محلة نجيب باشا

البارت 8

محلة نجيب باشا

بقلمي عطر الياسمين🌸🖤

البارت 8

________________

صاحبت الشمس حتى آجدلهم فَيّ
و صرتلهم نظر للعينه مكفوفه

_______________

ابتسم و حجى :
- اريد من بنات عمي

امي ما عجبها الحجي عبست و كالت :
- فدوه لبنات عمك هاي منو منهن بالله؟!
اني اكول اكول هاي روحاتك و جياتك مو خاليه

اتعصب و حجى :
- هسه انتي شعرفتي و هيج تحجين بعدني حتى ما نطيتج اسم

- من غير مااعرف جاي تريد تمشيني بكيفك؟!
هاي كطنه و طلعها من اذانك

- شنو امشيج بكيفي امي شبيج؟! بعدين اني اختار البنيه اللي اشوفها تناسبني

- اجل الموضوع هسه اختك على ولاده بعد شهرين و هالشهر تشيل لبيتها بالسلامه خل نخلص من عدها و بعدين نشوف موضوعك

ما رد عليها اكتفى بس هز راسه بالموافقه بس ملامحه معصبه نوعاً ما و تركنا و كام صعد لغرفته

خالتي تبعته بنظراتها لحد ما وصلنه صوت باب غرفته و هو يسده التفتت لأمي و حجت

- انتي شبيج خيه اي خلي الولد يحجي فتحلج قلبه و جاي يسولف هو المن يريد حتى ما خليتينه نعرفها

- آني عاجبتني سعاد اخت حجي صائب حماتها لأبتهال اله رايح يجيبلي من بنات عمه و يريدني اقبل ابد اببد والله 

- هسه ديكلج مااريدها شبيج داده هي كوه خما كوه؟!
بعدين الحجي بيناتنه آني هم ماتعجبني اريد لحيدر وحده نازكه صوتها ناصي لبسها محتشم اكثر من هيج

- شجلبتو بلبسها ماتكولولي البنيه مودليه ( تلبس عالموده ) و البنات كلهن هذا لبسهن

- لا خيتي لا هسه مو هاي نضال هم مودليه فده لطولها بس بحشمه هذيج لبسها فد مره

دارت وجهها امي ما عاجبها الحجي خالتي وجهت نظرها للسبحه اللي بين اصابعهه و حجت بملامح حزينه

- خيتي لا تشدين ويا مثل ما شديتي ويا اخو المرحوم اتهدي و العني ابليس و خلي يفيي عليج و على ولدج كلكم كاعدين بفيه ( تحت ظله ) هذاك حرمتي اللي قلبه رادها و راح بحسرتهه لا هذا هم تسوين ويا هيج و هو صايرلكم والي و سند

سكتت امي و ما ردت عليها ورا شويه خالتي سلمت و طلعت و اني طلعت ويا امي للسوك و خليت الجهال يم نهاد فرحانه احضر و اتسوك لبيتي الجديد

_______________
سناء ...

كاعدين نفصل و نخيط اني و عمتي بهيه بالغرفه خياطها يجنن و علمتني اخيط من اني طفله و شكد ما اتعلم ما اوصل لترتيبها و لخياطها القطعه اللي تطلع من ايدها عبالك حاضره