كنت بمسح في الأرض وتفكيري كلو في اخواتي خايفة عمتي تعمل ليهم حاجة بعد م هددتها و بدون م انتبه كان في مزهرية كرستالية كدا وقعت و اتكسرت جاتني مدام سليمة طايرة و كأنها كانت مستنية اللحظة دي من زمن قالت لي بي نهرة و صوت حاد كدا ي مرض انتي عملتي شنو حتى انا م استوعبت متين اتكسرت و متين المرة دي جات ادتني كف لمن وقعت في الأرض و جنب القزاز و جرحت يدي و وشي بقا احمر و الدم جا نازل من خشمي و كانت لابسة خاتم في يدها و محلو احمر اكتر من باقي الأماكن طوالي بقيت ابكي و بقيت اقول امي وين انتي شوفي بتك ابوي لي شنو مشيتو خليتوني و بقيت اصرخ جيداء و رفيدة جو نازلين و بسالو في امهم في شنو و لقوني في حالتي ديك رفيدة طوالي جات مسكت يدي قالت لي دا شنو العمل فيك كدا و شافت أثر أصابع مدام سليمة في وشي لمن المحل اتورم سليمة قالت لي رفيدة قومي من جنبها واحدة متخلفة م عارفة المزهرية دي أغلى منها بالله دي جايبنها من امريكا عارفة يعني شنو رفيدة بي صدمة في امها قالت ليها امي دي شنو عدم الإنسانية الدخلت فيك فجاءة دي م كنتي كدا امها قالت ليها جاية تعلميني كيف اتصرف مع الخدم رفيدة قالت ليها م ممكن معاك ي امي هي جاية تشتغل و الشغل م عيب و بعدين انتي مالك مقاصدة وريف كدا دي م اول مرة تتكسر حاجة و لي ضارباها كف شوفي وشها بقا عامل كيف عاينت لي جيداء وقالت ليها أجرى جيبي علبة الإسعافات و جيبي لي مويه جيداء جرت جابتهم و وريف بس بتبكي و رفيدة بطلع ليها في القزاز سليمة قالت بنات دليدة ديل غير الكف م بينفع معاهم عشان يتعلمو الاحترام تلقاهم وارثين اللائامة من امهم اصلو غير كدا اتوقع منهم شنو و مشت كنت عايزة اقول ليها انتي قصتك مع امي شنو لكن م قادرة حاسة خشمي زاتو خدران و الدموع كل م تجي فوق محل الكف بحس بي وجع أكبر رفيدة قالت لي اسفة ي وريف م عارفة امي دي حاصل عليها شنو اصلو م في حياتة عاملت زول كدا هزيت ليها راسي بمعنى م مشكلة كبت لي المعقم بقيت اصرخ و قلت ليها حار قالت لي اصبري عشان يدك م تلتهب و لفت لي المكان حاسة يدي بقت تقيلة و لمن دخل فيها القزاز حسيت زي كانو دخل في قلبي قمت عشان أتم النضافة رفيدة قالت لي لا امشي الليلة باقي اليوم اجازة بقيت بعاين ليها ابتسمت وقالت لي م تخافي انا بتصرف مع امي مشيت و طول الشارع ببكي و بقول في نفسي لو ابوي كان موجود م كان دا كلو حصل لمن اتعترت و جيت واقعة على يدي تاني بقت تكب دم م قدرت اقوم من محلي زاتو بقيت ماسكة يدي وقعد ابكي و التراب ملا وشي و الشمس كانت نص السما اليتم دا حاجة شينة صحي والله م بتعرف قيمة الحاجة الا لمن تفقدها اتكورت على شكل الجنين في الأرض و بقيت ابكي و اقول في نفسي ليه ي ابوي ليه فضلت على الحالة ديك يمكن نص ساعة وانا ببكي و عيوني بقو دم بس و حسي زاتو راح و بقيت ائئن من الوجع الحاصل على دا فجاءة في يد اتختت على كتفي و زول بقول لي ي اخت مالك ي اخت ساعدني اقوم م عاينت ليهو زاتو بقا بقول لي انتي كويسة و مالة يدك ي بت مالك م بتردي عاينت ليهو بي كسرة كدا و مشيت بقا واقف وبقول حسبي الله ونعم الوكيل عاين