#من _كتر _خطابها_.....؟!!
مثل يتردد في كثير من البيوت المصرية م غير م اللي يردده يعمل حساب لعواقب الكلام دا ع نفس صاحبه المشكلة... اللي هي اصلا مش مشكلة
من كتر خطابها بارت 🤷🏻♀️
ايه يعني اللي فيها لو بنت اتقدملها اكتر من عريس ولان ولا واحد فيهم مناسب رفضتهم
المفروض يعني توافق خوفاً من التفكير العقيم للمجتمع اللي عايشه فيه ف تتجوز شخص مش مناسب وبعد كام شهر ولا كام سنة حتي ترجع بيت اهلها مطلقة
م هي كدا بردوا مش هتسلم من لسان نفس ذات المجتمع العقيم...
ف نصيحة لأي بنت اركني المجتمع دا ع جنب بتفكيره بآراءه بظنونه السيئه المتخلفة ومتتجوزيش مهما وصلتي بالعمر إلا من الشخص اللي تحسي فعلا انك مقتنعه بيه وبحسن ظنك لربنا هتوصلي لكدا
وقصتنا انهاردة بتأكد دا ❤️
🌸🌸🌸🌸🌸🌸🌸🌸
انا رضوي عمري 43سنه.. اتربيت في وسط اسره متحرره جدا من اللي بيطلقوا عليهم فئة ال اوبن مايند اهلي فعلا كانوا اوبن مايند في كل حاجه والدين مكانش ليه وجود ولا راي في بيتنا بالتالي مكانش في صلاه ولا حجاب وصوم رمضان كان بيبقي حسب المزاج
بس الاوبن مايند دا كان بيجي عند الجواز ويعطل!!
كان بدا يتقدملي ناس من وانا ف الجامعة كنت برفض مش بس علشان كنت شايفة نفسي صغيرة ع فكرة اني اكون مسؤله عن اسرة وبيت لا هو بردو كان بسبب ان مفيش حد اتقدملي واقتنعت بيه
لحد م خلصت جامعة وبدأ زن اهلي يزيد اني اوافق وانا كنت بتغر شويه في اني بردوا لسه صغيره كمان مفيش حد من اللي بيتقدموا قادرة إني احس بقبول ناحيته لحد م وصل عمري 27 سنه وهنا اهلي بداوا يتجننوا حرفيا زن زن زن اني اشتغل عشان اقابل ناس طيب انا مش عاوزة اشتغل ولا شايفه نفسي ف اي شغلانه خلاص يبقي مرواح للنادي كل يوم وحضور اي مناسبه فيها ناس من الاخر اهلي كانوا بيدللوا عليا قدام اي حد وبردوا مفيش فايده وبمجرد م وصلت سن ال 29 اتقدملي شخص مكنتش اتخيل عمري اني ممكن اوافق حتي اني اقعد مع واحد زيه وبنفس عقليته شخص بشع جداً كل حاجه فيه بشعه نظراته تفكيره طريقه كلامه بس كان اهلي خلاص فاض بيهم وكمان بصراحة انا كمان كنت خايفه من شبح سن التلاتين...
وافقت وبدات حياتي تتغير بس للاسف كان تغيير بشع وللاسوء الشخص دا كان ملتحي وانا غير محجبه ضاقت بيه الارض كلها انه يدور ع واحدة محجبه ورايح لواحدة بشعرها وبيفرض عليها الحجاب ومن بعده النقاب!!
كان بيفرض عليا حاجات كتير وبيتباهي قدام الناس ان هو اللي هداني ولبسني الحجاب
كان بيتعامل ع اني كافرة ودخلني الاسلام!
وانا اصلا ولا اي حاجه م اللي فرضها عليا عملتها وانا مقتنعة وكانت كلها بضغط م اهلي حتي انه فرض عليا اروح لمسجد معين احفظ فيه قرآن ودا طبعا عشان بردوا يكرر قدام الناس اللي يعرفهم فيه انه جامد جدا في الهدايه بس مكملتش مرتين ورفضت اروح المسجد دا تماماً واختارت مسجد تاني مكانش فارق هو اي مسجد المهم انه بعيد عن الشخص دا ومعارفه وشويه ومبقتش قادرة خلاص اكمل فاض بيا وتعبت انا مكنتش بروح المسجد دا احفظ قران انا كنت بروح افضل اعيط لحد م عيني تورم م كتر العياط ومبقاش قادرة افتحها ف ارجع البيت والصداع قاتلني ف انام م كتر التعب اخدت فترة ع الحال دا وتقوقعت ع نفسي واتمنيت جدا ان الشخص دا ياخد قرار الانفصال لاني مش هقدر اواجه اهلي لكن هو كان مش مستني مني اهتمام اصلا هو واخدني لغرض مختلف وبس...
لحد م في يوم وانا في المسجد بنت عندها حوالي 18سنه استئذنت انها تقعد معايا وبصراحه انا م صدقت حد قالي مالك وانفتحت في العياط وخرجت معاه كل اللي في قلبي مكنتش اعرف ان البنت اللي انا اكبر منها ب 10سنين ممكن يبقي ع ايديها صلاح حالي وقلبي وحياتي.!!
