#حنان
《14》
الكاتبة : Beba Pink
مرت اياااام و حنان تمشي لكورس الانجليزي و محمد يرفع فيها ع الموعد و مقسم روحه بين شغله و بينها يعني خصصلها وقت في يومه بعد ماكان يومه كلللله عمل / ايناس مزالت مشغوله بالمجهول اللي يبعتلها في المسجات كل يوم قريب 10 مسجات اشعار حب و مغازله ليها /فاطمه نكسر خشمها و مشت خطبت آيه لمنذر زي المرا الطيبه و وافقت على شروطهم الكبيره غصبااا عنها/ام حنان و بوها عايشين كل يوم بيومه و اشرف و عماد زي عادتهم نفس المشاكل و الخمر اللي عايشين فيه/// ..
......الكاتبة : Beba Pink
روحت حنان من الكورس مع محمد ..وصلها لعند الباب ..
محمد: انزلي.. اني عندي عمل نكمله و نروح..
حنان نزلت: باهي..😒
محمد : استني ..
عطاها كرتون صغير فيه مجموعة افلام..
محمد: هاك هما افلام اجنبيه تفرجي عليهم مشي بيهم وقتك و ركزي في لغتهم باش تتعلمي بشكل اسرع ..
حنان بفرح: وااوووو 😍
محمد: هيا ..سلااام
حنان: سلام ..
مشت خطوتين .. محمد رجع بالسياره ..
محمد: حنان..
حنان تلفتتله : نعم
محمد: ماترقديش لين انجي ..
حنان ابتسمت و هزت راسها ب الايجاب ..
مشى محمد و خشت حنان..
محمد في السياره :هفففففف..حناان حنااان حنااان ..شن صايرلي اني ..كيف هكي مسيطره على تفكيري..كيف خذت جزء من حياتي ..امتا صار هالكلام مش عارف ...حتى لما نجي قدامها نسيطر على نفسي بالسيف ..
أما حنان خشت غيرت حوايجها و دارت سبول و قعمزت فتحت الكرتون اللي فيه افلام ..القت فيلم اسمه " آنا بيل" وعليه صورة بمبله ..
حنان: شكلا حلوو .. خليني نولعه و نتفرج عليه ..
ولعاته و قعمزت تتفرج...
........
منذر: الفيلا نبي نشريها يا امي ..
فاطمه: باهي ..اتفق مع صاحب الحوش وساهل بعدين .
منذر: تمام بكرا بنتلاقى معاه ...
طلع منذر و ماحكاش لامه ان الفيلا بيسجلها ب اسم آيه لانه عارف امه مستحييييل ترضى بالشي هذا ..
فاطمه: آيه بتسكن في فيلا ومن فلوسي..عليك قهره..
........الكاتبة : Beba Pink
ايناس مقعمزه في المكتب ..خبط مهند الباب و خش
ايناس: تفضل يا استاذ مهند..
مهند: كملتي الملفات يا ايناس
ايناس: ايه اتفضل ..و اي غلط كلمني نعدلهولك
مهند: مستحيل انتي تديري حاجه غلط يا ايناس..
ابتسملها ابتسامه حلوه و طلع
و منى زميلتها بتمووووت من الغيره لانه مهند مدير قسمهم و شاب انيق و جذاب و ناجح في عمله ..
ايناس في داخلها: زعما هذا نفسه اللي يبعتلي في مسجات حب .. الله كان يطلع هوا نفسه ما خلا ربي ماعطاني 😍
منى تأشر ل ايناس بيدها : هييييه وين مشينا
ايناس فاقت على روحها:لالا قاعده ما مشيت وين ..😅
منى:اهاا ..باهي..🔥
ايناس:تعرفي يامنى ..فيه موضوع شاغلني..
منى:شنو ؟احكي؟
ايناس:فيه رقم يبعتلي في مسجات مغازله و هكي .. و المشكله الرقم مجهول ..
منى:اوووو معناها فيه واحد معجب بيك ..سعدودك..
ايناس: زعمااا ..
