#حنان
《19》
الكاتبهBèbä Pĭnk
فاقت حنان حست انه فيه حد حاضنها فتحت عيونها و شمت عطر محمد،عرفت انه هوا اللي حاضنها..تذكرت الكلام اللي قاله امس وقت كانت فاقده الوعي .. مسكت ذراعه و زادت حضناته اكثر، وكأنها كانت تبي تندمج فيه، فاق محمد على ضمتها ليه ابتسم ..عرف انه حنان ناضت..ساوى روحه و خلا وجهه مقابل وجهها ..
محمد بصوت حنون و دافي:الحمدلله على سلامتك يا أحلى بنت تشوفها عيني ..
حنان مبتسمه و صوتها مبحوح :احلى بنت هههه شكرا ع المجامله..
محمد قام حاجبه:اايه احلى بنت..ما تعرفيش انك طرف يابنت..
حنان:ما عمره حد قالي انك حلوه 😶
محمد:ماهو شعبنا العزيز مايحبوش الا المزيته .. ماتعجبهمش اللي زيك جمالها هادي 🤨
حنان:اححم اي نعرف جمالي هادي 😌
محمد شاف في حنان نظره حلووه كلها مشاعر ، بعدين حط خشمه على رقبتها و خذا نفس عميق..دفن راسه بين شعرها و رقبتها..
محمد بصوت هادي:معادش نبي شي من الله الا انك تكوني معاي العمر كله ..
ابتسمت حنان وحست بالراحه و السعاده، حطت يدها على شعر محمد قعدت تخلل فيه باصابعها ..
حنان بصوت هادي: بس يا محمد .. فيه اتفاق بيننا و امك ..
محمد قام راسه ليها و تكلم بصوت حاد: لا امي ولا فيه مخلوق غيرها يقدر يبعدك عني ..
حنان: بس احني متفقين 4شهور و ..
قاطعها محمد: لا ياحنان معادش فيه4 شهور .. مددناها المده .. للعمر كله ..
حنان قعمزت و محمد سندها بايديه ..
حنان:محمد اني مزال عندي طموحات نبي نحققهم.. وانت عندك اعمالك و حياتك ..انت مش مضطر تضحي و تحميني منهم ولا مضطر تشفق عليا ولا ..
قاطعها محمد: نحبك ..❤
حنان تفاجأت من اعترافه .. حست قلبها بيطلع من مكانه سكتها بالكلمه معاد عرفت ترد .. حست بمشاعر حلووه...
محمد وعيونه ذابلات : طموحي الوحيد انك تكوني لياا .. انك تكوني سعيده ..تكوني زوجتي .. ام صغاري ..
حنان مع آخر كلمه حست النفس غايب عليها .. فهمت قصد محمد، ماكانتش مفكره في الشي هذا ما كانتش حاطه في بالها انه الامور بتتطور بينهم و انه بيجي يوم و محمد بيطلب منها الشي هذا .. استمر سكوتها ..
محمد وهوا مركز في عيونها: راحتي معاك يا حنان .. ولو فكرتي انك تروحي لليبيا حنسيب كل اعمالي ع خاطرك و نجي معاك .. انت كل مشاريعي وكل اعمالي ..
قرب منها و باسها على راسها و على خدها ..
حنان: محمد ..ااني ..
محمد:اشششش .. ولا كلمه .. فكري براحتك..وانتي وين تبي تكون حياتنا اني موافق ..المهم معاك..
حنان سكتت .. وقعدت تفكر ...
محمد:ماقلتيلي شنو الطموحات اللي تبي تحققيهم ..
حنان شافت قدامها بنظرة حالمه : نكمل ماجستير في ادارة الاعمال .. و الطموح الثاني و الاهم ...
نزلت عينها و مسكت اصابع يد محمد و قعدت تحرك فيهم و ملامح الحزن انرسمت على وجهها : بوي ..
محمد تنرفز لما شاف الحزن في عيونها : خيرا بوك ..
حنان: بوي زمان لما كنت صغيره ..كنت راكبه معاه في السياره و نتذكر كان يوم مطر قويه ..قلتلا نبي شوكلاته و قعدت نعيط عليه لين نزل عشان يشريهالي .. بس ..جت سياره و ضرباته ... بوي منها قعد مشلول ..قعدت حاسه بالذنب من يومها .. عاهدت نفسي اني نقرا كويس عشان نخدم و نديرلا العمليه اللي هوا محتاجها ..
محمد ضمها ليه بالقوه وباسها ع راسها وقال: ياقلبي انتي .. باذن الله حيرجع يمشي و حتكملي قرايتك ..
حنان: ان شاء الله ..
