 🔥♥️)

البارت 102

خلصت مكالمتي وياها اللي شلعت گلبي بيها
ورجعت اتصلت على ابويه وابد مچنت متوترة ولا متردده
حتى ميشك بيا ويعرف اني داخله بهالموضوع من طرف هُدى
شوي وجاوبني واجاني صوته التعبان
- ها بابا
- بابا اريد احچي وياك بموضوع مهم حيل
- نگدر بعدين ؟ لان حيل مشغول ويمي شغلة مهمة
- لاا لاا أصلا اعرف شغلك المهم هو بخصوصه
- شصاير شكو ؟
- بابا هدى اتصلت عليا وتعرف بموضوع زيد وطلبت تساعدهم
- بشنو تساعدهم ؟
- مسألتني منين عرفت؟
- اعرف من أنس
- شمدريك بعلاقتهم. !
- يوسف گالي
فزز گلبيي لأسمه وگمت اتلعثم بالكلام ومعرفت حتى اسوولف
- اااا ايي شسمه عجل
- شنو بابا
- تريد انت تحچي ويا اهلها وهيچ حتى تگوللهم يجيبونها تشهد
- ما داعي بابا .. مو حاجة همه صدگوا انها قضية شرف
- اايييي وشنووو حيطلعووون؟؟؟!
حسيت على روحي اتحمست زايد ورجعت
- ااححمم يعني شحيصير
- مايغير شي ..
- شلووون
- يعني حتى لو قضية شرف ودفاع عنها خوما بالقتل ؟؟ هالشي مايغطي عن اللي سووه يبقى القتل قتل واله حكمه وجزائه .. چانو يگدرون يمنعونه باي طريقة غير عن القتل .. وهذا مو كلامي ولا رأيي القانون هيچ يگول9
نفخت وگلت بخيبة واضحة بصوتي

- وهسه شصار؟
- هسه كمل التحقيق ودعوا الاوراق للمستشار القانوني حتى يدققها ويرسلها للآمر يحيلها للمحكمة العسكرية
- يعني اليوم محاكمتهم
- لا مو اكيد لان لازم المحكمة العسكرية يرجعون القضية للمسشتار حتى يدقق ييها ويكمل النقوصات وراها عاد المحكمة .. واحتمال چبير باچر ..1

- الله يكتبلهم اللي بي الخير
- ان شاء الله.. محتاجة شي بعد
- سلامتك
سديته من عنده والقوة اللي گلت راح اساعده بيها كلها راحت وطارت
اتصلت بشمس وسولفتلها عن كل اللي حچالي عليه بابا
وانهُ ماكو أمل حتى لو هُدى راحت وشهدت  لا يقدم ولا يأخر شي
عافتني شمس وراحت تبچي والاتصال بعده مفتوح
مااسمع بس شهگاتها بالموبايل
سديته من عدها واني عيون يحرجني من الدمع واتمنيت اگعد وابچي مثلها
بس للاسف ... اني يم البچي اضعف ومااگدر ابچي معندي القوة حتى اطلع دموعي وارتاح منهن
__
گاعد بغرفة على انفراد
گدامي 3 ضباط
بلشوا التحقيق وياي وحچيت كل اللي صار ويانا
حاولت شكد ما اگدر اسولف الموضوع كله بدون لا زيادة ولا نقصان بحرف لان وراي راح يحققون وي يوسف
واحنه متفقين نسولف القصة كلها
لان اي خطأ او مجرد انسى جزء منها ... يوسف يروح بيها وراح يطلعونه چذاب او يمكن اني اللي اطلع دااخفي الحقيقة

كمل التحقيق وطلعوني واجه وراي يوسف ماشفته ولا التقينا
گاعد بالممر وانتظره طلع يوسف وحالته ابدد مو زينه ونفسيته مدمرة

اعرفه من يحچي بموضوع زيد هيچ يصير بي ويتعب
اجه صافي وگالي دبرت رقم ريم
- اي عفيه اتصلت بيها؟
- اي اتصلت بس بسرعة لمن عرفت اني صافي گلتلي للتصل بيهه ابدد اني بس اگدر واح اخابرك
- ومعرفت ليش هيج سوت؟
- مادري .. اكيد مسويه فد مشكلة
- صافي لتخليها تنهزم منك
- لا افا عليك وراها وراها والله لو اعرف اروحلها للبيت
- عفيه بالذيب .. يلا هسه ارجع للبيت ميصير نلتقي اصلا وليشوفك احد
- انتبهوا لنفسكم .. سمعت العميد ديخابر ويطلب تنسجون على انفراد بس انت ويوسف
- ماقصر ويانا ..
- اي وان شاء الله يوافقون على طلبه لان خايف عليكم حيل والله
- لتخاف لتخاف ميصير شي
- ان شاء الله محد يسويلكم شي
- صافي اخبار اهلي ؟
- كلهم زينين
- لتچذب عليا !
- والله شگلك اهلك عرفوا كلهم
- وامي شحالها؟
- ابد مو زينه بس هسه لا صارت زينة لان اقتنعت وفهمت انت دافعت عن وحده .. فخورة بيكم هي
- وشمس؟
- تعبانة شوي بس قوية هي لتخاف عليها
- اعرف اعرف ... يلا صافي روح لتصيرلك مشكلة
- تمام رايح .. واي خبر اسمعه ويصير وياي احاول ازوركم
- احنه اليوم باقين هنا .. حاول تعرف كلشي قبل المحكمة وقبل منروح للسجن لان حتصير صعبة الزيارة ..
- تمام ابن خالتي..
- الله وياك
...
مر اليوم مثل الكابوس... كئيب.. مظلم
محچيت ويا يوسف چثير لان هو تعبان حيل وگضاها يمثل انهُ نايم
تعبت نفسيته بالزايد بالليل ما طلع الصبح الا احنه ميتين الف موتة من وراه
گعدنا الصبح
كلشي سويناه بركض واستعجال
خلصنا كلشي بسرعة ورحنا اتوجهنا للمحكمة وويانا العميد
وصلنا هناك وماكو اي خبر من صافي
عرفت انهُ مارجعت اتصلت بي لسه
طبينا ممرات المحكمة وكعدنا شوي
وصارت الجلسة
دنتمشى بالممرات حتى نروح واجاني احساس مو حلو ...
حسيت انهُ مراح اطلع من هالمحكمة الا وهمه حاكمين علينا بشي صعب
الليل كله وانا داحاول احلم واتأمل انهُ شكم شهر بس
فات يوسف گدامي وچان مستعجل حييل مثل كل مرة تنفتح سالفة زيد
حتى بس يحصل عقابه ويرتاح منها
اما اني .. مشيت بثقل .. حسيت روحي بالگوه داسحب بنفسي حتى افوت
لان اعرف مصيري .. واعرف هالمصير قيمته شمس وخسارتها ..
_