مرت الايام وجات معاها الشهور لمن عدت سنة من سفر بيبو وريف كانت بتشتغل ليل و نهار دي اخر سنة لي اخوات وريف ريل و ريم في الثانوي و ح يدخلو الجامعة قريب وريف خلاص ح تدخل العشرين من عمرها تلاتة سنة عدو على وفات ابوها و في التلاتة سنة اجتهدت وشدت حيلة عشان اللحظة دي لحظت تفارق عمتها لانو لكل حاجة نهاية إذا كانت الحاجة دي حلوة أو مرة الضيم الوريف عاشتو مع عمتها لازم ينتهي دلال بقت بت الخمسة سنوات ودخلت الروضة و رماح دخلت الثانوي و أسى ريل وريم ح يمتحنو يدخلو الجامعة وريف كانت طول السنة دي جزء من شغلها بتحوشو لي حاجة و جزء بترسلو لي بيبو و جزء إذا أخواتها حاجة و رفضو كان فاضل شهر على تخريج لينة و سجود اتخطبت و عرسها قريب إيهاب في السنة دي جا مرة واحدة ولي سبب من الأسباب حصل نقاش حاد بينو وبين ابوهو و طلع خلا البيت و عمت وريف يومي تضرب كف في كف و تقول ولدي سحرو ولدي عملو لي حاجة طفشتو من البيت ولي يوم الليلة م رجع البيت وكان بينو وبين امو تلفونات بس لكن رجعة للبيت ماف آخر شغل لي وريف جاب مبلغ كويس وقررت تشتري هدية لي لينة بمناسبة تخرجها ريل وريم بقو بنات حلات الدنيا عليهن طالعين لي وريف في الصبر و الأخلاق حتى بقو يتصرفو زي تصرفاتها عمتهم صحي عدت التلاتة سنين دي لكن لسه بتعاملهم زي كانو كاتلين ليها زول لكن كلو بالصبر بتحلا بيبو بقا عندو ستاشر سنة و متفوق في الدراسة هناك بقرا معاهد كمان لكن قريتهم احسن بكتير و متطورة و م كان فاقد الا اخواتو و الغربة حارة اليوم داك وريف قاعدة و معاها دلال و رماح لانو ريل وريم في الامتحانات و لينة في المكتب الباب انفتح وريف عاينت لقتو دا إياد ابتسمت وقالت ليهو اتفضل جا معاهو بنوتة حلاتة كدا تشبهو جا قعد شرب الموية ويعاين للبت بي طرف عيونو البت اتنحنحت وقالت ليهو انا الاء اختو لي إياد وريف قالت ليها اتشرفنا و انا وريف قالت ليها ايوا إياد بيحكي لي عنكم وريف قالت ليها جد اها قال ليك شنو الاء قالت ليها كل خير أسى جيت عشان اتعرف عليكم من كترت م بيحكي لي عنكم وريف قالت ليها حبابك و بقو يتونسو إياد قال احم احم الاء قالت ليهو خلاص خلاص ح اتكلم وريف قالت ليهم في شنو الاء اخدت نفس عميق وقالت ليها اسمعيني ي وريف إياد اخوي دا عايز اختك لينة دي على سنة الله ورسوله و جابني هنا عشان اتعرف عليكم و نحدد موعد نجيكم فيهو البيت نحن و الاهل و إذا ممكن تنادي لي لينة اشوفها ريف السعادة م كانت شايلاها لانو لينة زولة و م اي زول تستاهل كل الخير قالت ليها جدا أسى بناديها استنى الاء قالت ليها دقيقة اكمل وريف قعدت و م قادرة تصبر تفرح لينة بالخبر الاء قالت ليها نحن ناويين نعملها ليها مفاجأة يوم تخرجها يعني هدية تخريج في نفس الوقت و إذا ممكن تلمحي ليها فوق فوق عشان نعرف رعاياها وياريت م تكليميها وريف قالت ليها اكيد لكن اول بنادي العروس لا قصدي لينة إياد يعاين لي الاء بعد وريف مشت الاء قالت ليهو متين ح تبقى شجاع م بعرف و م تعاين لي بطرف عيونك كدا إياد حضنى وقال ليها اختي السمحة الله يحفظك لي ابتسمت وقالت ليهو وقت المصلحة بقيت احتك السمحة قال ليها معقول الكلام دا لي انا ي ألوية قالت ليهو معقول الكلام دا يكون لي ايود حبيب اختو اصلو م معقول وبعدين لمن تكلم امي و ابوي انا دي زي ألم بعرفك تفتح خشمك براك قال ليها لا ي شيخة قالت ليهو والله العايز العرس منو انا ولا انت و بعدين انا بي خطيبي مالي و مالك إياد عايز يرد لينة و وريف جو الاء قامت سلمت على لينة بي حفاوة و لينة اصلا بنوتة على نياتة بريئة و بتخش القلب إياد يتبسم ساي الاء رسلت ليهو رسالة قالت ليهو قوم خليني اتفاهم حبة بت لي بت بدل قاعد بينا كدا إياد لاحظ للحتة دي قام قال لي الاء طيب جاني شغل ساعة و بجي بشيلك الاء قالت ليهو طيب و طلع وريف جابت شاي و قعدو يتونسو و الونسة م بتخلي من هظار دلال ام جضوم ييي م شاء الله البت دي لو جات جمبك الا تقرصها في جضومها عثل ياخ الاء قالت لي لينة والله حبيتك كدا ساي لينة قالت ليها وانا كمان وضحكو الاء قالت ليها الله لو تبقى مرت اخوي و نعيش مع بعض لينة اخدة الموضوع هظار قالت ليها نقعد نتونس لمن الونسة تخلص الاء جاها احساس بالفرح انو ردت فعلها م كانت عدوانية و م رفضت الفكرة وريف قالت لي لينة و ح تخليني لي منو الاء قالت ليها م تخافي بخلي إياد يجيبها كل شهرين تلاتة تاني بقو يضحكو اتونسو لمن الزمن راح إياد جا دق الباب قال لي الاء نمشي قالت ليهو يلا ودعتهم و مشت و إياد عايز يعرف قالو شنو و حصل شنو و الاء قالت م توريهو بالساهل كدا وبقا ينق فوق رأسها لمن ورتو قال ليها بس فاضل اسبوع على التخريج بكرا نمشي ليهم في البيت الاء قالت ليهو م توري ابوك اول إياد قال ليها ايوا صاح ح تجي معاي صاح الاء قالت ليهو بري انا جبيل وريتك وبدو يتحاورو عشان الاء توافق و بعد معاناة رفضت و إياد اضطر يمشي براهو لي ابوهو و التوتر باين في وشو الا امو ساعدتو بعد الاء ورتها و ابوهو وافق و بكرا ماشين لي ناس لينة الاء اتفقت مع وريف انو بكرا لينة م ترجع البيت و تشغلها بأي شي.......
