نُـقطَـة اللّـقـاء 🦋

الفصـل 1 :

مقدمه 🕯️ :
#نقطة_اللقـاء

_ تظل الذكريات ، قصصا صامته و بعيده كلما حضرت تركت فينا أثرا جميلا من المستحيل أن يزول .
_________

• روسـيا ، موسكو 19 جانــفِي

_ " إنتي فراشــتي "
قمت من نومي مفجوعه ، قلبي بش يخرج من بقعتوا ، دورت عينيا طول لسريروا نلوج عليه راقد في سابع نومه مش حاس بحتى شي ، رجعت شعري ورا وذني و تنفست نهدي في روحي و في كل قطعه من بدني نرعش و ريقي شاح ، جانفي أكثر شهر نكرهوا ، و خاصة النهار هذا بالضبط نفس الحلمه نفس الصوت و نفس الكلمه ( فراشتي ) لو ما كنتش نعرف انها مجرد حلمه كنت صدقت انوا الصوت بجنبي ، غمضت عينيا بالقوي الصوت ما فارقش خيالي و لا أحلامي ساعات نحسوا كابوس يلاحق فيا ..
عديت يديا زوز على وجهي و كبست على راسي نحاول نبعد الأفكار إلي دارت بيا عديت عينيا عالخاتم إلي في يدي ، اليوم يصادف النهار إلي تقلبت فيه حياتي من إسمي لهويتي ،، للماضي المجهول..
تنهدت و قمت بزربه ، هاربه من روحي و من أفكاري منحبش نضيع و نغرق في التفكير هذا منحبش نخمم و أنا نعرف إنوا مش بش نلقى شي في الأخير كل شي مشا و ما نتصورش كان من ممكن إنوا يرجع .
تعرضت لأكبر خيانه ينجم يتعرضلها الإنسان في حياتوا خسرت حاجه خلاتني ضايعه ما عنديش إعاقه و لا نعاني من مرض لا لا .. ذاكرتي ضيعتني و هزتلي الماضي الكل بإلي فيه و خلاتني في صراع مع حياتي هاذي و حتى مع روحي و مع شخصيتي و أحلامي و مع كلمه وحده تدور في حيوط ذاكرتي من غير نتيجه .
ممكن الماضي مشاا و غاب في كل جوانب حياتي إلا في الكلمه هاذي ، كل ما نغمض عينيا نسمعها بصوتوا هو ( فراشتي ) ذاكرتي خانتني في كل شي إلا هاذي منجمتش نعرف و لا نجمت نسترجع حتى شي ، كل ما نغمض عينيا و نعصر مخي نلقى كان الفراغ و الظلام و برشاا وجيعه ، هزيت روحي بالسيف الأفكار الكل دارت بيا حتى حسيت روحي تعبت و إستنفذت طاقتي كلها قمت مديت يدي بالسيف طيحت بيجامتي عالأرض و دخلت تحت الماء السخون حسيت بكل قطره تتعدا على بدني و كأنها تحرق فيا ، ما نعرفشي إذا هكا قاعده نعاقب في روحي و إلا نوهم فيها اني هكا نتناسى و نتجاوز ، تنهدت بالقوي نحارب في أفكاري ، نقنع في روحي انوا هذا قدر ، مش عارفه إذا نكذب على روحي و إلا لا ، المهم إني متأكده إنوا حتى شي ما يستمر على نفس الحال ، بش يجي نهار و يدخل شويا نور في الظلام إلي أنا عايشه فيه من مده
_ أنا بش نتحرر من هذا الكل
عاودت الكلمات أكثر من مره و كإني نحارب في أفكاري ، نتحدى في روحي ، دوب لفيت بدني في منشفتي و خرجت مش عارفه كيفاه مشيت لدريسينڨ و لا كيفاه لبست ، عقلي ضايع و قلبي دقاتوا مش حابه تهدا ، خرجت قربت منوا غطيتوا أكثر و نزلت بستوا من صوابعوا الصغار ، هذا هديتي و مكسبي من الماضي المجهول ، كل قوتي ناخذها من عندوا ، ساعات نستغرب في كمية الطاقه إلي نحس بيها أول ما نحضنوا عندي ممكن هذا السبب الوحيد إلي خلاني قويه لتوا تبسمت و قربت من بلار البيت ، تنهدت نغزر للثلج إلى بداا يغطي الدنيا ، موسكو ، الطقس بارد و الدنيا ليل ، الطقس هذا يحسسني بالوحده و يرجعني لأيام خايبه برشا منحبش نخمم فيها ، سرحت نخمم ، كل ما نقعد وحدي و تدور بيا افكاري يجي على بالي سؤال واحد كهو و ممكن هو أهم سؤال " شكون أنا ؟ " نحس بالعجز ما عنديش جواب أنا ماريا ؟ اامه نعرف و متأكده إلي حتى إسمي ينجم يكون وهمي خاطر بكل سهوله ما فما حتى شي ثابت في حياتي لا اسمي و لا أصلي و لا شي غير ولدي هو كهو إلي متأكده إنوا الرابط الوحيد بين الماضي و المستقبل متاعي .
تنهدت بالقوي نحاول ننسى يا ريت ننسى الضياع إلي حاسه بيه كيما نسيت طفولتي و شبابي و حياتي الكل ، تلفت بعدت الريدو شويا و تبسمت ، فراشه صغيره لاصقه في البلار قريب تتجمد من الثلج مديت يدي شويا حليتلها دخلت طول ، ركزت معاها كيفاه دارت شويه في البيت و بعد وقفت على راس السرير ، عاودت سرحت من جديد في الصوت و في الكلمه و كإنوا الماضي متعمد يكون في تفاصيل حياتي الكل ، و مره أخرى سألت روحي رغم إنوا ما عندي حتى إجابه ، زعمه شكون كان يناديلي هكا ؟ لهدرجه لكلمه هاذي كان عندها تأثير عليا ؟ يعني لدرجة أنها قعدت جزء مني و من أحلامي و ذاكرتي حتى بعد الحادث ؟ منعرفش ، ما عندي حتى جواب أكثر حاجه كانت محيرتني و شاغله بالي هي هالكلمه ، قد ما حاولت نتذكر خرجت كان بالفرااغ ، كل إلي حاسه بيه هو الضياع من أول ما حليت عينيا بعد الحادثه لتوا ، اليوم بالضبط عامين تعداو و حتى شي ما تبدل ، تنهدت و رجعت الريدو مزال بكري و حسيت روحي نعست مره أخرى ، رجعت لفرشي و تغطيت ، رغم كل الأفكار إلي حاصرتني ، رغم تعبي ، رغم حيرتي و كل شي حسيت بيه امه نجمت نرقد حاولت نتناسى كيما كل مره نعرف انوا مش ساهل إني نلقى حاجه تربطني بالماضي و لا ساهل إني نكشف إلي ضاع مني سنين هاذي لكن الدنيا أكيد عمرها ما تبقى على حالها و مره أخرى حسيت برااحه كبيره ، طيشت همومي الكل و غرقت في النوم لعل يجي نهار يقلب حياتي للأحسن ممكن و وقتها نعرف روحي و نعرف سر هالكلمه لكن توا نحب نرتاح و ما نخمم في شي نحس في بدني تاعب و قلبي يدق بقوه دقات ما فهمتش سببها .