منى:ايه ..ومرات واحد معبي زي اللي طاحت فيه صاحبتك حنان ..
ايناس في خاطرها اااايه كان تعرفيه المعبي شنو ظار فيها 😒..
منى:سمعت قالو توفى ولا ..
ايناس:ايه ..وتزوجت خوه ..
منى بحسد: اااايه بالله .. دنيا حظوظ..من قال البنت اللي في الكليه تقعد باللبسه عام كامل تحك بيها ..ياخدها واحد من اولاد فاطمه الطروف الكاملين
ايناس:لو سمحتي ..اعرفي شنو تقولي عن حنان .. صاحبتي و مانرضاش فيها ..
منى:امممم باهي ياودي ماقلنا شي احني ..
ايناس عرفت انها غايره من حنان حبت تزيد تقهرها: امالا كان تعرفي زوجها التاني كيف مدللها تزيدي تموووتي بسمك وبحسدك..
منى وهي منفعله شهقت هذيك الشهقه وقالت: منو منو منو اني بنحسد حنان ..تضحكي انتي .. اصلا مش شايفتها قدامي باش نحسدها ..
ايناس: اايه اايه واضح...
كملت ايناس شغلها و هي مش قابله منى و تصرفاتها ..
..........الكاتبة : Beba Pink
حنان كملت الفيلم و هي تررررعش من الخوف .. وبمجرد ماكملت الفيلم تلفتت للقبو ..
و زي ماتعرفو ان اغلب البيوت الامريكيه عندهم قبو تحت الارض و دروجه في نص الصاله ..ولانه احداث فيلم " انا بيل" يحكي عن بمبله مسكونه بالجن في قبو المنزل ،هكي حنان ركبها الرعب و قعدت مخنسه من القبو و تشبحله و هي خايفه .. رقت تجري لدارها تغطت وهي خايفه و تحاول ماتركز مع الهدووء اللي في الحوش
حنان في داخلها : هيا تعالى يامحمد هيااا وينك ..
.. شوي شوي و سمعت محمد لوطه ينادي فيها .. فرحت ان محمد جي ..و حست بالامان ..نزلت وهي تشوف للقبو بخوف ..
محمد لاحظ حركتها غريبه: خيرك..
حنان: مافي شي 😕
محمد : باهي تعالي نتعشو ..جبت معاي عشى من برا..
قعدت حنان لاصقه فيه وين مايتحرك، زي العيل لما يبدا خايف ويلصق في امه ولا حد كبير..
لين قعمز على الصالون و حط الاكل ع الطاوله .. حست بالامان لما قعمزت جنبه، كانت بينهم مسافه بسيطه، و بدو ياكلو ..
محمد: حنان جبتلك شفره و عبيتهالك رصيد باش تكلميني امتى ماتحتاجيني ..وتكلمي حتى اهلك..
حنان : اايه كويس باش نكلمك ..اما عيلتي نكلم فيهم ع الواتس..
محمد: شنو حالهم كويسين ..
حنان: ايه الحمدلله امورهم تمام ..
محمد:ربي يدووم .. حتى امي تبي تكلمك ..توا نسجلك رقمها باش تكلميها ..
حنان لما سمعاته تكلم عن امه الدم جمد في عروقها.. سكتت ..
محمد لاحظ تغير ملامح وجهها..
محمد: خلينا توا من امي و امك ..افتحي الكيس هوا و شوفي شنو فيه ..
حنان خدت منه الكيس و فتحاته ..القت فيه تليفون "آيفون" ..
حنان 😲: ليا ..
محمد: ماليشي هلبا نازل ..جبتهولك من الشركه رأساً..
حنان وعيونها قلوب: ماكنتش متوقعه في يوم ندير تليفون هكي 😍
محمد وهوا مبتسم: ماهو انتي هديتيلي تشيز كيك طعمته في لساني لعند تو..حبيت نهديلك حتى اني..
