حنان(ليبية_منقولة)

حنان 16

#حنان

الكاتبة : Beba Pink

《16》
تعلق ايناس قلبها بمسجات الشخص المجهول ،قعدت كل دقيقه تراجي في مسج منه و كل خيالها انه مهند هوا اللي يبعتلها في المسجات ،اخر شي قررت انها تمشي تواجهه بالمسجات و تحطه في الامر الواقع ،
طلعت ايناس من مكتبها لمكتب مهند .. خبطت الباب.
مهند ب ابتسامته الحلوه: اتفضلي ايناس ..
ايناس عيونها قلوب قعمزت ع الكرسي ،ومالقت كيف تبدا الموضوع ..
مهند تعجب من تصرفها: شكله فيه شي مهم ..احكي يا ايناس..
ايناس وهي تفرك في يدها من الارتباك: هوا.. بصراحه ..اني عرفت ان انت اللي تبعتلي في مسجات كل يوم على رقمي ..😬
مهند:😳 مسجات شنو ...
ايناس طلعت تليفونها و فتحتهم ع المسجات: ماتحاولش تنكر يا استاذ مهند ..كان ب امكانك تجي و تحكي معايا مباشرة افضل من حركات المراهقين هادي..
مهند والدم يغلي في راسه: لو سمحتي يا ايناس ماتغلطيش معاي .. المسجات هما مالياش علاقه بيهم .. وبعدين اني مانيش مراهق على قولتك عشان نتصرف هالتصرفات الطايشه..
ايناس انصدمت من ردة فعله وقعدت تشوف فيه و تفكر شنو ترد ..
مهند وقف و جاب مصحف و حطه ع الطاوله : انتي شكلك مش مصدقتني .. واني متوضي
حط يده ع المصحف و حلف انه مش هوا صاحب المسجات ..
ايناس انحرجت و تمنت الموت تجيها عشان تطلع من الموقف اللي حطت روحها فيه ..
مهند : ماتوقعتش يا ايناس انك تنظريلي بالطريقه اهيا ..
ايناس: ااا .. اني اسفه بس ..
سكتت ماعرفت بشنو ترد ...وقفت تبي تمشي .. وقفها مهند بصوته ..
مهند: ايناس .. ملي عليا الرقم ..وخلي الموضوع عليا..
ايناس: ملت عليه الرقم و تاسفتلا و مشت ..
مهند والغيرة تحرق فيه: كان نشدك بس يا تافه نوريك ..
ايناس خشت لمكتبها و الدم يابس في عروقها حست روحها تافهه، و قعدت تفكر شنو الفكره اللي خذاها مهند عنها .. اكيد ظن انها خفيفه و تدور في سبله باش تفتح معاه راس موضوع .. هي سرحانه ..و منى تشبحلها بضحكه خبيثه ..
منى بخبث : غير من اللي واخد بالك بس ..🙂
ايناس: هااه .. لالا شي راسي بس يوجع فيا..
منى : اهااا راسك .. باهي ربي يشفيك 🙂🙂
ايناس سكتت و مزال تخمم في مهند ..
منى:شنو صار في المعجب عرفتيه؟
ايناس:هاه ..لالا ..مزال ..
منى: امممم باهي ..
..........الكاتبة : Beba Pink
قعمزت حنان في الصاله وهي لابسه وتستنى في محمد يروح من عمله و يرفعها .. و فكرها مشوش و بالها مع محمد و شنو اللي صارلا فجأه .. دقيقه و فتح محمد الباب و وجهه جدي و متجهم مش زي عادته ..
محمد بجديه: هيا نوصلك ..
وطلع و خلا الباب مفتوح باش تلحقه حنان للسياره .. حنان استغربت حركته .. ولحقاته ..قعمزت جنبه و قعدت تشبحلا.. محمد مايبيش يشبحلها مايبيش يضعفلها ،قعد يسوق و هوا ساكت ..وصلها للكورس بلا مايقول ولا حرف ..نزلت حنان ..وهوا مشى على حاله يدور في الشوارع يحاول ينسى يحاول يلقى حل، مايبيش يكلمها او يتكلم معاها باش مايزيد يتعلق بيها اكثر... أما حنان طول الكورس و هي بالها مع محمد وعلاش يعامل فيها ببرود .. وماتبيش تسأله عشان ماتبيش تبين روحها مهتمه بيه "حركات بنات😂"
..........
سناء ماسكة ورقة العقد اللي فيه انه منذر سجل الفيلا ب اسمها: بنيتي يا ناااس آيه ترباااايتي🐍
آيه: شوفتي يا ماماا .. قولي للفقر باي باي ..