محمد سكت شوي و بعدها شاف فيها: قولي لامك تبعت تقارير بوك .. اني حنتكفل بالعمليه ..
حنان: لا يامحمد .. العمليه غاليه هلبا ..وبعدين انت تعرفني مانحب حد ....
قاطعها محمد :ششششنو ششنو شنو .. حد .. من الحد هذا ..
حنان نزلت عينها و سكتت ..
محمد بهدوء : اني انتي .. احني واحد .. معادش نبي نسمع كلام هكي باهي .. ولا تبيني نزلك للقبو ونديرو حاجات عيب😉
حنان دفنت وجهها في جاكته من الخجل ، وهوا قعد يضحك على حركاتها البريئه..
..........الكاتبة : Beba Pink
آيه: شوفتي ياماما العبيط شرالي أرض تجارية هههههه مش قادره من الضحك ياماما هههههه
سناء:ماتوقعتاش خروف للدرجه هادي..
آيه مع غمزه:خروف سمين و وطني 😂😂
سناء:ههههه باهي قوليلي توا يابنتي شنو مخططه..
آيه:خلاص مليت منه ،خذيت منه مانبي فيلا و مبلغ في حسابي و ارض مليحه ..توا خطة الباااي باااي ههههه
.................الكاتبة : Beba Pink
مهند :ايناس بنكون معاك صريح من توا .. اني شاب على قد حالي توا كيف بادي حياتي ..يعني عايش ع المعاش..عندي شقه صغيره نأثث فيها كل مره نشري حاجه..مانوعدك بحياة رفاهيه ،بس نوعدك اني على قد مانقدر نخليك ما تحتاجي شي،و نحطك في عيوني ❤
ايناس سكتت و تذكرت قصة حنان و كيف عاشت حياة الرفاهية مع العذاب وعرفت ان فعلا اهم شي الراحه و القدر و الاحترام .
ابتسمت حنان :اهم شي يكون الاحترام و الود بيننا و الباقي معاشي مع معاشك نقدرو نعيشو بيهم احلى عيشه 😊
مهند: معناها على بركة الله ..بكرا حنجيب العيله يتعرفو عليكم 😉
ايناس بخجل :يتفضلو يآنسونا😊😊
..................الكاتبة : Beba Pink
فاطمه مزالت مستمره معاها الكحه و الدم المرافق ليها ..
وفاء:ماما بديت نخاف عليك .. امشي للدكتور..
فاطمه و هي خايفه:مافيا شي لالا ..مافيا حتى حاجه كحه و تمشي توا ندير الزعتر و تمشي ..
وفاء: اما زعتر ياماما انتي مش عارفه خطورة الامر .. هذا دم مع الكحه يعني شي خطير..
فاطمه :اسكتي بلا دوه فاضيه و فلسفه زايده ..
فاطمه في خاطرها خااايفه يكون فيها شي ماتبيش حتى تمشي للدكتور ...
شويه و خش منذر يجري و هوا يرعش: امي امي .. آيه ..آيه قاتلي اللي بيننا انتهى سيبتني يا امي ..
فاطمه بابتسامة نصر:فتكينا منها ..من الاول ماهيش لينا ولا من مستوانا ..
منذر و عيونه مدمعات:بس اني نحبها ..نبيها نموت من غيرها ..
فاطمه:اصحى على روحك ..شنو هالحاله اللي عايشها وجو الافلام ..كمل قرايتك و نزوجك ب احلى بنت فيك يا ليبيا ..
منذر:مانبيش نبيها هي يا امي ..
وفاء:هدي اعصابك يا وخيي..بالك مشكله صايره معاها ولا شي..
منذر : لا مافي شي صاير معاها..
وفاء:باهي ماسالتهاش شنو السبب ..
وقفت فاطمه و قالت بهزوه :بالك القت الفيلا كبيره عليها ،ماتقدرش تسكن فيها ...
منذر بصوت مهزوز: الفيلا ليها يا امي..
فاطمه شهقت و حطت يدها ع صدرها:كيف ليها؟
منذر بصوت واطي و مهزوز:مسجلها ب اسمها ..هي و ..
فاطمه:وشنوو؟
منذر:ارض تجاريه و مبلغ في حسابها من الخزنه متع بوي ..
فاطمه طاحت ع الارض فقدت الوعي معاد قدرت تتحمل من الصدمه و من ضحكة آيه عليها... رفعوها منذر و وفاء للمستشفى ..
...........الكاتبة : Beba Pink
رجعت حنان للحوش تصلت ب ايناس وحكتلها كل شي صار ..
