#حنان
الكاتبة : Beba Pink
《2》
وقفت حنان ع المرايا تشبح لوجهها و تضحك
حنان:بالله من قال في يوم من الايام يجي حد و يخطبني واااك عليك شيااانه فيا ..
حنان ماهيش شينه زي ماتقول بس هي من الناس اللي ماعندهم ثقه في شكلهم وديما توقف ع المرايا و تبدا تتهزا من شكلها ..ملامحها عاديه وهاديه عيونها و شعرها ع البني لونها قمحي بشرتها حلوه وجهها مدور و طولها و وزنها متوسط يعني بنت عاديه زي اي بنت مش هداكه الجمال ولاهي شينه و ماهي من البنات اللي مهتمات بشكلهم ولا تقدر تهتم من الوحوش اللي ساكنه معاهم اللي حارمينها حتى من انها تشري ملابس جديده حارمينها حتى من الطلعات العاديه ماتعرفش الا الزيارات العائليه الضروريه و قرايتها اللي حاولو يوقفوها منها بس جابتلهم عمامها و خوالها باش خلوها تستمر و تقرا .. حنان بنت متفوووقه في قرايتها عندها صديقه وحده اسمها ايناس ماعندهاش صحبه مع الاقارب لانهم ديما يهزو على شكلها و ملابسها القديمه ...
بعد ماكملت تأمل في شكلها خشت عليها امها و معاها هدايا حلوه ساعه و باقة شوكلاته و فستان و تاكم دهب صغييييرون و حلو ..
حنان:هدا شنو ؟؟؟ 😳
زينب ام حنان: هدايا من خطيبك مش اليوم عيد ميلادك سكرتي 23 وخشيتي24 🤩
حنان: هذا ليا اني 😳😳😳
زينب: ايه ليك يابنيتي هدي الدنيا ضحكتلك و ربي استجاب لدعواتي ان حظك في الحياة يكون حلو😥
حنان وعيونها دموع:هدي اول مره تجيني هديه يا امي حاسه روحي بنبكي 😢 زعما الدنيا ضحكتلي زعما ربي بيعوضني خلاص 😢
زينب باست بنتها: ايه يابنتي احمد ولد كويس اهو تفكرك حتى في عيد ميلادك حتى اني اللي جبتك نسيته
حنان:بس كيف عرف ؟؟ اني وياه مانحكوش ؟؟
زينب: امه يومتها تصلت بيا و قاتلي ولدي يسال على عيد ميلادها واني قلته ليها ...
سكتت حنان و قعد تشبح للهديه بفرح و تجرب في الساعه و تذوق من الشوكلاته 😍
...
فاطمه مقعمزه و جنبها ولدها احمد قالت :
اليوم بعتتلها هديه خطيبتك قلتلها انت بعتتها ليها توا تلقاها عيونها قلوب قلوب مسكينه تحسابك متفكرها وانت ماتندري عنها ههههههه
احمد: به وعلاش تقوليلي شنو علاقتي بيها اني ..
فاطمه: هادي خطيبتك و بعد شهرين بتكون زوجتك
احمد:قصدك ضحيتي
فاطمه:وطي صوتك تو يسمعوك خوتك و خواتك
احمد: منو خوتي ؟ خوي منذر فوق في داره و خوي محمد في امريكا مريح راسه منكم و خواتي في بيوتهم متزوجات و بوي في قبره يعني خليني نعبر براحتي ..
فاطمه: الله يرحمه😔
احمد: ياريته خذاني معاه ياريته ماخلاني ميت في الحياه😔
فاطمه:بعيد السو ياوليدي اهو توا بتتزوج وكل الامور تنحل
وقف احمد و قاللها: قصدك بتتعقد..
ومشى و خلاها دمعتها ع خدها ...
.........
الكاتبة : Beba Pink
كانت ايناس مقعمزه هي و ايناس في دار الضيوف يختارو في ارواب من النت لانها ماتقدرش تطلع تشري خوتها مانعينها
ايناس:صحه ليك يا حنوونه عطوك مبلغ خياالي للبتاات من قدك توا البنات كلهم يبتتو بروحهم وبفلوسهم وزيدي عليها الصاله حجزوهالك فخمممه وكل شي عليهم🤨
حنان: قولي ما شاء الله يابنت 😒
ايناس : ما شاء الله 😏
شويه و رن تلفون حنان برنة الفايبر فتحت حنان لقت مسج من اخت خطيبها فتحتها القت فيها صوره لشاب حلووو بعتتلها حنان :هذا منو؟
وفاء: احمد خوي 😌
حنان:😍😍😍😍😍😍😍😍😍
دارت روحها ثقيله قالتلها :اها ربي يحفظه وسكرت الفايبر ..
مسكت ايناس منها التليفون شهقت هذيك الشهقه قررريب روحها طلعت ..
