امير . كمت صارت مريم كدامي بالمطبخ تطلع مواعين وتبجي رحت عليها من شافتني كامت تناشغ وتبجي بصوت عالي جريتها بحضني (لا تبجين كافي يله غسلي وجهج حته تتعشين وتنامين يله عفيه بالسباعيه ) عفتها تصب عشا وصعدت فوك وكفت كدام المرايه ملابسي كلها دم وجهي شلونه وعيوني تارسها الدمع نزعت التشيرت سفطته وخليته بالكنتور اخذت ملابس من قاسم وطبيت سبحت لبستهن وطلعت نزلت جوه لكيتهم ينتظروني قبل لا اكعد اكل رحت لغرفة امي لكيتها نايمه وريم هم نايمه يمها باوعت مريم مموجوده وياهم رحت للمطبخ لكيتها مرتاجه على الحايط وصافنه جبتها كعدتها يمي وتعشينه اكلنه بدون نفس اكلنه حته نقاوم قساوة باجر
انتهى اول يوم بدون قاسم عفتهم جوه وصعدت لغرفة قاسم اول مدخلت الغرفه حسيت بالنعاس خليت راسي على المخدمه مالته وغفيت بدون ماحس على شي
مريم. اكلت شويه وكمت بعد مخلصو اكل عمامي راحو يرتاحون وابويه وامير صعدو نامو والولد اسمع اصواتهم كدام البيت يرتبون المكان علمود باجر لميت السفره وغسلت المواعين وصعدت انام تمددت وتكلبت مكدرت انام احس نفسي مختنكه مدا اكدر استوعب البارحه جان كدامي واليوم جوه التراب اخذت نفس عميق ونزلت جوه شربت مي وطلعت بالحوش عدنه مرجوحه بالحديقه كعدت عليها وصفنت اتأمل ملامح اخوي اخوي الي ماكدر اشوفه ولا اتلمس وجهه الحنين بجيت بجيت من كل كلبي بذاكه اليوم خليت راسي على ركبي وحضنت نفسي
حيدر. نظفنه الجادر والخبصه رشيد والولد راحو يرتاحون بقينه اني وادهم نشيل الكراسي صارت ب٢ ونص كال ادهم نروح ونرجع من وكت نكمل كتله يله وصلنه لباب البيت جان اتذكر موبايلي عفته بمكاني (اهو نسيت موبايلي فوت وعوف الباب مفتوح اجيبه واجي) ركضت مستعجل طبيت للجادر ادور على موبايلي لكيته بمكانه شلته وطلعت اجيت دا امشي وسمعت صوت بجي خفت خاف صاير شي فتحت الباب صارت كدامي مريم كاعده وحدها وضلمه وبس تشاهك من حست الباب انفتح رفعت راسها باوعتلي وبجت بصوت عالي ركضت عليها صرت كدامها
(شبيج مريم صاير شي ويه امج بيها شي؟)
هزت راسها بمعنى لا وهيه تبجي رجعت كتلها
(امير بي شي ابوج بس فهميني صاير شي؟)
مريم. مصاير شي مصاير شي
حيدر. كعدت يمها وبقيت ساكت اسمع صوت بجيها بس ( تردين تحجين شي) هزت راسها بمعنى لا وهيه دتبجي (حاس بيج والله بس ميسوي البجي ميسوي شي غير يأذيج احنه كلنا على هذا الطريق البارحه قاسم باجر احنه كلنا نموت والموت احسن من الدنيا الدنيا سيئه وان شاء الله قاسم مكانه الجنه ولو اني ماعرفه بس واثق مدام عمي حارث ابوه وانتو اهله وهيج حزينين عليه فهوه شخص زين والزين مكانه الجنه صيري قويه وان شاء الله تلتقون بالجنه بدون فراك ولتنسين الصبر جزاه الجنه بدون حساب )
مريم. ان شاء الله
حيدر. قوي نفسج انتي عندج اختج وامج خل يشوفوج قويه لتنكسرين كدامهن وتبجين هيج راح تزيدين عليهن
