حنان(ليبية_منقولة)

حنان 8

#حنان

الكاتبة : Beba Pink

《8》
حنان في دارها مقعمزه و ضامه ركبيها لصدرها و تتنفس بسرعه و تحاول تسمع اذا كان محمد لحقها و بيضربها او لا .. قعدت فتره هكي وهي ضامه رجليها بقوه و بعدها رخت روحها شوي .. وقفت و قربت من الروشن شافت اذا كان سيارته قدام الحوش او لا .. لقت سيارته مش موجوده عرفت ان محمد طلع ..
حنان: هففففف الحمدلله مش حننضرب .. طلع .. توا نمشي نفطر براحه ..
نزلت و هي مبتسمه و كأنه احلى لحظات عمرها لما يكون مش موجود او لما تكون بروحها ما معاهاش اي انسان ..القت الطاوله زي ماخلتها عرفت ان محمد مافطرش وماشربش قهوته .. تنهدت و قعمزت تفطر..
......
فاطمه ع التليفون مع ولدها محمد..
فاطمه: طمني ياوليدي كيف حنان معاك ؟
محمد:مش عارف ..عاديه ..
فاطمه: كيف عاديه ..هادي زوجتك و..
قاطعها محمد: لا زوجتي لا سو اني شخص عملي عندي طموحات نبي نحققهم مانبي شي يشغلني شهور و تروح ع حالها ...
فاطمه في خاطرها: معقد زي بوه
محمد: هيا عندك شنو تقولي لاني بنسكر..
فاطمه: قصدي ... يعني ..
محمد: احكي يعني شنو؟ ... هيا اساسا بنت غامضه و في قصه وراها الله اعلم شنو هي و الموضوع كله مش مرتاحله غير نساير فيك ومش فاضيلها نشغل روحي بيها
فاطمه: مافي لا قصه لا شي .. غير انت معقد
محمد: نقولك حاجه ..مع السلامه عندي ما اندير ..
و سكر التليفون ..
فاطمه :مشكله هكي .. زعما يقعد معاها غير هكي ... لالالا مستحيل مستحيل كل شي حيمشي زي ماخططتلا..
كملت فاطمه قهوتها و هي تفكر في حنان و محمد ..
.......الكاتبة : Beba Pink
مرو ساعات دارت حنان الغدى و دارت لفه في الحوش غيرت اماكن حاجات دارت مق كابتشينو و قعمزت في الصاله ع التلفزيون القت القنوات كلهم بالانجليزي و هي لغتها مش قويه تفهم شوي شوي ..
حنان:علاش مانتعلم لغه ..عالاقل نكون استفدت بشي في هالشهور اللي بنقعدهم هني..ويمكن هاللغه نلقى بيها شغل لما نروح .. شغل هه ..اما شغل و خوتي قاعدين زي الجنون ..حي قعدت نتكلم مع روحي شكلها هالعيله مابيخلوني لين ينشفوني..
ابتسمت حنان على كلامها لعند ما سمعت صوت مفاتيح الباب تغيرو ملامح وجهها في لحظه ..فتح محمد الباب و خش ..
محمد وقف و قعد يشبحلها يحاول يفهم نظرة عيونها هل هدت ولا مزال خايفه ..!
حنان لما شافاته وقفت و كانت بتمشي بس وقفها صوت محمد ..
محمد: استني ..
حنان بصوت مرعوش: اسفه ..اسفه ع اللي صار بكري ..اخر مره والله اخر مره ..
محمد عصب و تنرفز من طريقة كلامها معاه حس روحه و كأنه وحش وكأنه مش من سلالة البشر و زي عادته لما يعصب قبض على يده بالقوه لين عروقه برزو..
محمد: لا حول ولا قوة الا بالله ..
حنان قعدت تشبحله و خايفه ..
محمد وصوته اعلي شويه: بالله عليك ماتكلمينيش  بالطريقه هادي ..
حنان وصوتها زاد خوف وتوتر : حاضر حاضر اخر مره ..
قاطعها ..
محمد بصوت اعلى: قلتلك ماتكلمينيش بالطريقه هادي ..
حنان: هاه سكتت سكتت اسفه ..
محمد: علاش تتاسفي علاش ..علاش كل هالخوف .. تشوفي فيا غوله تشوفي فيا حيوان مفترس ..
حنان ساكته و مش قادره تفهمه ...
محمد زفر بالقوه و شبحلها : امتا يتمو هالشهور مش عارف اني ..
حنان مزال ساكته و تزرط في ريقها بخوف ..
شبحلها محمد و عرف انها خايفه قرب منها بشوي .. حنان خافت و دارت يدها ع وجهها .. محمد تنرفز و عصب من حركتها حاول يمسك روحه ويضبط اعصابه و مسك يديها الزوز ،و هي ترعش يديها يرعشو بين ايديه عيونها معلقه في عيونه ماتقدرش حتى ترمش من الخوف ماقدرتش تستمر و هي تشبح فيه غمضت عيونها تراجي فيه يضربها زي خوتها وزي احمد لحظات سريعه حستهم تقول سنه .. بس محمد مسك يديها و ركز فيهم كيف يرعشو بقووه نزلهم لوطه عرف و تأكد وبصم ان حنان عااااانت هلبا في حياتها من العنف الجسدي وان وراها قصه بس برضو مايبيش يعرف ولا يبي يتعب روحه لانه حنان مش مهمه عندا.. سكت شوي ..و بعدها تكلم بصوت هادي ..
