محلة نجيب باشا

البارت 68

محلة نجيب باشا

بقلمي عطر الياسمين🌸🖤

البارت 68

____________

الحمدلله تحقق الحلم البعيد
و صرت اشوف الدنيا كلها بلونچ

چنت استحي حتى ما اسلم عليچ
و هسه اگلچ ها مريتي شلونچ

___________

چان كلش رزن و ثگيل و كلامه موزون احترم وجود اهلنا قريبين و خلى اعتبار انه بعدنا ما عاقدين ما حچى اي كلمة غزل بس عيونه چانت تحچي

و آني ضعت بيهن و بنظراتهن خالد شاب وسيم متوسط الطول حنطاوي مو كلش ابيض و عيونه مبطنه لونهن اخضر و رموشه كثيفه شعره جوزي مموج و بالضوا تلمع بي خصل شگره عنده لحيه خفيفه زايدته حسن

و الأهم من شكله اخلاقه و اسلوبه بالكلام هو اللي خلاني انجذب اله لأن ضرغام هم چان من ناحية الشكل وسيم بس عقله صفر

نبهنا صوت خاله منال و هي تصيح على خالد بصوت هادئ .. يلله يوم نگوم
رد خالد .. بكيفكم

طلعنا كلنا سوه چنت امشي بجانبه و الأبتسامه ما ترضى تفاركني و ماما و خاله يتهامسون بينهم و يبتسمون بفرح گالت خاله .. عيني حسام من رخصتك خلي عروستنا و ام عبدالرحمن يصعدون ويانه اذا ما عندك مانع

لأن جايبين الغراض مال ميز المهر بسيارتنا حتى نجي وياكم ننطيهن الكم و الفستان مالتهه اللي راح تلبسه باچر

رد حسام .. اي ليش لا هلا بيكم

صعدنا آني و ماما وياهم مخلد يسوق و خالد گاعد ليگدام و احنا و خاله ليورا و حسام بقت ويا ميسم

اول ما مشت السياره خالد شغل المسجل بأغنية محمد السالم
خليهم و اذا يحچون كل شي بحبنا ما يغيرون
مكانك بالگلب لا تخاف حبك بالحفظ و الصون
ابيض حبنا راح يعيش سودا تموت نيتهم
سمعونا كلام هواي بعدك هذا انت وياي

چنت اسمع و مبتسمه وصلنا لبيتنا نزلو الغراض مال ميز المهر و الفستان نطانياه بأيدي دخلو جوه تركت كل شي و دخلت للمطبخ احضر ضيافه و اجتي ميسم ويايه

طلعت ميسم كليچه جبناها ويانه من بيتنا سوينا شويه قبل ما نجي و آني سويت نسكافيه دافيه و طلعنا ضيفناهم خاله گالت .. يمه ليش هالزحمه هسه شربنا

ردت ماما .. بالعافيه شي دافي شويه

هو شرب شويه و ترك الكوب شويه و طلعو بعدنا نسد الباب وراهم دگ تليفوني اجيت ارد لگيتها عبير متصله عالكاميرا فتحت خط سلمت عليها گالت .. هم زين بعدچ ما بدلاي اريد اشوفچ شنو لابسه ؟

ثبتت التليفون على الميز و رجعت ليورا حتى ابين زين چنت لابسه بينصل لونه حني و عليه ستره سودا و شال لونه بيجي و مصبغه اظافري بلون الفستان