فصل 12 :
• أحمد :
_ ×××× عليا يخي ؟ أه ؟ شمعناها سلعه ناقصه شمعناااهااا
وخر إلتالي و طبس راسوا بخوف يحكي
هو : سي أحمد صدقني ما نعرفوش كيفاه صار هكا
أنا : زاايد الكلام معاكم
نظرت الدوسي من يدي و رصيت على سناني نحاول نتحكم في أعصابي
أنا : حاااااازم
عالكلمه دخل طول خزرلي يستنا في تعليمات شاورتلوا نحكي
أنا : إلي مسؤولين عالصفقه الكل يتعداو للتحقيق حد ماااا يقعد ، طلعلي شكون وراء الحكايه هاذي في أقرب وقت
حازم : تهنى امه السلعه لازم تخرج ٱخر جمعه هاذي كيما قلت
نفخت بالقوي وشاورتلوا نحكي
أنا : تصرفوا و خرجوها كامله و خلي الباقي عليا
هزلي براسوا و خرج ڨحرت للٱخر نحكي
أنا : مزلت ناوي تاقف قدامي ؟
نفخت وقت خرج ناقص أنا حكايه أخرى ، مش عارف شكون من مصلحتوا يكسرلي كرايمي بهالعمله الكلبه هاذي ، عبيت كأس و وخرت سمعت صوت دقات الباب و قبل ما نجاوبوا دخل طول ما ستنانيش تبسمت على جنب نحكي
أنا : يخي مش بش تبطل هالصنعه
أدهم : علاه ؟ مش البيرو للخدمه كهو
أنا : بالله
أدهم : بطبيعه يعني نجم نهد عليك في أي لحظه امه في بلايص أخرى لا
أنا : زيد تركك زيد ، تعرفوا جوي هذا ؟
أدهم : جوي أنا
أنا : مستعرف زاده
أدهم : شبيك فادد و قالب دنيا هكا
أنا : شعرفك ؟
خزر للدوسيات المقلوبه و شاورلي يحكي
أدهم : شكون من مصلحتوا يعمل حاجه هكا ؟
أنا : ما نعرفش
أدهم : ما يكونش ه...
قصيت عليه كي ضيقت عينيا و شاورتلوا نحكي
أنا : ما نتصورش هو يوصل يعمل حاجه هكا
أدهم : ماله الحكايه واضحه
أنا : قصدك الصفقات ؟
أدهم : بالضبط أكيد حد من منافسينك فالسوق
أنا : ماله لازموا كبسه باهيه حتى يعرف كيفاه يلعب معايا المره الجايه
شاورلي مندري كيفاه و ضحك يحكي
أدهم : نعرفك قدها و علخر زاده ، هيا نخليك
أنا : وين ماشي
أدهم : خدمه
أنا : اي خدمه اي ، رد بالك على روحك
تلفت هزلي بأكتافوا يتركك و يحكي
أدهم : باهي بابا
أنا : هامل زايد
ضحك و خرج طول تنهدت و رجعت للبيسي لازمني نركح الدنيا قبل السفره إلي قربت رغم ما عينيش فيها ، للحظه تعدات صورتها بين عينيا تبسمت على جنب على قد ما نحسها تبدلت عليا على قد ما تصرفاتها ترجعني لتالي بالأخص البارح ، تكيت إلتالي و تنهدت مجرد نتخيلها قدامي نحس دقات قلبي تزيد تأثيرها عليا قوي برشا ، مديت يدي للتاليفون دوب وصيتهم على إلي حاجتي بيه و تأكدت منهم بش يكون كل شي حاضر بعثت ميساج لساندرا و تكيت ، الليله مميزه برشا و أهم حاجه إنها بش تكون معايا و قدام عينيا في بلاصتها وين لازم تكون نحبها تكون غيرهم الكل نحب نرجع نراها بالقوه نفسها و الثبات نفسوا ، نظرات الحيره و الخوف إلي مسيطرين عليها توا لازم تتخلص منهم جملاا و هذا أول شي لازم يصير .
