نُـقطَـة اللّـقـاء 🦋

الفصل 9 :

                 🤍 _•_•_•_ 🤍
مَـاريا :

قطرات ماء خلاتني نعقد حواجبي حليت عينيا شويا نحاول نستوعب أنا وين كل الأحداث رجعت تشكلت قدامي دورت عينيا فيسع خزرتلوا قاعد بجنبي يخزرلي من غير حتى كلمه تنهد و مد يدوا رجعلي شعري إلتالي يحكي
أحمد : كيفاه تحس في روحك ؟
هزيت روحي قمت و هزيتلوا براسي نحكي
أنا : ل.لاباس
خزرلي مندري كيفاه و طبس شويا حط مجد في حظني هزيتوا بشويا نسكت فيه بعد ما صار يبكي كي سيبوا تقول حس بيه تبسمت و قعدت نهز فيه مد يدوا لصدري يحب يرضع تنهدت و نزلتهالوا حسيت روحي حشمت من الفازه مديت يدي للتابل دو نوي خطفت البيبرون و عطيتهولوا غمض عينيه يرضع لين رجع رقد في حضني هزيت راسي نخزرلوا كيفاه مركز معايا و عينيه على مجد خزرلي مندري كيفاه يحكي
أحمد : شنوا سميتوا ؟
أنا : مجد
أحمد : قداه عمروا توا ؟
أنا : عام و شويا
تبسم يخزرلوا و تلفتلي مره أخرى قرب قعد قدامي يثبت في تفاصيل وجهي بعد تنهد يحكي
أحمد : ماريا كيفاه فقدت ذاكرتك ؟
أنا : ف.في حادث
أحمد : مش هذا قصدي
أنا : ماله ؟
أحمد : أنسى ما تخمم في شي
تنهد و سكت شويا قرب مني قعد قدامي بالضبط هز يدي باسها يحكي
أحمد : نوعدك إنتي بش تتذكر و يرجع كل شي كيما كان
قعدت نخزرلوا قربوا مني ريحتوا ، نضراتوا ليا خلات الدوخه قوات بيا أكثر و التصاور ماشيه و تزيد في ذاكرتي أصوات مشوشه و صور كحلاا حسيت روحي تخنقت لدرجة ما نعرفش كيفاه جبدت يديا منوا نزلت مني دمعه نحكي
أنا : أ.. أنا حاولت برشا مرات و ما نجمتش حتى الدواء منفعش ما تنتظرش مني شي
هزيت راسي خزرتلوا كيفاه مد يدوا مسح الدمعه يحكي
أحمد : علاه الدموع هاذومه ؟
أنا : هكاكه
أحمد : ششش فراشتي ما تبكيش
قوست حواجبي عالكلمه وقفت كايني ضربني الضو للحظه حسيت الأرض دارت بيا وقف و قرب مني خزرتلوا و وخرت خطوه عديت يدي على شعري دوب هزيت راسي لقيتوا قدامي بالضبط هزيت يدي بالسيف حطيتها على لحيتوا نخزرلوا بحيره نحاول نلقى جواب لأسئلتي
أنا : إنت شك..شكون
أحمد : أهدا
أنا : قلي إنت شكون
أحمد : ماريا
ما سمعتوش حتى شنوا يحكي شويا شويا الدنيا ضلامت في عينيا الأرض دارت بيا فقت بيه كيف لقفني في حضنوا تكيت عندوا نحس في جهدي طاح طبس عليا هزني عندوا تكيت على صدروا كبست على راسي بيدي من ريحة برفانتوا إلي شميتهاا تفاصيلوا هاذي الكل خلات ذاكرتي تخرج عن السيطره و حتى مانيش منجمه نتحكم في تصرفاتي مانيش عارفه شنوا صارلي لتوا لا إستوعبت إلي هذا هو نفسوا الصوت إلي كان يجيني في الحلمه "فراشتي" نحس في روحي نتنفس بالسيف من وجيعة راسي حطني على الفرش و مد يدوا بعدلي خصلات شعري يحكي
أحمد : تحب نكلملك طبيب ؟
أنا : لاا
أحمد : شنوا حسيت ؟
أنا : راسي دار
أحمد : ديما تجيك الحاله هاذي
تبسمت على جنب نحكي
أنا : كان وقت رجعت لتونس
أحمد : باهي ما تخمم في شي أرتاح
هزيتلوا براسي و غمضت عينيا شويا دوب حسيت روحي إرتحت تلفت نخزرلوا نلقاه مزال قاعد مركز معايا كمية الخوف إلي في عينيه خلات قلبي يدق بقوه تبسمت بحرقه نحكي
أنا : أنا مش نفس الشخص إلي تلوج عليه أنا ناسيه كل شيء ما عندي حتى فكره عالماضي و لا حتى عليك انت
تنهدت بالقوي و قمت شويا تكيت بضهري إلتالي عالفرش عديت عينيا على وجهوا و غمضت عينيا بالقوي نمنع في دموعي و نحكي
أنا : علاه حتى تعمل هذا الكل ؟ علاه حتى تواجهني بعد المده هاذي الكل 
قعد يخزرلي ساكت كملت نحكي
أنا : كل إلي نتذكروا كلمه وحده "فراشتي" صوتك كهو إلي قعد في ذاكرتي رغم إني فقدت كل رابط مع الماضي لكن الكلمه هاذي قعدت ملازمتني طول العامين إلي فاتوا .
