محلة نجيب باشا
بقلمي عطر الياسمين🌸🖤
البارت 53
______________
توادعنا و نسيت بوجهك عيوني
شثكل هجرك؟!
سما و طاحت على متوني ..
_________________
كاعده و صافنه عالتلفزيون و ايدي على خدي و ساندتها على الميز الكدامي ماما كاعده و بأيدها بجامة مينا خيطت النا دشاديش و اللي بقى من القماش سوته للجهال
جنت اكلب بالتلفزيون طلعت اغنيه قديمه سامعتها هوايه قبل بس اول مره اركز بكلماتها و تجذبني
محسوبه من العمر كل ليله نكضيها
محسوبه من الدرب كل خطوه نمشيها
افرح ولا تنتظر ايامنا اللي تمر
رحله بقطار العمر
سفره بمرابع خضر
شتريد سميها
يالرايح بهالدرب و انتَ على ناسك ضيف
ينراد معشر حلو و لمة احباب و كيف
لو ضكت برد الشتا و لسعة ظهاري الصيف
صبرك و هي تنجلي و تصير ذكرى و طيف
صفنت بكلماتها و كلت .. الله شكد حلوه الكلمات كأنه تشرح تفاصيل الحياة
ردت ماما .. اغاني قبل جانت كل اغنيه تنكتب الها قصه و بيها عبره و معنى مو مثل اغاني هالوكت بس طربكه و بنات و ما تفتهمين شنو يحجي
كطعت الخيط بسنونها و نفضت البجامه تباوعلها مبتسمه كالت فدوه حبيبتي راح تطلع تخبل عليها
صفطتها و حتطها بصفها و سحبت الثانيه اشرتلها بعيوني و سألت .. و هاي المن؟
- لشموسه
- صدقه يلوكلها اللون الأصفر
طلعت ميسم من الغرفه تهف ضربتني بالكوشه مال القنفه و كالت .. ولج ماسه وينه شالي الأبيض و نيلي ؟
صديت الكوشه بأيدي و كلتلها .. اااخ وجع شمدريني
- لا بالله يعني ما ضميتي حتى باجر من اطلع تلبسي ورايه
- اااا .. لا ما ضميت شي مو كاعده هنا كدامج امشي ولي تضيعين غراضج و تذبيهن براسي
كلتها و انداريت اكلب بالقنوات
كالت .. والله جذابه
- هسه شيصير اذا لبسته بس هاليوم قابل قحط مو الكنتور متروس شالات
- ها ياجذابه تكولين ما ادري وينه
- اهووو شكد نحسه
- باجر دا البس ابيض و نيلي و يكعد ويا لبسي حلو هذا الشال
- عابت ضميته بكنتور ماما ولي اخذي لا تظلين تبجين
كعدت على الكرسي اللي بصفي و صفنت شويه و كالت .. يلله لبسي بس عكب باجر اموتج اذا اخذتي
كرصت خدها و كلتلها .. اروح فدوه لكلبها
شمرت ايدي و كالت .. و مو تضميليا مخمخم و عركانه بي اغسلي و اكوي
أنت تقرأ
محلة نجيب باشا
Fiksi Umumسندخل الى قلب بغداد لأحد ازقتها التي خبأت بين جدرانها عبق الماضي و سنطرق باب احد بيوتها في محلة نجيب باشا و نعيش تفاصيل حياتهم من جيل الى جيل