جا اليوم التاني و وريف من الصباح طلعت لينة بعد ورت عمها عن الناس و كلمتو بالحيحصل إذا هو وافق قال ليها طيب و استفسر منها عن إياد و قال يسأل منو زي بعد صلاة الضهر إياد و ابوهو و اعماو م شاء الله جوا ناس كتار و العربات جات وقفت قدام باب ناس لينة ام لينة كانت اكتر انسانة مبسوطة اليوم داك بعد م ابو لينة وراها بالناس الجايين قامت نضافة وبخور و ناس ريل في العصير و الحلويات و الأكل النسوان جوا كمان و الجبنة بخورها طلع و كأنهم أهل من زمان ونسة وضحك لبنة كمان نضمو فيها لكن لسه م جو خطبوها رسمي اليوم داك بالتحديد لينة خلصت شغل بدري الا وريف البقت تجيب ليها شغل من ماف و لينة مستغربة إيهاب اليوم داك جا غسان اختو طبعا و كان متغير بقا هادي و كلامو قليل و البسمة م بتفارق وشو ابو لينة بعد الجماعة فاتو قال بكرا يسأل منهم و ادوهم موافقة مبدئية و أهل إياد جو ناس عقد بس لكن ابو لينة قال عايزين زمن عشان كدا بعد الضيوف طلعو نضفو البيت و زي الكاف حاجة عشان لينة م تعرف لمن رجعو كان كانو م حصل شي لينة انبسطت بي جية إيهاب و وريف استغربت انو الإنسان دا اتغير كدا لي شنو لكن كل حاجة في وقتها حلوة عدا الايام سريع وجا يوم تخريج لينة و ابوها سأل عن ناس إياد و عرف انهم ناس م شاء الله أخلاقهم عالية فتمت الموافقة اليوم داك لينة امها ودتها عشان يعملو ليها حنة و اشترت ليها فستان غير الكانت لينة مجهزاهو و لينة مستغربة امها مالة الليلة جا الزمن لينة لبست كان فستان كحلي و طرحة بيضا و كحل و قلوس صح بسيطة بس أنيقة وريف اشترت فستان و ملحقاتو و تلفون هدية لي لينة لبست أخواتها و كالعادة طقمت مع دلال بي فستان بنفسجي و دلال بي فستان بنفسجي بيطلع ظابطين طلعو على محل التخريج و م شاء الله الناس كتيرة و بدو ينادو على الخريجين الاء كانت مع إياد و اهلو عشان هي ح تلبس لينة الدبلة و لينة م شافتهم لمن جا الوقت و نادو على لينة و هي طالعة السلم إياد شال المايك وقال ليها سعر بالعربية الفصحى و م متذكرة منو الا
انتي بدر منير في سواد الليالي❤️
اردتك انتي أن تكوني حلالي💜
لينة تعاين لينا و لي ابوها و ترجع تعاين لي إياد الاء جات طالعة قالت ليها مرت اخوي تعالى لينة عاينت لي عمي أشر ليها وقال ليها يلا م شفتو كمية الفرح الكانت بتنقط من عيونها إياد قال ليها موافقة هزت رأسها و الدموع بين لو من عيونها الاء ليست الدبلة و حضنتها و قالت ليها بالله دا زمن بكا انا لو مكانك برقص لينة بقت تضحك قالت ليها ايوا افرديها كدا جو اخوات لينة و امها باركو ليها نزلت من المنصة و جات على حضنتني وقالت لي كنت عارفة صح قالت ليها ايوا و كنت جزء من الخطة كمان ضحكت وخصنتني اقوا وقالت لي الله م يحرمني منك أن شاء الله قالت ليها ولا منك يا رب زحت مشت استلمت شهادتة و أثناء م انا منتبهة حسيت بي لمسة في كتفي أتلفت...... 🌼🌼