_____________
• ماريا :
هزيت روحي قمت عديت سوايع في نوم حتى حسيت بدني تفرهد بعد السوايع إلي عديتهم في النادي ، أول ما سمعت صوت الناقوز متع الفيلا قرنت حواجبي مستغربه و هزيت روحي نمشي دوب نزلت الدروج نحاول نفيق من نعاس شفت ساندرا كي تعدات من قدامي مش عارفه منين خرجت أصلا وقفت قدامي و قربت من الباب حلتوا دوب شافتهم وخرت خطوه إلتالي شويا قابلوني زوز من الحراس و معاهم زوز بنات تكلمت وحده فيهم تحكي مع ساندرا
هي : من طرف سي أحمد
ساندرا : باهي تفضلوا
دوب سمعت إسموا ضيقت عينيا و سألتها
أنا : علاه حتى يكونوا هوني ؟
ساندرا : هوما باش يعاونوك تحظر روحك للحفله
أنا : بالله ؟
قعدوا يخزروني مستغربين هزيت يدي رجعت شعري إلتالي منعرفش علاه حكيت هكا اامه ما حبيتش إني نتحط قدام الأمر الواقع و أصلا جرد حفله باعثلي عليها هذا الكل تنهدت و تبسمتلها نحكي
أنا : باهي تفضلوا
دوب قربوا مني طلعت الدروج ،، دخلوا الزوز ورايا معاهم اللازم حطوا كل شي يحتاجوه في بيتي قربت مني وحده فيهم و تبسمت و هي تأشرلي على المرايا قربت قعدت قدامها من غير حتى كلمه نحب نشوف وين حاب يوصل خزرتلها كيفاه مدت يدها حلت شعري من الشكال طاح الكلوا و ترما ورايا تبسمت على جنب و عدات يدها على سبلاتوا تحكي
هي : لون شعرك بش يطلع تحفه مع الروبه
تبسمتلها و سكت ما سألتهاش على تفاصيل جبدت روحي شويا خزرتلي مستغربه شاورتلها نحكي
أنا : ناخو دوش و نجي
هزتلي براسها و سكتت ، دوب دخلت عملت دوش خفيف حسيت بدني ترخف نشفت شعري لبست و خرجت قربت منها
هي : نبداو ؟
أنا : اي تفضل
قعدت قدام المرايا خليتهم يكملوا يعملوا كل شي خليني نشوف ٱخرة هالطلعات و هالحفله المفاجأه تكيت إلتالي حليت عينيا وقت بدات الدنيا تضلام شويا فقت بيها كي حطت شويا هايلايتر و بعد فيكست المكياج هزيت عينيا نخزر لروحي في المرايا المكياج على قد ما كان خفيف في نفس الوقت كان حلو ، واضح و رقيق بطريقه خياليه و شعري إلي لمت منوا سبلات الفوق امه خلات الباقي طايح على طول ظهري تبسمت على جنب و عديت يدي على شفايفي لون الروج ياسر محلاه
هي : عجبك ؟
أنا : حبيتوا
دورت عينيا ثبتت في كل تفاصيلي من شعري لعينيا شفايفي و ظوافري كلوا كان بيرفكت خزرت من المرايا لوحده منهم كي قربت هزت كوفر كبير و فوقوا كوفر ٱخر صغير حطتوا قدامي خزرت للماركه إلي منقوشه بالذهبي على الباكو ما ركزتش معاه و تلفتلها وقت حلت الباكو الكبير بالكل فيهم فوق الفرش تتبسم و تحكي
هي : توا مزال كان الروبه و تكتمل صورة أميرة ديزني