محمد: اني اسف لاني خوفتك مني بكري وتوا ...
حنان فتحت عينها بسرعه و كأنها تحلم او مش مصدقه ..
حنان: ش ششنو ؟ ااا كيف يعني اسف
محمد: اني اسف .. شنو كيف يعني ..ماتعرفيش معناها..
حنان: يعني انت اسف مني .. ااا قصدي اني اسفه منك ..قصدي ... وضحكت ..ضحكه فيها مراااااره ..
محمد مستغرب من تصرفها : شنو يضحك فيك..
حنان: لا بس اول مره في حياتي حد يقولي اسف.. هههههه لين نسيت معناها ههههه تعرف متعوده يهينوني و يسبوني و يضربوني واني اللي نجي زي الكلبه و نتأسف..
رقت حنان فوق و هي تضحك ضحك مرر ضحك يوجع القلب ..
محمد في داخله: شنو قصتك ياحنان ..مانبيش نشغل روحي بيك ..بس انتي تسحبي فيا لقصتك شنو وراك ياحنان ..علاش هالحزن فعيونك و الخوف من اللي مسببلك كل هالوجع .. مستحيل يكون خوي لانه احني في عيلتنا مانضربوش حتى في خواتنا.. زعما بوها؟ بوها مشلول ..اكيد خوتها واضح عليهم مجرمين ...
فاق محمد من شروده و خش للمكتب متاعه يدفن روحه بين اوراقه ويشغل روحه ب العمل باش ينسى الدوامه اللي هوا فيها ...
حنان رقت فوق تضحك و مش مصدقه ان فيه حد تأسفلها .. بعتت مسج ع الواتس ل ايناس
حنان: تأسلفي 😂
ايناس ردت : منو؟ وعلاش؟ 😲
الكاتبة : Beba Pink
حنان:محمد، عشان علا صوته عليا بكري .. اول مره حد يقولي اسف حسيت روحي بنادمه لاول مره حسيت عندي خاطر عند حد حسيت روحي ذات قيمه 😂
ايناس: هذا كله حسستهولك كلمة اسف
حنان: اااه يا ايناس ماتعرفيش معناها عند بنت زيي ماعندهاش شخصيه ولا وجود ديما متعوده تكون ع الرف مايتفكروهاش الا وقت حد يبي يفش غله ..
ايناس: حبيته محمد شكله جنتل مان مش زي عيلته..
حنان: تصوري عشان علا صوته و خوفني بسسس تأسف ..
ايناس:تعرفي علاش .. لانه ليه سنين برا ليبيا خدا ع جو الاجانب مش زي الجفاف اللي عندنا ياكبدي ..
حنان:😂.
هيا خليني توا ننزل نجهز الغدى مش كان تاسف معناها خلاص
ايناس: بري ياعمررري ربي يوفقك و يفرحك
سكرت حنان النت و نزلت تجهز في الغدى ..
.....الكاتبة : Beba Pink
منذر في منتزه مع آيه ..
منذر: ياحبيبتي ياعمري اني امي تشوف فيا صغير مستحيل حترضى تجي نخطبك
آيه: امالا خلاص انسى آيه و عيون آيه و جمال آيه .. اول عريس حيتقدملي بنوافق .. قداش بنراجي اني ..
منذر: لالا ارجووك ارجوك والله نموت بلاك تعرفيني نحبك و مستعد نفديك بروحي ..
آيه وهي تمضغ في مستكه: تعرف الكلام هدا و الدسكه المشروكه متع الشباب يمشيش معايا اني .. نعرف الافعال بسسس و الباقي كله عندي مجرد حرووف
منذر: اقسم بالله نحبك يا آيه كيف نثبتلك بسس
آيه: اخطبني..
منذر : حاضر نقنع امي ..
آيه: امك العزوزه الشينه هادي ماتهمنيش ياتخطبني يااا فوتني
منذر: حاضر والله لما نخطبك اصبري عليا بس عطيني مهلة شهرين و نقنعها ..
آيه: مش حيصبرني هالشهرين الا شي واحد بسسس
منذر: شنو؟؟
آية وهي تشقلب فعونها فوق : فلوس .. تحول مبلغ لحسابي هديه لآيه حبيبتك ..
منذر: حاضر قداش تبي اني نعطيك
آيه : سلمه حبي ياربي
منذر: نحبك والله نحبك
آيه: هيا هيا بنروح تأخرت ..
ناضت آيه من قدامه تتلوى بعدت عنه رن تليفونها برقم مكتوب اسمه "تخصص رصيد"  ضحكت و قالت في خاطرها : توا كنت مع تخصص فلوس و توا بنرد على تخصص رصيد كلاب مايبوش الا اللي تضحك عليهم هههههه
وضحكت ضحكتها العاليه و عينها ع اللي ماشي و اللي جاي ..
اما منذر ركب سيارته و هوا حزين
منذر: ضروري نقنع امي ضروري نتزوج آيه نموت من غيرها اني والله نموت .
........
الكاتبة : Beba Pink