#هتعجبكوو ✍️
قبل فرحي بإسبوع حصل معايا موقف غير لي كل حياتي وخلاني ألغي الفرح واتراجع !
يومها جدتي تعبت اوي ورحنا على المستشفى اول ما وصلت هناك لقيت جدي قاعد قدام باب غرفة العناية المركزة وبيعيط ... قعدت جنبه ولأول مرة في حياتي بشوفه بالشكل ده ... قلتله بتعيط يا جدو !
مسح دمعته وقالي جدتك تعبانة اوي ... بصيت في وشه وقلت له إن شاء الله حتطلع بالسلامة ادعيلها قالي جدتك حتة من قلبي من جوا.
انا طبعا استغربت يعني جدي شخص قوي جدا وحازم ومن جيل أيام زمان إلي كنت فاكرة انه مش رومانسى زينا ... حبيت أغير الجو وكده واخليه يتكلم قلتله يا جدو انت كنت تعرف بنات غير جدتى ؟
ضحك وقال : يووووه مليون بنت كانوا يحبوني عشان كنت شاب حليوة وغني .
ضحكت وقلتله بس يعني جدتي مش حلوة !
بص لى وقالي : جدتك روحها حلوة ... عيونها قصة لوحدهم ... عارفة يوم ما كنت عايز اتجوزها شفتها وهي مروحة كانت ماسكة اخواتها بايدها وعرقها على جبينها وبتبتسم ! ابتسامتها خلتني حبتها !
قلت له طيب اسألك سؤال : كم مرة اتخانقت انت وهي وازاي لحد النهارده بتحبوا بعض كده؟
قال: يوووووه ياما اتخنقنا بس ولا مرة مرجعناش صالحنا بعض حتى بعد العتاب .
هنا افتكرت خطيبي اللي كلامه وحش وبيعايرني بكل شيء ... وبشكلي انه مش عاجبه واني لازم اخس ١٠ كيلو وانى حساسة زيادة عن اللزوم وانى مدلعة و...... قائمة طويلة من الانتقادات !
الوقت ده الدكتو جه وجدي قام وقاله : طمني يادكتور الحالة ايه ؟
الكتور قاله :الحمد لله هي زي الفل دلوقتي!
تقدر تدخل تشوفها بس طبعا بس متطولش عليها ّ
دخلت معاه ودخل جدي زي الولد الصغير اللي متلهف يشوف مامته ... والأحلى من كده كانت نظرات جدتي له ... مافيش أصدق من كده نظرة حب في حياتي شفتها .
مسك إيدها وقالها كده يا حته من قلبى تتعبي وتسبيني لوحدي لأول مرة في حياتي !
ضحكت جدتي وقالتله : ما انت سبتني برضه يوم عمليتك !
قالها يعني كه خلاص اخذتي بتارك .
شدت على أيده وقالتله لا مش حسيبك ابدا مرة تانية .
انا طول الوقت وانا مستغربة ازاي علاقة عمرها تقريبا ٤٠ سنة ولسه بالقوة والحب ده ! برغم كل الظروف الصعبة الي مروا بها .
في الوقت ده اتصل خطيبي كان متعصب لاني مش برد عليه من الصبح ... واول ما فتحت الخط قالي انتي فين من الصبح مش بتردى عليا ليه وزعق واهاننى !
انا في العادة كنت بطنش لأنه حبيبي قبل ما يكون خطيبى ... بس افتكرت جدي وهو بيحكيلي عن الإحترام والمودة والرحمة اللي هما أهم شيء ازاي حكالي انه علاقتهم استمرت بسببهم ... قلت له : من فضلك متزعقش ميصحش تقولى كلام زى ده حتى لو هزار !
رد وقال : من امتى وانت بيفرق معاكى ولا بتزعلى من يوم ما عرفتك ودى طريقتى معاكى وعمرك ما اعترضتى ؟
انا بعد الكلام ده اتعصبت زيادة وقفلت الخط ..
طبعا خلال ١٠ دقايق كان باعت ١٠٠ رسالة وكلهم بهدله وكلام وحش يعني حتى مهديش وراجع نفسه بالعكس زاد من عنفه !
الوقت ده سرحت فى جدي اللي ماسك ايد جدتي وهي نايمة وبيحسس على راسها وبببوس ايدها وقاعد تحت رجليها .
طلعت من عندهم والدموع في عيوني ... وبقول في سري ايه هو الحب ؟
هو بجد كلمة بحبك اللي بيقولها ليا خطيبي مع إن تصرفاته معايا لا تدل نهائيا على الحب ... ولا الحب نظرة جدي لجدتي
وخوفه وقلقه عليها وحبه واحترامه لها ... وازاي قضوا العمر كله مع بعض في مودة ورحمة!
وصلت البيت ولسه خطيبي بيبعت مسجات كلام وحش ... نمت وصحيت الصبح وقلت لهم انا مش عايزة اكمل معاه ... الكل اتصدم ... والكل عارضني ... بس في النهاية انا اخدت قراري ومش هتراجع !
فسخت الخطبة وحسيت انه احسن قرار اخدته في حياتي .. بعد كدة ربنا وفقنى واتزوجت انسان محترم وحنين
. النهارده وانا قاعدة مع زوجى جت بنتي بتقولي ماما انا بحبك !
قلت لها ايه في ايه؟
قالت لي بابا دايما بيحكيلي إنه بيحبك لأنك طيبة وحنينة وعلشان كده انا كمان بحبك !
عرفت يعني ايه مودة ورحمة ... يعني اتجوزي اللي قلبه طيب وحنين و بيروق بسرعة ... اللي عايزة اولادك يكون ابوهم قدوة لهم بكل تصرفاته ! اللي مش حتخافي من ابوهم انه يتمادي في الزعل والخصام ... اللى هيخاف عليكى ويحترمك ويعزك ويصونك .♥