في الأرض لقا سلسل فضة فيهو حرف Mرفعو وقال دا اكيد حقها عاين لقاني اختفيت قال م مشكلة و علقو في علاقة المفاتيح وقال ح ألقاها اكيد في يوم من الأيام رجعت البيت وانا حيل م فيني اول م دخلت عمتي عايزة تسألني شافتني في حالتي ديك سكتت دخلت طوالي لي الغرفة لقيت ريل و ريم و رماح قاعدين يعاينو في الكراسات و الكتب الجابتهم ليهم عمتي من شافوني جرى جو قالو لي مالك م قدرت ارد ليهم زاتو شدة م م حاسة بي خشمي أشرت ليهم على السرير عايزة ارقد ريم ساعدتني اطلع العباية و نفضت لي شعري اللي كان حلو و طويل أسى اتقصف و بقا قصير اتحسر على شنو و لا على شنو ابوي شهر واحد بس من راح و دي حالتنا رقدت في السرير و دلال بتقول لي أتى مالت عيانة و تمسح في وشي مع انو لمستها على مكان الكف حارة لكن برضو حسيت بي دفا امي في يدينها وقلت لي نفسي أسى نحن ح نقعد السنين دي كلها معاهم و لمن وصلت للنقطة دي قلت مستحيل اخلي اخواتي يعانو زيي و يشتغلو في البيوت مستحيل ريم جات هبشت راسي قالت لي مالك محمومة كدا اصلا ريم بي طبعها حنينة فطوالي بكت اما ريل عندها شخصية قوية جرت جابت موية و بدت تعمل لي مكمدات مسحت ليها دموعها و هزيت ليها راسي بمعنى اني كويسة جابت لي بندول بلعتو بالغصب حسيت حلقي اتقفل و دلال لسه بتمسح على وشي م عارفة كيف ولا متين نمت وانا بفكر اني لازم اعمل حاجة اضمن مستقبل اخواتي صحيت لقيت اخواتي كلهم راقدين في رجلي ابتسمت بصعوبة و عايزة اقوم حسيت راسي دا تقيييل و م قادرة ارفعو عاينت لي يدي لقيتها ملفوفة بي شاش جديد و لونها باقي ازرق م قدرت اقوم و م عارفة الساعة كم بس دموعي بتنزل غصبا عنها و الوجع كاتل راسي ريل صحت لقتني في حالتي ديك جرت قالت لي عمتي وريف عيانة عمتي قالت ليها اعملي ليها مكمدات و اديها بندول براها بتبقى كويسة قالت ليها عملنا كدا لكن لسه م قامت قالت ليها يمكن مغص ساي يومين و بروح و مشت خلتها جاتني راجعة و الدموع في عيونها قامت صحت ريم وقالت ليها ارح نودي اختك المستشفى قالت ليها من وين نجيب القروش قالت ليها من سيوتر ابوي رفعت دلال براحة و طلعت خمسة الف منو و رجعتو رماح كانت نايمة قوموني بصعوبة و لبسوني عباية وشي كان بقى ازرق عديل سندوني و طلعنا قفلو الباب من برا بالطبلة عشان م يعملو ازعاج و رماح و دلال يصحو و يلقونا مافي يبكو كنت م قادرة امشي لينة لاقتنا في الباب و ريل حمرت ليها وقالت ليها و امشي ورى امك نحن طلعنا عشان اوريك كلكم خير م فيكم لينة قالت ليها ابدا والله و مسكتني عشان تسندني ريل سكتت عشان زمن مافي و طلعنا و بقينا ماشين و أقرب مستشفى بعيدة من الحلة و م في مستوصف في الحلة كان في واحد بيبني فيهو لكن لسة م فتحو مشينا وقفنا جنب الظلط و كان الزمن عصر يمكن وقفنا ساعة وانا حيلي مات حتن جات عربية بوكسي كدا ريل وقفت ليهو في الشارع قرب يضربها فتح القزاز قال ليها انتي مجنونة قالت ليهو عليك الله وصلنا المستشفى اختي دي عيانة و مواصلات مافي قال ليها عيانة تعملي كدا قالت ليهو م عندي خيار قال ليها طيب اركبو ركبوني في الضهرية ورا و مشينا....... يتبع