حنان شبحتلا شبحه كلها امتنان و شكر وقالت:
شكرا محمد.. 🥰
محمد وهوا يتهرب بعيونه عن نظرتها اللي تسحر فيه قال: عفوا 👀👀
كمل محمد اكل.. وقعد يشبحلها..كانت لابسه بيجاما متع دبدوب ورديه في الابيض ..لما لقى روحه بيسرح فيها زي يومتها سيطر على روحه..و وقف من مكانه ...
محمد: عندي شغل في مكتبي نكمله و بنرقد.. انتي اكيد بترقدي....تصبحي على خير
حنان وهي خايفه من الفيلم ماتبيش تقعد بروحها: لالالا مش نعسانه ..بنتفرج عليك و انت تشتغل..
محمد في داخله: مزال فيها فرجه هي ،عليك ليلة متهببه تي اني هااااارب هااااااارب ارحميني ...
بعدين رد عليها وهوا مبتسم وقال :شنو تلفزيون اني تتفرجي عليا..
حنان : لالا هكي ..كساد ومش جايني نوم ..
محمد : باهي ..
مشى محمد للمكتب و هي قدامه ماشيه ..لما جت قدام مدخل دروج القبو ..غمضت عيونها و سرعت خطوتها تقول من يجري وراها..
محمد من لما جي لاحظ خوفها و نظراتها للقبو..
محمد بتعجب: حنااان .. خيرك شنو فيه في القبو!!! .. من شنو خايفه؟
حنان بهمس وعيونها خايفات :نقص صوتك..
محمد قرن حواجبه مستغرب: علاش ..
حنان قربت منه: فيه شبح في القبو .. فيه آنا بيل😰
محمد ماقدرش يتمالك نفسه من الضحك،عرف انها متفرجه على فيلم" آنا بيل" اللي جابه ليها ..
حنان استفزها بضحكته عليها: علاش تضحك عليا تحسابني نهلوس؟ هما اصلا في افلامهم ديما الاشباح في القبو هذا دليل كافي انهم ديما مسكونات 😡
محمد وهوا يضحك : يامجنونه هذا فيلم ..مش حقيقه..
حنان : مسكون ..مافيش قبو مش مسكون😰
محمد قام حاجبه بثقه: تعالي معايا عشان تتاكدي انه مش مسكون و انه فاضي مافيشي شي ..
حنان: به هات يدك .. 🥺
مسك يدها و نزلو للقبو كانت ترعش وانفاسها متلخبطات مع كل درجه ينزلوها .. لما نزلو كان القبو مظلم ..فتح محمد الضي ..بس اغلب اللامبات محروقات كانت فيه لامبه وحده تخدم ..يعني الاضاءه ضعيفه ...
محمد : هااه شوفتي كيف فاضي مافيشي شي ..
حنان وصوتها يرعش: ايه ايه صح فاضي .. فاضي ..
قعدت تلف بعيونها لين لقت طاوله و عليها صندوق صغير ..قربت من الطاوله وبعدت عن محمد مسافه .. عجبها الوان الصندوق.. وجاها الفضول تفتحه .. فتحت الصندوق ..... والقت بمبله محطوطه في الصندوق ... صرخت حنان على طول حسها ..ومشت تجري لمحمد .. حضناته بكل قوتها ..بلا شعور منها وكانت اووول مره تحضنه ..
حنان وهي في حضن محمد: آنا بيل القيتها والله هي هي 😭😭😭
محمد مش مستوعب ان حنان حضناته قعد فاتح دراعه ماعرفش يحضنها ولا لا .. عنده رغبه قووويه ان يحضنها ..قاااوم هالرغبه .. قاااوم .. بس لما رفعت عينها و شاف الخوف في عيونها زي عادته حس بالضعف قدامهم .. ماقدرش يهرب زي كل مره ...
هالمره استسلم .. و حضنها ... ❤
..........
الكاتبة : Beba Pink
أنت تقرأ
حنان(ليبية_منقولة)
Romanceانا ﮼حنان ومعك عرفت معنى الحنان💙😩. . . رواية حنان💙🌼. للكاتبة: Beba pink. متكونة من 2o حلقة💙🪐. قراءة ممتعة💙🫀.
