#حنان
الكاتبة : Beba Pink
《5》
محمد: حنان؟ حنان منو؟؟
فاطمه: مرت احمد؟ انت حتى ماتعرفش مرت خوك شنو اسمها؟
محمد: واني شن دراني ب اسمها و شكلها اني البلاد ماجيتها من وفاة بوي .. وبعدين منو اللي بيتزوج؟ ان شاء الله اني؟ تي موضوع الزواج مش في دماغي اصلا ولما بنفكر فيه اكيد مابناخد مرت خوي..
فاطمه: خوك مات ومافي حد بيستر عليه غيرك
محمد بشبح لامه بنظرة استغراب: يستر عليه !!!
فاطمه: اااا قصدي يستر عليها خوك كان يحبها و مايبيها تتبهدل بعده موصيني ان لو صارلي شي يتزوجها محمد و يسافر بيها معاه ...
وقعدت الام تنزل في دموع التماسيح
فاطمه: تربحك يا وليدي نفد وصية خوك و تزوجها بنية كويسه و مسكينه و اني نحبها وهوا ما أمن عليها الا معاك ..
محمد: يا امي ماتبكي مانحب نشوفك تبكي عارفتني نضعف قدام دموعك ..
سكت شوي و بعدها قال: باهي علاش مش منذر يتزوجها حتى هوا كويس و ..
قاطعاته فاطمه: منذر اصغر منها مزال عمره 19 بيكمل قرايته و حياته
محمد: لاحول ولا قوة الا بالله ... كان نحساب الموضوع هكي راهو عزيتكم بالتليفون وتمت
فاطمه: ارجوك ياولدي كان تبي الربح فكر في الموضوع ارجوك ياولدي ..
نزلت فاطمه على يدين محمد ولدها تبي تبوسهم وتترجاه سحب محمد يده ونزل لعند امه باسها على راسها و يدها
محمد: لا يامي لاا ماتديريش هكي اني اللي ننزل عندك و نطلب رضاك ..
فاطمه :تبي رضايا تزوجها حتى 3 ولا4شهور وبعدين كان تبي تطلقها طلقها ارجوك ياولدي ..
وقعدت تبكي
محمد: يا امي افهميني هادي انسانه ماهي سياره بنجربها شهور و بنبيعها حرام عليك ... بعدين يا امي اني ليا حياتي ليا عملي و شركتي اني مانفضى حتى نحك راسي تبيني نجيب مرا و مسؤليه ..
فاطمه: البنيه هااااديه لا بتديرلك دوه ولاشي شهور بس و طلقها وارجع لحياتك بعدها ..
محمد سكت يفكر ومستغرب من كلام امه و يسال في نفسه علاش شهور و نطلقها علاش شنو فيه؟؟
فاطمه لما القت ولدها يفكر: فكر ياولدي وعطيني الجواب قبل ماتروح ..
محمد: اني بعد غدوه مروح و بعدين اساسا مرت خوي عندها عدة يعني بعد4شهور و عشرة ايام يدير الله طريق ..
فاطمه: الطريق هادي طريقك انت وياها ..فكر ياوليدي و زي ماقلتلك تبي رضايا والربح تزوجها..
ناضت الام و مشت و خلاته يفكر و يقرر
محمد شخص عملي جداااا يحب شغله يحب النظام في كل شي حياته ماشيه زي الساعه نفس الروتين في كل يوم ..من الصبح شغل شغل شغل يمشي بعدها لصالة الحديد يفرغ فيها تعب اليوم لين يجي الليل يروح و يرقد و اللي داره امس يديره اليوم وهكذا ....سيب البلاد من 9سنين عشان يحقق طموحه واحلامه مايجيش زيارات لاهله مافيش وسيلة اتصال بينهم الا مكالمات الفيديو استقر في امريكا وقرر ان يكمل حياته غادي..مش مفكر يتزوج لانه في نظره الزواج عائق امام تحقيق احلامه في انه يكون عنده اسم و ثروه خاصه بيه ومن مجهوده مش من ورثة بوه ..
......
حنان مقعمزه ع الفطور و جنبها ايناس ..
ايناس: حسدوك فيه يا حنّونه.. شاب كل بنت تتمناه طربقوه بعين لين مسكين مات موته شنيعه تقطع قطعه قطعه اااخخخ ياكبدي كنتي متهنيه في هديك الفيلا و الرفاهيه يقولو العين تدخل الجمل للقدر و انتي العين دخلت احمد للقبر اااايه بالله ..
حنان: غلطانه يا ايناس...
ايناس: اس اسس العين حق و مذكوره في القرآن..
حنان: العين حق ..بس اللي خلت احمد يموت هالموته دعواتي يا ايناس مش العين ..
ايناس و هي تشبح لحنان بصدمه: دعوات شنو؟؟😲
حنان رفعت قفطانها كشفت ساقها المبقعه بالازرق : تشوفي للرضوض هادي ؟؟ هادي حياتي ورا اسوار الفيلا اللي عاجبتك هادي حياتي ورا القفاطين الفخمه اللي كنت نلبس فيهم هادي حياة الرفاهيه اللي الكل حسدني عليها ..
