الأشيب

Part 25

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

روح مُتعبة .. أجفان ثقيلة ، التعب هاد ثلثين حيلي، رجعت الأصوات تكدست براسي وشوية شوية تصفى ويبقى صوت واحد كنت أتمنى أموت ولا أرجع أسمعة
عُثمان: كافي تدلليّن عليَّ مورفو أكعـــــدي

خنگني وشوفني الموت وعند أخر لحظة تركني وفقدت وعيّ بسبب قلة الأوكسجين ويكلي دا تدلليّن.! أي مفهوم فاهم عن الدلال؟ بُقيت مغمضة عيوني وأني أسمعة يتوسل بيه أحجي وياه بس ما نطقت ولا حَرف ، ما تجاوبت إلا مِـنْ حسيت أيدة مسدت على شعري دفعتها بقوة عني وباوعتلة خازرتة
مورفو: أيدك عني كافــــــي قرف
- أبتسم لأن صحيت وهز راسة متأسف
عُثمان: أسف أسف بس خايف عليج ، شلون صرتي؟

رُفعت جسدي ساندة ظهري على الحايط ولملمت نفسي
مورفو: وإلك عين تسأل شلون صرتي؟ صرت أشُك بعقليتي مِـنْ أشرف تصرفاتك أكول معقولة الخلل مني؟
عُثمان: ليش شسويت أني؟
مورفو: ما سويت شي بس حبيت تتشاقة وياية وخنگتني شوفتني الموت ورجعتني لحياتي التعيسة

دنك راسة وبقى مكابلني وكاعد لا باوعلي ولا حجة شي وكأنُ طفل صغير أُمة معاقبتة ، كنت مشمئزة منه وكارهتة لدرجة لا توصف .. أخــــذت نفس عميق وأيدي أتحسست رقبتي الليّ توجعني حتى مع النفس ، مِـنْ جهة راسي وهسة رقبتي.. تكلمت بدون مــا أباوعلة متجنبة أشوف وجهة
مورفو: أطلـــع ما أريد أشوفك
عُثمان: بـس أنتِ ....
- قاطعتة بسُرعة بقصد أقهره مثل ما حارگ كلبي
مورفو: راح أكول للأشيب على الليّ سويتة وأخلي يكسر أيدك ، وحتى ظهرك لأن وعدني يكسر ظهر الليّ يتقربلي عكسك تماماً ما تكدر غير على أذيتي

خليت عيني بعينه أشوف كمية الغضب والقهر الليّ أجتاحهن بهذهِ اللحظة بس سكت وكأنُ ما سمع شي
عُثمان: لازم تاكلين مورفو وجهج شاحب
مورفو: ما يورد إلا بشوفة وجه أشيبي