محلة نجيب باشا

البارت 30

محلة نجيب باشا

بقلمي عطر الياسمين🌸🖤

البارت 30

____________

لا اليأسُ ثوبي ولا الأحزانُ تكسِرُني
جُرحي عنيدٌ بَلَسعِ النارِ يلتئِمُ

إشرَب دُموعَكَ و أجرع مُرَّها عسلاً
يَغزو الشُّمُوعَ حَريقٌ و هي تبتَسَمُ

____________

كلهم وكفو و استقبلو الشخص اللي دخل و من ضمن اللي وكفو اخواني ؛ جان طويل مثل بابا و بقية عمامي ابيض شعره خفيف و اشكر مبتسم و هو يسلم عليهم و ظاهره غمازاته

و ورا وحده ضعيفه و طويله محجبه و بشرتها حنطيه كايده بأيدها اولاد اثنين عمرهم قريب واحد للثاني سلمت عالكل و عايدتهم و افترت عيونها علينا و كالت

- فدوه للبنيات منين هالحلوات اشو ماشايفتهم قبل

رد زوجها و هو يباوع علينا بأبتسامه .. هذني بنات اخويه حيدر

راحت عيونه على ماسه اصغر وحده و اشرلها و كال .. لج تعالي خل ابوسج

ماسه خجلت و ختلت ورا ايناس رجع صاحنا اني و ميسم بوسنا و عايدنا و ايناس هم و رجعنا كعدنا ؛ صفنت عليه اني شايفه صوره اله بين البومات صوري من جنت كلش صغيره بس جان اصغر من هسه من خلال كلامهم افتهمت انه هذا عمو عدنان اصغر عمامي

انجمعنا عالغده و عزلونه احنا الصغار بالمطبخ على الميز ويا بنات عمامي اللي بعمرنا شويه اندمجنا وياهم و بعد الغدا طلعنا لعبنا شويه بره صار العصر شفت حسام طلع من جوه يرتب بسترته و ورا ايناس و عبد الرحمن

و طلعت وراهم بيبي و عمه نضال و بيبي توصيهم .. عود تعالو انتظركم

التفتو عليها الولد و ردو .. ان شاءالله بيبي يلله في امان الله
- الله وياكم

اخذونا و طلعنا بعد ما سلمنا عالكل و رجعنا و اني ببالي هوايه اسأله اريد اجوبتها اولها ليش ماما و بابا ما اجوي ؟!! بس اعرف امي ماتنطيني جواب على اسألتي

اول ما وصلنه للبيت و ايناس استلمتني ترزلني و تشكيني لماما .. لج غبيه انتي مالكيتي غير كدامهم كاعده تسأليني منو بيبي و منو عمتي ؟ ليش ما مبينه بيبي من عمه ؟

- اي مااعرف لعد المن اسأل
- عالأقل انتظري نطلع و اسألي
- كلت اخاف انسى حتى كدامهم تأشريلي و اعرفهن اخاف احجي ويا عمتي و اكلها بيبي و عيب

ردتها ماما .. و انتي ليش عصبيه حقها ماشايفتهم شمعرفها بيهم

- شوف امي تدافعلها يعني بيبي جبيره و عمتي مبينه اصغر منها ؛ بعدين المكان صغير و هدوء بس احنه موجودين راح يلاحظون من اشرلها و احجي و اني اساساً خجلانه اكثر منها