سناء: مزال الدهب اللي مخزنته عزوز النار في خزنتها ..وهداك المشروع اللي وعدك بيه ..وبعدهاا هههههههه
آيه: بعدها نقوله باااي ياعيل برا كمل قرايتك هههههههه
استمرو سناء و آيه و هما يضحكو و يعلقو و يتهزو على سذاجة منذر
.............الكاتبة : Beba Pink
حنان كملت الكورس و روح بيها محمد زي ماجابها سااكت و مايشبحش جيهتها ..
اول ماوصلو خش للمكتب طوول بلا مايكلمها ..
حنان قعدت تشبحله و هي متضايقه من تصرفاته معاها ..
حنان في صراع مع نفسها: علاش يعامل فيا هكي ببرود ..وكأني غريبه عليه .. بس اني حق نعتبر غريبه عليه..بس مهما كان هوا معودني ع الحنيه و ابتسامته الدافيه علاش تغير ..القصه كلها في اللي جاه بكري على التليفون ..خلي نمشي نجهز العشى ونخشلا للمكتب يمكن نفهم منه ...
خشت حنان للمطبخ وهي تجهز في العشى جاها مسج ع الواتس من ايناس ..وحكتلها على كل شي صار بينها و بين مهند..
حنان:حححي حشومه ..🤦🏻‍♀️
ايناس:وجهي تقشر  تعرفي 🥶..
غير خلينا توا مني اني ومهند ..
وين محمد شن اخباره معاك ..😉🥰
حنان:مش عارفه يا ايناس متغير معاي اليوم ..معاملته جافه معايا..
ايناس:علاش؟ شنو السبب؟
حنان:جاه مسج ولا شنو ماعرفتش .. المهم تغير بعدها..قلقانه عليه ..نبي نعرف شنو صاير معاه..
ايناس:ياااااعييييني يااعيني ..قعدنا نقلقو عليه 😘
حنان:مش زي ما انتي فاهمه يا ايناس ..محمد انسان ممتاز ..راجل..يعرف كيف يتعامل مع الانثى ..خلا عندي ثقه في نفسي ..سندني ..والاهم من هذا كله متفاهم و عرف كيف يغيرني بعد ماكنت متدمره و متحطمه من حياتي السوده ...عيب مني نكافي الخير بالشر و وقت يحتاجني ما يلقاني...
ايناس: الله ع الكلااااام 😍 تعالى اقرا يا حمووده 😂البنت تحبك ..
حنان:حب شنو يا بارده..مافيش مشاعر الا الحب يعني ..بعدين اساسا نحس فيه صديق ليا ..
ايناس:صديق و تحضنيه و قريب حتى يبوسك 😂
حنان:نقولك حاجه ..اقلبي وجهك ..
سكرت حنان النت و قعدت تفكر في كلام ايناس و تصرفات محمد الغريبه...
بعد ساعه جهزت حنان العشى و دارتها سبله باش تخشلا للمكتب ..
حنان خبطت باب المكتب بهدوء و خشت..
حنان: محمد .. العشى جاهز😐
محمد وهوا يقاوم في صوتها يقاوم في نفسه مايبيش يشبحلها.. عيونه ع الملف اللي قدامه
محمد : مش جعان مانبي نتعشى ..
حنان عصبت منه انه ماعبرهاش حتى عينه مارفعها..
حنان: كويس لأنه حتى أني مانبي نتعشى ..
جت بتطلع .. ناداها من غير ما يرفع عينه ..
محمد: حنان ..بري تعشي ...
حنان تفتتلا: مانبيش ..🤨
محمد مزال مارفعش عينه فيها
محمد: خيرلك راهو ..بلاش عناد😠
حنان بعصبيه:انت تكلم فيا ولا تكلم في الملف متاعك ..
محمد فهم انها تبيه يشبحلها ومع هذا مايبيش يرفع عينه وقعد يحرك في الاوراق اللي قدامه..
محمد: نكلم فيك ..
حنان قربت من طاولة المكتب و خبطتها ب ايديها الزوز على الطاولة بكل نفاذ صبر
حنان بعصبية : اني هنااا...
محمد ماقدرش يقاوم اكثر رفع عينه فيها ،كان وجهها قريب منه ،عيونها واضح عليهم العصبيه وانهم حايرات من سبب المعامله الجافه ، عيونها زي عادتهم يحسسو فيه بالضعف قدامها ...
شبحلها فتره و نزل عينه مره تانيه ..وكمل تقليب في الوراق..
حنان عدلت وقفتها :تمام يامحمد ..تمام ..
مشت و سيباته ..وهوا حط يده ع راسه
محمد : يارب صبرني ..شكلها زعلت .. قلبي مش مطاوعني انخليها زعلانه ... اوووفففف..
طلع محمد من مكتبه ما هانش عليه تقعد حنان زعلانه و من غير عشى ...
لقاها مقعمزه في الصاله و حاطه رجل على رجل و تهز فيها بكل قوتها وتعض في اظافرها  ..
عرف انها تخطط و تدبر وانها في قمة عصبيتها ..