تبسمت على ٱخر كلمه و شديت الروبه عليها دخلت للبيت إلي جنبها نلبس فيها و مديت يدي للتالون إلي معاها كملت لبستوا دوب خرجت عاونوني نسكرها كان لونها روج بوردو توا فهمت علاه قتلي لونها بش يطلع تحفه مع شعرك طويله و مسنتره من فوق مرصعه ناحية الصدر و ضهرها إلي كلوا عريان امه شعري كان مغطيه الكل ، هزيت روحي و خرجت خزرولي الزوز و تبسموا لبعضهم حتى أنا كي خزرت لروحي في المرايا ما كنتش بش نعرف إلي هاذي هي ماريا عندي برشا ما ريتش روحي لا في اللوك و لا في الشكل هذا قربت مني وحده فيهم بالكوفر الصغير متع بكري الشكل متاعوا كان مذخم و جذاب لأبعد حدود إلي خلاني نركز معاه
هي : هذا بش تحلوا انت
أنا : علاه ؟
هي : يظهرلي لازم تشوف إلي فيه وحدك
تبسمتلي و حطتوا في يدي حليتوا بشويا وين جات عيني على شكال كبير شويا على شكل فراشه ، مرصع بكعبات ألماس هزيتوا في يدي و ثبتت فيه منقوش عليه إسمي على جنب ترهوجت من شكلوا كانت فراشه مرسومه بدقه عاليه الفازه إلي ما توقعتهاش منوا جملااا تبسمت و أنا نتذكر في الكلمه
" فراشتي " حسيت بشعور غريب إجتاحني لدرجة سرحت بعيد فقت وقت هزتوا من يدي و ركحتوا فوق شعري خلات خصلات أخرين طايحين ضحكت و صفقت بيديها زوز تحكي
هي : إكتملت الصوره
قربت الثانيه مني و هزت دبوزه بارفان من فوق التابل رجعتها بيديا نحكي
أنا : لااا ، هات إلي في جنبها
ريتها كي قربت من الكوفر إلي جنبها و هزت
"عطر ورد الجوري " تبسمت و رشتلي منوا مع ٱخر اللمسات هزيت روحي قمت نخزر للمرايا مش مصدقه الشكل إلي طلعت بيه عديت يدي على رقبتي و منها لصدري عندي مده طويله ما شفتش روحي بكامل الأنوثه هاذي و لا خممت نعطي فرصه لماريا إنها تشوف جانب ٱخر منها ممكن لهالدرجه كان الماضي و مزال مسيطر عليا تعدا كلام ساندرا في مخي ، في نفس الوقت حسيت روحي توترت من شكلي و من فكرة إني بش نكون معاه هكا تذكرت الموقف إلي صار البارح نزلت على شفايفي و تبسمت دوب خرجوا قربت من الشباك هزيت الريدو شويا نخزر لحراسوا وقفوا محاوطين الكراهب و البلاصه الكل بطريقه غريبه في لحظه ريتوا كي نزل من الكرهبه دقات قلبي زادوا وقت هز عينوا يخزرلي منعرفش كيفاه حس بوجودي أصلا رجعت الريدو بزربه و وخرت خطوات إلتالي من دقات قلبي إلي حسيتها بش تخرج مع صوت الكعب متاعي وترني تلفت على صوت الباب و بعدها ساندرا إلي تبسمت و دخلت تحكي
ساندرا : حاضره ؟
• البنات يهمني برشا رأيكم و بالأخص توقعاتكم خليولي تعليقاتكم الكل نحب نقراهم 🤍🕯️
أنت تقرأ
نُـقطَـة اللّـقـاء 🦋
Roman d'amourحصريا 🚫🚫 : #نقطة_اللقاء 🕯️ " تتعدّد أسباب الجريمه لكن الحب أهمّ دافع " _ هناك مئة طريقه لأُريك كم أحبك لكنّـني إخترت الحَــرب ! 🌀 " .. حبِيبِــي وجـدتُ الهروب حلَّا .. لكن ! إلى أين ؟ هل إلى جُـدران ذاكرتي المظلِـمه أم إليك ؟ " _ بين ا...