ايناس: وووووه عليا ووووه علياااا ووووووه هذا شنو هذا منووو 😍😍 اسمعي حنونه الدين حلل ب 4 صاحبتك اني جيبيني ضره عليك
حنان: نوووضي تل 🤨
ايناس: يشحطك يا مكاره خززي عليك 😒
حنان:محلاه يا ايناس معقوله كل هالمواصفات مهندس ناجح و سمعته محترمه و حالته مرتاحه و طرررف 😍 مستحيل الحياة مش معودتنا تعطينا حاجات كامله
ايناس: اهو بدينا في النكد 😒
مسكت حنان التليفون و عيونها قلوب و قعدت تتامل في صورته و قلبها قابضها حست ان فيه شي بيكون ناقص بس شن هوا مش لاقيته ...
ايناس مع غمزة: وريني الهدايا اللي جابهم ليك خطيبك😉
حنان:لحظه و نوريهم لك 🥰
خشت حنان للدار تفاجأت بخوتها الزوز اشرف و عماد مقعمزين ياكلو في الشوكلاته
اشرف: شوكلاته كيف الحق ياخليقه مصدقه روحك
عماد: شوكلاته نفرشو بيها في سوق الجمعه و نبيعوها الطرف بجنيه😂
حنان وهي ترعش من الخوف: عععلاش هذي شوكلاتي هديه ليا😰😰😰
اشرف: هديه يافاسده ومزال تقولي فيها ..
عماد: هات الساعه نبيعها ولا نعطيها للحب متاعي..
اشرف : اما حب منهم حباتك هلبا
وقعدو اشرف وعماد يضحكو وهي ميته بالخوف
بعد ماوقف عماد و في يده الساعه و اشرف الشوكلاته طاح صندوق صغير انفتح وطاح منه التاكم
اشرف : لاه لاه لاه تاكم دهب 😮 شوفت يا عماد نسيبنا المعبي
عماد: هههههه حصلنا باش نسهرو ليلة الخميس و باش نشرو جونا كله ونجيبو جونا كله😉😉
حنان واقفه قدام الباب و دموعها ينزلو دفها عماد و هوا طالع : زيدي غادي زيدي
اشرف: ناقصك غير شوكلاته و ذهب يا نعجه
طلعو و خلوها قعمزت حنان و مسكت الصندوق الفاضي متع الذهب في يدها و هي تبكي 😭
خشت عليها ايناس : علاش طولتي ؟
لما لقتها مقعمزه و تبكي جتها تجري
ايناس: خيرك شنو فيه؟
حنان:خذوهم مني هالمستذئبين 😭😭😭
ايناس: الهدايا؟😮
حنان: ايه 😭
ايناس: يانهارك المغبر 😢
حنان: نكرههم يا ايناس امتا نفتك منهم الكلاب هما مايبونيش نفرح بكل😭
حضنت ايناس حنان و قعدت تهدي فيها لين هدت هدرزت عليها شوي غيرتلها جوها و روحت..
فاتو الايااام و جي يوم الفرح ..
كانت حنان واقفه في الصاله تشبح ل احمد و هوا خاش عشان يروح بيها كانت اللقطه بالبطيء حنان تشبحله وهي فرحاااانه طايره من الفرحه كان كل شي زي ماتبي و زي ماتحلم اي بنت ،فيلو فخم و راقي ميك اب حلوو و تسريحه تهبل طالعه زي الاميرات صاله راقيه و عريسها قاعد يقرب منها وسيم صفاته ممتاااازه كل بنت تتمناه شافت لقريباتها و كيف مصدومات من نصيبها حست بالنصر عليهم لانهم كانو يتهزو عليها و مستقلين بيها ..قرب منها جت عينه في عينها لاول مره.. شاف الفرحه فعيونها ..
احمد في خاطره :هه مسكينه .. وابتسم 🙂
مسك يد حنان صور معاها شوي و روح بيها ...
خشو حنان و احمد للفيلا متاعهم اللي كان كل شي فيها فخم اثاث اول مره تشوفه حنان في حياتها قعدت تتلفت يمين و يسار قالت في خاطرها: حححي هذا حوشي هذا ليا مش مصدقه 😍😍 لالا صدقي ياحنان الدنيا ضحكتلك و ربي سمع لدعواتك و بدل حالك لاحسن حال .. ابتسمت حنان ابتسامه من قلبها وكانت هادي اخر مره تبتسم فيها حنان من قلبها .... سكر احمد باب الفيلا وراهم بالقووووه لين فزعت حنان و تلفتتلا مخلوعه ...
أنت تقرأ
حنان(ليبية_منقولة)
Romantizmانا ﮼حنان ومعك عرفت معنى الحنان💙😩. . . رواية حنان💙🌼. للكاتبة: Beba pink. متكونة من 2o حلقة💙🪐. قراءة ممتعة💙🫀.
