محلة نجيب باشا

البارت 52

محلة نجيب باشا

بقلمي عطر الياسمين🌸🖤

البارت 52

____________

آني وين و عنّي هاي الناس وين
تحجي عني ولا دريت شبيها

و اللي جانوا على داري مواظبين
خلصت الحاجه و نسو راعيها

و اللي عاونته غدرني و عض الأدين
ذراعي هاي الشالته يلويها

و اللي أمنّته انا عيوني الثنين
ما رضى يحكلها اصر يعميها

والله دنيا صار بيها الشين زين
و اعتلى الناصي و صفى عاليها

طبع نخله ما انحني ولا بيه لين
و تمر تنطي اللي بحجر يرميها

_______________

عبير ..

خلصت صلاة المغرب وكفت انزع إزاري فات غيث كال .. ها حبيبي اشو هنا كاعده
- جنت اصلي
تقدم بأتجاهي مبتسم و كال .. الله يتقبل
- منا ومنك حبيبي
- ترى راح يجون خطار بيت جدي على جيه تعالي ويا امي
- اي اعرف و حضرنا الضيافه لا يظل بالك

اخذ ايدي و نزلنا سوه اندكت الباب و دخلو اهل خالتي استقبلناهم و دخلت ويا خاله للمطبخ نرتب الضيافه بالصينيه هي شالت صينية الببسي و اني الكليجه و البيتيفور

لمتهم حلوه كلها سوالف و ذكريات و يحجولي سوالف غيث بصغره شكد جان مشاغب و هو ينصي راسه و يسوي نفسه فقير ما مسوي شي

من بين صوت ضحكاتنا اجاني صوت موبايلي يدك غيث التفت الي و كال .. تليفونج يدك وينه
بقيت اتلفت نسيت وين خليته مشيت ورا الصوت لكيته بالمطبخ

هذا رقم امي خير ان شاءالله فتحت الخط و اني صاعده لغرفتي لأن جوه هوسه و ما اسمع شي

فتحت باب الغرفه و كلت .. الوو
ردت عليه ماسه صوتها مبحوح .. هلو عبوره شلونج
- الحمدلله يولي شبي صوتج شنو مريضه انتي ؟

- احمم لا مابيه شي
- اي شلونكم شنو اخباركم هاي شنو صوت مينا يمج
- اي ايناس هنا

جرت حسره و كالت .. عبير خالو توفى
مرت لحظة صمت اريد استوعب جنت منتظره يكوم على حيله و اسمع بي تعافى شنو توفى شكد تمنيت اروح اشوفه شكد مشتاقتله

- الوو عبير انتي ويايه ؟
- ششش شنو شنو توفى اخاف متوهمه انتي
بجت و كالت .. اليوم المغرب توفى و قبل شويه اجانه الخبر ماما و بابا راحو ويا حسام و بقى عبد الرحمن هنا يمنه

سديته منها و حطيت ايدي على وجهي ابجي بقلب محروك غيث فتح الباب شافني بهذا الحال اجه يركض حضني و كال .. شبيج حبيبي ليش تبجين !!
احجي يمعوده وكعتي كلبي شصاير !!

جاوبته و الشهكات تارسه صوتي .. خالو .. خالو توفى
فتح عيونه مصدوم كال .. شوكت و منو كالج ؟
- هسه ماسه خابرتني .. راح و ما لحكت اشوفه