خزرلي مندري كيفاه و تنهد كبس على يديا يحكي
أحمد : كان إنتي نسيت أنا ما نسيتش و مستحيل ننسا ، إنتي بش تتذكر كل شي نوعدك .
أنا : و كان متذكرتش ؟
أحمد : ما تفرقش معايا
أنا : يعني
تبسم و قرب مني عدا يدوا على خدي و بعد عداا صوابعوا على شفايفي خلاا بدني الكل يتكبس ، خزر لعينيا يحكي
أحمد : الماضي مشاا على روحوا ، أحنا توا في الحاضر بش نعاودوا نبنيوا كل شي من جديد و أحسن حتى من قبل
أنا : شقصدك بالكلام هذا
أحمد : يعني إنت مرتي و مزلت زاده سوى تذكرت و إلا لا مستحيل نسلم فيك
قلبي دق مع الكلمه حسيت روحي ترهوجت كبس على يديا أكثر و خزرلي منعرفش كيفاه المره هاذي نضره ما فهمتهاش و ما نجمتش نفسرها
أحمد : ما تخافش مني منحبش نرا نظرة الخوف في عينيك مني خاطرك تحرقني بيها
طبست راسي نهرب في عينيا منوا
أنا : أخرج و إبعد من هوني أنا مستحيل نكون ماريا إلي تلوج عليها إبعد عليا كهو
خزرلي مندري كيفاه رشق عينيه في عينيا يحكي
أحمد : مستحيل نبعد أنسى هذا
أنا : أنا ما رجعتش هوني بش نعيش في صراع ٱخر كنت نحب نعرف الماضي صحيح لكن ما نتصورش إني بش نتحمل هذا الكل ، إلي صاير متعبني ما تقعدش تلاحق فيا من غير سبب أنا مش نفس الشخص
تبسم مندري كيفاه ما نعرفش علاه حاسه إني قاعده نوجع فيه بكل كلمه نقولها و رغم هذا أنا تاعبه برشا و مش منجمه نتقبل حتى شي من إلي صاير
أحمد : لا نفسها حتى إنوا ما تبدل شي
عدا يدواا على شعري
أحمد : نفس الشعر
مشا بيديه لوجهي يحكي
أحمد : نفس النمشات
حسيت بيه كي عداهم على شفايفي يحكي
أحمد : نفس الشفايف نفس النظره نفس الصوت حتى شي ما تبدل و مستحيل يتبدل إنت لازم تعطي لروحك و ليا فرصه كهو
أنا : ما نجمش
أحمد : بش تولي تنجم
أنا : و شنوا بش تعمل  ؟
أحمد : بش نخليك تحبني من أول و جديد
أنا : شكون قلك أنا بش نحبك ؟
تبسم و قربلي شويا حط يدوا جهة صدري بعدلي شعري شويا و حطها فوق قلبي بالضبط خزرتلوا مع الدقات إلي زادت حلت فيا حرب و فضحتني قداموا هربت عينيا من وجهوا نسمع فيه يحكي
أحمد : قلبك مزال يتذكرني
نزلت راسي ساكته حسيت بيه كي عدا يديه على شعري هز خصله منوا و قربها يشم فيها خزرتلوا ضايعه من تصرفاتوا أول ما جات عينيا في عينيه غمضتهم بالقوي نحاول نحارب الدوخه إلي ماشيه و تقوا بيا كل ما يقرب مني و إلا كل ما نثبت في ملامحوا و خاصة عينيه ،، عقدت حواجبي وقت إستوعبت جبدت روحي و هزيت راسي خزرتلوا نحكي
أنا : انت إلي حابسني هوني
أحمد : مانيش حابسك
أنا : ماله شتسميه هذا
تنهد يحكي
أحمد : قاعد نحاول نحميك
أنا : نجم نحافظ على روحي وحدي
ڨحرلي يحكي
أحمد : لااا ظااهر من هبطتك للجنينه وحدك بكري
أنا : أصلا تعودت نكون وحدي ما تفرقش معايا
كبس على كتافي و جبدني قداموا خزرلي ما نعرفش كيفاه للحظه خفت من نضرتوا هاذي إلي تغيرت في لحظه قرب مني لين حسيت بأنفاسوا على وجهي خزرلي يحكي
أحمد : العامين إلي تعداو بش تنساهم ماريا انتي كنت ضايعه و رجعت هاذي بلاصتك و بعد اليوم مفماش حاجه إسمها وحدك مستحيل نخليك
قعدت نخزرلوا ساكته منعرفش شنوا حسيت ،، هزيت يديا زوز دزيتوا نحكي
أنا : لاااااا مانيش بش ننسى ما نجمش ننسى علاه حتى تظهر في حياتي توا ؟ شنوا تحب مني أه ؟