محمد بصوت هادي : هيا نوضي نتعشوو..
حنان ماتبيش تتلفتلا: مانبيش.. 😠
محمد: يهون عليك محمد يرقد من غير عشى ..😕
حنان مزال ماتبيش تشبحلا...ومزال تعض في اظافرها،
حنان :خليك مع ملفاتك هما عشاك و غداك..
عرف انها معصبه حتى من انه ماتغداش معاها بكري ..
محمد قعمز جنبها و مسك ايدها..
وقال : خلاص اهو توا نتعشو و نتغدو ..
" مسك اصابعها بالاصبع " ..
وكمل: وهما الاصابع مايعضوهمش ..
"رفع اصابعها ليه و باسهم".. هما يبوسوهم بس ...
حنان شبحتلا غصبا عنها بعد ماكانت حاطه في بالها انها معاد بتشبح في وجها..بس جذبها بتصرفه الحلو  .. عيونها في عيونه ..و جتهم حالة السحر و المشاعر الحلوه اللي جتهم بكري ع الفطور .. قعدو يشبحو لبعضهم في صمت ..
محمد ماقدرش يقاومها انهار قدام نظراتها ..قربها منه و ضمها لصدره ❤.. حنان في عالم ثاني مافكرتش حتى انها اتبعده او تمشي تجري زي عادتها ..بالعكس حبت اللحظه و حبت الاحساس و حبت حضنه ..
محمد بعد دقايق تذكر انها كانت مرت خوه و ان اكيد اللحظات هادي صارت بينها و بين خوه زي اي متزوجين ..فجأه بعدّها عنه حس بالغيره و النار في قلبه .. حنان شبحتلا با استغراب ..
محمد وهوا يحاول مايشبحش فيها حك راسه ب انفعال و قعد يقبض في يده كالعاده..
حنان عرفت من تصرفاته اللي حفظتهم ان محمد فيه شي عصبه و فيه شي مغيره عليها ...
حنان وقفت بعصبيه :لما تفكر ترجع لطبيعتك وترجع محمد اللي قبل كلمني...
محمد وهوا في قمة غضبه: مابنرجعش ولا نبي نرجع ..
حنان تشبحلا مصدومه منه ..
محمد وقف و النار فعيونه الغيره بتقتله تمنى لو حنان كانت في حياته بطريقه ثانيه مش كانت زوجة خوه ،محمد بطبعه غيووور،و زي أي راجل يتمنى يكون الاول في حياة حبيبته و زوجته ...
وقف محمد وبصوت عالي: اكيد خطر عليك .. اكيد جي في بالك لما كنتي في حضني .. اكيد تذكرتي حضنه صح.. و تذكرتي كل لياليكم ..
حنان مزال مش مستوعبه :انت شنو تقول ومن تقصد ..انت اكيد مش طبيعي
محمد بصوت موجوع: لا مش طبيعي ياحنان ..من لما خبطت فيك في المطار واني معاد محمد القديم، من لما نشوف فيك تتحركي في الحوش واني مركز معاك ..مركز في تفاصيلك ..ابتسامتك ..و حركاتك ، مركز في صوتك و نبرة صوتك نعرف لما تكوني زعلانه و لما تكوني فرحانه ، مركز في عيونك ..عيونك اللي نضعف قدامهم ..ايدك اللي لما نلمسها نحس بالدفى ..حضنك اللي لما نحضنك نحس روحي في وطن ليا و خاص بيا اني بس ...
حنان دموعها ينزلو و متفاجأه من كلامه ... حست بمشاعر متلخبطه ..بين تبي و بين ماتبيش.!
محمد :تبي تعرفي علاش عصبت و تغيرت عليك .. وصلني اشعار ان مزال شهرين بس ..وترجعي ل ليبيا ...ماقدرتش نستوعب ان البنت اللي زوجتها ليا امي غصبا عني، و اللي كنت نراجي امتى نطلقها و نكمل حياتي بعدها ...اني معاد نقدر نعيش بلاها ..
محمد عيونه ترقرقو بالدموع وحنان مزال دموعها ينزلو بغزاره ..
محمد بنبرة مبحوحه : ومش قادر نستوعب ..اني مش الاول في حياتك ..مش اول من حضنك مش اول من لمس ايدك و باسها ... ومش
حنان معاد قدرت تسكت معادش قدرت تحتفظ بسر احمد اكثر من هكي ... حست انها ماتبيش تخسر محمد وان مفروض يعرف ان هوا فعلا اول واحد فحياتها..
حنان بصوت مرعوش يبين انها كاتمه بكاها قاطعت كلام محمد: بس انت فعلا اول واحد فحياتي ...
محمد شبحلها و مش فاهم ...
حنان مسحت دموعها وكملت:احمد مالمسنيش ..اللي عشته معاك عمري ماعشته مع غيرك يامحمد...💔
...............
الكاتبة : Beba Pink