- شروق: هنلتزم بضوابط الخطوبه ان شاء الله
- احمد: تطلع ايه ضوابط الخطوبه دي بقى
- ازاي حضرتك متعرفهاش ولا ايه ؟!
- مسمعتش عنها قبل كده، بتتكلم عن ايه ضوابط الخطوبه دي؟
(استغربت اوي من ردة فعله هو بجد لسه في ناس جاهله بالامور دي للاسف !!
- ضوابط الخطوبه يعني تغض بصرك مش معنى انك خطيبي تفضل مبحلق فيا طول الوقت، يعني انت غريب عني مش مِحرم ليا ف كلام حب وهئ ومئ مينفعش سواء كنا مع بعض او حتى ف الفون، كلمة هلبسك الدبله طب استني هظبط السلسله ممنوع فعلًا وقولًا طنط اللي هي مامتك تبقى تعمل كدا، اكيد مؤكد تأكيد هيقعد معانا مِحرم عشان ميحصلش خلوه يعني متجيش تقول عايز اقعد معاها لوحدنا او حد يجي يقول نسيب العرسان لوحدهم ونخلى لهم الجو عشان يبقوا على راحتهم واهو المصايب والبلاوي مبتحصلش غير من الكلام دا، هنخرج هيجي معانا مِحرم بردو ومش كل شويه خروجه هنتكلم نتكلم في حاجه مفيده مش اي كلام وخلاص، اعرف شخصيتك وتعرف شخصيتي بحدود وبضوابط الطرفين لازم يحافظوا عليها، مش كل شويه اسمع كلمة اتصوري وابعتي اصلك وحشاني عايز اشوفك طب لابسه ايه والكلام دا ممنوع، حفل الخطوبه مش واجب بس لو عملنا يبقى بحدود مفيش اختلاط ولا مزيكا انا مش هبدأ حياه جديده بذنب وعصيان لربنا، الخطوبه مش معموله عشان كل طرف يتجمل و يظهر أجمل ما فيه قدام الطرف التاني انا صريحه وانت صريح نتعامل بتلقائيه الدنيا هتمشي وتبقى فل ان شاء الله..انا مش بقولك كدا عشان تتعقد او تقول فين الخطوبه وفين الكلام اللي بسمعه الكلام اللي بتسمعه سواء من اخوك، قريبك او حتى صاحبك هيبقى حلو اوي في الحلال لما يكون ربنا مبارك فيه وراضي عنه لكن هيعصي ربنا وميبقاش فيه مُباركه يبقى انسى العيشه المرتاحه انسى ان قلبك يكون راضي وحاسس بالراحه (رفعت وشي من الارض عايزه المح تعبيرات وشه هل راضي بالكلام، مستغرب طب هيرفض ولا هيوافق..
- هو انت بتبصلي كدا ليه
- بسمعك
- خلصت
- احم كلامك حلو، انا اول مره اسمع عن الموضوع دا وبصراحه متلغبط ومش عارف احدد الاحساس اللي انا حاسه، استاذن انا وردي هيوصل باباكِ قريب ان شاء الله
- باستغراب: ايه دا الحال اتشقلب ولا ايه هو مش المفروض انا اللي هفكر والرد هيوصلك
- طالما اتكلمتي عن ضوابط الخطوبه ومرفضتيش من الاول ف اكيد قلبك مقفول عليه لسه ومحدش وصله ف مش فارق معاكي لكن انا حابب افكر بعد اللي قولتيه دا، يلا سلام
(بيتكلم بكل ثقه وهو لا يفقه شئ ايه الانسان الغريب دا !! وايه مش فارق معاكي دي كمان يعني هو عشان محافظه على قلبي للي يستاهله يبقى كدا مش فارق معايا ؟! حابب افكر بعد اللي قولتيه هو انا قلت ايه أصلًا انا مقولتش كل حاجه، يلا مش مهم هو دا اول واحد يعني..
" قاعدين قاعده عائليه جميله عند جدتي من اللي قلبك يحبها دي واذ فجأةً تتسأل سؤال من اللي قلبك مبيحبوش الا وهو؛ هنفرح بيكِ امتى؟ المشكله مبقتش عارفه ارد زمان كنت بقول لسه بدري دلوقت هقول ايه اكيد هيبقا نفس الرد مهو فعلًا لسه بدري وانا لسه صغيره بس المشكله ف ان موضوع طويل عريض هيتفتح نهايته يارب نشوفك عروسه قريب..طب ما كان من الاول ايه لازمة هتفضلي قاعده جمب امك خلاص عديتي ال 20 سنه يبقى هتعنسي وانا عندي 24 سنه يعني خلاص راحت عليا ايه الظولم دا!!