ايناس:وافقي ياغبيه و كملي حياتك معاه غادي ..شنو بتديري تجي هني للهم و الحروب ..
حنان بحيره : مش عارفه يا ايناس .. محتاره ..حاسه الموضوع كبير عليا ..
ايناس:ماهو قالوها وجه الفقر يستحي من الغنى و انتي وجه النكد يستحي من الفرح 😒
حنان: الحق مش فيك في اللي يحكيلك..🤨
ايناس: غير خلينا توا و قوليلي .. تحبيه؟
حنان:مش عارفه .. اللي نعرفه انه مشاعري متلخبطه و مستغربه من نفسي كيف قعدت مانرتاحش الا بوجوده و حاسه بالامان معاه والفرح .. بس خايفه مايستمرش هالشعور معانا ،خايفه من بكرا.. تعرفي شعور لما تكوني عايشه طول عمرك في الهم ..لما تجيك فرحه تبدي خايفه شنو بيصر بعدها بس لانك فرحتي و ارتحتي ..
ايناس: مش قلتلك وجه نكد 😒
حنان: بري بري يامتع مهند.. معاد بنحكيلك شي ..
ايناس:أااااااه من مهند و عيون مهند و صوت مهند ..
حنان تبي تستفز ايناس:ووععععع بنرجع من القرف..
ايناس:مافيش قرف غيرك يا متع القبو ..
حنان قعدت تضحك :نقولك حاجه ..مع السلامه..
سكرت منها و قعدت سرحانه في محمد و اهتمامه بيها و حنانه عليها و كيف مانع عليها الحركه و يحاول يضحكها و يفرحها ب اي طريقه ..
دقيقه و خش محمد قعمز جنبها ع السرير متع دارها: حنونتي بنيتي ..كيف حالك توا؟
حنان: بنيتك 🙈
محمد:ايه بنيتي..و حبيبتي ..وصديقتي..
سكت شوي و غمزلها .. وكمل: و زوجتي و ام صغاري ..
حنان ابتسمت و مسكت يده : خليني نفكر و نقرر براحتي ..
محمد:فكككري و قرري لكن بالنسبه ليا محسومه..
حنان شبحتله ب استغراب : كيف ؟
محمد حط كفوف ايديه على خدودها :مش حنسيبك .. ولاحد حياخدك مني ..نحبك يابنت افهمي ..
حنان بدلال:كيف بنفهم و اني ماحبيتش قبل ..
محمد:اهو توا بتحبيني اني ..
حنان بنظرة تحدي: من قالك ؟🤨
محمد:اني قلته يا بتحبيني يابتحبيني ..خيار ثالث لاا..
حنان تبي تستفزه:مرات نختار نرجع لعيلتي و نتطلقو و نحب غيرك ونتزوجه ..
محمد وقف بعصبيه و النار ولعت فيه: ردي بالك ياحنان ردي بالك .. احبال الغيره عندي ماتلعبيش عليهم ..
حنان بدلع وهي مبتسمه وماخافتش منه لانها واثقه انه مستحيل يأذيها: اممممم ... حاضر معادش نعاودها..
محمد رجع قعمز جنبها: حنان حبيبتي ..اني غيور هلبا ماتلعبيش في ملعب غيرتي عشان ما انعصبش ..
حس روحه قسى عليها شوي،ضمها ليه و باسها على راسها ..
حنان مش حاسه الا بالسعاده و انها ماتبيش هاللحظات يتموو ..
...........الكاتبة : Beba Pink
فاطمه مقعمزه ع سرير العياده بعد ما فاقت ودارولها التحاليل و الصور وجنبها وفاء و منذر ..
الدكتور و وجهه مايتفسرش: مانبيش نقول ..بس الموضوع خطير و ضروري تعرفي ..
فاطمه وقلبها قريب بيوقف:شنو فيه يادكتور..
الدكتور:عندك تليف في الكبد ..وللاسف في المراحل الاخيره ..
فاطمه وهي ترعش: فلوسي توا بفلوسي نتعالج و نرجع احسن من قبل ..
الدكتور:للاسف.. الفلوس مش حيديرو شي..انتي حاليا عايشه على جزء بسيط من الكبد ..الجزء هذا لما يتليف ....
سكت الدكتور ..و وفاء ومنذر يبكو و مزال مش مستوعبين ..
فاطمه بهستيريا :لالا اني مش حنمووت لا مستحيل .اني لاا ..
حضنت وفاء امها و هي تبكي و منذر مش عارف على شنو يبكي على امه ولا على ضحكة آيه عليه ..