ايناس متفاجأه من اللي تشوف فيه ومش قادره تقول حرف ..
حنان: مش كل من عاش في رفاهية مرتاح يا ايناس.. المظاهر خداعه ... كنت نتمنى نعيش في خيمه في صحرا ومعايا زوج يحترمني و يقدرني و يحطني فعيونه..راحة البال ماتنشرى بكنوز الدنيا يا ايناس ...
ايناس: علاش ماقلتيلي ؟ علاش ؟ كنت درت حل كنتي شكيتي فيه ؟ اي شي يا حنان كيف تسكتي ع الظلم كيف تسمحيلا يضربك ..
حنان: نشكي هه .. لمنو؟ البلاد و تعرفيها اللي عندا نفوذ و فلوس يقدر يدير كل شي ..وامه قااادره هددتني لو اطلقت تقتل خوتي و تشردنا ..انتي ماتعرفيهاش هذي شيطان مش بشر ..رضيت بالامر الواقع و شكيت لله ..هوا ربي فكني منه مزال هي ربي حياخدلي حقي منها ..كل يووم يا ايناس ندعي عليها كل يوم ندعي عليه وحقي منه مش مسامحته فيه .. نبيه يراجيني قدام الله لين نموت ونجي ناخد حقي منه ...
ايناس قعدت تبكي و حضنت صاحبتها بس حنان ولا دمعه نزلت منها زي الجماد ..
ايناس: احكيلي كل شي يا حنان اكيد قلبك مليان وماعندك لمن تحكي ..فضفضيلي ...
حنان: ااااه يا ايناس ... نفضفض لله ع السجاده في كل سجود ..تصدقي في ايام انقطعت عن الصلاة لما كان يحبس فيا في داري بالايام مايخليش فيا حنى نطلع للحمام تصدقي اخر الايام لما يضرب فيا معاد حسيت بالضرب.. تعودت عليه كل يوم كل مايشوف وجهي يضربني ..
ايناس: علاش باهي ..
حنان: من غير سبب ..
ايناس: مريض حيوان حقير ربي ينتقم منه ان شاء الله يجاور فرعون في جهنم هالكلب
حنان: امين ..
ايناس: باذن الله ربي حيعوضك فيه حاجه اسمها عوض رباني ربي يعوض فيه عباده وانتي ربي حيعوضك لانه الحياة متوازنه على قد ماعشتي ايام سوده حتعيشي ايام بيضا لانك شديتي في ربي و ربي اللي يشد فيه ما يخليه ❤
حنان: العوض في الجنه اما الدنيا معاد عندي فيها طمعه
ايناس: 3شهور عشتيهم معاه في هم و غم ربي حيعوضك عليهم سنين من الفرح ..حتشوفي..والحمدلله انك مش حامل ..
ابتسمت حنان ابتسامة وجع و بهزوه : الحمدلله ..
خلت سر احمد في قلبها ولانها خايفه من فاطمه ..
.......
مر يوم وجي موعد سفر محمد ..
فاطمه : ماقلتلي ياوليدي شنو صار في موضوعنا..
محمد خدا نفس عميق وسكت..
فاطمه: ارجوك يا ولدي ارجوك ..
محمد: هي عندها علم ان 4شهور بس وبتتطلق ؟
فاطمه وهي تتلكك : ايه اايه عندها علم و موافقه..
محمد سكت شوي : تمام ..موافق 4شهور و بس ..
فاطمه:الله يفتحها قدامك قلبي راضي عليك يا وليدي و تضبطت ولدها و قعدت تبكي
محمد قعد عاقد حواجبه و عاصر قبضة يده و مش عارفه كيف وافق و سمح ان يحط روحه في موقف زي هذا
.....
سافر محمد و مرو 4 شهور ورجعت حياة حنان زي قبل و احرف مع خوتها قريب يمنعو عليها حتى النفس و ضربهم ليها زاد اكثر من قبل بوها زاد تعب لما يشوف معاملة خوتها ليها وهوا مشلول مايقدر يديرلها شي امها كل مره رافعينها راقيلها السكر و الضغط ..محمد رجع لحياة شغله و نسى موضوع حنان وكل مايفكر في كلام امه يقول يلا فتره و تمشي ..
....
حنان مقعمزه في الدار سرحانه زي عادتها ..
زينب: بنيتي اطلعي جاتك عمتك فاطمه..
حنان قعمزت و نظرة الخوف في عيونها: عععلاش شنو تبي ؟
زينب: مش عارفه قاتلي نبي حنان في موضوع.
حنان: قوليلها مش قاعده ولا راقده اي شي يا امي
زينب: عيب يابنتي من امتا نكذبو ع الضيوف يابال هادي فطومه ام احمد من ريحة الغالي..
حنان في خاطرها : اماغالي يا امي هما ارخص من الرخص ..