هزيت يديا زوز ضربتوا على صدروا ندز فيه بكل قوتي عدا يدواا على وجهوا من غير ما يعمل حتى ردة فعل
أحمد : ماريا أهدااا
أنا : لااا إبعد عليا
خلاني لين فشيت فيه غشي الكل خزرت لقفلة سوريتوا كيفاه طارت من ضوافري إلي خبشتوا بيهم هزيت راسي نخزرلوا تبسم مندري كيفاه يحكي
أحمد : نعرف إنوا صعيب تتقبل هذا الكل
أنا : شنوا بش نتقبل بالضبط ؟
أحمد : كل شي
أنا : ما نجمش ما نجمش نحب نبعد من هوني
غزرلي مندري كيفاه
أحمد : وين تبعد ؟ انت متخيله إني مزلت نخليك بعد ما لقيتك ؟
أنا : تنجم أكيد تنجم عامين يكفيوا بش تنسى
سكت و مازاد حتى حرف تكيت لتالي ساكته من غير ما نخزرلوا مش منجمه نتقبل إلي قاعد يصير معايا ورا بعضوا و لا نجمت نتأقلم مع حضوروا و لا نكونترولي تصرفاتي سمعت تنهيدتوا و بعدها صوتوا إلي خرج بنبره غريبه المره هاذي
أحمد : مانسيتش يا روحي صدقني عمري ما نسيت ما تعبنيش ماريا ما تزيدش على ما بيا أنا من عامين مش عايش ما تخلينيش نحس بالذنب أكثر من هكا
تلفت طول خزرتلوا مندري كيفاه كلاموا إلي خرج بخنقه وجعني بصفه غريبه قعدت دقايق نخزرلوا من غير حتى كلمه ما تخيلتش روحي نتحط في الموقف هذا كلاموا نضرتوا ليا و كمية اللهفه إلي ريتها في عينيه و تصرفاتوا حيرتني و رغم كل شي قاعد يصير قلبي مرتاح علخر دموعي إلي حبستهم ما ستناوش أكثر و نزلوا يحرقوا مش عارفه على شنوا نبكي على روحي و إلا على الضياع إلي أنا فيه و إلا عالذنب إلي حاستوا خزرتلوا مندري كيفاه نحكي
أنا : أ أنا محتاجه وقت
أحمد : مستحيل نجبرك على شي و مستحيل نبعد عليك زاده انت بش تلقاني في وجهك بعد اليوم في كل خطوه
أنا : أ أنا تاعبه
غزرلي مندري كيفاه و قرب مني حسيت بالبوسه إلي طبعها على جبيني تهزيت مع صوت الرعد جبدني و خزرلي مندري كيفاه يستنى في ردة فعلي طاوعتوا و تكيت على صدروا وين غمتني ريحتوا تنهدت و غمضت عينيا مش عارفه فاش قاعده نعمل لكن حركة يديه على شعري خلاتني نغطس في النوم من غير لا نخمم في شي و لا نحسب حساب لشي
أحمد : أرتاح ما تخمم في شي
أنا : علاه حتى تطلع في حياتي توا
أحمد : خاطر ما عادش نجم نبعد أكثر
تنهدت ما جاوبتوش كبست على سوريتوا و غطست في نوم و ما عاد حسيت بشي من إلي صاير ممكن رجوعي لتونس كان حل بش نكتشف الماضي لكن توا عرفت زاده إلي الرجوع هذا بش يغير برشا حاجات مش في الماضي المجهول كهو اامه زاده حتى في المستقبل رقدت في حضن شخص حيرني و خلاا ذاكرتي تتمرد عليا لثاني مره كل إلي صار معايا خلاني نرقد على كوابيس و أحلام فيها الخايب و الباهي قعدت بين المد و الجزر حتى في النوم مش عارفه سفينتي وين بش ترسي و لا كيفاه نجم ناثق في الشخص هذا أنا المره هاذي لغيت عقلي و تبعت قلبي و ما نعرفش شنوا نهاية هذا الكل نحب نبعد من أفكاري ، من روحي و من كل حاجه قاعده تخنق فيا كل مره أكثر من إلي قبلها ممكن التعب إلي حاستوا توا أكثر من أي فتره تعدات عليا في حياتي كل إلي قاعد يصير معايا غريب الدافع الوحيد إلي يخليني قويه في كل مره هو ولدي و رغم هذا فقدت قوتي المره هاذي إلي صاير أقوى مني ،، كل إلي نتمناه إنوا ما نكونش دخلت في متاهه أخرى .

#نقطة_اللقاء
#ولاء🦋🤍