محلة نجيب باشا

البارت 40

محلة نجيب باشا

بقلمي عطر الياسمين🌸🖤

البارت 40

____________

لا تبالغ بالحب .. لا تبالغ بالأهتمام
ولا تبالغ بالأشتياق
وراء كل مبالغه صفعة خذلان ..
فإذا اردت أن تُحب احداً بعُمق تأكد اولاً ان الطرف الأخر يحبك بالعمق نفسه ..
فعمقُ حُبك اليوم هو عمق جُرحِكَ غداً
فكُن حذِراً و حافِظ على ما بينً أضلعِكَ من الكسر ..

____________

خالو ناصر صاح .. ليش عفتها تطلع ؟!
عمار رد .. و اني شمدريني هي طالعه بدون علمكم ؟
آني واكف اشتغل و هي سلمت و فاتت عبالي عادي عدكم تطلع وحدها

صاح خالو بحركة قلب على عمه .. انعااام امشي جيبي تليفونج خابريها لهاي الأدبسز افتخار الثانيه

فاتت تركض جابت التليفون و اجتي تتصل عليها و آيه ماترد خالو كاللها .. دكي مره ثانيه

رجعت دكت و نفس الحاله ماكو رد خالو اشتعلت اعصابه بنار و هي تهدي بي .. على كيفك يجوز خايفه و ما ترد

رد بعصبيه .. خااايفه ؟!! ليش هي اللي تسوي هيج عمله هم تخاااف ؛ كله مننننج شكو جبتيها كله منج شنو دخلي آني و اتحمل مسؤليتها ؟!!

وحده صلفه لا تربيه ولا اخلاق ملفيتها ببيتي ليييش هسه لو صار شي لو ما رجعت اني وين اودي وجهي من اخوانج شأكول لعلاء ؟!!

- و شوصل الموضوع لعلاء هسه ترجع و نلم السالفه عاد انت هم على كيفك شويه جبتها تونسني و تغير جو شويه قابل سويت جريمه

- خوش لعد تونسي هسسسه حتى ماترد على اتصالاتج بشرييييني تونسسسستييي ؟!! شبعتي ونسه انتي وياها ؟!!

ما ردت مشغوله تتصل ينتهي الأتصال و يفصل و آيه ماترد رفعت راسها باوعت لعمار و كالت .. فدوه عمار اتصل عليها من رقمك اني ماتجاوبني يمكن خافت مني بس رقمك ماعدها

مد ايده عمار بجيبه و طلع تليفونه ردتله الرقم اتصل عليها ردت اخيراً جنت واكفه يمه و اسمع صوتها شلونه تتموع و تحجي ويا تمنيت اشرب من دمها فوك المصيبه اللي مسويتها النوب بعدها عينها صلفه

و عمه بقت قريبه منه من الجهه الثانيه عافته هو يحجي وياها فتحت الخط و كالت .. الو

رد عليها عمار .. آيه انتي وين ؟!
ردت بتمسكن .. ماادري اني وين مشيت مسافه مااندل ارجع
- ميخالف دليني و نجيج اني و خالو بالسياره
- لا لا عفيه اخاف
- لعد شلون خما تبقين بالشارع يلله عيني يلله حبابه اوصفيلي المكان حتى هسه نجيج
- اخاف ارجع اخاف يكتلوني
- لا محد يكتلج شوفي شلون البيت انخبص علمودج و عمه انعام خطيه تخبلت عليج

بعد نقاش طويل كامت تدلي هي وين طلع هو و خالو بالسياره و اني و عمه مكابلين شباك المطبخ و واكفين بعد نصف ساعه تقريباً رجعو جايبيها وياهم و نزلت عادي بكل صلافه ولا كأنه مسويه شي