زينب: هيا سلم بنتي .. ساوي روحك و اطلعي
حنان تنهدت وقالت: حاضر يا امي حاضر
شويه و خشت حنان لدار الضيوف القت فاطمه مقعمزه و تشبح للاثاث بقرف ..
حنان: تفضلي ؟؟؟
فاطمه:يا اهلا وسهلا و مرحبا ب حنوونتي الغاليه
حنان نفخت و قالت بصوت واطي : يغلوك في طنجرة افراح ياارب
ضحكت فاطمه ضحكه مستفزه: تعلمنا نردو ..
وقفت فاطمه وجت قدامها و قعدت تمسح على شعر حنان..
فاطمه: ردي بالك .. لسانك نقطعهولك ياحبيبه🐍
حنان: زيدي غادي
ودفت يد فاطمه بالقوه.. فاطمه مسكت يد حنان بالقوه
وقالتلها:تعرفي يدك نكسرهالك و نشردكم و خوتك نقتلهم بوك نحبسه بقضيه سياسية الضي معاد يشوفه امك نبعت من يخطفها وفهمك كفايه ... عاد البلاد سايبه ومكثرهم ولاد الحرام اللي يبو فلوس .. وضحكت ضحكتها المستفزه...
حنان بعصبيه وصوتها يرعش: شنو تبي مني ؟ خلاص فوتيني انسيني ارحميني ..
فاطمه ببرود: لا لا لا نقدرش نفوتك انتي حبيبتي حنووونتي ههههههه
حنان: شنو تبي ؟؟؟
فاطمه: ولدي محمد .. يبي يتزوج مرت خوه 🙂
حنان بصدمه: منووو؟؟
فاطمه: ولدي محمد الكبير ..من قدك تاخدي رجل اعمال عايش برا ولد عيلة محترمه عز و جاه ..
حنان: عيله محترمه هههه بالله الكلام هذا قوليه زمان ايام مانعرفش وسخكم و عاركم تي انتم العيلة اللي خالها ميلاد تابت لما شافتكم ياحقرااء
فاطمه مدت يدها و ضربت حنان كف : ماتختبريش صبري اقسم بالله نمحييي عيلتك من الدنيا ونخليك بروحك عايشه تتمني الموت و ماتحصليه .. بعدين هما 4شهور بس وتتطلقي و تروحي 🙂
حنان تشبح فيها بخوف و حاطه يدها ع وجهها
حنان: وعلاش اني علاش تبيني نتزوجه سركم والله مش حنقوله علاش بس علاش
فاطمه: عيلتك مش حيخلوك بلا زواج .. وسر ولدي بيعرفه اللي بيتزوجك يا اما بتتزوجي محمد والا ... انتي تعرفي الباقي 🙂
مشت فاطمه خطوات و تلفتت ل حنان : مزالك10 ايام اتم عدتك وتفكري فيهم و تحددي مصير عيلتك ..سلام حنونتي🙂..
طلعت فاطمه .. قعمزت حنان و رجليها يرعشو و دموعها ينزلو خشت امها تجري ترعش
زينب: هذا شنو اللي سمعته ..معقوله هادي فاطمه..
حنان دفنت راسها في حضن امها وقعدت تبكي بحرقه: اااه ياامي بنموووت حاسه روحي بنتقطع مليت منها يامي حياتي جحيم من لما شوفتها..
زينب: سمعتيها شنو قالت بتدير لخوتك .. واني يابنتي سمعتيها شنو بتديرلي .. هذي مرا قادره و البلاد خاربه تدير ما احرف .. وبعدين شنو السر اللي قالت عليه
حنان تبكي : هادي ماتعرفش ربي يا امي ماتخافش من حد كان نحكيلك تشردنا كلنا..
زينب بخوف و تردد: وافقي يابنيتي .. هما4شهور زي ماقالتلك و ....
حنان رفهت راسها من حضن امها بصدمه: كيف؟ واني يا امي؟؟ فكرتي فيا
زينب: انتي يابنتي هكي هكي حياتك ماهي مرتاحه فيها هنا خوتك غلبونا و بوك نفسيته تعبت من مشاكلهم معاك وهوا عاجز مش قادر يدافع عنك .. واني يابنتي مايرضيك يصير فيا هكي ..
حنان وقفت و خشت لدارها و سكرت الباب و قعدت تبكي وخلت امها تبكي اكثر منها ...
....
فاطمه عالتليفون: الو محمد
محمد: اهليييين ااامي كيف حالك ؟
فاطمه: كوووويسه فوووق الريح
محمد: ما شاء الله دوم ياربي زعما شنو السبب؟
فاطمه: اسبوعيين بس.. وتكون حنان معاك 🙂
........
أنت تقرأ
حنان(ليبية_منقولة)
Romanceانا ﮼حنان ومعك عرفت معنى الحنان💙😩. . . رواية حنان💙🌼. للكاتبة: Beba pink. متكونة من 2o حلقة💙🪐. قراءة ممتعة💙🫀.