"انواع المصايب اثنين ، فيه بلاء و فيه ابتلاء .. الابتلاء ينزله الله ع العبد عشان يمتحنه و يؤجر على صبره .. بس البلاء ينزله الله على العبد انتقام منه عشان يعاقبه على حاجات دارهم العبد ب ايديه .. و اللي جي لفاطمه هوا بلاء ع الشي اللي داراته ..ومزال حساب الاخره اعظم "..
........................
نزلت حنان من دارها خشت للمطبخ تفكر شنو تدير غدى .. طلع محمد من المكتب سمع صوت حركه في المطبخ ،جي و القى حنان فيه ..جي محمد قرب منها.. ومسكها من خسرها ..
محمد:شنو قلنا احني ..مش قلنا حركه ممنوووع ..
حنان :ملليت من السرير نبي نتحرك🥺
محمد: ياااقلبي يا عمري ضروري ترتاحي مايجيش هكي.
حنان:نبيش نخليك من غير غدى..
محمد قرب راسه من راسها ،حط جبهته على جبهتها، وغمض عيونه، وحنان ماقدرتش الا انها تدير كيفه ..
محمد بصوت زي الهمس:نبيش اكل نبي راحتك بس..
حنان سكتت .. الكلام غاب عنها ...
محمد: نحبك...
قرب منها اكثر.. بس حنان لفت وجهها عنا .. محمد احترم رغبتها و ضمها ليه .. حنان ضماته ..وانحرجت و حست بإنها دارتلا لقطه مش حلوه ..بس هوا ما زعل منها..
محمد بعدها عنه بهدوء و شبح لعيونها: بنيتي.. شنو رايك بعد اسبوعين نكمل اعمالي ناخد اجازه و نسافرو نغيرو جو..
حنان بلهفه :بجديات ..وين ؟
محمد:انتي اختاري ..
حنان: نبي اي جزيره.. نبي مكان فيه بحر و يكون اخضر و هااادي ..
محمد باسها من راسها:خلاص تم ..نمشو لجزر هاواي..مكان حلو حتحبيه..
حنان و الفرحه فعيونها قعدت تنقز :مش مصدقه حلم حياتي نمشيلهم 😍
محمد:وعد مني نسعدك و نحققلك احلامك على قد مانقدر..قداش عندي بنيه اني ❤
حنان :وحده بسسس 🥰
حضنها محمد مره تانيه و هوا فرحان لفرحها وحاس بالسعاده ..
.........................
فاتو اسبوعين و حنان و محمد عايشين في سعاده و راحه و حنان مزال تفكر و ماعطاتاش جواب نهائي و مزال كل واحد فيهم في دار..
مهند خطب ايناس بشكل رسمي و حددو الفرح ...
والد حنان دار عمليته في المانيا و رجع لليبيا يتلقى في العلاج الطبيعي لين تتحسن حالته و يرجع يمشي كويس..
آيه رجعت لصاحبها رئيس العصابه و خطبها و فرحهم الاسبوع الجاي ومزال منذر يدور فيها و يدور في ارقامها و يلحق فيها بسيارته باش يترجاها ترجعله وهي اتضايقت منه و قررت تحكي لخطيبها انه يضايق فيها وخطيبها قرر "يصفيه"...
وفاطمه مزال عايشه ع المسكنات وخايفه من الموت و كيف بتقابل ربي بعد اللي داراته كله ..
.........الكاتبة : Beba Pink
منذر راكب في سيارته حس انه فيه تاندرا مظلمه تلحق فيه .. زاد سرعته و ماعرفش كيف يتصرف ..خش لزنقه ..التاندرا زادت سرعتها و درست قدامه سكرت عليه الطريق .. نزل منها واحد و في يده سلاح ..قرب لي سيارة منذر و فتح الباب ..
منذر و هوا خايف:تبي السياره خودها اهوا مفتاحها ..
الراجل:نبي روحك ..
فرغ السلاح في منذر .. منذر طلعت روحه و مات...
الراجل و هوا راجع لسيارته: من قال يافاطمه كنتي تدفعيلي عشان نقتل ..وتوا قتلت ولدك وبنفس الطريقه هه....
و ركب في سيارته و مشى ...
الراجل هذا نفسه اللي فاطمه دفعتله عشان يقتل الشاب اللي سيارته خشت في سيارة ولدها احمد.. دفعله خطيب آيه عشان يقتل منذر ...
.....................................
الكاتبهBèbä Pĭnk
أنت تقرأ
حنان(ليبية_منقولة)
Romanceانا ﮼حنان ومعك عرفت معنى الحنان💙😩. . . رواية حنان💙🌼. للكاتبة: Beba pink. متكونة من 2o حلقة💙🪐. قراءة ممتعة💙🫀.
